"திங்க" க்கிழமை :: மாங்காய் சாதம் - கீதா சாம்பசிவம் ரெஸிப்பி

 

மாங்காய்ப் பாலுண்டு மலைமேல் இருப்போர்க்கு! 

ஹிஹிஹி, குதம்பைச் சித்தரின் பாடல் சும்ம்ம்ம்ம்ம்ம்ம்ம்மா! இதிலே மாங்காய்ப் பால் தேங்காய்ப் பால் இரண்டும் உண்டே!

புத்தகம் அடுக்கும் வேலை ஆரம்பிச்சுப் பாதியிலேயே நிக்குது! அவ்வளவு சுறுசுறுப்பு! க்ர்ர்ர்ர்ர்ர்ர்ர்ர்ர்ர்! எல்லாம் இந்தக் கணினி நடுவில் படுத்துடுச்சா! அந்தக் கவலை! மருத்துவர் வரதும் போறதுமா இருக்கவே மத்தியான நேரங்கள் அதில் போய்விட்டன! புத்தகங்கள் வேலை அப்படியே நின்னிருக்கு! அதைச் சீக்கிரமாச் சரி செய்யணும். எப்படினு தெரியலை! அது கிடக்கட்டும்.

இப்போச் சில மாசங்களாக நம்ம வழக்கமான சாப்பாடு சாம்பார், அல்லது குழம்பு, ரசம், கறி, கூட்டு முறையை மாற்றியாச்சு. நம்ம ரங்க்ஸே அதிசயமாப் பொடி ஏதேனும் பண்ணி வைனு சொல்லிப் பருப்புப் பொடி, கொத்துமல்லி விதைப் பொடி பண்ணி வைச்சிருக்கேன். புளிக்காய்ச்சலும் செய்து வைச்சிருக்கேன். அதிலே ஒரு தில்லுமுல்லுவும் பண்ணினேன். ஹெஹெஹெ! அதைத் தனியாச் சொல்றேன். இப்போ மாங்காய் சாதம் பண்ணினதைப் பத்திச் சொல்லப் போறேன். மாங்காய் என்ன மலிவா விற்றாலும் நம்ம ரங்க்ஸுக்கு மாங்காய்ப் பச்சடியோ அல்லது மாங்காய் சாதமோ அல்லது மாங்காய் சாம்பாரோ அல்லது மாங்காய் போட்ட மோர்க்குழம்பு அல்லது அவியலில் மாங்காய் சேர்த்தால் அலர்ஜியோ அலர்ஜி! மாங்காய்னா ஊறுகாய்க்கு மட்டும் எனத் திடமான நம்பிக்கை கொண்ட பேர்வழி! எவ்வளவோ சொல்லியும் அவரை இந்த விஷயத்தில் மாத்த முடியலை! நீ பண்ணிச் சாப்பிட்டுக்கோனு சொல்லிடுவார். க்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்! அதே போல மாங்காய்க்கு உப்பு மட்டும் போட்டுப் பச்சைமிளகாய் தாளிச்சாலோ, காரட், இஞ்சி சேர்த்து மி.பொடி, வெந்தயப்பொடி, கடுகுப்பொடி போட்ட ஊறுகாயோ பிடிக்காது! அரைப் பழமான காயில் மாங்காய் ஊறுகாய் போட்டு நான் மோர் சாதத்துக்குத் தொட்டுப்பேன். அரைப்பழமா இருந்தால் அவருக்குப் பிடிக்காது! ஐய! தித்திப்பு, எப்படித் தான் சாப்பிடறயோ என்பார்.

இப்படியாகத் தானே ரெண்டு பேரும் எதிரும் புதிருமா இருக்கக் கூடிய காலகட்டத்திலே ஒரு நாள் திடீர்னு பார்த்தால் மாங்காய் (கல்லாமை) வாங்கி வந்தார்.  என்னமோ அதிசயம் பாருங்க! போன வாரம் ஒரு மாங்காய் வாங்கிட்டு வந்தார். ஒட்டு மாங்காய் என இந்தப் பக்கங்களிலும் கல்லாமை மாங்காய் என மதுரையிலும் சொல்வோம். அதைப் பார்த்தாலே பச்சடி பண்ணு, பண்ணுனு சொன்னது! அதிலே கொஞ்சம் போல் தோல் சீவி எடுத்துக் கொண்டு பச்சடிக்குனு தனியா வைச்சேன். நான் மட்டும் தான் சாப்பிடணும்! :( பரவாயில்லை, துணிந்து நில் மனமே என என்னை நானே தைரியப் படுத்திக் கொண்டேன். ஆனாலும் பாருங்க, இதுக்கெல்லாம் கூட நாங்க "கத்தி" ச் சண்டை போட்டுப்போம். ஏன், சாப்பிட்டா என்ன நு நானும் நான் சாப்பிடலைனா உனக்கென்னனு அவரும் "கத்தி!" எடுக்காத குறையாச் சண்டை. அரைகுறையாக் காதிலே வாங்கிக்கற அக்கம்பக்கத்தினருக்கு இது பழகிப் போயிருந்தாலும் இதுங்களுக்கு வேறே வேலையே இல்லையானும் தோணும். ஹெஹெஹெ!

சரி, சரி, பாயின்டுக்கு வந்துடறேன். மாங்காய் மிச்சம் இருந்ததைத் துருவினேன். துருவும்போதே என்ன செய்யலாம் என யோசனை! அப்போப் பார்த்து ரங்க்ஸ் இதை வேணா மாங்காய் சாதமாப் பண்ணிடுனு சொன்னாரா! எனக்கு மயக்கமே வந்துடுத்து! ஙே என நான் முழிக்க, மாங்காய் சாதம்! என்றார். நிஜம்மாவா என வாயைப் பிளந்த நான் மூட வெகு நேரம் ஆச்சு! சரி எங்கேயானும் மாறிடப் போறாரேனு அவசரம் அவசரமா அதைத் துருவி எடுத்துட்டுப் போனால் என்னைக் கூப்பிட்டு, "இங்கே பார்!" எனக் காட்டினார். அதிலே தினமலர் வார மலர்/பெண்கள் மலர், ஏதோ ஒரு மலர் அதிலே  மாங்காய் சாதம் ரெசிபி ! க்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்ர்! கடைசியில் இதைப் பார்த்தா! சரி பரவாயில்லைனு அதைப் படித்துக் கொண்டேன். மாங்காய் சாதத்துக்கு சாதம் தனியா எப்போவும் தயாரிக்கிற மாதிரித் தயாரித்தால் போதுமே. மாங்காய் கிளறியது தான் தனியா வேணும். ஆகவே அதற்காக சாமான்கள் சேகரித்தேன்.

மாங்காய்த் துருவல்

மாங்காத் துருவல் ஒரு கிண்ணம், பச்சை மிளகாய் 3, இஞ்சி ஒரு துண்டு, தேங்காய் துருவல் ஒரு டேபிள் ஸ்பூன், ஜீரகம் (தேவையானல்), மஞ்சள் பொடி கால் டீஸ்பூன், மிளகாய்ப் பொடி அரை டீஸ்பூன், வெந்தயப் பொடி கால் டீஸ்பூன், உப்பு தேவையான அளவுக்கு.

இஞ்சி, பச்சை மிளகாய், ஜீரகம்

நல்லெண்ணெய் அரைக்கிண்ணம், கடுகு, உ.பருப்பு, க.பருப்பு, வேர்க்கடலை, கருகப்பிலை, பெருங்காயம்  தாளிக்க. தேவையானால் ஒரே ஒரு மி.வத்தல் தாளிக்கலாம். அவரவர் காரத்தைப் பொறுத்து.

தேங்காய்த் துருவல்

தாளிதம்

முதலில் பச்சை மிளகாய், இஞ்சி, தே.துருவலை ஜீரகத்தோடு சேர்த்து நன்கு அரைக்கவும். அடுப்பில் நல்லெண்ணெய் ஊற்றிக் கொண்டு கடுகு, பெருங்காயம், மி.வத்தல், கருகப்பிலை போட்டுத் தாளித்துக் கொண்டு உபருப்பு, கபருப்பு, வேர்க்கடலையையும் போடவும். அல்லது இவற்றைப் பின்னர் தனியாகத் தாளிக்கவும். இந்த எண்ணெயில் தாளிதத்தைத் தனியாக எடுத்து வைத்து விட்டுப் பின்னரும் சேர்க்கலாம். நான் அப்படியே இதில் மாங்காய் விழுதைப் போட்டு, அரைத்த விழுது, மஞ்சள் பொடி, மி.பொடி போட்டுக் கிளறினேன். நன்கு கிளறி எண்ணெய் பிரிந்து வரும் சமயம் கீழே இறக்கி வெந்தயப் பொடி சேர்க்கவும். தாளிதம் கரகரப்பாக இருக்கணும் எனில் மாங்காய் விழுதுடன் அரைத்த விழுது, மி.பொடி, உப்பு சேர்த்துக் கிளறி இறக்கிவிட்டுத் தனியே கடைசியில் தாளித்து   இப்போது தாளிதத்தைப் போட்டுக் கலக்கலாம். இம்முறையில் தாளிதம் கரகரப்பாக இருக்கும்.  

ஒரு தட்டில் சமைத்த சாதத்தில் அரை டீஸ்பூன் உப்பு கொஞ்சம் நல்லெண்ணெய் விட்டு உதிர்த்துக் கொள்ளவும். அதில் இந்த விழுதைக் கொஞ்சம் போல் எடுத்து நன்கு கலக்கவும். சாதமும் விழுதும் நன்கு கலந்தவுடன் வாயில் போட்டுப் பார்த்து சரியாக இருக்கானு பார்த்துக் கொள்ளவும். தேவையானால் இன்னும் கொஞ்சம் விழுது சேர்க்கலாம்.

தேவையானால் கொத்துமல்லி சேர்க்கவும். இதில் கொத்துமல்லி அவ்வளவு சுவை கூட்டவில்லை. இதுக்குத் தொட்டுக்க நான் செய்தது பச்சை மோர்க்குழம்பு! இதைச் சூடு செய்ய வேண்டாம்.

அரைத்த விழுது!

மாங்காய் விழுதுடன் கலந்து வதக்குதல்

சாதம் கலந்தாச்சு!

பக்கத்தில் பச்சை மோர்க்குழம்பு. சிலர் இதுக்குத் தேங்காய்த் துருவல் சேர்ப்பதில்லை. அவரவர் விருப்பம்! 

நல்ல கெட்டியான மொரில் தேவையான உப்பு, மஞ்சள் பொடி போட்டுக் கலந்து வைக்கவும்.

மி.வத்தல் ஒன்று அல்லது இரண்டு, துவரம்பருப்பு, கடலைப்பருப்பு தலா அரை டீஸ்பூன், வெந்தயம் அரை டீஸ்பூன், தேங்காய்த் துருவல் ஆகியவற்றை எண்ணெயில் வறுத்து மிக்சி ஜாரில் போட்டு நன்கு  அரைத்துக் கொள்ளவும். ஒரு கடாயில் அல்லது இரும்புக் கரண்டியில் தாளிக்க எண்ணெய் ஊற்றிக் கொண்டு கடுகு, கருகப்பிலை, மி.வத்தல் ஒன்று பெருங்காய்ம் போட்டுத் தாளிக்கவும். அரைத்த விழுதை மோரில் போட்டுக் கலந்து விட்டுத் தாளித்ததை அதில் சேர்க்கவும். இதற்கு வெண்டைக்காய் வற்றல் இருந்தால் தாளிக்கும் எண்ணெயிலேயே வறுத்துச் சேர்க்கலாம்.

============================================================================================================

மனசாட்சியம் - 5 

KGY Raman 

எனக்குத் தமிழ் மொழி, தமிழ் இலக்கியத்தின் மேல் அதிக ஆர்வம் உண்டு. அப்படிச் சொன்னால் நான் ஏதோ தமிழில் கவிதை எழுதும் ஆற்றல் படைத்தவன் என்றோ, சிலப்பதிகாரம் கம்பராமாயணம் இவற்றை ஆழமாக அலசி ஆராய்ந்து உரை நிகழ்த்தக்கூடிய தமிழ் அறிஞன் என்றோ எடுத்துக் கொள்ள வேண்டாம். சுவாரஸ்யத்துடன் தமிழைப் படிப்பவன், தமிழை ரசிப்பவன் என்று வேண்டுமானால் சொல்லலாம். 

இப்போதைய தலைமுறைக் குழந்தைகளில் தமிழ் அறிவு மிக்க குழந்தைகள் வெகு வெகு சொற்பம். இது என் கருத்து. இது உண்மைதானா என்று நிறுவ ஆதாரம் என்ன வைத்திருக்கிறாய் என்று கேட்டால் அப்படியான ஆதாரம் எதுவும் என்னிடம் இல்லை. நான் பார்த்தவரை தமிழார்வம் அதிகமாக இல்லை என்று தான் சொல்கிறேன். இது உண்மை அல்ல என்று நீங்கள் நிறுவ முடிந்தால்,  மிகவும் சந்தோஷப்படக்கூடிய ஆள் நான்தான் என்று நான் உறுதியாக நம்புகிறேன். 

அது போகட்டும். என் தமிழார்வம்   விஷயத்திற்குத் திரும்ப வருவோம். 

என் ஆர்வத்திற்கு முக்கியமான காரணம்:  இரண்டு, மூன்று மிகச் சிறந்த தமிழாசிரியர்கள். அவர்களில் ஒருவர் மிகவும் அழகான கவிகள் இயற்றும் ஆற்றல் படைத்தவர். இந்த மூன்று பேரும் ஒரு செய்யுளை எடுத்துக்கொண்டு மாணவர்களுக்கு விளக்கிச் சொன்னால் மாணவர்கள் " தேன் குடித்த நரி போல் " என்று சொல்வார்களே , அந்த மாதிரி ஒரு மாதிரி கிறங்கிப் போய் உட்கார்ந்து கேட்பார்கள்.

இப்படியான ஆசிரியர்கள் என் மனதில் தமிழை விரும்பி படிக்கும் ஆர்வத்தை வளர்த்து விட்டார்கள். என் பள்ளிப் பருவத்து நிகழ்ச்சி ஒன்றை இங்கே சொல்வது பொருத்தமாக இருக்கும்.

திருவாரூர் கழக உயர்நிலைப்பள்ளி ஆண்டு விழாவிற்கு தமிழறிஞரும் ஐஏஎஸ் அதிகாரியுமான திரு பாஸ்கரத் தொண்டைமான் அவர்கள் வந்து உரையாற்றினார்கள். 

" தமிழ்ப் புலவர் என்றால், அவர்கள் பேச்சு மூச்சும் தமிழாகவே இருக்கும். புலவர் ஒருவரிடம் சமையல்காரன் வந்து " இன்று என்ன சமைக்கட்டும் " என்று கேட்கிறான். புலவர் சமையல்காரரிடம் 

" சற்றே துவையல் அரை , தம்பி ஒரு பச்சடி வை ! " என்று சொல்கிறார். அவர் பேசுவதில் உள்ள ஓசை நயத்தை கவனியுங்கள். 

சற்றே துவையல் அரை தம்பி ஒரு பச்சடி வை 

வற்றல் ஏதேனும் வறுத்து வை குற்றமில்லை 

காயரைத்து கீரைகடை நல்லமிள

காய் போட்டுச் செய்வாய் கறி ! 

என்று ஒரு வெண்பா என்று நினைக்கிறேன் சரியாகத் தெரியவில்லை, முழுப்பாட்டையும் சொல்லி அசத்தினார் பாஸ்கரத் தொண்டைமான்.

இது பற்றி எங்கள் தமிழாசிரியர் திரு க. மீனாட்சி சுந்தரம் அவர்களிடம் நாங்கள் புகழ்ந்து சொன்ன போது, அவர் " ஆம். அதை நானும் ரொம்ப ரசித்துக் கேட்டேன்.  நாமும் அந்த மாதிரி ஒரு பாடல் தயார் செய்வோமா ? " என்று கேட்டு, சரியாக இரண்டு நிமிஷம் யோசித்து, கீழ்க்கண்ட பாடலை எங்களுக்குச் சொன்னார்:

" வெங்காயச் சாம்பார் செய் வெள்ளரிக்காய் பச்சடி வை 

தங்காதுருளை தான் வறு நீ - இங்கிதமாய் 

தக்காளிச் சாறோடு தான் சிறந்த மாங்காயின் 

தொக்கே செய் போதுமது ! " 

மாணவர்கள் கைதட்டி ஆரவாரம் செய்யாத குறையாக இதை ரசித்தோம். 

இதைக் கேட்டதும் என் மனதில், சாமர்த்தியக் குறைவான சமையல்காரனைத் திட்டும் விதமாக எஜமானர் என்ன சொல்லக்கூடும் என்கிற ரீதியில் கற்பனை ஓடியது: 

உப்பான சாம்பார் செய் உவர்ப்பான பச்சடி வை

தப்பு பல செய்து துவையலரை - இப்பாகம்

எப்போதுஞ் செய்து என்னிடம் வசைவாங்கி

தப்பான புகழ் தன்னைக் கொள் ! "

இதை என் ஆசிரியரிடமோ நண்பர்களிடமோ காட்ட எனக்கு அப்போது தைரியம் இல்லை. எனக்குள்ளே சொல்லி சொல்லி ரசித்துப் பார்த்துக் கொண்டது உண்டு. 

அது ஒரு காலம் - அந்தக் காலம் !!

===================================================================================================

பாரதி நூற்றாண்டு விழா கொண்டாடப்பட்ட வருடம். எனவே பாரதியார் ட்ரெண்டிங்கில் இருந்தார் போலும். எல்லா கட்சிகளும் அவரைக் கொண்டாடுவதில் தங்கள் பங்குதான் பெரிது என்று போட்டி போட்டன. அதில் கம்யூனிஸ்ட்கள் சார்பில் அறந்தை நாராயணன் இந்தக் கட்டுரையை குமுதத்தில் எழுதி இருந்தார்.

இதில் கல்கியைப் பற்றி அறந்தை நாராயணன் சொல்லி இருப்பதை மறுத்து அடுத்த இதழில் பகீரதன் பதில் கட்டுரை எழுதி இருந்தார்.

================================================================

அ தி மு க காளிமுத்துவும், தி மு க ரஹ்மான்கானும் குமுதத்தில் போட்டுக் கொண்ட குஸ்தியை பார்த்து எனக்கு சிரிப்புதான் வந்தது. பாரதியாரின் விழாவை கொண்டாட தங்களுக்கு தான் அதிக உரிமை உண்டு என்று இரண்டு கட்சியினரும் ஆரவாரம் செய்கிறார்கள். என்ன கேலிக்கூத்து!

1928 இல் சென்னை மாகாணத்தை ஆண்டு கொண்டிருந்த ஜஸ்டிஸ் கட்சி மந்திரி சபை, மகாகவி பாரதியின் தேசபக்தி பாடல்கள் அடங்கிய தொகுப்பு நூலை தடை செய்தது. அப்படிப்பட்ட ஜஸ்டிஸ் கட்சியின் பிள்ளைகள் தான் தி க, தி மு க, அ தி மு க ஆகிய கட்சிகள். பாரதி பற்றி பேசவோ, விழா எடுக்கவோ இந்த திராவிட இயக்கத்தினருக்கு தார்மீக உரிமை ஏதும் கிடையாது.

பச்சையாகவே கேட்கிறேன், ஆட்சிக்கு வருமுன் பாரதிக்கோ, தேசத்தின் தலைவர்களுக்கோ தி மு க வும் சரி, அ தி மு க வும் சரி விழா எடுத்ததுண்டா? இப்போதும் இந்த கட்சிகள் தமிழ்நாட்டிலும் புதுச்சேரியிலும் தங்கள் சொந்த செலவிலா விழாக்கள் நடத்துகின்றன? இல்லை. மக்களின் வரிப்பணத்தில் விழா எடுக்கிறேன் என்று விரயம் செய்து கொண்டிருக்கும் இவர்களுக்கு சவாலும் சவடாலும் என்ன வேண்டி இருக்கிறது?

உண்மையில் பாரத விழாவை மனப்பூர்வமாக வருடம் தவறாமல் கொண்டாடி வருபவர்கள் கம்யூனிஸ்டுகள் மட்டும் தான். மேடை கிடைக்கும்போதெல்லாம் மகாகவி பாரதியின் புகழ் பாடியவர்கள் கம்யூனிஸ்டர்களாகிய நாங்கள் தான்.

1947 அக்டோபரில் எட்டையபுரம் மணிமண்டபத் திறப்பு விழாவின் போது தலைமை தாங்கிய கவர்னர் ஜெனரல் ராஜாஜி "இப்போது ஜீவானந்தம் ஐந்து நிமிஷம் பேசுவார்" என்றார். ஆனால் மக்களின் கரஒலிகளோடு ப. ஜீவானந்தம் அன்று 45 நிமிடங்கள் பேசி முடித்தார். அன்று தொடங்கி இன்று வரை அந்த எட்டயபுரத்தில் கம்யூனிஸ்டுகளாகிய நாங்கள் எங்கள் சொந்த முயற்சியில் மகாகவிக்கு விழா நடத்தி வருகிறோம். ஜீவா தொடங்கிய தமிழ்நாடு கலை இலக்கிய பெருமன்றம் என்கிற எங்களது இலக்கிய அமைப்பு தமிழகம் முழுவதும் ஆண்டுதோறும் பாரதிக்கு பணியாற்றுகிறது.

பாரதி புகழ் பாடுகிறார் என்பதாலேயே எங்கள் ஜீவாவை 'பார்ப்பன கைக் கூலி' என்று திட்டிக் கொண்டிருந்தனர் இந்த திராவிட இயக்கத்தினர். பாவேந்தர் பாரதிதாசனை தவிர இதர திராவிட இயக்கத்தினர் நேற்று வரை பாரதியை 'பார்ப்பனக் கவி' என்று ஏளனம் செய்து கொண்டிருந்தார்கள்.

'தாகூருக்கு நிகரான உலக மகாகவி அல்ல பாரதி' என்று எழுதிய கல்கி ரா கிருஷ்ணமூர்த்தியின் கொள்ளை வாதத்தையும், தேசிய கவி என்ற செப்புக்குள் பாரதியை அடைத்த காங்கிரஸ் காரர்களின் குறுகிய வாதத்தையும், வேதாந்த கவி என்ற பக்தர்களின் குட்டை பார்வையையும், உடைத்து நொறுக்கி, அந்த மகாகவியின் பன்முகச் சீர்மையை எடுத்துக்காட்டி புரட்சிக்கவியாக நிலைநாட்டியவர்கள் கம்யூனிஸ்டுகளாக நாங்கள்! நாங்கள் மட்டுமே! இந்த இலக்கிய யுத்த களத்தில் சிங்கங்களென கர்ஜித்தவர்கள் எங்கள் தலைவர்கள் ஜீவானந்தம், பாலதண்டாயுதம், ரகுநாதன், ஜெயகாந்தன்!

நூற்றாண்டு விழாவுக்காக மட்டும் பாரதியை தரிசிப்பதில்லை கம்யூனிஸ்ட்களாகிய நாங்கள். எங்களது ரத்த நாளங்களிலும் உயிரணுக்களிலும் பாரதி எப்போதும் இருக்கிறார்.

=============================================================================