புதன் 200325 : கற்றல் சிறப்பா? கற்பித்தல் சிறப்பா ?

     
ஏஞ்சல் :

1, கற்றல் சிறப்பா?  கற்பித்தல் சிறப்பா ?


$ ஒன்றில்லாமல் மற்றொன்று இருப்பதற்கு வாய்ப்பில்லை.

# இரண்டுமே சிறப்பு . கற்றல் நமக்கு நன்று. கற்பித்தல் சமூக நலனுக்கு நல்லது. 

& கற்பவர்கள், கசடறக் கற்று, கற்றதை மற்றவருக்கும் கற்பித்தல் சிறப்பு. 

                   

2, தலையாட்டுதலுக்கும் ஜால்ராவுக்கும் வித்யாசம் இருக்கா ?

$ நிறைய. ஒன்று வெறும் ரசனையாக இருக்கலாம். மற்றதில் பங்களிப்பு இருக்கிறது.

# இருக்கிறது.  ஜால்ரா பலன் கருதிச் செய்வது. 

3, இதை செய்தா சந்தோஷமும் மனநிம்மதியும் கிடைக்கும்னு தெரிஞ்சும் பலர் அதை செய்யாமலிருப்பதேன் ?

$ சோம்பேறி?

# அவநம்பிக்கை ?

& // இதை செய்தா //  எதை? 

4, நீங்கள் முதல் கேள்வியை படிச்சிட்டு அடுத்த கேள்விக்கு தாவுபவரா அல்லது ஆர்வக்கோளாறில் கடைசி கேள்வி என்னவா இருக்கும்னு அங்கே செல்பவரா ?

 $ இல்லை.

# வரிசையை மீறிச் செல்ல மாட்டேன்.  

& சற்று விளக்கமான பதில் சொல்கிறேன். 
எங்கள் அலுவலக (communication workshop) பயிற்சி வகுப்பில் நடந்த ஒரு நிகழ்வை சொல்கிறேன். 
பயிற்சி வகுப்பில் இருபது பேர். 
பத்து நிமிட பயிற்சி. 
யாரும் பேசக்கூடாது, ஒருவரோடொருவர் கலந்தாலோசிக்கக்கூடாது என்று சொன்னார்கள்.
ஒவ்வொருவரிடமும் அச்சடிக்கப்பட்ட ஒரு தாள் கொடுத்தார்கள். 
எல்லோரும் படித்தார்கள். 
இருபது குறிப்புகள்.  

1. நீங்கள் இதை முழுவதுமாகப் படித்து முடிக்கும் வரையில் வேறு எந்த செயலையும் செய்யவேண்டாம். 
2. எந்தப் பகுதியில் வேலை செய்கிறீர்கள்? 
3.  இந்தத் தாளின் வலதுபக்க மேல் மூலையில் உங்கள் பெயரை எழுதவும்.
4. இந்த சோதனையில் நீங்கள்தான் வெற்றியாளர் என்றால், ஒருமுறை உங்கள் பெயரை உரக்கக் கூறுங்கள். 
5. மேலே எழுதப்பட்டிருக்கும் உங்கள் பெயரைச் சுற்றி பேனாவால் ஒரு வட்டமிடவும். 
6. ஏதேனும் ஒரு பக்கத்தில் இருப்பவரை செல்லமாக ஒரு தட்டு தட்டுங்கள். 
7. நானே ராஜா என்று சொல்லுங்கள். 
8.  சமீபத்தில் நீங்கள் படித்த ஜோக்கை நினைவுபடுத்திக்கொண்டு வாய் விட்டு சிரியுங்கள். 

............ இப்படி முதல் பதினெட்டு பாயிண்டுகள் இருந்தன. 
.
.

19. இந்தப் பயிற்சித்தாளில் உள்ளவைகளில், மூன்றாவதையும், ஐந்தாவதையும் மட்டும் செய்யுங்கள். 

20. பத்தொன்பதாவது பாயிண்டில்  சொல்லியுள்ளவைகளை செய்து முடித்தவர்கள் கைகட்டி உட்கார்ந்து, மற்றவர்களை வேடிக்கை பாருங்கள். 

முதல் மூன்று நான்கு நிமிடங்களுக்கு எல்லோரும் மௌனமாகப் படித்துக்கொண்டிருந்தார்கள். விற்பனைப்பிரிவு இளரத்தம் ஒன்று முதலில் தன் பெயரை உரக்கக்கூறி, பேனாவை எடுத்து தாளில் ஒரு வட்டம் போட்டார். அவ்வளவுதான், எல்லோரும் ஒவ்வொருவராக பெயரைக் கூறுவது, வட்டம் போடுவது, சிரிப்பது, அடிப்பது என்று பொளந்து கட்டிட்டாங்க. இருபது பேரில் மூன்று பேர் மட்டும் இவை எதையும் செய்யாமல், புன்னகையுடன் பார்த்துக்கொண்டிருந்தார்கள். 
நான் எல்லாக் கேள்விகளையும் வரிசைக்கிரமமாக படிப்பவன். 

 5, ஒருவர்  செய்யும் விஷயங்களில் அவருக்கு  திருப்தி ஏற்படுவது முக்கியமா ? அல்லது அவரை சுற்றியுள்ளவர்களை அது திருப்திப்படுத்தணுமா ? (மனநல சம்பந்தப்பட்டது :)

$ முதல்வர் எளிதில் திருப்தி அடையக்கூடும். சுற்றியுள்ளவரைத் திருப்திப் படுத்த நினைப்பவர்களுக்கு சுற்றம் கூடும். நேரம் குறையும்.

 # நமக்கு உண்மையான திருப்தி தரும் செயல், அடுத்தவரையும் திருப்திப் படுத்தும். 

6, போதும் என்ற மனம் கிடைக்க என்ன செய்யணும் ?

$ போதுமான அளவு எல்லாவற்றையும் சம்பாதிக்க வேண்டும்.
              

# பேராசையை அறிந்து அடையாளம் கண்டு விலக்க வேண்டும். 

& கிடைத்தது போதும் / அல்லது அதுவே அதிகம் என்ற எண்ணம் இருந்தால் போதும். 

7,  நம்மை நடிப்பால் மகிழ்விக்கும் நடிகர்களை/நடிகையர்களை  திரையில் ரசிக்கிறோம் ஆனால் அவர்கள் பொதுவாழ்வில் அரசியலுக்கு வருகிறேன் என்றதும் மனதின் மூலையில் எதற்கு என்ற கேள்வி உதிப்பது ஏன் . ??? நமக்கு பிடிச்சவங்கதானே என்னும் எண்ணம் இதில் உடைபட்டுவிடுவதேன் ?

$ உங்களை இப்படி அடையாளம் காட்டிக் கொள்கிறீர்கள்.

# டிரைவர் ஓட்ட வேண்டும். குக் சமைக்க வேண்டும். ரோல் மாறினால் பிடிக்காதுதானே. 

& நடிகர்களும் சமுதாயத்தின் ஓர் அங்கம்தான். அவர்களுடைய பாபுலாரிடியை மக்கள் ஆதரவாக மாற்றி, வோட்டு பெறமுடியுமா என்று அவர்கள் பார்ப்பதில் தவறு இல்லை. ஜெயித்தபின், என்ன செய்கிறார்கள், எப்படி நடந்துகொள்கிறார்கள் என்பதில்தான் இருக்கின்றது மீதி எல்லாம். நான் அதிகம் எதிர்பார்த்து ஏமாந்தது விஜயகாந்தின் அரசியல் எழுச்சியும், வீழ்ச்சியும். 

8,  அதிகாரம்  பதவி, முக்கியபொறுப்பு இவை ஒருவரின் குணநலன்களை மாற்றிவிடுமா ?

$ குண நலன்கள் மாறி விட்டதாக மற்றோர் கருத வாய்ப்புண்டு.

# மாற்றாமல் இருந்தால் அதிசயம். 

9,  முந்திக்காலத்தில் சீப்பு பிரஷ் இல்லாத காலத்தில் எப்படி தலை வாரி இருப்பாங்க ?

$ கையால் ஒதுக்கிக் கொண்டிருப்பார்கள்.

# எண்ணெய் பூசி சேர்த்து வைத்து  முடிபோட்டு வைத்திருப்பார்கள்.

& 

 

சீப்பு கண்டுபிடிக்கப் படுமுன்பு ... 






10,  நமது வாழ்நாள்  100 வயது என்பதற்குப்பதில் 300 ஆகிட்டா என்னாகும்?

$ 300 ஆண்டுகள் ஆனதும் 60 வயது வரை கல்லூரியில் படிக்க வேண்டியிருக்கும். சொந்தக்காலில் துணையுடன் நடக்க முடியாத காலம் அதிகரிக்கலாம்.இன்னும் எவ்வளவோ..

# போர் அடித்துப் போகும்.

& அந்தக் கால கட்டத்தில் பேப்பர் இருக்காது. பெர்சனல் டிவி ஆளுக்கு ஒன்று இருக்கும். இ.கு.ம எண் A2KZG545.1952 அவர்கள் தன்னுடைய இருநூற்று ஐந்தாவது வயதில் அகால மரணம் அடைந்தார் என்று ஒரு இருநூற்றுத் தொண்ணூறு வயது ஆசாமி அறிவித்தால் பார்க்கின்ற பல்லுபோன கிழங்கள் எல்லாம் கண்ணீர் விடுவார்களா? 

11. பணம்  கொடுக்கும்போது 101 ,1001,501 என்று ஒரு ரூபாய் சேர்த்து ஒன்றாம் இலக்கத்தில் தரக்காரணம் என்ன ?

$ 10 க்குப் பிறகு கேள்விகள் இல்லையோ என்று பார்த்தால்....
101,1001 எல்லாம் தொடரப்படாமல் limit செய்ய ஒரு உத்தி.

 # "0" க்கு சூனியம் என்ற பெயர் உண்டு. மொய்யில் அதிகமாக சூன்யம் வைக்கக் கூடாது.

& முதலில் மொய் வைத்தவர், கவரின் மீது எழுதிய Rs 10/ - என்பதை 101 என்று நினைத்து ஒவ்வொருவரும் நூற்று ஒன்று ரூபாய் கொடுத்தார்களாம். அப்புறம் எல்லோருமே சரிதான், 51, 101, 501, ..... என்றுதான் கொடுக்கவேண்டும் என்று நினைத்துவிட்டார்களாம்! 

12, கலை ஐ மீன் ஆர்ட் மனதுக்கு உற்சாகமூட்டுமா ? கலையென்ற பெயரில் சில கொலைகள் நிகழ்வது எரிச்சலூட்டுவதால் எழுந்த கேள்வி இது .

$ ஆம், கொலையாக உள்ளது கலையாக மட்டுமே இருந்தால்.

# மகிழ்ச்சி சிலிர்ப்பு தருவதுதான் உண்மையான கலைக்கு அடையாளம்.

& மூட்டும். 

13, சடங்குகள் சம்பிரதாயங்கள்  மன அமைதியை தந்திருக்கா ?உங்கள் அனுபவங்களை பகிரவும்.    (நான்  சடங்கு எனக்குறிப்பது எப்பவும் வீட்டை விட்டு வெளியே கால் வைக்குமுன் ப்ரே செஞ்சுட்டுதான் வெளியேறுவேன் அதுமாதிரி )

$ அவ்வப்போது மாறும். 

# எனக்கு அந்த மாதிரி சடங்குகளில் நம்பிக்கை இல்லை.

& நான் மட்டும் தனியாக இருந்தால், சாஸ்திரம், சம்பிரதாயம், சடங்கு என்பதெல்லாம் சௌகரியம்போல செய்வேன் / செய்யாமல் இருப்பேன். ஆனால் என் கூட இருப்பவர் என்னுடைய திருமதியோ அல்லது வயதில் பெரியவர்களாகவோ  இருந்து, அவர்கள் சா, ச, இவற்றை வற்புறுத்தினால், அவர்களுக்காக செய்வதுண்டு. 

14, மந்திர சிந்தனையில் உங்களுக்கு நம்பிக்கையுண்டா ?? உங்களுக்கு எதெல்லாம் மந்திர சிந்தனை  என தோன்றும் ? இது ஒரு அளவுடன் இருப்பது நல்லதா ?

# மந்திர சிந்தனை என்ன என்றே புரியவில்லை.  ஜபத்தில் எனக்கு நம்பிக்கை இல்லை. 

& தியானமா? சில சமயங்களில் தியானம் மன அமைதியைக் கொடுத்துள்ளது. 

15, நீதி கிடைப்பது பழிக்குப்பழி இரண்டுக்கும் வித்தியாசம் இருக்கா ?

$ அவரவர் மன நிலையால் மாறுபடும்.

 # இரண்டும் ஒன்றல்ல. சில சமயம் அநீதிக்குப் பரிகாரம் / நஷ்ட ஈடு தேவையானதாக இருக்கும். 

& நீதி =  slow process.  அறிவுபூர்வமானது. தவறுகள் நடக்க சந்தர்ப்பம் குறைவு.    பழிக்குப்பழி = quick process. உணர்வுபூர்வமான எதிர் வினை. தவறுகள் நடக்க சந்தர்ப்பங்கள் அதிகம். 

வல்லிசிம்ஹன் :

1, கிழமைகளில் நம்பிக்கை,  அவநம்பிக்கை உண்டா?

 $ செவ்வாய்க்கிழமை சந்தை கூடும் என்றால் புதன் கிழமை போகலாகுமா? பொது வாழ்க்கையில் இருக்கும் நடைமுறைகளை மாற்றாத வரை கிழமைகள் நம் நடவடிக்கைகளை கட்டுப்படுத்துவதில்லை.
ஆகையால் நம்பிக்கை அவநம்பிக்கை என்ற கேள்விக்கு இடமில்லை.

 # கிடையாது. 

& ஏதோ கொஞ்சம் உண்டு. 

2, என்னைப் பொறுத்த வரையில் புதன் மேல் ஒரு பயம் உண்டு.
அனேக நெகடிவ் விஷயங்களைக் கண்டதனால்.....

$ 3 blade razor வருவதற்கு முன் சுமார் 60 வருடங்களுக்கு முன் பள்ளி ஆசிரியர்கள் சில குறிப்பிட்ட நாட்களில் கோபம் கொள்வதைப் பார்த்திருக்கிறோம்.

& எனக்கு புதன் கிழமைகள்தான் நல்ல பொழுதுபோக்கு! 

அதிரா :

கெள அண்ணன் என் கொஸ்ஸனையும் நோட் பண்ணிக்கோங்க.. இது ஒன்றுதானே என கைதவற விட்டிடாதீங்கோ கர்ர்ர்ர்:))..

1. கில்லர்ஜியின் போஸ்ட் பார்த்ததும், எனக்குள் எழுந்த கேள்வி இது.. ஒரு பேய்க்கு, இன்னொரு பேயைத் தெரியுமோ? அதாவது கண்ணுக்கு தெரியுமோ? அவர்கள் ஒற்றுமையாக இருப்பினமோ? பேசிக்கொள்வார்களோ? பயப்பட மாட்டினமோ?:)).

$ அப்போ என்னை எல்லோரும் பேய், பிசாசு என்று சொன்னதெல்லாம் பொய்தானா?

 # கொஞ்ச நாளைக்கு பேய்களை நிம்மதியாக அலைய விடுங்கள். 

& பேய் அறியும் பேயின் கால். பேய்கள் ஒற்றுமையாக இருந்தால்தான் மனிதன் பயப்படுவான். ஒரு பேய்க்கும் இன்னொன்றுக்கும் சண்டை என்றால், மனிதன் அதில் ஏதாவது ஒன்றின் கட்சியில் சேர்ந்து, இன்னொரு பேயை கவிழ்க்க முயல்வான்! 

2. தண்ணி மட்டும் குடிச்சே ஒருவரால் பல நாட்கள் இருக்க முடியுமோ?

$ முடியும். வெகு என்பது எவ்வளவு நாள்? 3 வாரம்?

# சில நாட்கள் இருக்கலாம்.

& யார் அந்த ஒருவர்? 

நெல்லைத்தமிழன் : 

கேள்வி 3. ஒரே கேள்வி என்று சொல்லிவிட்டு ரெண்டு கேள்வி கேட்கிறவங்க, கணக்கில் A வாவது (டி அல்ல) வாங்கியிருக்க வாய்ப்பு உண்டா?

# "ஒரு விஷயம்" என்று பலதையும் சொல்வது இயல்பானதுதான். அது பெரிய தவறு என்று நினைப்பதுதான் ஆராய்ச்சிக்குரியது.  

& ஹா ஹா ! கணக்குல, தமிழ்ல எல்லாத்துலேயும் D+ வாங்கினவங்க அவங்க! கராத்தேயிலும் ஏதாவது பெல்ட் வாங்கியிருப்பாங்களோ! வாங்க ஓடிடலாம்! 

பானுமதி வெங்கடேஸ்வரன் :


குழந்தைகள் எப்போது உங்களை கவர்கிறார்கள்?
a. ) படிப்பில் சிறப்பாக விளங்கும் பொழுது
b.)  பாட்டு,படிப்பு,நடனம்,பேச்சு என்று extra curricular activitiesகளில் தூள் கிளப்பும் பொழுதா?
c.)  விஷமம் செய்யும் பொழுதா?
d.)  அவர்கள் சகாக்களோடு விளையாடும் பொழுதா?

# குழந்தைகள் எப்போதும் கவர்கிறார்கள்.  அதிகபட்சமாக விளையாடும் போது. ஆனால் இதெல்லாம் நபருக்கு நபர் வேறுபடும். 

& கள்ளமில்லா சிரிப்பாலும், வெளிப்படையான பேச்சாலும். 

தந்திரம், சாமர்த்தியம் என்ன வித்தியாசம்?
               
# எனக்கு வேறுபாடு தெரியவில்லை. பேச்சளவில் பார்க்கும்போது தந்திரம் என்பதில் ஒரு அத்துமீறல் அல்லது துடுக்குத்தனம் இருக்குமோ என்று தோன்றுகிறது.


$ தந்திரம்=cunning
சாமர்த்தியம்=clever
எனலாம்.

& 

தந்திரம் : " காக்கா காக்கா, நீ இம்புட்டு அழகா இருக்கியே, ஒரு பாட்டு பாடேன் "

சாமர்த்தியம் :  (வடையைத் தின்று முடித்துவிட்டு ) " கா, கா , கா ..... ஆகாரம் உண்ண எல்லோரும் ஒன்றாக  அன்போடு ஓடிவாங்க ... " 

சீர்காழி கோவிந்தராஜன் குரலில் காதல் பாட்டையும், எஸ்.பி.பி. குரலில் பக்திப் பாடலையும் ரசித்திருக்கிறீர்களா?

# இதற்கு என்னிடம் விடை இல்லை. என் ரசனைப் பட்டியலில் மெல்லிசைக்கு சொற்ப இடம்.

& ஓ ! ரசித்ததுண்டு. 'அமுதும் தேனும் எதற்கு '  ' அருணாச்சலனே ஈசனே'

நெல்லைத் தமிழன்: 

1. தவறு செய்தவன் அதிலும் கொடிய தவறு செய்தவன் என்று தெரிந்தும் நீதிக்கெதிரான வாதங்கள் வைக்கும் வக்கீல்கள், சமுதாயக் குற்றங்கள் பெருக முதல் காரணம் என்று சொல்ல முடியுமா?  

 # வக்கீல்களின் உத்யோக தர்மம் கட்சிக்காரரின் நலன் சட்டத்தை சரியாக பயன்படுத்தாததால் பாதிப்படையாமல் பார்த்துக் கொள்வது. உத்யோக லட்சியம் நிறைய சம்பாதிப்பது. உத்யோக லாபம் கேஸில் வெற்றி பெறுவது.  தொழில் நேர்மையற்ற வக்கீல், நீதி"யரசர்", டாக்டர், போலீஸ்காரர் முதலிய யாரானாலும் சமூகத்துக்கும் தனிநபருக்கும் பெரும் தீங்குதான். 

2.  பாலியல் பலாத்கார குற்றங்களில், சிறார் என்று சொல்லி ஒரு கயவனை விடுதலை செய்வது, சிறார்கள் பாலியல் குற்றங்கள் செய்ய அரசு அனுமதிக்கிறது என்பதைப் போலல்லவா இருக்கிறது. இதில் சாமானியனுக்கு என்ன நீதி கிடைக்கும்?   

# சட்டம் அறியாமல் தவறிழைத்த சிறுவர்களுக்கு சில சலுகைகள் காட்டப்படுவது நியாயம் இல்லை எனச் சொல்ல முடியாது.

3.  கிராமத்துப் பஞ்சாயத்தில்-ஆலமரத்தடி  நீதி தேவதை இன்னும் மிகச் சிறப்பாகவும் வேகமாகவும் நீதியைப் பெற்றுத்தந்தார் என்பதில் உங்களுக்குச் சந்தேகம் உள்ளதா?

 # நீங்கள் சினிமா பஞ்சாயத்து அடிப்படையில் தான் இப்படிச் சொல்ல முடியும்.

ஒரு பொறுப்புள்ள அரசியல் அமைப்புப் பதவியில் இருந்து ஓய்வு பெற்றவர்கள், அரசியல் பதவிகளுக்கு வருவது நியாயமான ஒன்றா? (உ.நீதிமன்ற முன்னாள் தலைமை நீதிபதிகள் கவர்னர், நியமன எம்.பி போன்றவர்களாவது)

# ராஜ்யசபா என்பது அடிப்படையில் சமூகத்தில் பல துறைகளைச் சார்ந்த மேன்மக்கள் இருக்க வேண்டிய இடம்.  அந்த வகையில் சட்டம் இயற்றும் சபைக்கு தலைமை நீதிபதி நியமனத்தில் தவறு ஏதும் இல்லை.  

கவர்னர் பதவியில் நீதிபதி அரசியல் சாசனத்தை அறிந்து செயல் படலாம்.  பதவி "பரிசாக" தகுதியற்றவருக்குத் தந்தால்தான் ஆட்சேபம் எழ வேண்டும்.

          

மத்தவங்க அவங்க குற்றச் செயல்களுக்காக தண்டிக்கப்படும்போது நாம இரக்கப்படுவதும், அதே குற்றச் செயல் நமக்குச் செய்யப்பட்டிருந்தால் அவர்கள் மீது நாம கோபப்படுவதும் எந்த விதமான மனநிலை?

# மிக இயல்பான எங்கும் காண்கிற மனநிலைதான்.   எந்த சூழ்நிலையிலும் ஒரு உயிர் "பறிக்கப்" படுவது மனதை என்னவோ செய்கிறது.  அந்த அபலைப் பெண்ணின் தாய் கூட தன் "மகிழ்ச்சி"யை இந்த அளவு பொதுத் தளத்தில் சொல்லியிருக்க வேண்டாம் என்று தான் தோன்றுகிறது.

=======================================

7, 16, 25 தேதிகளில் பிறந்தவர்கள் பற்றி வாசகர்கள் கருத்துரைக்கவும். எனக்குத் தெரிந்த ஏழாம் எண்காரர்கள்  எம் எஸ் சுப்பலக்ஷ்மி, வாஜ்பாய். 

       

=======================================