உணவு உடை இருப்பிடம் தவிர வேறு எது எதற்கு முக்கியத்துவம் தரவேண்டும்?

 

கேள்வி பதில்கள் : 

 நெல்லைத்தமிழன் : 

1. அனேகமா ஒவ்வொரு வீட்டிலும் (நான் சொல்வது பிராமணர்கள் மத்தியில்) பசு இருந்த காலம் போய், பிறகு ஊரில் உள்ள பால் பண்ணை அல்லது வீட்டிற்குக் கொண்டு வந்து தரும் பால் சாப்பிட்டதுபோக, தற்காலத்தில் பாக்கெட் பாலில் காலத்தைக் கழிக்கிறோமே. இது வளர்ச்சியா இல்லை உடல்நலத்தைக் கெடுத்துக்கொள்ளும் பாதையா?   

# வீட்டில் மாடு வளர்க்க இயலாத சூழ்நிலையில் வேறு வழியில்லையே !  பாக்கெட் பாலில் சில தில்லு முல்லுகள் நடக்கின்றன எனும் சந்தேகம் மிகவும் வலுவாக  இருக்கிறது. கடவுள்தான் காப்பாற்ற வேண்டும்.

2. போர்ன்விட்டா, பூஸ்ட், ஹார்லிக்ஸ் என்று வித வித விளம்பரங்கள் பார்க்கிறேன். ஒரு காலத்தில் அவைகள் உடலுக்கு மிகவும் நல்லவை என்று நம்பிக்கொண்டிருந்தேன். அதுபோல தினமும் பால் அருந்துவதும் உடல் நலத்திற்கு நல்லது, கால்ஷியம் சேரும் என்றெல்லாம் நம்பினேன். உண்மையில் போர்ன்விட்டா போன்றவைகள் நம் உடலுக்குக் கேடு என்றே இப்போது நம்புகிறேன். உங்கள் எண்ணம் என்ன?  

# கேடு என்பது உண்மையோ பொய்யோ தெரியவில்லை.  ஆனால் நிச்சயம் பண விரயம். நன்மை என்பது இருந்தாலுமே கூட மிக மிகச் சொற்பம் என்று உறுதியாகச் சொல்லலாம். இது போன்ற பொருள்கள் விளம்பர யுகத்தின் வெற்றிகள்.

3. தற்போதைய வாழ்க்கை முறையில் கூட்டுக்குடும்பம் சரிப்படுமா? பெரியோர்களிலிருந்து சிறியோர்கள் வரை ஒவ்வொருவருக்கும் ஒவ்வொன்றில் ஆர்வமும், விட்டுக்கொடுக்காத தன்மையும் இருப்பதால் இந்தக் கேள்வி.  

# அவரவர்களுக்கு வேண்டிய இடைவெளியைத் தரவல்ல  வசதியான வீடு இருந்து, அங்கே கூட்டுக் குடும்பமாக  இருப்பதே சிறப்பு என்று நான் கருதுகிறேன்.

ஆனால் ஒவ்வொரு குடும்பத்திலும் உள்ள சூழ்நிலைகள் அதற்கு ஒத்துப் போவதாக இருக்க வேண்டும்.  அது எல்லா இடத்திலும் இருப்பதற்கு வாய்ப்பு இல்லாமலும் இருக்கலாம்.

4. எதற்கு கோவில் கோவிலாகச் செல்லவேண்டும்? இருக்கும் இடத்திலேயே இறைவனை நினைத்துக்கொண்டு இருந்தால் போதாதா என்ற கேள்வியைச் சிலர் கேட்கின்றனர். நீங்களும் வாசகர்களும் என்ன நினைக்கிறீர்கள்? 

# இறைவனை வணங்க மட்டும் கோயிலுக்கு போகிறோம் என்று சொல்ல முடியாது.  அங்கே இருக்கிற சூழ்நிலையில் அங்கு வழங்கப்படும் பிரசாதம் பட நமக்கு பிடித்த விஷயங்கள் இருந்தால் கோயிலுக்கு போக நாம் ஆசைப்படுகிறோம் என்பதே உண்மை.

5. வாழ்க்கையில் உணவு உடை இருப்பிடம் தவிர வேறு எது எதற்கு முக்கியத்துவம் தரவேண்டும்?

# பண வசதி, ஆரோக்கியம், மன அமைதி இவை  மிகவும் முக்கியம்.

= = = = = = =

படமும் பதமும் : 

நெல்லைத்தமிழன் : 

அட... ஒரு மதிய உணவு ப்ளேட்டுல என்ன அதிசயம் இருக்கு என்று நினைக்கிறீர்களா?  நான் பொதுவா பழங்களையும், ஜூஸ்களையும் ப்ரெட்களையும் வைத்து என்னுடைய வெளிநாட்டுப் பயணங்களின்போது சமாளித்துக்கொள்வேன். இருந்தாலும் செல்லும் நாட்டில் நம் வெஜிடேரியன் உணவு கிடைக்கும் என்றால், பயணம் செய்து அங்குபோய் மதிய உணவு சாப்பிடுவேன். இது பாரீஸ் பயணத்தின்போது, சங்கீதாவின் மதிய உணவு. என்ன சார்..தயிர் இல்லையா என்றேன். நீங்கதான் முதல் ஆள் பாரீஸ்ல மீல்ஸுக்கு தயிர் கேட்டது. நம்ம ஊர்க்காரர். உங்களுக்கு இல்லாததா என்று சொல்லி தயிர் கொடுத்தார்கள். விலை 12 யூரோ என்று நினைவு. 

= = = = = = = =

பாரீஸில் புகழ் பெற்றது லூவர் மியூசியம். அதில் உள்ளவற்றில் கொஞ்சம் அதிகமாகவே புகழ் பெற்றது ஓவியர் லியனார்டோ டாவின்ஸியின் இந்த ஓவியம் மோனா லிஸா.  இந்த மியூசியத்துக்கு நான் மூன்று முறை சென்றிருக்கிறேன். இது பற்றி ஒரு தொடர் எழுத எண்ணியிருக்கிறேன். ஆனால் ஓவியங்கள், சிற்பங்களை ரசிக்க கலைக்கண் வேண்டும். அதற்குத் தயார் என்றால் நான் தொடர் எழுதுகிறேன். 

மோனாலிஸா ஓவியம் சிறியது. அதன் எதிரே இந்த மிகப் பெரிய ஓவியம் இருக்கிறது. ஆனால் பாருங்க, மோனா லிஸா உலகப் புகழ் பெற்றதாக இருக்கிறது. அளவு முக்கியம் இல்லை, அல்லவா?

= = = = = = = = =

சுஜாதா இரண்டு சரித்திரத் தொடர்கதைகள் எழுதி இருக்கிறார் அல்லவா...  இதோ இன்னொரு செமி சரித்திரக்கதை!  வஸந்த் வஸந்த் என்கிற கதை.  இதில் சுஜாதா சிவப்பு கருப்பு வெளுப்பு நிறுத்தப்பட்டதை ஓரிரு வார்த்தைகளில் சொல்கிறார்.  தொடர்ச்சியை எதிர்பார்க்காதீர்கள்.  ஆங்காங்கே கொஞ்சம் கொஞ்சம்...

'சுந்தர சோழன் தனது மூத்த புதல்வனது வீரச் செயலையும் ஆற்றலையும் உணர்ந்து கி.பி. 966-ல் அவனுக்கு இளவரசுப் பட்டம் கட்டினான். மற்றொரு மகனாகிய அருள்மொழித் தேவன் என்பவனே பின்னர் எத்திசையும் புகழ் பரப்பி இனிது வாழ்ந்த முதல் ராஜராஜ சோழன் ஆவான்.'

எஸ்டேட் டியூட்டி ஆக்ட்டில் ஆழ்ந்திருந்த கணேஷ் எரிச்சலுடன் நிமிர்ந்து 'வஸந்த்! இப்ப நிறுத்தப் போறியா இல்லையா?' என்றான்.

"ரொம்ப சுவாரஸ்யமா இருக்குது பாஸ்! இந்த ஆதித்த கரிகாலன் 969-ல் க்ளோஸ்! நாலு பேர் சேர்ந்து ஆளைத் தீர்த்துட்டாங்க! இதில ஒரு பெரிய சஸ்பென்ஸ் கதையே இருக்கு. உத்தம சோழன் ஏன் அந்த நாலு பேருக்கும் தண்டனை கொடுக்கலை? அதுலதான் பாஸ் இருக்கு மர்மம்.

'வஸந்த்! நிஜமாச் சொல்லு. திடீரென்று உனக்கு ஏன் சரித்திரத்தில் இத்தனை ஈ.பா?'

'என்ன பண்றது பாஸ் ? சரித்திரக் கதையெல்லாம் இப்பப் படக்குன்னு நிறுத்திர்றான்களே! அதான் சொந்தமாகவே படிச்சுக்கலாம்னுட்டு... எல்லாக் காரியங்களையும் சொந்தமா செஞ்சுக்கிறது நல்லதில்லையா?'

'ஏய்! நிஜமாவே உனக்குச் சரித்திரத்தில இன்ட்ரஸ்ட்டா?'

'பின்னே?'

'நான் நம்பலை. ஏதாவது சரித்திரம் படிக்கிற பொண்ணை ஸைட் அடிக்கிறியா?'

நடு சென்டர்லே குத்திட்டிங்களே, பாஸ். நான் சரித்திரம் படிக்கிறதுக்குக் காரணம் ஒரு பெண்ணில்லை. அவ அப்பா!"

---------

...........................

ஸ்டியரிங்கில் உட்கார்ந்து ஸ்டார்ட்டரை கிர்ர்ர்ரக்கி காரை விரட்டிய வஸந்த், 'இனியா, என் நெத்திலே கவலை ரேகைகள் படிஞ்சிருக்கே கவனிச்சியோ?' என்றான்.

வஸந்த், எனக்கும் கவலையாத்தான் இருக்குது.'

'மெட்ராஸ்ல நடு சென்டர்ல இருந்த ஆளுக்குப் பல்லாவரத்தில் என்ன வேலை? அங்க கல்லை உடைப்பாங்களே தவிர கல்வெட்டு ஏதும் கிடைக்காததே!'

'புரியலையே?'

'அப்புறம் இது என்ன கட்டுரை? ராஜராஜன் கிணறு? கொஞ்சம் சாம்பிள் படி!'

இனியா சற்றுத் தடுமாற்றத்துடன் கையிலிருந்த கட்டுரையைப் படித்தாள்.

'ஸ்வஸ்திஸ்ரீ திருமகள் போலப் பெருநிலச் செல்வியுந் தனக்கேயுரிமை பூண்டமை மனக்கொள காந்தளூர்ச் சாலையும் கலமறுத்தருளி வேங்கை நாடும் கங்கபாடியும் நாளம்பாடியும் தடிகைபாடியும்...'

'நாயுடு ஹால் பாடியும்... ஹோல்டான். நிறுத்து. கார் உதறுது. கட்டுரை பூரா பாடியா?'

'ஆராய்ச்சிக் குறிப்புகள் இருக்கு. South Indian Inscriptions, Vol.III, No. 44 on...'

'ஆமா, எனக்கு ஒரு சின்னச் சந்தேகம். உங்கப்பா தினப்படி இப்படித்தான் எழுதிக்கிட்டிருப்பாரா?'

'ஆமாம்!'

--------------

'பரவாயில்லையே. ஒரு வக்கீலுக்குச் சரித்திரத்திலே ஈடுபா​டா 

'ரெண்டிலேயும் நிறையச் சரடு விடலாம் இல்லையா?"

'சரடா?'

'சரடுன்னா ஐ மீன் நிறையப் படிக்கணும்னு சொல்ல வரேன்! இனியா உங்கிட்டச் சொன்னேனோ இதை? என் ஃப்ரண்ட் சம்பத்துனு பி.ஏ. ஹிஸ்டரி படிச்சிட்டிருந்தான். க்வார்ட்டர்லி எக்ஸாம். ஹிஸ்டரி பேப்பர். மூன்று மணி நேர பேப்பர். Do you consider Rajaraja as the greatest of the Chola Kings?னு ஒரு பெரிய கட்டுரை எழுதச் சொல்லியிருந்தாங்க. இவன் No. I Don'tனு எழுதிட்டு மாட்னிக்குப் போய்ட்டான். ஹ ஹ ஹ'

அந்த வட்டாரத்திலே யாருமே சிரிக்கவில்லை. பேராசிரியர் முகம் சற்றுக் குறுகி, 'யங் மேன்! சரித்திரம் என்கிறது சிரிக்கிற விஷயமில்லை' என்றார்.

'சும்மா சின்னதா ஒரு ஜோக் அடிச்சுப் பார்த்தேன். ஸார் உங்களுக்கு மெக்ஸிகோ தேசத்து லாண்டரி ஜோக் தெரியுமா?'

இனியா அவசரமாக 'வஸந்த்! நீங்க என்னவோ அப்பாவைச் சந்தேகம் கேக்கணும்னீங்களே!' என்றாள்.

'அதான் ஸார்! இந்த உத்தம சோழனைப் பத்தி எனக்கு ஒரு பெரிய சந்தேகம்!'

'என்ன?'

'பிளாகாட் ஆதித்த கரிகாலனைக் கொன்னவங்களுக்கு ஏன் பனிஷ்மெண்ட் கொடுக்கலை? அந்தக் கொலைக்கும் இவனுக்கும் கனெக்ஷன்னுதானே அர்த்தம்?'

'அது அவ்வளவு சிம்பிள் இல்லை வஸந்த். பஞ்சவன் பிரமாதி ராஜன்னு பாண்டி நாட்டு அரசியல் அதிகாரி ஒருவன் அதிலே சம்பந்தப்பட்டிருக்கான்!'

'அப்படியா/ சொல்லுங்க ஸார்! ரொம்ப இன்ட்ரஸ்டிங்!' என்றான்.

இனியா அப்பாவின் பின்புறத்திலிருந்து, 'உன்னை வெட்டறேன் வா' என்று கையைக் காட்டினாள்.

கார் வந்து நிற்கும் சத்தம் கேட்டுப் பேராசிரியர் நிறுத்தினார்.கணேஷ் உள்ளே வர 'பாஸ்! உங்களுக்காகத்தான் காத்துக்கிட்டிருக்காங்க!' என்றான்.

**********

'ராஜராஜன் கிணறுங்கிறது என்ன ஸார்?"

'செங்கல்பட்டு ஜில்லாவில் உக்கல்ங்கிற கிராமத்துக்குப் பக்கத்திலே ஒரு பழைய கிணறு அது. ராஜராஜன் காலத்திலே ஆவூர்ல கண்ணல் ஆரூரன்னு ஒரு ஆண் ராஜா போல அதை வெட்டித் தண்ணி இறைக்கறதுக்கு விட்டிருக்கான். அது பத்தி ஒரு கோயில் கல்வெட்டில் எழுதியிருக்கு.'

'கோயில் பேரு?'

'புவனி மாணிக்க விஷ்ணு கிரகம்!'

'சரிதான் சின்னதா இருக்கே!'

அந்தக் கிணறு இ​ன்னமும் இருக்கா?

இருக்கு, அடையாளம் கண்டுபிடிக்கலாம்.

அந்தக் கல்வெட்டில் அதைப்பத்தி வேற விவரம் ஏதாவது இருக்கா?"

வேறு விவரம்னா?'

புதையல் கிதையல், தங்கம் அப்படின்னு.'

'சேச்சே! அதெல்லாம் இல்லை..

'கல்வெட்டு என்ன சொல்றது

'இந்த மாதிரி கிணற்றை வெட்ட வெச்சவன் இவன்.. அதில இருந்து தொட்டிக்குத் தண்ணி இறைக்கிறவனுக்கு எத்தனை மரக்கால், எத்தனை குறுணி நெல் கொடுக்கணும், பந்தல்காரனுக்கு இவ்வளவு-சேதத்துக்கு இவ்வளவுன்னு நெல் கணக்கு... என்னைப்போல் சரித்திர ஆசாமிக்குத்தான் இந்தக் கிணத்திலே செய்தி இருக்கு... புதையலும் கிடையாது! ​ ஒரு மண்ணாங் கட்டியும் கிடையாது. அதான் ரொம்ப ஆச்சரியமா இருக்கு/"

'இப்ப நாங்க என்ன செய்யணும்னு சொல்றீங்க?' என்றான் கணேஷ்.

'அந்தக் குண்டர்கள் எக்கேடு கெட்டுப் போகட்டும். கிணத்துல போய் விழட்டும். ஆனா அந்தக் கட்டுரை எனக்கு அவசியம் திருப்பி வேணும்! அதுக்காக நீங்க உதவி செய்து எப்படியாவது அதைக் கொண்டு​ வந்துறணும்!'

'வஸந்த்/ கேட்டில்ல? ஸார் கவலைப்படாதீங்க. வஸந்த் கெட்டிக்காரன். அதை மீட்டுக்கிட்டு வந்துருவான்.

'ஏன் ஸார், அந்தக் கட்டுரை ரொம்ப அவசியமோ? 'ராஜேந்திரன் கிணறு'ன்னு இன்னொண்ணு எழுதிக்குங்களேன்.'

'இல்லைப்பா, ஆறு மாசம் ஆராய்ச்சி பண்ணி அதை ஆறு பக்கத்திலே சாறாப் பிழிஞ்சு எழுதியிருக்கேன். ராஜராஜன் கிணறு கல்வெட்டில் எத்தனை விஷயம் இருக்கு! புதுக்குப்புறம்னா என்னன்னு தெரியுமா?

'புதுசு, குப்புறப் படுத்துக்கறது?'

'இல்லை. காஸ்ட் ஃபார் ரிப்பேருக்கு செந்தமிழ்த் தொடர். அது அந்தக் கல்வெட்டில் எழுதியிருக்கு!'

[இதன் இன்னும் கொஞ்சம் சுவாரஸ்யமான பகுதிகளை வெவ்வேறு கிழமைகளில் கொடுக்கிறேன்!

=====================================================================================

KGG பக்கம்: 

(வாடகைத் ) தாயே யசோதா உந்தன் .. ! 

சமீபத்தில் yashoda என்ற தெலுங்குப் படம் Prime Video(?)  வில் பார்த்தேன். 

ஸமந்தா கதாநாயகி. 

வாடகைத் தாய்(கள்) பற்றிய படம். ஆனால் இந்தத் தாய்மார்கள் எல்லோரும் ஏழை மக்கள் - அத்தியாவசிய தேவைகளால் பெரும் பணத்துக்கு ஆசைப் பட்டு, வலையில் வந்து விழுகிறார்கள். அப்புறம் அவர்கள் கதி என்ன ஆகிறது என்பது கதை. 

சமந்தா கிட்டத்தட்ட லேடி ஜேம்ஸ் பாண்ட் ஆக வருகிறார். படம் முழுவதும் பரவி இருக்கிறார்! 

வரலக்ஷ்மி சரத்குமார் வில்லியாக வருகிறார். (ஆனால் அவர் வில்லி என்பது படத்தின் இறுதியில்தான் நமக்குத் தெரிகிறது) 

படம் முடியும்போது எனக்கு வந்த சந்தேகம்: அவ்வளவு அடி தடி, உதை, குத்து , பறந்து பறந்து சண்டைகள் போட்ட சமந்தாவின் வயிற்றில் இருந்த செயற்கைக் கரு குழந்தை என்னதான் ஆயிற்று? அது பற்றிய விவரங்கள் எதுவும் சொல்லாமல் படம் முடிந்துவிடுகிறது. 

ஜேம்ஸ் பாண்ட் ரசிகர்கள் / சமந்தா ரசிகர்கள் படத்தைப் பார்த்து ரசிக்கலாம்! 

= = = = = = = = = = =

முதுமையிலே இனிமை காண முடியுமா? 

முடியும் என்கிறார் ஒரு டாக்டர். 

44 வாக்கியங்கள் அதற்காக கொடுத்துள்ளார். 

அவை என்னென்ன என்று பார்ப்போம்! 

உளவியலாளர் ஹிடேகி வாடா "80 வயது சுவர்" என்ற புத்தகத்தை வெளியிட்டுள்ளார். புத்தகம் வெளியான உடனேயே, அதன் விற்பனை 500,000 பிரதிகளுக்கு மேல் சென்றது, இது அந்த நேரத்தில் அதிகம் விற்பனையான புத்தகமாக மாறியது. இந்த விற்பனைப போக்கு தொடர்ந்தால், இந்தப் புத்தகம் 1 மில்லியனுக்கும் அதிகமான பிரதிகள் விற்பனையாகி, அந்த ஆண்டின் ஜப்பானின் அதிகம் விற்பனையாகும் புத்தகமாக மாறும்.

61 வயதான டாக்டர் வாடா, முதியோரின் மன நோய்களில் நிபுணத்துவம் பெற்ற ஒரு மருத்துவர். 80 வயதுடையவர்களுக்கான ஒரு "அதிர்ஷ்டமான" வாழ்க்கையின் ரகசியங்களை அவர் 44 வாக்கியங்களில் சுருக்கமாகக் கூறியுள்ளார், அவை கீழே பட்டியலிடப்பட்டுள்ளன:

1. தொடர்ந்து இயங்கிக்கொண்டே இருங்கள்.

2. கோபம் வரும்போது ஆழமாக மூச்சு விடுங்கள். (deep breathung) 

3. உங்கள் உடல் இறுகிப் போகாதபடி போதுமான உடற்பயிற்சி செய்யுங்கள்.

4. கோடை காலத்தில் ஏர் கண்டிஷனர் பயன்படுத்தும்போது அதிக தண்ணீர் குடியுங்கள்.

5. டயப்பர்கள் நடமாட்டத்தை அதிகரிக்க உதவுகின்றன.

6. நீங்கள் எவ்வளவு அதிகமாக மென்று சாப்பிடுகிறீர்களோ, அவ்வளவு அதிகமாக உங்கள் மூளையும் உடலும் சுறுசுறுப்பாக இருக்கும்.

7. ஞாபக மறதிக்குக் காரணம் வயதல்ல, மூளையைப் பயன்படுத்தாததே ஆகும்.

8. அதிகப்படியான மருந்துகளை உட்கொள்ளத் தேவையில்லை.

9. இரத்த அழுத்தம் மற்றும் சர்க்கரையை தேவையில்லாமல் குறைக்கத் தேவையில்லை.

10. தனியாக இருப்பது தனிமையல்ல; அது அமைதியாக நேரத்தைச் செலவிடுவது.

11. சோம்பல் ஒரு அவமானமல்ல.

12. ஓட்டுநர் உரிமத்திற்காக பணம் செலவழிக்கத் தேவையில்லை (முதியோர்கள் தங்கள் உரிமங்களைத் திரும்ப ஒப்படைக்க ஜப்பானில் ஒரு பிரச்சாரம் நடந்து வருகிறது).

13. உங்களுக்குப் பிடித்ததைச் செய்யுங்கள்; பிடிக்காததைச் செய்யாதீர்கள்.

14. இயற்கையான ஆசைகள் முதுமையிலும் நீடிக்கின்றன.

15. எந்தச் சூழ்நிலையிலும், எல்லா நேரமும் வீட்டிலேயே உட்கார்ந்திருக்க வேண்டாம்.

16. உங்களுக்குப் பிடித்ததைச் சாப்பிடுங்கள்; லேசான உடல் பருமன் நல்லது.

17. எல்லாவற்றையும் கவனமாகச் செய்யுங்கள்.

18. உங்களுக்குப் பிடிக்காதவர்களுடன் பழக வேண்டாம்.

19. எல்லா நேரமும் தொலைக்காட்சி பார்க்க வேண்டாம்.

20. நோயுடன் போராடுவதற்குப் பதிலாக, அதனுடன் வாழக் கற்றுக்கொள்ளுங்கள்.

21. "வண்டி மலைக்குச் சென்றதும், பாதை தெரியும்" - இது முதியோருக்கான மகிழ்ச்சியின் மந்திரச் சொல்.

22. புதிய பழங்கள் மற்றும் சாலட்களைச் சாப்பிடுங்கள்.

23. குளியல் நேரம் 10 நிமிடங்களுக்கு மிகாமல் இருக்க வேண்டும்.  24. உங்களுக்குத் தூக்கம் வரவில்லை என்றால், உங்களை நீங்களே கட்டாயப்படுத்திக் கொள்ளாதீர்கள்.

25. மகிழ்ச்சியைத் தரும் செயல்கள் மூளையின் செயல்பாட்டை அதிகரிக்கின்றன.

26. நீங்கள் உணர்ந்ததைச் சொல்லுங்கள்; அதிகமாக யோசிக்காதீர்கள்.

27. கூடிய விரைவில் ஒரு "குடும்ப மருத்துவரைக்" கண்டறியுங்கள்.

28. அதிக பொறுமையுடனும் இருக்க வேண்டாம், அதிக பிடிவாதமாகவும் இருக்க வேண்டாம்; ஒரு "துணிச்சலான மூத்தவராக" இருப்பதும் தவறில்லை.

29. சில சமயங்களில் உங்கள் மனதை மாற்றிக்கொள்வது பரவாயில்லை.

30. வாழ்க்கையின் இறுதி கட்டங்களில், மறதி நோய் என்பது கடவுளின் ஒரு வரம்.

31. நீங்கள் கற்றுக்கொள்வதை நிறுத்தினால், நீங்கள் வயதாகிவிடுவீர்கள்.

32. புகழுக்காக ஏங்காதீர்கள்; உங்களிடம் இருப்பது போதுமானது.

33. அப்பாவித்தனம் முதியோருக்கானது.

34. ஒரு விஷயம் எவ்வளவு கடினமாக இருக்கிறதோ, அது அவ்வளவு சுவாரஸ்யமாக மாறும்.

35. சூரியக் குளியல் மகிழ்ச்சியைத் தருகிறது.

36. மற்றவர்களுக்குப் பயனளிக்கும் காரியங்களைச் செய்யுங்கள்.

37. இன்றைய நாளை வசதியாகச் செலவிடுங்கள்.

38. ஆசைதான் நீண்ட ஆயுளுக்கான திறவுகோல்.

39. மகிழ்ச்சியாக வாழுங்கள்.

40. எளிதாக சுவாசியுங்கள்.

41. வாழ்க்கையின் கோட்பாடுகள் உங்கள் கைகளிலேயே உள்ளன.

42. எல்லாவற்றையும் அமைதியாக ஏற்றுக்கொள்ளுங்கள்.

43. மகிழ்ச்சியானவர்களை அனைவரும் நேசிக்கிறார்கள்.

44. ஒரு புன்னகை நல்ல அதிர்ஷ்டத்தைத் தருகிறது.

வயதாவதென்பது ஒரு வரம்பு அல்ல - அது ஒரு வரம். சரியான கண்ணோட்டத்துடனும் தினசரி பழக்கவழக்கங்களுடனும், 60 வயதுக்கு பிந்தைய ஆண்டுகள் உங்கள் வாழ்க்கையின் மிகவும் பயனுள்ள ஆண்டுகளில் சிலவாக இருக்கலாம். வயதாவதை பயத்துடன் அல்லாமல், கருணையுடனும், நன்றியுடனும், டாக்டர் வாடா தாராளமாகப் பகிர்ந்துகொண்ட ஞானத்துடனும் ஏற்றுக்கொள்வோம்.

 = = = = = = = = = =