நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 09

 

வைரமுடி யாத்திரை – ஹொசஹொலாலு, மாண்ட்யா – பகுதி 9

 ஹொசஹொலாலு என்ற இடம், மாண்ட்யா மாவட்டத்தில் உள்ளது. இங்கு பொது ஆண்டு 1250ல் கட்டப்பட்ட லக்ஷ்மிநாராயணர் கோவில் உள்ளது. இது எப்போது கட்டப்பட்டது என்பதற்கு சரியான ஆதாரம் இல்லை. இருந்தாலும் இது ஹொய்சாளர்கள் கட்டிட பாணியில் இருப்பதால் 13ம் நூற்றாண்டு என்று சொல்லப்படுகிறது. அதற்கு முற்பட்டதாகவும் இருக்கலாம். இது தொல்லியல் துறையின் கீழ் வரும் கோவில். இந்தக் கோவிலின் சிறப்பு, நகைகளில் வேலை செய்திருப்பதைப் போன்று, கோவிலின் உள்ளும் புறமும் இழைத்திருக்கிறார்கள். ஹொய்சாளர்களின் காலம் 1050-1300 என்று சொல்கின்றனர். அந்தக் காலத்தில் அவர்களின் சிற்பத் திறமைகளுடன் கூடிய கோவில்கள் (ஹொய்சாள கட்டிடக்கலை) என்று பேளூர், ஹளபேடு மற்றும் ச்ருங்கேரியில் உள்ள கோவில்கள் என்கிறார்கள். ஹொசஹொலாலு லக்ஷ்மி நாராயணர் கோவிலைப் பார்த்த நான், இதற்கே இவ்வளவு மயங்கிவிட்டால், மற்ற மூன்று இடங்களில் உள்ள கோவில்களும் எப்படி இருக்கும்? என்று யோசித்தேன். நிச்சயம் அந்த மூன்று இடங்களுக்கும் வரும் காலங்களில் சென்று புகைப்படங்களையும் அனுபவத்தையும் பகிர்ந்துகொள்வேன்.

இந்தக் கோவிலைக் கட்டியது, வீர சோமேஸ்வரா என்ற ஹொய்சாள மன்னன் (1250). கிழக்கு நோக்கிய கோவிலில், மூன்று பிரதான சந்நிதிகள் இருப்பதால், த்ரிகூட விமான அமைப்பு என்று சொல்லப்படுகிறது. இடது பக்கம் ஸ்ரீவேணுகோபாலர் சந்நிதி, வலது பக்கம் லக்ஷ்மி நரசிம்மர் சந்நிதி, நடுவில் கிழக்கு நோக்கி நாராயணர் சந்நிதி உள்ளது. ஸ்ரீவேணுகோபாலர் மற்றும் நரசிம்மர் சந்நிதிகள், ரங்க மண்டபம் என்று சொல்லப்படும் முன் மண்டபத்தோடு இணைகின்றன.  கோவிலை, சுமார் 1 ½  மீட்டர் உயரமுள்ள கல் மேடையில் அமைத்திருக்கின்றனர். கோவிலைச் சுற்றி, கல் மேடையிலேயே வலம் வரும்படியாக இடம் விட்டுக் கட்டியிருக்கின்றனர். இந்தக் கல் மேடையின் நான்மு புறங்களிலும் யானைச் சிற்பங்கள் உள்ளன. ஏறுவதற்கு படிகள் அமைப்பு கிடையாது.

 

கோவில் பகுதி, ஆறு பட்டைகள் கொண்ட பகுதி, அதன் மேல் விதானம் என்று அமைந்துள்ளது. இதைச் செய்வதற்கு Soap Stone எனப்படும் கற்களை உபயோகித்திருக்கிறார்கள். ஆனால் அந்தக் கற்களே, இழைத்து இழைத்து கருங்கல் போன்று ரங்க மண்டபத்தில் இருக்கிறது. கோவில் வெளிப்புறத்தில் நூற்றுக்கும் மேற்பட்ட சிற்பங்கள் இருக்கின்றனவாம். அதில் பெரும்பகுதி, வைணவத்தைச் சார்ந்த சிற்பங்கள். சைவம், சாக்தம் சார்ந்த சில சிற்பங்களும் இருக்கின்றன.

 

கோவில் மண்டபத்தில் நாராயணர் சந்நிதிக்கு இருபுறமும், பிள்ளையார் மற்றும் மஹிஷாசுர மர்த்தினி சந்நிதிகள் மிகச் சிறிய அளவில் இருக்கின்றன.

 

ஆறு பட்டைகள் (வரிசைகள்) கொண்ட வெளிப்புறத்தில், மேலிருந்து கீழாக, அன்ன வரிசை, புராணத்தில் வரும் மகர வரிசை,  இராமாயண மஹாபாரத, பாகவத புராண நிகழ்ச்சிகளைச் சிற்பங்களில் சொல்லும் வரிசை, அழகிய இலைகள் கொண்ட வரிசை, குதிரைகளின் வரிசை மற்றும் கடைசியாக யானைகளின் வரிசைகளைக் கொண்டுள்ளது.  இந்த வரிசைகள் ½ அடிக்கும் குறைவான உயரம் கொண்டவை.

 

ஒவ்வொரு சந்நிதியின் முகப்புப் பகுதியிலும் (நுழைவாயிலின் மேற்புறப் பகுதி), உள்ளே இருக்கும் இறைவனின் சிறிய சிற்பம் உள்ளது.  

 

கோவிலின் வெளிப்புறத்தைப் பார்த்த பிறகு கோவிலின் உட்புறத்தைக் காணலாம் என்று தோன்றியது. நான் முதலில் (முழுக் கூட்டமும் கோவிலுக்குள் வருவதற்கு முன்பு) கோவிலுக்குள் சென்று இறை தரிசனம் பெற்று, தீர்த்தம் வாங்கிக்கொண்டேன் (அப்போதான் படங்கள் எடுக்க எனக்கு நேரம் கிடைக்கும்.) சென்ற வருடம் போயிருந்தபோது கோவிலின் உள்ளே நிறைய நேரம் செலவழித்தேன், சிற்பங்களை மற்றும் சந்நிதிகளைப் பார்ப்பதில். பிறகு வெளியே வந்து கோவிலைப் பிரதட்சணம் செய்யலாம் என்று நினைத்தபோதுதான் வெளிப்புறச் சிற்பங்களின் சிறப்பு எனக்குப் புலப்பட்ட து. நிறைய நேரம் கிடைக்காததால், 20-30 படங்கள் எடுத்திருந்தாலே அதிகம். இந்த முறை, யாத்திரை நடத்துபவரிடம் என் ஆசையை முன்பே கூறியிருந்ததால், நீங்கள் முழுவதுமாக படங்கள் எடுத்த பிறகு வந்தால் போதும், நான் காத்திருப்பேன் என்று சொல்லியிருந்தார். அதனால் வேண்டிய அளவு புகைப்படங்கள் இந்த முறை என்னால் எடுக்க முடிந்தது. இதை எழுதும்போது அவருக்கு மனதால் நன்றி சொல்லிக்கொள்கிறேன்.

கோவிலின் முகப்பு. நுழைவாயிலைக் கடந்ததும் த்வஜஸ்தம்பம், பிறகு கோவில். மிகச் சாதாரணம் தோற்றம். இதனைப் பார்த்துத்தான் சென்ற முறை (2022 மார்ச்) நான் கோவிலின் உள்ளேயே இருந்தேனே தவிர, வெளியில் வந்து கோபுரம் பார்ப்போம் என்றெல்லாம் தோன்றவில்லை. கோவிலின் எதிரே நீண்ட வீதி. முன் காலத்தில் பிராமணர்கள் குடியிருக்கும் இடமாக (அக்ரஹாரா என்று சொல்கின்றனர்) இருந்திருக்கும். நாங்கள் சென்றது மதியம் என்பதால் அதையெல்லாம் முழுமையாக கவனிக்க எனக்கு நேரமில்லாது போனது.

முழுமையான விமானம், கருவறைக்கு மேல் அமைந்துள்ளது. ஆனால் கீழிருந்து பார்த்தால் முழுமையாகத் தெரியாதபடி. நல்ல ஓவியர் வண்ணம் தீட்டியதுபோல மிக அழகாகச் செதுக்கப்பட்டுள்ள சிறிய சிற்பங்கள்.

 

கருங்கல் தளத்துக்கு மேல் கோவில் அமைப்பு. தளத்தில் வியக்கும்படியான எந்தச் சிற்பமும் இல்லை. படிப்படியாக அமைக்கப்பட்டுள்ள தள அமைப்புதான். யானையின் சிற்பம்கூட சாதாரணமாகத்தான் உள்ளது.

எனக்கு மிகுந்த ஆச்சர்யத்தை உண்டுபண்ணியது, தரைத்தளத்திலிருந்து முதல் வரிசையில் யானைச் சிற்பங்கள், அடுத்த வரிசையில் குதிரைச் சிற்பங்கள் (பலவித pose/நிலைகளில்) எப்படிச் செதுக்கியிருப்பார்கள்? புடவை நெய்வதுபோல இருந்தன.

அடித்தளத்திலிருந்து இருக்கும் 6 பட்டைப் பகுதி (கீழே யானையிலிருந்து ஆரம்பித்து 6வது பகுதியாக ஹம்ஸத்தில் முடியும்)

கோவிலின் வெளிப் ப்ராகாரத்தில் உள்ள சிற்பங்களை அடுத்த வாரம் காணலாம். அதன் பிறகு கோவிலின் உள்ளே நுழையலாம். கோவில் பகுதியாக எழுதிவிட்டு, பெருமாள் படம் இல்லாமலிருக்கலாமா? அதற்காக, கோவிலின் ஸ்ரீவேணுகோபாலர் படம்.

ஸ்ரீவேணுகோபாலர் – ஹொசஹொலாலு கோவில்.

( தொடரும்)