குளிக்கிற நிலவுக்கு முதுகுல அரிக்குது...

 

"அது ஏன்டா எப்பவும் முதுகுல கைக்கு எட்டாத தூரத்துலயே அரிக்குது?  மேலேயிருந்து ட்ரை பண்ணினாலும் எட்டலை, கீழேயிருந்து ட்ரை பண்ணினாலும் எட்டலை!  கரெக்ட்டா நடு சென்டர்ல அரிக்குது. கொஞ்சம் சொறிஞ்சு விடேன்.."

"அதே ரீஸன்தான்பா..   கை எட்டாததால அங்க மட்டும் சரியா தேச்சு குளிக்க மாட்டேங்கறே.."

"ஏதாவது சொல்லு..   சரி கொஞ்சம் சொறிஞ்சு விடேண்டா..   அரிக்குது ரொம்ப..  குளிக்கும்போது அம்மாவை முதுகு தேச்சு விடுன்னாலும் 'பசங்களை வச்சுக்கிட்டு சரஸமா'ன்னு  தொடப்பத்தைத் தூக்கறா...   சரசமாடவாடா கூப்பிட்டேன்..  சீக்கிரம் வா..  கொஞ்சம் அந்த சீப்பை எடுத்து.."

"குளிக்கிற நிலவுக்கு முதுகுல அரிக்குது கைகொடு" என்று பாடும் அனுவுக்கு கமலின் உதவி!

"நை நை ங்காதப்பா..   ஆபீஸ் கால் பேசிக்கிட்டிருக்கேன்.  சொறிஞ்சு விடு சொறிஞ்சு விடுன்னு..    என்ன நினைப்பாங்க?"

"ஏண்டா அவர்களுக்கெல்லாம் அரிக்காதா?"

"சும்மா கம்முனு இருப்பா..  அந்தாண்ட போ..  அம்மாவக் கேளு"

"அம்மாவைத்தானே?  அடப்போடா...  ஏண்டி..  ச்சே.. ஏன்பா....  இங்கே முதுகு சொரிய ஒண்ணு வாங்கி வச்சிருந்தேன் பார்த்தியா?"

"ஆமாம்..  எனக்கு அதுதான் வேலை..  இன்னும் வாஷிங் மெஷின் போடல..  நேத்து காயப்போட்டு எடுத்து வச்ச துணிய மடிக்கல...   முதுகு சொரியணுமாக்கும் முதுகு...?"

"இவங்க அப்பாவும் இப்படிதான்..  முதுகை  சொறி,காலை மிதின்னு..  அப்பாவுக்கு பிள்ளை தப்பாம பொறந்துருக்கு..."

".பாவம்மா.  அப்பாவை ஒண்ணும் சொல்லாத.."

"நான் கால் மிதிக்கச் சொல்லி எத்தனை வருஷமாச்சு..  இப்பல்லாம் கேக்கறதே இல்லை.  முதுகுதான்...   அதுவும் எப்பவாவதுதானே?  கொஞ்சம் வாடா..."

".போப்பா..  நீ போதும்னே வேற சொல்ல மாட்டே...  இங்கேயிருந்து கால் பேசவே முடியலை..  நான் லாப்டாப்பை எடுத்துக்கிட்டு ரூமுக்கு போறேன்.."

ச்சே..  வச்சிருந்த சொரியானையும் காணோம்..  யாரும் உதவிக்கும் வர மாட்டேங்கறாங்க..  அர்பன் ஆப் ல முதுகு சொரிய வருவாங்களான்னு கேட்டுப் பார்க்கணும்!...

==============================================================================================

விகடன் 2008 இதழில் சுவாரஸ்யமாக ஒரு தலையங்கம்...  நம்ம போலீஸ்ல சிலபேர் அப்பவே அப்படிதான்!

வணக்கம்

சமீபத்துச் சம்பவங்கள் சிலவற்றைப் பாருங்களேன்..!

ரோந்து போய்க்கொண்டு இருந்த கோவை போலீஸாரைக் கட்டிப்போட்டு துப்பாக்கியைப் பறித்துக்கொண்டு ஓடியது ஒரு கும்பல். இது சம்பந்தமாக ஒரு ஆசாமியைப் பிடித்து, 'ராஸ்கல்! எப்படிடா கொள்ளை அடிச்சீங்க?" என்று போலீஸார் மிரட்ட... அவனும் பயபக்தியாக கொள்ளை ஸ்தலத்துக்கு கூட்டிச் சென்று நடித்துக் காட்டினான். 'இந்தப் பக்கமா வந்தோமா... இங்கே கட்டிப் போட்டோமா... இதோ, இந்தச் சுவரைத் தாண்டிக் குதிச்சு... இப்படித் தான் ஓடினோம்...' என்றபடியே விட்டான் ரேஸ்! போனவன் போனவனே..!

அடுத்ததும் கோவை குசும்புதான்... கிராமத்தில் ரெய்டு போன போலீஸ், 'எங்கெல்லாம் ஊறல் பானை புதைச்சிருக்கு? யாராவது வந்து அடையாளம் காட்டுங்க!' என்று மிரட்டியது. ஊர்க்காரர்கள் பயந்து நடுங்க... ரொம்பவே உதறிய ஒருவனை வம்படியாகக் கூட்டிப் போனார் கள். முதலில் அலையவிட்டவன், கடைசியாகக் காட்டிய சில இடங்களில் ஊறல் பானை இருக்கவே செய்தது! அதையெல்லாம் உடைத்துவிட்டு, அந்த ஆளையும் வழியனுப்பிய போலீஸ் கம்பீரமாக ஊருக்குள் வர... 'அதெல்லாம் சரி சார்... சாராயம் காய்ச்சறவனைக் கூட்டிக்கிட்டுப் போனீங் களே... அவன் எங்கே?' என்று ஊரார் கேட்டபோதுதான், போலீஸுக்கு தங்கள் 'திறமை' புரிந்தது!

திண்டுக்கல்லிலும் திண்டாட்டம்... டிமிக்கி கொடுத்த இரு குற்றவாளிகளை நைஸாகப் போய் பிடிப்பதற்காக மஃப்டி உடையில் போனது போலீஸ். மாறுவேஷ போலீஸை மறுநிமிஷமே கண்டுபிடித்துவிட்ட குற்றவாளிகள், 'ஐயையோ... யாரோ எங்களைக் கடத்த வர்றாங்க!' என்று கூச்சல்போட... ஊரே கூடி போலீஸுக்கு பரேடு நடத்திவிட்டது!

இது எப்படி இருக்கு?

சமீபத்தில் சிக்கிய மயக்க பிஸ்கட் ரயில் திருடர்களையும் வழக்கப்படி 'நடித்துக்காட்ட'ச் சொன்னதாகச் செய்தி வந்தது. நல்லவேளை அவர்கள் பிஸ்கட் ஊட்ட... போலீஸ் 'ஆ' காட்ட... இன்னொரு கூத்து அரங்கேறாமல் போனதே!

என்னங்க... 'என்னை வெச்சி காமெடி கீமெடி பண்ணலியே..?" என்று வடிவேலு குரல் கேட்குதா..?

என்றும் உங்களுக்காக,

12/03/2008  

பா.சீனிவாசன்,

பதிப்பாளர்.

===================================================================================

குறுக்கெழுத்துப் போட்டி  - கன்னி முயற்சி!  மிகவும் எளிமையாக அமைந்திருப்பதை நினைத்துக் கொண்டிருக்கிறேன்.  உண்மையா இல்லையா என்று இன்று தெரிந்து விடும்!

இடமிருந்து வலம் 

1 எம் ஜி ஆர் படம் வலி போய்விட்டது. (4)

2. கவுண்டமணி பாஷை (4)

3. கொனஷ்டை என்றும் சொல்லலாம்.

4. பயிர்கள் வளரத் தேவை (2)

9. தாயின் வயிற்றில்... (2)

,

மேலிருந்து கீழ்

1. மேற்குத் தொடர்சி மலை (5)

5. ஷோபா பற்றிய படம் என்பார்கள் முதல் வார்த்தை மட்டும் .  (5)

6. கழகத்துக்கு முன் வார்த்தையில்  க் அதிகம்! (5)

7. புளிப்பு (2)

8.  கள்ளி

விடை (தேவைப்பட்டால்)  'திங்க' பதிவில்....!

=======================================================================================

கொஞ்சம் கேள்விப்பட்ட கதைதான்.  அல்லது படித்த கதை?  கதையல்ல, நிஜம்!

====================================================================================

இது முன்பு திருமதி சுஜாதா யு டியூபுக்கும், தினகரனுக்கு கொடுத்த பேட்டியிலிருந்து முற்றிலும் மாறுபட்டது.  இது அவர் மறைந்த உடனேயே விகடனுக்கு கொடுத்த பேட்டி.  சுஜாதா நினைவு நாளன்று ஃபேஸ்புக்கில் பகிர்ந்திருந்தேன்.

'சுஜாதா பற்றி சுஜாதா!'

 "சாயங்காலம் ஏழு மணியில இருந்து காலைல ஏழு மணி வரை ஒரு லிட்டர் தண்ணீர் தான் குடிச்சிருப்பார். ஆனா 200 மில்லிதான் வெளியேறித்து. 800 மில்லி உடம்புலயே தங்கிடுத்து. ஆஸ்பத்திரிக்கு ஆம்புலன்ஸ்ல கூட்டிப் போனோம். இதுக்கு முன்னாடிலாம் சந்தோஷமா ஆஸ்பத்திரிக்கு வர்றவர், இந்தத் தடவை ஏனோ .மாட்டேன்னு அடம் பண்ணார்.   அட்மிட் பண்ணினதும் தூங்கிண்டே இருந்தார். என்ன கேட்டாலும், 'ஊம்... ஊம்!'னு மட்டும்  சொன்னார்.  திடீர்னு  'நீ யாரு?'ன்னு கேட்டார். 'ஏன் இப்படிப் பேசுறீங்க.. என்ன பண்றது சொல்லுங்கோ!'னு நான் பதறி, டாக்டர்களை அழைச்சுண்டு வந்தேன். வாய் கோணித்து.. ஸ்ட்ரோக்குன்னாங்க, கை வரலைன்னதுமே, 'ஐ யம் ட்ராப்டு, எனக்கு இதெல்லாம் புடிக்கலை. வீட்டுக்குக் கொண்டு போ. இனி என்ன இருக்கு சொல்லு'னு புலம்ப ஆரம்பிச்சுட்டார். "அப்டிலாம் சொல்லாதேள். நான் இருக்கேன்ல... நீங்க சொல்லச் சொல்ல... நான் எழுதித் தர்றேன்"னேன். அவருக்குக் கேட்கலியா, கேட்க விரும்பலையான்னு தெரியலை!

ஒரு நிமிஷம்கூட அவரை விட்டுட்டு இருந்ததில்லை. நன்னாத்தான் பார்த்துண்டேன். அவருக்கே அவருக்குனு பார்த்துப் பார்த்துச் சமைப்பேன். ஆனாலும் தப்பிச்சு ஓடிப் போய் எங்காவது போண்டா தின் னுட்டு வந்துருவார். கேட்டா, 'எத்தனை நாள்தான் உப்புச்சப்பில்லாமச் சாப்புடுறது. இந்த 75 கலோரி என்னை ஒண்ணும் பஸ்பமாக் கிடாது"னு சிரிப்பார். நல்ல மனுசன். என்னை நல்லாப் பாத்துக்கிட்டார்.

சின்ன வயசுல எல்லாம் அவ்வளவா காசு பணம் வரலை. ஆனா, ரிட்டயர் ஆனப்புறம் ரொம்ப ஷேமமாப் பார்த்துக்கிட்டார். என்னை ஜப்பானீஸ் கிளாஸ்லாம் சேர்த்துவிட்டார். அங்க சின்னச் சின்னப் பொண்ணுங்கள்லாம் நிறைய மார்க் வாங்குவா. இதைச் சொன்னா, அவாகூட நீ எப்படிப் போட்டி போடலாம். அவாளுக்கெல்லாம் யங் ப்ரைன். உனக்குக் கொஞ்சமே கொஞ்சம் வயசாயிடுத்து இல் லியான்னுவார். அவர் அளவுக்கு எனக்கு பிராட் மைண்ட் கிடையாது. ஒருவேளை அவர் அளவுக்கு இன்டெலிஜென்ட்டா இருந்தா, எனக்கும் பிராட் மைண்ட் இருந்திருக்கும். அவருக்கு உடம்பு படுத்த ஆரம்பிக்கவும் நான் கிளாஸுக்குப் போறதில்லை. அப்படியும் நடுவில் ரெண்டு நாள் அனுப்பினார். இனி எனக்கு என்ன இருக்கு, ஆனாலும் போகணும். அவர் இருந்தா, அப்படித்தான் சொல்வார். ஆனா, இப்போ அவர் இல்லையே!

எந்த நேரமும் ஏதாவது படிச்சுண்டு, பார்த்துண்டே இருப்பார். படுக்கை முழுக்க புஸ்தகங்களா இருக்கும். அதுக்கு இடையில இடம் பண்ணிண்டு படுத்துக்குவார். நடுராத்திரியில நாலு புஸ்தகங்களை மாத்தி மாத்திப் படிச்சுண்டு இருப்பார். ராத்திரி ரெண்டு மணிக்கு எந்திரிச்சு கிரிக்கெட் பார்த்துண்டு இருப்பார். 'உடம்பைப் பார்த்துக்காம இந்த அப்பா ஏன் இப்படிப் பண்றார்?''னு பசங்க கோச்சுக்குவாங்க. 'இப்படில்லாம் இல்லேன்னாதான் அவருக்கு உடம்பு படுத்தும்'னு சொல்வேன்.

இதுக்கு முன்ன ஹாஸ்பிடலுக்குப் போனப்பல்லாம் கொஞ்ச நேரம் இருப்பார், வந்துருவார். அப்புறம் அதைப் பத்தியே ஒரு கதை எழுதிடுவார். ஆனா, இப்ப அவர் இறந்த கதையை யார் எழுதுறது..?

ஒரு தடவை அவருக்கு மாத்திரை கொடுக்க லேட் ஆயிடுத்து. பதறி ஓடி வந்து கொடுத்தா. 'ஒரு வாய் மாத்திரை சாப்பிடலேன்னா, நான் செத்துட மாட்டேன். நீ ஏன் வொர்ரி பண்ணிக்கிற..?'ன்னாரு.

தண்ணி, பேப்பர், ரிமோட், சாப்பாடுனு எது கொடுத்தாலும், சின்னதா 'தேங்க்ஸ்' சொல்வார். 'எதுக்கு என்கிட்டயும் தேங்க்ஸ்?'னு கேட்டா. உன்கிட்டயும் தேங்க்ஸுக்கு ஒரே அர்த்தம்தானே!'னு சிரிப்பார்.

ஐயோ! ஐ ஃபீல் கில்ட்டி... நான் அவரை இன்னமும் நல்லபடியா கவனிச்சுண்டு இருந்திருக்கணும்! என்னை எப்படில்லாம் பார்த்துண்டார். என் பேர்ல எழுதுறதுக்கு அவருக்கு எவ்வளவு பெரிய மனசு இருந்திருக் கணும். நான் பதிலுக்கு அவருக்கு என்ன செஞ்சுருக்கணும். நான் இருக்குற வரை, அவரை போஷிச் சிருக்க வேண்டாமா..!

'பாடி எப்ப வீட்டுக்கு எடுத்துட்டு வருவேள்?”னு ஒருத்தர் கேட்டா. ஆமா, அவர் இப்ப 'பாடி' ஆயிட் டாருல்ல... இனி அவர் வெறுமனே 'பாடி' மட்டும்தானா..? அவர் என் சுஜாதா இல்லையா..?!"

சுஜாதாவின் இந்தக் கேள்விக்கு அந்த 'சுஜாதா' பதில் சொல்லி இருக்கலாம்!

-கி.கார்த்திகேயன் - ஆனந்த விகடன் -  ஆனந்த விகடன் - 12- 03 - 08

===================================================================================

ஜெ... யின் ஆரம்ப கால ஓவியங்கள் சில..

==========================================================================================

லக்ஸ் விளம்பரத்தில் ஜெயலலிதா..  இன்னொரு ஆரம்பகால ஜெ...

=========================================================================================

இதுதான் ராஜவாழ்க்கை -  முகில் 

வரலாறு 

கொக்கரக்கோ...கோ என சேவல் சாதகம் பண்ணும் அதிகாலையில் ஒரு மகாராஜா என்ன செய்துகொண்டிருப்பார்? சூரிய நமஸ்காரம், யோகா, உடற்பயிற்சி... சேச்சே, ஏதோ ஒன்று இரண்டு 'உத்தம' மகாராஜாக்கள் அப்படி வேண்டாத வேலை செய்திருக்கலாம். அசல் ..-9001 மகாராஜா எனப்படுபவர், அந்த நேரம் குப்புறப்படுத்து, குதூகலமாகத் தூங்கிக் கொண்டிருப்பார் அல்லது நள்ளிரவு எல்லாம் குடித்துக் கொட்டமடித்துவிட்டு அப்போதுதான் தூங்கவே ஆரம்பித்திருப்பார்.

பஞ்சாபின் ஜிந்த் சமஸ்தானத்தைச் சேர்ந்த மகாராஜா ரன்பிர் சிங் ராஜேந்திர பகதூர் இரண்டாம் வகை. விடிய விடிய முடிந்தவரை குஜால் கூத்தடித்துவிட்டு, விடியலில்தான் படுக்கையில் விழுவார். ஆனால், அவர் தூங்க ஆரம்பித்த நேரத்தில் இருந்து பணியாளர்களுக்கு கிலி பிடித்துவிடும். எப்போது எழுவார் எனத் தெரியாது. எழும் நேரத்தில் இன்னென்ன விஷயங்கள் இம்மி பிசகாமல் சரியாக இருக்க வேண்டும் என்பது ராஜ கட்டளை.

என்னென்ன?

குறிப்பிட்ட பணிப் பெண்கள், குறிப்பிட்ட இடங்களில் அமர்ந்து பதமாக அவரது கால்களைப் பிடித்துவிட்டுக்கொண்டிருக்க வேண்டும். சில குறிப்பிட்ட பணிப்பெண்கள் அவரது தலைமாட்டில் நின்று, குறைவான வால்யூமில் கோரஸாக சில பாடல்களை (மட்டுமே) பாடிக்கொண்டிருக்க வேண்டும். ஒரு குறிப்பிட்ட பணிப்பெண், எவ்வளவு மணி நேரமானாலும் சரி, 'சூடான' தேநீர்க் கோப்பையோடு காத்திருக்க வேண்டும்.

ஜிந்த் மகாராஜா ரன்பீர்சிங்

இந்தப் பணிப்பெண்கள் ஆள் மாறவோ, இடம் மாறவோ கூடாது. மகாராஜா பள்ளியெழுச்சி ப்ரேக்ஃபாஸ்ட்டில் நிகழலாம்; லன்ச்சில் அமையலாம்; அல்லது சாவகாசமாக சாயங்காலம் நிகழலாம். வேறு வழி இல்லை, பணிப்பெண்கள் தேவுடு காத்தே தீர வேண்டும்... ஆறாத தேநீருடன். போனால் போகிறது என மெதுமெதுவாகக் கண்கள் திறக்கும் ரன்பிர் சிங், தன் பார்வையால் சுற்றியிருக்கும் பணிப்பெண்களை நோட்டமிடுவார். அவர்கள் என்னதான் களைப்பாக இருந்தாலும் அப்போது பூத்த மலரைப்போல, வளையோசை கலகல மெட்டில் புன்னகைத்தே தீர வேண்டும். மகாராஜா எழுந்து உட்காரும் வேளையில் நொடி பிசகாமல் ஆவி பறக்கத் தேநீர் நீட்டப்பட வேண்டும்.

ரன்பிர் சிங், தேநீரை உறிஞ்ச ஆரம்பிக்கும் வேளையில், அரண்மனை ஆஸ்தான ஜோதிடர் பண்டிட் கரன் சந்த், மகாராஜாவின் உச்சி குளிர நான்கைந்து நிமிடங்கள் வாழ்த்தித் துதிபாடிவிட்டு, அன்றைய தினப்பலன்களையும் சொல்வார். 'நான்கில் கேது, ஒன்பதில் குரு இருவர் பார்வையும் நீசபங்க ராஜயோகப் பார்வையாக இருப்பதால், சத்ரு ஜெயம், ஆரோக்கிய விருத்தி, அனுகூலத் திருப்பங்கள் உண்டாகும்...' இப்படி ரன்பீர் சிங்கின் பள்ளியெழுச்சிப் பொழுதில் ஏதாவது ஓரிரு குறைகள் நேர்ந்துவிட்டால் அவ்வளவுதான், அன்றைக்கு அரண்மனைப் பணியாளர்களுக்கான ஒட்டுமொத்த தினப்பலன் மரண பயம்.

இன்னொரு நவாப் இருந்தார். அவரது காலைப் பொழுதே மிகவும் வித்தியாசமாகத் தொடங்கும். காலை எழுந்ததுமே ஒப்பனை. அதுவும் இப்படி எல்லாம்கூட ஒப்பனை செய்துகொள்ள முடியுமா என பெண்களே வெட்கி, வெம்பி, வேதனைப்பட்டு தலைகுனியும் அளவுக்கு, தலை முதல் அடி வரை உச்சபட்ச ஒப்பனை. ஆம், அந்த நவாப் ஒப்பனை வெறியர். அவர் பெயர் சாதிக் முகமத் கான் நான்காம் அப்பாஸி. இந்திய சமஸ்தானங்களில் ஒன்றாக இருந்த பஹவல்பூரை (தற்போது பாகிஸ்தானில் ஒரு மாவட்டம்) 1866 - 1899 காலத்தில் ஆட்சி செய்தவர். 

காலைக்கடன்களை எல்லாம் கடகடவென முடித்துவிட்டு, ஆளுயரக் கண்ணாடி முன் சென்று நவாப் நிற்கும் வேளையில், சகல சௌந்தர்ய ஏற்பாடுகளுடனும் 'பல பேர் கொண்ட ஒப்பனைக் குழுவினர்' தயாராக இருக்க வேண்டும். அங்கே  ஒப்பனைப் படையெடுப்பு ஆரம்பமாகும். முதலில் உடையலங்காரம். ரகரகமான மஸ்லின் கால்சட்டைகள், வகைவகையான முழுநீள பட்டு ஜிப்பாக்கள், தகதகவென வெல்வெட் மேலங்கிகள். அவற்றில் நவாப் தேர்ந்தெடுக்கும் உடை, அவர் மேலேறும். அவருக்குச் சற்றே நீண்ட கூந்தல். ஆக, உடையலங்காரத்துக்குப் பின் சிகை அலங்காரம், அடுத்து நகை அலங்காரம், பின் மிகை அலங்காரம். நவாபுக்குத் திருப்தி உண்டாகும் வரை ஒப்பனை மணிக்கணக்கில்கூட நீளும். ஒரு சில சமயங்களில் ஒப்பனை செய்யும் பணியாள், களைப்பில் மயங்கி விழுந்ததும் உண்டு. 

நவாப் அசரவே மாட்டார் கிண் என்று நிற்பார். அவர் உடலில் எங்கு எல்லாம் அணிய முடியுமோ அங்கு எல்லாம் நகை ஜொலிக்கும். அத்தனையும் விதவிதமான, நவாபுக்காகவே வடிவமைக்கப்பட்ட தனித்துவ ஆபரணங்கள். இறுதியாக, வைரமும் மரகதமும் பதிக்கப்பட்ட ஒன்பது பவுண்ட் எடையுள்ள தங்கக் கிரீடம் தலையேறும். ஏதாவது அவசர காரியம் என்றாலும்கூட, பல மணி நேர ஒப்பனையில் திருப்தி ஏற்பட்ட பிறகே நவாப் நகர்வார். அப்படிப்பட்ட அதகள் நவாப், தான் இரவில் படுத்து உறங்குவதற்காகவே பிரத்யேக டிசைனில் கட்டில் ஒன்றை பாரீஸில் ஆர்டர் செய்தார். அந்தக் கட்டில் தயாராகி வருவதற்கு முன்பாக, வெவ்வேறு அரண்மனைகளில் எத்தனை விதமான கூத்துகள் எல்லாம் நிகழ்ந்தன என, ஓர் எட்டு பார்த்துவிட்டு வரலாம்.

விகடன் 2016 தீபாவளி மலரிலிருந்து.   

இது பின்னர் 'அகம், புறம், அந்தப்புரம் என்னும் பெயரில் பெரிய புத்தகமாக வந்ததது.  எங்கள் வீட்டு கிரஹப்ரவேசத்துக்கு என் மாமா KGY இந்தப் புத்தகத்தை எனக்கு பரிசளித்தார்.  1000 பக்கஙகள்.