காசியாத்திரை நிகழ்ச்சியில். மாப்பிள்ளைக்கு கையில் கைத்தடி கொடுப்பது ஏன்?

 

கேள்வி பதில்கள் :

நெல்லைத்தமிழன் :

1. ஆண் நடிகர்கள் வயதாக ஆக மெஜெஸ்டிக் லுக் வருவதும் பெண் நடிகைகளுக்கு வயதாக ஆக அப்படி இல்லாததன் காரணம் என்ன? உடனே விதிவிலக்குகளான பிரசாந்தைக் கொண்டு வராதீங்க

# நடிகைகள் திரையில் மிக அழகாகத் தோன்றுவதன் பின்னணியில் எவ்வளவு பேருடைய உழைப்பு இருக்கிறது என்பது நமக்குப் புரிவதில்லை. நடிகர்களின் மெஜஸ்டிக் லுக்கும் அவ்வாறே.

2. "டூட்" படம் மோசம் என்ற விமர்சனம் பலர் சொல்றாங்க (Dude) நான் படமாகப் பார்த்தபோது எனக்கு அப்படித் தோன்றவில்லை. நகைச்சுவையா ஒரு கான்செப்ட் எடுத்துக்கிட்டு பண்ணியிருக்காங்க. மோசமான படம் என்றால் சூப்பர் ஹிட் ஆகுமா? நீங்கள் படத்தைப் பார்த்தீர்களா?

# நான் பார்க்கவில்லை.

& நானும் பார்க்கவில்லை; பார்ப்பதாகவும் இல்லை.

3. நம்ம ஊர்ல, வெளி நாடுகளைப் போல, விவசாயத்தை பெரிய தொழிலாக அணுகினால், அதாவது வெண்டைக்காயை வற்றல், உறைந்த வெண்டை என்று பலவித மதிப்பு கூட்டுப் பொருட்களைத் தயாரிக்கும் கம்பெனி, வெண்டை விவசாயிகளிடம் வாங்கியோ அல்லது அவங்களே பெரும் விவசாய நிலங்களில் விளைவித்தோ, கார்ப்பொரேட் போன்று செயல்பட ஆரம்பித்தால், விவசாயத்தில் நஷ்டம் என்று ஒன்று வராதோ?

# விவசாயத்தில் இடைத் தரகர்கள் கொல்லை லாபம் அடிப்பதே நிறுத்தினாலே விவசாயிகளுக்கு நல்ல லாபம் கிடைக்கும். இதை எடுத்துச் செய்ய யாருக்கும் வாய்ப்பு இல்லை. காரணம் அரசு இயந்திரத்தில் எல்லா மட்டங்களிலும் பரவி போன ஊழல் லஞ்சம். மற்றபடி நீங்கள் சொல்வது போல் விவசாயிகளின் விளைச்சலை பதப்படுத்தி நீண்ட நாட்களுக்கு விற்பனை செய்யும் வாய்ப்பு கிடைத்தால் அமோகமாகத்தான் இருக்கும்.

4. டயபடீஸ் ஷுகர் அளவு, BP அளவு, எடை என்று பலவற்றை ஆறு மாதங்களுக்கு ஒரு முறை எடுத்து கவலைப்பட்டு, அதற்காக மருந்துகளோ அல்லது உடற்பயிற்சிகளோ செய்வதைவிட, எதையும் செய்யாமல் அக்கடா என்று இருப்பது நிம்மதியான வாழ்க்கைக்கு வழியோ?

# எனக்கு உடல்நிலை பலருடன் ஒப்பிடும் போது நன்றாக இருப்பதால் இந்த கேள்விக்கு சரியான பதிலை என்னால் சொல்ல இயலவில்லை. என் கருத்து என்று சொல்வதானால் உடம்பில் ஏதாவது ஒரு உபாதை வந்தால் அதை பார்த்து வைத்தியம் செய்து கொண்டால் போதும் என்று தோன்றுகிறது. 75 அல்லது 80 வயதை கடந்தவர்களுக்கு மிகப்பெரிய தொகை செலவு செய்து வைத்தியம் செய்வதில் எனக்கு நம்பிக்கை இல்லை. அண்மையில் எனக்குத் தெரிந்த ஒருவருக்கு மருத்துவம் செய்ய ஐ சி யூ வில் ஒரு நாளைக்கு 80 ஆயிரம் தனி அறையில் வைத்தியம் செய்து கொள்ள ஒரு நாளைக்கு 17,000 என்ற செலவானதாகச் சொன்னார்கள். எத்தனை பேரால் இந்த மாதிரி வைத்தியங்கள் செய்து கொள்ள முடியும் ?

5. எந்த வயதில் நாக்கிற்கு ருசி முக்கியமாக இருக்காது? எதையாவது சாப்பிட்டால் போதும் என்று தோன்றும்?

# இதற்கு வயது நிர்ணயம் செய்ய இயலாது. ஏதோ உள்கோளாறு காரணமாக உணவில் ஈடுபாடு குறைவதை அந்தக் காலத்தில் "அன்னத் திரேஷம்" என்று சொல்லக் கேட்டிருக்கிறேன். வசதி இல்லாது, வயிறும் காய்ந்தால் பழைய செருப்பை மோரில் ஊறப்போட்டு சாப்பிடலாம், (சார்லி சாப்ளின் மாதிரி).

பானுமதி வெங்கடேஸ்வரன் :

என் தோழி ஒருத்தி 1980ல் வங்கி நேர்முகத் தேர்வுக்குச் சென்றபோது, "சமைக்கத் தெரியுமா? என்ன இனிப்பு செய்வீர்கள்?"மைசூர் பாக் செய்வது எப்படி? என்றெல்லாம் கேட்டார்களாம். அவள் சென்றதோ வங்கியில் எழுத்தர் பணிக்கு. இப்படி நிறைய கதைகள் அப்போது உண்டு. அது என்ன மாதிரி மனப்பான்மை? இப்போதெல்லாம் அப்படி நடப்பது போல் தெரியவில்லையே?

# விசாலமான அறிவு இருக்கிறதா என்று சரி பார்க்க இந்த மாதிரி கேள்விகள் உதவும் என்று நினைத்துக் கேட்கிறார்களோ ?

& பெரிய கம்பெனிகளில் நிறைய பேரை இண்டர்வியூ செய்பவர்களுக்கு ஒரு பேசிக் ரூல் உண்டு. Make the candidate to feel ease. ஆகையால் முதல் சில கேள்விகள் இப்படிக் கேட்கப்பட வாய்ப்பு உண்டு. ஆனால் அதற்குப் பிறகு வேலை தொடர்பு உடைய கேள்விகள் கேட்பார்கள்.

அப்படி இல்லாமல் நேர்முகத் தேர்வு முழுவதும் இப்படியான கேள்விகள் என்றால், வேலைக்கு ஆள் ஏற்கெனவே தேர்ந்து எடுத்துவிட்டார்கள் அல்லது ஹை லெவல் recommendation மூலம் வேறு ஆளுக்கு வேலை என்று முடிவெடுத்திருப்பார்கள். உங்கள் தோழியிடம் சும்மா சில கேள்விகள் கேட்டு time pass செய்திருப்பார்கள்.

கே. சக்ரபாணி சென்னை 28:

1. யாரேனும்  ஃபோன் செய்து  என்ன பண்றீங்கன்னு  கேட்கும்போது   சும்மாதான் இருக்கேன்னு சொல்றதுக்கு பதிலா ஃபிரீயாதான் இருக்கேன்னு  சொல்லலாமே. 

# லாம்தான். வோம்.

& 'ஃபிரீயாதான் இருக்கேன்' என்று ஆண்கள் சொன்னால் சரி; பெண்கள் சொன்னால் சரியாக இருக்குமா? என்று யோசிக்கவேண்டும்.

2. திருமணத்தில்  காசியாத்திரை  நிகழ்ச்சியில். மாப்பிள்ளைக்கு   குடை  விசிறி    காலுக்கு செருப்பு    எல்லாம் கொடுப்பார்கள் சரி கையில்  கைத்தடி  கொடுப்பது  ஏன்?

# 1945 வாக்கில் தலைப்பா அங்க வஸ்திரம் வாக்கிங் ஸ்டிக் இவை உல்லாசிகளின் அடையாளங்களாகக் கருதப்பட்டன. எங்கள் வீட்டிலேயே பனங்கட்டையில் செய்த வாக்கிங் ஸ்டிக் இருந்தது.‌ அது போக யாத்திரிகர்களுக்கும் கைத்தடி ஒரு உபயோகமான பொருள். காசி யாத்திரை போகும் பையனுக்கு அது வேண்டாமா ?

& இதென்ன இப்பிடி கேட்டுட்டீங்க! காசியாத்திரை செல்லும் மாப்பிள்ளை, வெயில் / மழையிலிருந்து பாதுகாத்துக்கொள்ள குடை, தங்குமிடங்களில் (சத்திரங்களில்) காற்றுக்காக விசிறி, கால் செருப்பு வெயில் முள் ஆகியவற்றிலிருந்து பாதுகாப்பு - எல்லாம் சரி - போற வழியில (சொறி)நாய் துரத்தினால், அவற்றைத் துரத்துவதற்கு வாக்கிங் ஸ்டிக். அம்புட்டுதான்!!

= = = = = = = = =

படமே பதம் :

அனுப்பியவர் : ஆர் இளங்கோவன்; உரிமையாளர், ராஜம் ஹவுசிங், ஊரப்பாக்கம் .

- - - - - - - - - - - - -

மருத்துவக் குறிப்பு : (ஆம் - அவர்தான் அனுப்பினார்!)

இதைக் கண்டு, பொங்கி எழுகின்ற பெண் உரிமைப் போராளிகள், ஆட்டோ அனுப்ப நினைத்தால், மேலே காணப்படும் அவருடைய விலாசத்திற்கு அனுப்பவும்! 

நாராயண, நாராயண! 

== = = = = = = =

படமும் பதமும் : 

கிருஸ்துமஸ் candy, மற்றும் சாக்லேட்டுகள். 

வெனிலா கேக் அல்ல! அந்த மணத்தில் சோப்புகள்.

கர்மா வலியது என்று தெரியும், இவ்வளவு பெரியதா?

---------------------

சென்ற வாரத்தில் ஒரு நாள் மால் ஒன்றிற்குச் சென்றிருந்தேன். Lush என்னும் பிரபல பாடி கேர் & சோப் கடையில்தான் இந்த சோப்புகளை பார்த்தேன். 

மிட்டாய், சாக்லேட், கேக் வடிவ சோப்புகள். வெனிலா, ஸ்ட்ராபெர்ரி என்று ஐஸ்க்ரீம் போல ஃப்ளேவர்கள். பாத்ரூம் ரிஃப்ரஷ்னர் கூட இந்த அரோமாக்களில்🤔

பாத்ரூம் ரிஃப்ரஷ்னர் என்றால் லாவண்டர், ரோஸ், லெமன், ஜாஸ்மின் என்று பழகிய எனக்கு வித்தியாசமாக இருந்தது.

------------

பெரிய சைஸ் கர்மா, ஹனிகோம்ப் சோப்புகளை நறுக்கித் தருவார்களாம். 100gm பத்து கனடியன் டாலராம்!

-------------

நெல்லைத்தமிழன் :

சமீபத்தில் Prestige Falcon City என்ற குடியிருப்பு வளாகத்திற்குச் சென்றிருந்தேன். வளாகத்தின் பெயரை நினைவுபடுத்துவதுபோல மிகப் பெரிய பருந்து மீனைக் கவர்வது போல சிலை அமைத்திருந்தார்கள். ரொம்பவே அழகாக இருந்தது.

( Prestige என்ற வார்த்தைக்கு வியட்நாம் வீடு சிவாஜி அல்லது அ ம மு க சின்னம் சிலை வைக்கவில்லையா! ) 

அந்த வளாகத்தையொட்டி இருந்த Forum mallல், பழைய ஜூக் பாக்ஸ் (இசைத்தட்டில் பாட்டுக் கேட்பது) வடிவத்தில் மிகப் பெரியதாக ஒளி விளக்குகளுடன் அமைத்திருந்தார்கள். கண்ணைக் கவர்ந்த அந்த அமைப்பு இதோ

======  ===========

KGG பக்கம் : 

மார்கழி மாதம் பிறந்துவிட்டது. 

1957 - 62 கால கட்டத்தில் நாகையில் நான் அனுபவித்த மார்கழி மாதங்கள் நினைவுக்கு வருகின்றன. 

காலையில் அக்கம்பக்கத்து கோவில்களிலிருந்து திருப்பாவைப் பாடல்கள் எம் எல் வசந்தகுமாரி பாடியவை ஒலிக்கும். 

அதிகாலையில் நாலரை அல்லது ஐந்து மணிக்கே அம்மா என்னையும், என் சின்ன அண்ணனையும் எழுப்பிவிடுவார்கள். 

நாங்கள் இருவரும் உடனடியாக பல் தேய்த்து சுமாரான டிராயர் சட்டை அணிந்து (அந்தக் காலத்தில் எங்களுடைய ஆடைகள் எல்லாமே சுமாரானவைதான்! பட்டன்கள் எல்லாம் உதிராமல் இருந்தால் அது சுமாரில் கொஞ்சம் நல்லவை!)   அருகில் உள்ள சட்டையப்பர் கோவில் வாசலில் இருக்கும் ராமமடம் செல்வோம். 

அங்கே மார்கழி மாத பஜனை நடந்துகொண்டு இருக்கும். சில பாடல்களில் ஒரு வரி பாடி கேப் கொடுத்தார்கள் என்றால், கோரசாக எல்லோரும் கடைசியில் பாடப்பட்ட வரிகளை உரத்த குரலில் ரிபீட் செய்வோம். 

"ராமச்சந்திரா ரகுவீரா, ராமச்சந்திரா ரணதீர" 

இது போன்று இன்னும் சில பாடல் வரிகள் ! 

பெரிய பிறை போன்ற அமைப்பில் உள்பக்கமாக நிறைய சாமி படங்கள் வரிசையாக மாட்டப்பட்டிருக்கும்.  மகாவிஷ்ணு, குழந்தை கிருஷ்ணர், பெரிய கிருஷ்ணர், ஆண்டாள், மாடு மேய்க்கும் கிருஷ்ணர், ராமர் பட்டாபிஷேகம், ஆஞ்சநேயர் .. இன்னும் பல படங்கள். 

குறிப்பிட்ட சிலர் குறிப்பிட்ட பாடல்களை மட்டும் பாடுவார்கள். அபூர்வமாக சிலர் ஆடாது அசங்காது வா கண்ணா போன்ற பாடல்களைப் பாடுவார்கள். 

எல்லாம் ரொடீன் ஆக போய்க்கொண்டு இருக்கும். 

திடீரென்று உபயதாரர் வீட்டு வேலைக்காரர்கள் ஒரு பெரிய பாத்திரத்தில், வெண் பொங்கல் சுடச் சுட கொண்டு வந்து வைப்பார்கள். 

பொங்கல் மணம் அந்த மடம் முழுவதும் வீசும். 

சோர்வாக பாடிக்கொண்டிருந்த எல்லோருக்கும் சுறுசுறுப்பு வந்துவிடும் !

கோரஸ் வரிகள் இன்னும் உற்சாகமாக பெரிதாக ஒலிக்கத் தொடங்கும். 

" ராதே ராதே ராதே முகுந்தா பிருந்தாவன சந்தா " 

பிறகு ராம மடத்தின் இரண்டு extreme கதவுகளில் (ஒன்று entry மற்றது exit ) ஒரு pair கதவு மூடப்படும். இதற்கு 2 காரணங்கள்: 

1)  பொங்கல் வாங்கித் திங்க மட்டும் வருபவர்களை தடுப்பது மற்றும்

2)  வாங்கித் தின்றுவிட்டு மறுபடி reentry செய்ய முயல்பவர்களைத் தடுப்பது.  

ஒரு பக்கக் கதவுகள் மூடப்பட்டவுடன், 

டிங் டிங் டிங் ..

டிங் டிங் டிங் .. 

என்று மூன்று மூன்றாக ஆலய மணி ஒலிக்கும். அந்த நேரத்தில் எல்லோரும் எழுந்து நின்று, படங்களுக்கு காட்டப்படும் கற்பூர தீப ஆரத்தியைப் பார்த்து பக்தியுடன் கன்னத்தில் பட படவென்று போட்டுக்கொள்வோம். அருகில் வரும் கற்பூரத் தட்டின் ஒளிப் பிழம்பிற்கு அருகே கைகளைக் காட்டி கொஞ்சம் சூடான உள்ளங்கைகளைக் கண்களை மூடி ஒத்தடம் கொடுத்துக்கொண்டு விரைந்து சென்று, திறந்திருக்கும் ஒரு பக்க கதவுக்கு அருகே வரிசையாக நிற்போம். 

பொங்கல் பாத்திரம் கதவுக்கு அருகே கொண்டு வந்து வைக்கப்படும். 

அதை கரண்டியால் எடுத்து கொடுப்பவர் பெரும்பாலும் (குண்டு ) வைத்தா அல்லது ஒல்லி தண்டபாணி வாத்தியார். 

எங்கள் பார்வையில் குண்டு வைத்தா கஞ்சர். ஒல்லி வாத்தியார் தாராளம் - பொங்கல் வழங்குவதில்!

வெள்ளிக்கிழமைகளில் சர்க்கரைப் பொங்கல். (எனக்கு மிகவும் பிடித்த விஷயம் ) மற்ற நாட்களில் வெண் பொங்கல். 

சில நாட்கள் தொன்னையில் வழங்கப்படும். சௌகரியம் - பொங்கலின் சூடு உள்ளங்கைகளை சிவக்க வைக்காது. 

பல நாட்கள், சூடான பொங்கல் கைகளில் வாங்கி, உள்ளங்கைகள் சிவந்துவிடும். பொங்கல் உருண்டையை இரண்டு கைகளிலும் மாற்றி மாற்றி எடுத்துக்கொண்டு வீட்டுக்கு ஓடி வருவோம். 

சிலர் ரிஸ்க் எடுக்காமல் சிறு பாத்திரங்களைக் கொண்டு வந்து அதில் பொங்கல் வாங்கி செல்வார்கள். 

கோடி வீட்டு கிருபா, தன்னுடைய பாத்திரத்தில் ஒரு கரண்டி பொங்கல் வாங்கியவுடன், " மாமா என் தம்பிக்கு கொஞ்சம் பொங்கல் " என்று கேட்டு பாத்திரத்தில் இன்னும் ஒரு கரண்டி பொங்கல் வாங்குவாள். (அவளுக்கு தம்பியே கிடையாது என்பது எங்களுக்குத் தெரியும்! ) 

பிறகு நாங்கள் வேறு வீடு மாற்றி சென்றுவிட்டோம். அடுத்த இரண்டு வருடங்கள் ராமமட பஜனை செல்ல இயலவில்லை. 

அதன் பின் மீண்டும் சட்டையப்பர் கோவிலுக்கு எதிரில் இருந்த காக்கா பிள்ளையார் கோவிலுக்கு பின்புறம் குடி பெயர்ந்தோம். 

அதன் பின் நீலகிரி பக்கம் ஏழாம் வகுப்பு படித்து திரும்ப நாகைக்கே வந்து சேர்ந்தேன். 

அம்மாவிடம் சொல்லி வைத்து, 1964 மார்கழி மாதத்தில் ஒரு லீவு நாளில் அதிகாலையில் எழுந்து பல் தேய்த்து, சட்டையப்பர் கோவில் ராமமடம்  சென்று பார்த்தால் - மடம் மூடியிருந்தது. 

மார்கழி மாத பஜனை இல்லை; கூட்டமும் இல்லை. ஏமாற்றத்துடன் வீடு திரும்பினேன். மார்கழி பஜனைகளை முன்னெடுத்து செய்த ரோலிங் மில் சங்கர ஐயர் (ராம மடத்திற்கு எதிர் வீடு) காலமானதற்குப் பிறகு அதை யாரும் முன்னெடுத்து செய்யாததால் மார்கழி பஜனை அங்கே மார்கழிப் பனி போல கரைந்துவிட்டது. 

*************    ************* 

சென்னைக்கு (புரசவாக்கம்) வந்த பிறகு, 1971 மார்கழி மாதத்தில் அக்கம் பக்கத்து கோவில்களிலிருந்து திருப்பாவை, திருவெம்பாவை பாடல்கள் கேட்க ஆவலாக இருந்தேன். 

பார்த்தால் எங்கு பார்த்தாலும் ஐயப்பன் பக்தி பாடல்கள், பஜனைகள்தான் ஸ்பீக்கரில் ஓங்கி ஒலிக்கும். 

அப்படி எங்கிருந்துதான் இந்த பாடல்கள் கேட்கின்றன என்று சென்று பார்த்தால், சுந்தரம் பிள்ளைத் தெருவின் கோடியில் ஒரு சிறிய கீற்றுக் கொட்டகைப் போட்டு அங்கே இருக்கும் ரிக்க்ஷா  இழுப்பவர்கள் சிலர் நீலக் கலர் / கருப்புக் கலர் வேட்டி கட்டி, பீடி புகைத்த வண்ணம் அங்கே இருந்த ரெகார்ட் பிளேயரில் இசைத் தட்டுகளை மாற்றி மாற்றிப் போட்டு ஸ்பீக்கர் வழியாக பாடல்களை அலற வைத்துக் கொண்டிருந்தார்கள். 

= = = = = = = = = = = =

இன்னும் பலப் பல வருடங்கள் கழித்து, 2010 சமயத்தில், மார்கழி மாதத்தில் குரோம்பேட்டை குமரன் குன்றம் காலை எட்டு மணிக்கு நானும் என் ஒ வி தம்பியும் சென்றிருந்தபோது அங்கே பள்ளிக்கூட மாணவ மாணவியர் கோஷ்டி (அருகில் இருந்த விவேகானந்தா வித்யாலயா மாணவர்களாக இருக்கலாம் ) திருப்பாவை, திருவெம்பாவை பாடல்களைப் பாடி முடித்து, வந்திருந்த எல்லோருக்கும் பொங்கல் வழங்கினார்கள். 

நானும் என் தம்பியும் அந்தப் பொங்கல் பிரசாதம் வாங்கி உண்டோம். 

மார்கழி மாத பொங்கல் நினைவுகள் எவ்வளவு சுவையானவை! 

= = = = = = = = = = = = = = = = = =