"திங்க"க்கிழமை : அடைகுடைமிளகாய்! (ஸ்டஃப்ட் கேப்ஸிகம்)

லாக்டவுன் காலங்களில் ஒருநாள் செய்த ஒரு பக்கப்பண்டம்!  அதுதாங்க ஸைட் டிஷ்!  

அடை குடைமிளகாய் என்று தமிழ்ப் 'படுத்தி'யிருப்பது போலதான் இதுவும்!  இது எல்லோரும் விதம் விதமாக நிறைய செய்கிறார்கள் என்று கேட்டு, பார்த்து, நானும் ஒருமுறை செய்து பார்க்க (சாப்பிட) ஆசை கொண்டேன்! 

கீதா ரெங்கனிடமும் டிப்ஸ் கேட்டுக்கொண்டு, என் மாமாவின் மருமகளிடமும் டிப்ஸ் கேட்டுக்கொண்டு ஒருநாள் முயற்சித்தது இது.

உள்ளே என்ன அடைப்பது என்பதில் நிறைய விருப்பங்கள், ஆப்ஷன்ஸ் இருந்தாலும் வீட்டில் எது இருக்கோ அதை வைத்தும், எது கொஞ்சம் சுலபமோ அதை வைத்தும் செய்தது!

உருளைக்கிழங்கை வேகவைத்து எடுத்து சிறுதுண்டங்களாக்கிக் கொண்டு வெங்காயம் நறுக்கிக்கொண்டு, பூண்டு பத்தைகளை முந்திரிப்பருப்பு போல சைஸ் செய்து கொண்டு, கேரட் துருவிக் கொண்டு, அப்புறம் என்ன இருக்கு என்று பார்த்து பீன்ஸ் கண்ணில் படவும் அதையும் நறுக்கிச் சேர்த்துக் கொண்டு....

புதினா இருக்கிறதா என்று பார்த்து, அது இல்லாமல், கறிவேப்பிலை, கொத்துமல்லி எடுத்து வைத்துக் கொண்டு...

பிரெட் துண்டங்களை வறுத்து எடுத்துக்கொண்டு...

பிரெட் தவிர எல்லாவற்றையும் வதக்கி, தனியாக வைத்து....

குடைமிளகாயை எடுத்து மேலே நறுக்கி, உள்ளிருப்பதைக் காலி செய்து கப் ரெடி செய்துகொண்டு...

அதை 'அவனி'ல் (அவனுக்கு தமிழ் என்ன?!!) வைத்து, கொஞ்சம் வதக்கிக்கொண்டு...

வெளியே எடுத்து, அதில் அந்த கலவையை நிரப்பி...

நறுக்கி வைத்திருந்த மூடிகளை அதன் மீது வைத்து ஜாக்கிரதையாய் மூடி..

ப்ரெஷர் பானில் வைத்து அவ்வப்போது திருப்பி, நன்றாய் வதங்கவைத்து, 

வெளியில் எடுத்து, மேலே பிரெட் துண்டுகளை வைத்து (முன்பே உள்ளேயும் ஒரு லேயர் வைத்திருக்கிறேன்)

சாப்பிடத் தயாரானோம்.  அதனுடன் சாதத்தில் கலந்து சாப்பிட வெங்காய வெந்தயக்குழம்பு.

நாங்கள் சாப்பிட்டு விட்டு கண்டுபிடித்ததை, என் மாமாவின் மருமகள் படம் பார்த்தே கண்டுபிடித்தார்.  

"மிளகாய் இன்னும் கூட கொஞ்சம் வெந்திருக்கவேண்டும் அண்ணா.."

ஆனாலும் மோசமில்லை!  நன்றாகவே இருந்தது.

=======

மின்நிலா தீபாவளி சிறப்பிதழ், எதிர்பாராத காரணங்களால் சற்று தாமதமாகிறது. 

புதன்கிழமை வெளியாகும். 

======