"திங்க"க்கிழமை : மாங்காய் சாம்பார், சேனை சீவல் (சிப்ஸ்) JKC - + உணவு – மாறிவரும் ரசனை - நெல்லைத்தமிழன்

மாங்காய் சாம்பார், சேனை சீவல் (சிப்ஸ்)

 JKC

வர வர இந்தப்பகுதியில், என்ன, எப்படி, எதை சமைப்பது என்று எழுதுவதில் ஒரு விவஸ்தை இல்லாமல் ஆகி விட்டது. ஐம்பது வருடமாக சாம்பார் செய்து சாப்பிடுபவர்களுக்கு சாம்பார் செய்வது பற்றி ஒரு பாடம் …பார்ப்பார்களா? !!!. பொறுங்க, இது 50 வருடம் சாம்பார் சாப்பிட்டும் சரவணபவன் ஹோட்டல் சாம்பாருக்கு சப்பு கொட்டுபவர்களுக்காக மட்டும்.

 மாறுதலுக்காக ஒரு மாங்காய் சாம்பார். மாறுதல்? …புலி இல்லா சாம்பார். சே …புளி இல்லா சாம்பார்.  

 30 நாள் 30 சாம்பார் செய்யும் நீங்கள் உங்களுக்கு பிடித்த சாம்பார் செய்ய தொடங்குங்கள். அதில் போடும் தான்களை நீக்கிவிட்டு சின்ன வெங்காயம், மாங்காய், தக்காளி மட்டும் சேர்த்து சாம்பார் செய்யுங்கள். புளி கரைசல் சேர்க்காதீர்கள். அவ்வளவு  தான். அதுதான் மாங்காய் சாம்பார். இந்த மாங்கா (சாம்பார்) மடையன் செய்த சாம்பார் பா(ப)டம் கீழே

டிரம்ப் அண்ணாச்சி என்னதான் மிரட்டினாலும் பருவகாலம் மட்டும் நான் மாறியே தீருவேன் என்று அடம் பிடிக்கிறது. மார்ச்சில் பூத்து ஏப்ரலில் காய்க்கும் பக்கத்து வீடு மாமரம் ஜனுவரியில் பூத்து பெப்ருவரியில் காய்க்க ஆரம்பித்துட்டுது. கிளை, காய் பாரம் தாங்காமல் ஒடிந்து விழ கொஞ்சம் மாங்காய்கள் எங்களுக்கும் கொடுத்தார்கள். வடுமாங்காய் செய்யும் வடு மாங்காயும் இல்லை, ஆவக்காய் செய்யும் அளவு முற்றலும் இல்லை. நடுத்தரம். நறுக்கி மிளகாய்ப்பொடி போட்டால் நாலு நாளைக்குத்தான் நன்றாக இருக்கும். ஆலோசித்ததில் புளி இல்லாமல் மாங்காய் தக்காளி போட்டு சாம்பார் வைத்தால் என்ன என்று தோன்றியது. அதனால் தான் இந்த சாம்பார்.  நன்றாகவே இருந்தது…. எனக்கு. 

 துவரம்பருப்பு, கட்டிப்பெருங்காயம், விளக்கெண்ணெய் ½ ஸ்பூன் சேர்த்து குக்கரில் வேக வைத்து  மசித்துக்கொள்ளவும். நான் துவரம் பருப்புடன் கொஞ்சம் மைசூர் பருப்பு எனப்படும் canadian lentils சேர்த்துக்கொள்வது வழக்கம். சின்ன வெங்காயம், பச்சை மிளகாய், மஞ்சள்பொடி, சாம்பார் பொடி, மிளகாய் பொடி, மல்லிப்பொடி, உப்பு சேர்த்து நெடி அடங்கும் வரை கொதிக்க விடவும். நெடி அடங்கியபின் கழுவிய மாங்காய் துண்டங்கள், தக்காளி துண்டுகள், கடைந்த பருப்பு,  வேண்டிய தண்ணீர் சேர்த்து கொதிக்க விடவும். மாங்காய் வெந்தபின் கடுகு, வற்றல் மிளகாய், வெந்தயம் அல்லது சீரகம், காயப் பொடி, தாளித்து இறக்கவும்.  அதிகம் கொதிக்க விட வேண்டாம், மாங்காய் கரைந்து விடும். 

 

என்ன கேரட் பற்றி சொல்லவே இல்லையே என்று கேட்கிறீர்களா? மேக்கப் போடும்போது கடைசியில் கன்னத்தில் ரோஸ் பவுடர் கொஞ்சம் போடுவது போல், கவர்ச்சிக்காக.   

சரி அடுத்து சேனை சீவல் செய்யலாம்.

சேனை சீவல்  

சேனை துண்டு ஒன்று எடுத்து தோல் சீவி சின்ன துண்டுகளாக நறுக்கி பஜ்ஜி சீவல் கட்டையில் பஜ்ஜிக்கு சீவுவது போல் சீவி எடுத்து தண்ணீரில் நன்றாக கழுவி, உலர்த்திக்கொள்ளுங்கள். 

 

வாணலியில் எண்ணெய்யில் பொறித்து எடுத்து உப்பு மிளகுதூள் பிரட்டி காற்று புகாத டப்பாவில் அடைத்து வைத்துக்கொள்ளவும். 

திப்பிச திலகம் கீதா மாமி இந்த திப்பிசத்திற்கு ஒரு செர்டிபிகேட் தருவாரா?   

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

திங்கள் - உணவு – மாறிவரும் ரசனை 

நெல்லைத் தமிழன்

சென்ற வாரத்தில் பானுமதி வெங்கடேஸ்வரன் மேடத்தின் “முட்டையில்லா சாக்லட் கேக்” பதிவிற்கு துரை செல்வராஜ் சாரின் ஒரு பின்னூட்டம் இவ்வாறு இருந்தது. 

அந்தக் காலத்தில் #₹%& கபே
என்று கடைகள்... சாப்பிடுவதற்கு மன நிம்மதி..

இப்போது டீக்கடையில் கூட முட்டை போண்டா
சிக்கன் பகோடா, பீப் வறுவல்....

எங்கெங்கு பார்த்தாலும் புலால் மயம்...

சைவ உணவு உண்போர்க்கு
மிகவும் கஷ்டம்..

ஹோட்டல் தொழில் வந்த ஆரம்ப காலத்தில் (என் நினைவிலிருந்து எழுதுகிறேன்) பெரும்பான்மையாக சைவ உணவகங்களே இருந்தன. அதிலும் பயணங்களின்போது பேருந்து நிறுத்தும் இடங்களிலெல்லாம் சைவ, அதிலும் பிராமணவகை உணவகங்களே இருந்தன. திருவள்ளுவர் போக்குவரத்துக்கழகம் ஆரம்பித்த புதிதில் (அதாவது நான் 77களில்) திருநெல்வேலிக்குப் பிரயாணம் செய்தபோது, வழியில் பேருந்து நிறுத்தும் இடத்தில் பிராமண பாஷையில் ‘பொங்கல் உப்புமா இட்லி தயார். கொத்ஸு உண்டு. சாப்பிட வாங்கோ’ என்று ஒருவர் கூவிக்கொண்டு வந்தது நினைவில் இருக்கிறது. நெல்லையிலும் என் அம்மா வழி உறவினர்கள் வீட்டிற்குச் சென்றால், அவ்வப்போது சந்திரவிலாஸிலிருந்து பேப்பர் ரோஸ்ட் வரும் (நியூஸ் பேப்பரின் மீது, இலையில் தோசையை வைத்து இரண்டடி நீளத்திற்குச் சுருட்டிக் கொடுப்பார்கள். சாம்பார் வாங்கிக்கொள்ள வீட்டிலிருந்து பாத்திரம் செல்லும்). பேப்பரில் சுருட்டி வருவதால்தான் பேப்பர் ரோஸ்ட் என்று நினைத்திருந்தேன். 

80களின் இறுதியில், 90களின் ஆரம்பத்தில் சரவண பவனும் பிராமணவகை உணவை சிறிது மேம்படுத்தி சைவ உணவு பாரம்பர்யத்தில் வழங்கிய உணவும் ரொம்பவே நன்றாக இருந்தது. திநகர் மற்றும் சுற்றுப்புறங்களில் கையேந்தி பவன்களும் சைவ உணவையே வழங்கிவந்தன. 77களிலிருந்தே கடைகளில் புரோட்டா கிடைப்பது சகஜமாக இருந்தது. கொஞ்சம் கொஞ்சமாக தோசை சாப்பிடும் ஆசை போய் புரோட்டா சாப்பிடும் ஆசை, கடைகளில் சாப்பிடும் சந்தர்ப்பம் கிடைக்கும்போது ஏற்பட்டது. 

என் நினைவில் 2000க்குப் பிறகுதான் உணவில் மாற்றங்கள் வர ஆரம்பித்தது. நமக்குத் தெரிந்த தலப்பாக்கட்டி போன்ற பிரியாணி வகை கடைகள் வர ஆரம்பித்திருந்தாலும் அங்கொன்றும் இங்கொன்றுமாக இருந்தன. 2005க்குப் பிறகு பிரியாணிக்கடைகள் ஆங்காங்கே வர ஆரம்பித்தன. தி.நகர் ரங்கநாதன் தெருவில் இரண்டு நல்ல உணவகங்கள் (சைவம்), பழக்கடை ஜூஸ் கடை, கரும்புச்சாறு கடைகள் இருந்தது போக, அதன் பிறகான காலகட்டங்களில் அசைவ பிரியாணிக் கடைகள் வர ஆரம்பித்தன. தற்போது பார்க்கும் இடங்களிலெல்லாம் பிரியாணி, அசைவ வறுவல்கள் கடை மிக அதிகம். 

பிரியாணிக்கடைகள் அதிகமாகும்போது வாடிக்கையாளர்களின் உணவு டேஸ்டும் மாறிவிடும். அதனால்தான் சரவணபவனில் மாற்றம் வந்தது என்று நினைக்கிறேன். கேடரர்களும் காலத்தின் மாறுதல்களுக்கு ஏற்ப நூடுல்ஸ், சைனீஸ் உணவு, பிரியாணி, ஃப்ரைட் ரைஸ் என்று மாறிவிட்டனர். 

சைவ உணவே பிரதானம் என்று இருப்பவர்களும் மாறிவிடக் கூடாதே என்ற கவலையில், சைவ இறால் தொக்கு, சைவ சிக்கன் ஃப்ரை போன்ற வெரைட்டிகளை வழங்கும் உணவகங்களும் கேடரர்களும் தற்காலத்தில் வர ஆரம்பித்துள்ளனர். 

சைவ உணவகங்களில் வரும் மாற்றங்களை கொஞ்சம் விவரித்து எழுதினால் சர்ச்சையாகிவிடும். தற்காலங்களில் உரிமையாளர்கள் மாறுகின்றனர். பிரபல சங்கீதா உணவக பிராஞ்சுகளின் உரிமையாளர்களும் மாறுகின்றனர். கோயில் நகரங்களில் கோயிலின் அருகிலேயே அசைவ உணவகங்கள் நிறைய வந்துவிட்டன. 

கோயில்களில் வெளியிலிருந்து உணவு தயாரித்து, பிரசாதம் என்ற பெயரில் கடை வைத்து விற்பனை செய்வது கடந்த எட்டு ஆண்டுகளாக, குறிப்பாக ஐந்து ஆண்டுகளாக அதிகமாகிவிட்டது. அதை வியாபாரம் என்ற அளவில் பார்க்கும் எண்ணம் வந்தே ஐந்து ஆண்டாகிவிட்டது. காரணம் ஒரு ஏலதாரர், மொத்தமாக ஒரு இடத்தில் தயார் செய்து, திருவரங்கம், மற்றும் சுற்றியுள்ள கோயில்களில் ப்ரசாதம் என்று விற்கும் தன்மை அதிகமாகிவிட்டது. திருப்பதியில் லட்டு பிரசாதம் கொடுக்கிறார்கள், ஒப்பிலியப்பன் கோயில் மற்ற கோயில்களில் புளியோதரை, சில கோயில்களில் சர்க்கரைப் பொங்கல், அனுமார் கோயில்களில் மிளகுவடை. ஒருவேளை பக்தர்கள் இதுக்காகத்தான் அந்தக் கோயிலுக்குச் செல்கிறார்களோ என்று நினைத்து, எல்லாக் கோயில்களிலும் லட்டு, புளியோதரை, சர்க்கரைப் பொங்கல், மிளகுவடை என்று சரமாரியாக இதனை வியாபாரமாக்கிவிட்டார்கள். 

இன்னும் சில வருடங்களில் டீ, காபி,  பிறகு சைவ பிரியாணியையும் பிரசாத ஸ்டால்களில் கொண்டுவந்துவிடுவார்கள் என்று தோன்றியது. நல்லவேளை தற்போது சைட் டிஷ் என்று சாம்பார் சட்னி, காய் தருவதில்லை. அதுவும் வந்துவிடுமோ?

இதனால் பெறப்படும் நீதி என்ன என்றால், காலத்துக்கு ஏற்றபடி எல்லாமே மாறும். அதனை நினைத்து நாம் வருந்தக் கூடாது. மக்களின் ரசனை, ஆர்வம் எல்லாமே மாறிவிட்டதுதான் காரணம். ரொம்ப புலம்பினால், தள்ளு பெருசு.. என்று நம்மை ஒதுக்கிவிடுவார்கள்.