"திங்கக்கிழமை : பார்லி உப்புமா - கீதா ரெங்கன் ரெஸிப்பி

 

 

பார்லி உப்புமா (காய்கள் கலந்த உப்புமா)

பார்லி

ஆயுர்வேதத்தில் மிகவும் பரிந்துரைக்கப்படும் தானியம்.

உடல் எடையைக் கட்டுப்பாட்டில் வைத்திருக்க உதவும்.

நார்ச்சத்து உள்ள தானியம்

Low glycemic - மெதுவாக, குறைந்த சர்க்கரையை உயர்த்தும்

குடல் ஆரோக்கியத்திற்கு உதவும்

கொழுப்பைக் குறைக்க உதவும்.

இதய நலத்திற்கும் நல்லது.

கணையம், கல்லீரல், சிறுநீரக ஆரோக்கியத்திற்கும் நல்லது

பார்லியை முழு தானியமாகவோ, உடைத்தோ, ரவையாகவோ பயன்படுத்தலாம். கடைகளில் பார்லி ரவை விற்கப்படுகிறது ஆனால் எல்லாக் கடைகளிலும் கிடைப்பதில்லை. .

எனவே நான் முழு தானியமாகவோ இல்லை உடைத்தோ பயன்படுத்துகிறேன். பார்லியை முழு தானியமாக சாதத்திற்குப் பதில் பயன்படுத்துவதும் உண்டு நம் வீட்டில்.

பார்லியில் இட்லி, தோசை செய்யலாம் அடிக்கடி செய்வதுண்டு நம் வீட்டில். அடுத்த முறை செய்யும் போது படங்கள் எடுத்துப் போடுகிறேன்.

இம்முறை உடைத்த பார்லியில் உப்புமா செய்முறை.

முழுதானியத்தை மிக்ஸியில் போட்டு இரு சுற்று சுற்றினால் உடைந்துவிடும். இல்லைனா ரவையாகவும் கூட செய்து கொள்ளலாம்.

சலித்தெடுத்த பொடி

உடைத்த தானியத்தை தண்ணீரில் அலசி தண்ணீரை வடித்து...

உடைத்த தானியத்தை சல்டையில் போட்டு சலித்துக் கொண்டு தானியத்தை மட்டும் எடுத்துக் கொள்ள வேண்டும். சலித்தெடுத்த பொடியை இட்லி தோசை எதற்கேனும் பயன்படுத்திக் கொள்ளலாம். அல்லது பார்லி தண்ணீர் போட்டுக் குடிக்கலாம். (கணையம், கல்லீரல், சிறுநீரகத்திற்கு நல்லது)

உடைத்த தானியத்தை தண்ணீரில் அலசி தண்ணீரை வடித்துவைத்துக் கொள்ளவும்.

உங்களுக்குப் பிடித்தமான காய்களைச் சிறிதாக நறுக்கிக் கொள்ளவும். பீன்ஸ், குடைமிளகாய், தக்காளி, வெங்காயம் காரட் எடுத்துக் கொண்டேன்.

உப்புமாவிற்குத் தாளிப்பது போல் சிறிது எண்ணையில் எல்லாம் தாளித்து பச்சைமிளகாய், இஞ்சி, கறிவேப்பிலை எல்லாம் போட்டு வெங்காயத்தைச் சேர்த்து வதக்கிக்கோங்க.

சற்று வதங்கியதும் காரட், பீன்ஸ், போட்டு வதக்கிவிட்டு தக்காளி சேர்த்து வதக்கி...

கடைசியில் குடை மிளகாயும் சேர்த்து சற்று வதக்கியதும் பார்லியை சேர்த்து நன்கு புரட்டிக் கொடுக்கவும்.

முழு தானியம் என்றால் தண்ணீரில் அலசி 2 மணி நேரம் ஊற வைச்சுடுங்க. வேக வைக்க, ஒரு கப் பார்லிக்கு 3 கப் தண்ணீர்.

உடைத்த பார்லியாக இருந்தால், ஒரு கப் பார்லிக்கு பொல பொலன்னு செய்ய 2.5 கப். கொஞ்சம் ஒட்டிக் கொண்டு இருக்கலாம் என்றால் 3 கப் தண்ணீர்.

பார்லி ரவை என்றால் 2 - 2.5 கப் தண்ணீர். எந்தக் கப்பால் பார்லியை அளக்கிறோமோ அந்தக் கப்பால் தண்ணீரின் அளவு.

தண்ணீர் சேர்த்துக் கொதிக்கும் போது தேவையான உப்பைச் சேர்க்கவும். மஞ்சள் பொடியும் விருப்பமிருந்தால் சேர்க்கலாம். நான் சேர்ப்பதுண்டு.

பார்லி ரவையாக இருந்தால் வாணலியிலேயே ரவா உப்புமா செய்வது போல் செய்துவிடலாம், மூடி போட்டு சிம்மில் வைத்து அவ்வப்போது கிளறிக் கொடுத்து செய்துவிடலாம்.

உடைத்ததாக அல்லது முழு தானியமாக இருந்தால் வாணலியிலேயே கிளறிடலாம். ஆனால் அப்பாவுக்காக, நன்றாகக் கொதித்து தண்ணீர் வற்றத் தொடங்கிய போது பாத்திரத்தில் கொட்டி குக்கரில் வைத்து 3-4 விசில் விட்டு எடுத்துவிட்டேன். ரிஸ்க் வேண்டாம் என்று.

பார்லி உப்புமா ரெடி.

டிப்ஸ் - பார்லி தானியத்தில், கலந்த சாதம் செய்வது போல், காய் சாதம் செய்வது போல் செய்யலாம். கதம்ப சாதம், சாம்பார் சாதம், பிஸிபேளாபாத், தயிர் சாதம் என்று வழக்கமான அரிசியில் செய்வது போல் எல்லாம் செய்யலாம்.

=================================================================================

கொஞ்சம் ஜோக்ஸ்...   

பின்னே சேர்த்து வைத்திருப்பதை என்னதான் செய்ய!