"திங்க"க்கிழமை :: முட்டையில்லா சாக்லேட் கேக் -- பானுமதி வெங்கடேஸ்வரன் ரெஸிப்பி

 

 முட்டையில்லாத  

சாக்லேட் கேக்  (Browney)

தேவையான பொருட்கள்:

மைதா அல்லது கோதுமை மாவு. -  1 கப் 

சர்க்கரை    - 3/4 கப்      

கோகோ பவுடர். - 1/4 கபீ                                      

சுட வைத்த பால் - 1 கப்.                                  

தயிர். - 1/2 கப்                                            

சமையல் எண்ணெய் - 1/4 கப்

பேக்கிங் பவுடர்  -  1 டீ ஸ்பூன்

பேக்கிங் சோடா  -  1/2 டீ ஸ்பூன்

வெனிலா எசென்ஸ்   -  1 டீ ஸபூன் 

செய்முறை:

முதலில் ஓவனை(அவனை என்றால் எவனை என்று கேட்பார் ஸ்ரீராம்) 180°Cயில் ப்ரீ ஹீட் செய்வதற்காக ஆன் பண்ணி விடுங்கள். ஓவன் சூடாகட்டும். 

ஒரு அகலமான பாத்திரத்தில் சர்க்கரையை போட்டு, அதில் சூடாக்கப்பட்ட பாலை ஊற்றி, சர்க்கரை கரையும் வண்ணம் கலக்கவும். 

பிறகு தயிர், சமையல் எண்ணெய் சேர்த்து கலக்கவும். 

மாவு, கோகோ பவுடர், பேக்கிங் பவுடர், பேக்கிங் சோடா வகையறாக்களை சலித்து, பால், தயிர், சர்க்கரை, எண்ணெய் கரைசலில் இட்டு நன்றாக கிளறவும். 

ஒரு பேக்கிங் ட்ரேயில் இந்த கலவையை ஊற்றி, ஓவனில் 180° C யில் பேக் பண்ணவும். 20 அல்லது 30 நிமிடங்களில் பேக் ஆகி விடும். ஒரு டூத்பிக்கால்(toothpick) அல்லது கத்தியால் குத்தினால் ஒட்டாமல் வர வேண்டும். அப்போது வெளியே எடுத்து ஆற விடவும்.

 ஆறியதும், ஒரு கத்தியை கேக்கிற்கும், பாத்திரத்திற்கும் இடையே வைத்து சுழற்றினால் பாத்திரத்தில் ஒட்டிக் கொண்டிருப்பவை விடுபட்டு விடும். பின்னர் ஒரு தட்டில் பேக்கிங் ட்ரேயைக் கொட்டி லேசாக தட்டினால், தட்டில் விழுந்து விடும். அதை நிமிர்த்தி துண்டுகள் போட்டு சுவையான சாக்லேட் கேக்கை சுவையுங்கள். 

அப்படியே சாப்பிட்டால் ப்ரெளனி, நடுவில் கட் பண்ணி வெனிலா சீஸ் அல்லது சாக்லேட் சாஸ் தடவி, மேலே ஐசிங் சுகரால் டிசைன் போட்டால் சாக்லேட் கேக்.

என் மகளின் பிறநந்த நாளுக்கு நான் செய்தேன். 

====================================================================================================================================

குண்டு காயம்பட்ட போதிலும் துணிச்சலுடன் முன்னேறிய

மோப்பநாய்: டைசனுக்கு சல்யூட்

ஜம்மு: ஜம்மு காஷ்மீரில் நடந்த என்கவுன்டரில், பாதுகாப்புப் படையினரை வழி நடத்தி சென்ற ராணுவத்தின் சிறப்புப் பிரிவு மோப்ப நாய் 'டைசன்' குண்டடி பட்ட போதும், முன்னேறி சென்று பயங்கரவாதிகளை கொல்லஉதவியது.

ஜம்மு காஷ்மீரின் கிஸ்திவாரில் வனப்பகுதியில் பயங்கரவாதிகள் மறைந்துள்ளதாக வந்த பாதுகாப்புப் படையினர் சுற்றிவளைத்தனர். அப்போது இரு தரப்புக்கு இடையே நடந்த மோதலில் 3 பயங்கரவாதிகள் சுட்டுக் கொல்லப்பட்டனர். அவர்களில் ஜெய்ஷ் இ முகம்மது பயங்கரவாத அமைப்பைச் சேர்ந்த சைபுல்லா என்பவன் முக்கியமானவன்.

பயங்கரவாதிகளிடம் இருந்து ஆயுதங்கள், வெடிமருந்துகள் உள்ளிட்டவை பறிமுதல் செய்யப்பட்டு உள்ளன.

இந்நிலையில், இந்த மோதலில் ராணுவத்தின் சிறப்புப் பிரிவு மோப்ப நாய் 'டைசன் பயங்கரவாதிகளால் குண்டடி பட்ட போதும் பாதுகாப்புப் படையினரை வழிநடத்தி உள்ளது தெரியவந்துள்ளது.  டைசன் தான், வனப்பகுதியில் பயங்கரவாதிகள் இருப்பதை முதலில்உறுதி செய்தது. அடர்ந்த வனப்பகுதிக்குள் பாதுகாப்புப் படையினரை வழிநடத்தி முன்னேறி சென்றது. அப்போது பயங்கரவாதிகள் சுட்ட முதல் குண்டு, மோப்ப நாயின் காலில்பாய்ந்தது. காலில் காயம் ஏற்பட்டாலும், முன்னேறி சென்று பயங்கரவாதிகள் இருக்குமிடத்தை பாதுகாப்புப் படையினரிடம் காட்டிக் கொடுத்தது. ஜெர்மன் ஷெப்பர்டு ரகத்தைச் சேர்ந்த இந்த நாய்க்கு, உடனடியாக ஹெலிகாப்டர் உதவியுடன் உதம்பூரில் அமைந்துள்ள மருத்துவமனைக்கு கொண்டு சென்று சிகிச்சை அதிகாரிகள் ஏற்பாடு செய்தனர்.

இந்த மோப்ப நாய், வெடிகுண்டுகள் மற்றும் வெடிபொருட்களை கண்டுபிடிக்கவும், சந்தேகத்துக்கு இடமான இடங்களை கண்டறிவதுடன், பயங்கரவாதிகளை கண்டுபிடிக்கும் பணிக்கு பயிற்சி அளிக்கப்பட்டுள்ளது. பயங்கரவாதிகளுக்கு எதிரான பல்வேறு நடவடிக்கைகளில் இந்த மோப்ப நாய் முக்கிய பங்காற்றி உள்ளதாக ராணுவ அதிகாரிகள் தெரிவித்துள்ளனர்.