சூர்ய சந்திரனும் குருவும்

 

நாம் தொடங்கும் செயல்கள் எந்தவித தடங்கலும் இல்லாமல் நடைபெற வேண்டுமென்றால் நாம் வணங்க வேண்டியது விநாயக பெருமானை என்பது எல்லோருக்குமே தெரியும்.  மனித வாழ்க்கையின் முக்கியமான கட்டங்களான கல்வி கற்க தொடங்குவது, திருமண வாழ்க்கையை தொடங்குவது, பயணங்களை தொடங்குவது, போர் காலங்கள் போன்ற எல்லா காலங்களிலும் விநாயகரை இந்த சிறப்பான பதினாறு பெயர்களை சொல்லி வணங்கி விட்டு தொடங்கினால் அந்த செயல்கள் எல்லாவற்றிலும் எந்தவித தடங்கல்களும் வராது. 

சுமுகஸ்ச்ச ஏக தந்தஸ்ச கபிலோ கஜகர்ணக 

லம்போதரஸ்ச விகடோ விக்நராஜோ விநாயக 

தூமகேதூர் கணாத்யக்ஷ பாலச்சந்த்ரோ கஜானந 

வக்ரதுண்ட: சூர்ப்பகர்னோ ஹேரம்ப: ஸ்கந்தபூர்வஜ:

ஷோடசைச்ச நாமானி ய: படேத் ஸ்ருணுயாதபி 

வித்யாராம்பே விவாஹே ச பிரவேசே நிர்கமே ததா

ஸங்க்ராமே ஸர்வ கார்யேஷு விக்நஸ்தஸ்ய ந ஜாயதே   

• மங்கள முகம் வாய்ந்த சுமுகர், 
• ஒற்றைக் கொம்பை உடைய ஏக தந்தர், 
• கபில நிறம் வாய்ந்த கபிலர், 
• யானைக் காதுகள் உள்ள கஜ கர்ணகர், 
• பெரும் வயிற்றோடு கூடிய லம்போதரர், 
• குள்ளத் தோற்றமுள்ள விகடர்,  
• சகல விக்கினங்களுக்கும் ராஜாவான விக்கினராஜர்,  
• எல்லா விக்கினங்களையும் அழிக்கக்கூடிய விநாயகர் 
• நெருப்பை போல் ஒளி வீசக்கூடிய தூமகேது, 
• பூத கணங்களுக்கு தலைவராக விளங்கும் கணாத்யக்ஷர், 
• நெற்றியில் பிறைச் சந்திரனை சூடிய பால சந்திரன், 
• யானைத் தோற்றமுள்ள கஜானனர், 
• வளைந்த தும்பிக்கையை கொண்ட வக்கிரதுண்டர் 
• முறம் போன்ற அகலமான காதுகள் கொண்ட சூர்ப்பகர்ணர், 
• தம்மை வணங்கி நிற்கும் அடியவர்களுக்கு அருள் புரியும் ஹேரம்பர்
• கந்த பெருமானுக்கு மூத்தவரான ஸ்கந்த பூர்வஜர் 
• என்னும் பதினாறு பெயர்களையும் வித்தைகளை கற்க தொடங்கும் பொழுதும்,  
• வீட்டை விட்டு வெளியே செல்லும் பொழுதும் போர் காலத்திலும்      
• யாராவது வாசித்தாலும் அல்லது செவி குளிர கேட்டாலும் அவர்களுக்கு எந்தவித விக்கினங்களும் சம்பவிக்காது. 

கல்சுரல் ஷாக்:

நாம் வளர்ந்த சூழலிலிருந்து மாறுபட்ட ஒரு சூழலுக்குச் செல்லும் பொழுது நமக்கு ஏற்படும் அதிர்ச்சிதான் கல்சுரல் ஷாக். கனடாவில் நான் சந்தித்த சில விஷயங்கள் எனக்கு ஏற்படுத்திய பாதிப்பகள்:

என் பேத்தியின் பிறந்த நாளுக்கு அவள் தன் தோழிகள் சிலரை அழைத்திருந்தாள். பார்ட்டி முடிந்து அவர்கள் சென்றதும், நான் அவளிடம், "குண்டா இருந்தாளே அந்தப் பெண்ணின் பேர் என்ன?" என்று கேட்டதும், அவள் மிகவும் ஷாக்கான ரியாக்ஷன் கொடுத்தாள். குண்டு என்று நான் குறிப்பிட்டது பாடி ஷேமிங்காம்(உருவ கேலி). நம் ஊரில் நாம் வெகு சகஜமாக குண்டாக, கருப்பாக, சொட்டைத் தலை, நெடுநெடுவென்று ஒட்டடை குச்சி போல என்றெல்லாம் சொல்வோம். உருவ கேலி காமெடியை சினிமாவில் ரசித்தவர்களாயிற்றே நாம்.

அதைப்போல என் பேத்திகள் என் மகளிடம் ஏதாவது சொல்லிக் கொண்டிருக்கும்பொழுது, நான் என் மகளிடம் ஏதாவது சொன்னாலோ, கேட்டாலோ, "பாட்டி யூ ஹேவ் டு வெய்ட் ஃபார் யுவர் டர்ன்" என்பாள் ஐந்து வயதாகும் சிறிய பேத்தி. நாம் என்னதான் முக்கியமாக பேசிக்கொண்டிருந்தாலும் பெரியவர்கள் ஏதாவது சொன்னால் குறுக்கிடுறார்கள் என்று நினைக்க மாட்டோம். ஒரு நாள் அவளோடு வெளியே சென்ற பொழுது, பாட்டி, "அவுட்சைட் யூ ஷுட் நாட் டாக் வித் மி இன் டமில்" என்றாள், "ஏன்?" என்று கேட்டதற்கு, "வெளியே செல்லும் பொழுது மற்றவர்களுக்கு தமிழ் புரியாது, அதனால் நாம் தமிழில் பேசக்கூடாது" என்றாள். சொல்லுங்க குருவே என்று கேட்டுக் கொண்டேன். 

அவளுடைய தோழி ஒரு குழந்தை வீட்டிற்கு விளையாட வரும். தஞ்சாவூர் பட கிருஷ்ணன் போல கொழு கொழுவென்று அழகாக இருக்கும். அதன் கஸ்பு கன்னங்களில் முத்தம் கொடுக்க ஆசையாக இருக்கும். ஆனால் அப்படியெல்லாம் செய்யக் கூடாதாம். அந்தக் குழந்தை அனுமதித்தால்தான் முத்தம் கொடுக்கலாமாம். அந்தக் குழந்தை முத்தமிட என்னை அனுமதிக்கவில்லை. என்ன ஊரப்பா? ஒரு குழந்தைக்கு ஆசையா ஒரு முத்தம் கொடுக்க முடியவில்லை. 

அந்தப் பெண் என் மகளை ஆண்டி என்று அழைக்க மாட்டாள், "ஸாயிஜனனிஸ் மாம்" என்பாள். இங்கு அவர்களுடைய உறவினர்களை மட்டும்தான் அங்கிள்,ஆண்டி என்ற உறவெல்லாம் சொல்லி அழைப்பார்களாம். மற்றவர்களையெல்லாம் பெயரிட்டுதான் அழைக்கிறார்கள். என் பேத்திகளே கூட அண்டை வீட்டார்களை பெயர் சொல்லிதான் குறிப்பிடுகிறார்கள். கீதா ரங்கன் இங்கு வந்தால் என்ன செய்வார்?

இதைச் சொல்லும் பொழுது 'அவரும் நானும்' என்ற தொடரில் திருமதி.துர்கா ஸ்டாலின் விவரித்திருந்த ஒரு சம்பவம் நினைவுக்கு வருகிறது. அவருக்கு திருமணமான புதிதில் ஒரு முறை கோபாலபுரம் வீட்டிற்கு நெடுஞ்செழியன் வந்திருந்தாராம். இவர் ஸ்டாலினிடம், "நெடுஞ்செழியன் வந்திருக்கிறார்" என்றதும், "நாவலர் என்று சொல்லாமல் அவர் பெயரையா சொல்கிறாய்?" என்று ஒரு அறை விட்டாராம்.

நாம் சாதாரணமாக முன்பின் அறிமுகமில்லாதவர்களுக்கு அவர்களின் தோற்றத்திற்கோ, உடைகளுக்கோ பாராட்டுகள் வழங்க மாட்டோம். இங்கு அப்படியில்லை, "நைஸ் டிரஸ், வெரி ப்ரிட்டி டிரஸ்" என்று பாராட்டுகிறார்கள். 

'பொம்பள சிரிச்சா போச்சு..'என்று சொல்லி பெண்கள் சிரிப்பதற்கே தடா சொன்னவர்கள் நாம். இங்கே பெண்கள் அட்டகாசமாக சிரிக்கிறார்கள்.

இங்கு எனக்கு அறிமுகமான இந்தியக் குடும்பத்தினர் 30 வருடங்களுக்கு முன்பே இங்கு குடியேறியவர்கள். அதில் குடும்பத் தலைவர் அமெரிக்காவில் இருக்கிறார். அவ்வப்பொழுது வருவார். இண்டு பெண்களில் ஒருத்திக்கு மணமாகி விட்டது. தாயோடு இருந்து கொண்டு வேலை பார்த்துக் கொண்டிருந்த இன்னொரு பெண், சில மாதங்களுக்கு முன் தனியாக வசிக்கத் தொடங்கி விட்டாள். சிறப்பு குழந்தைகளுக்கான பள்ளியில் பணி புரிந்து கொண்டே மூன்று படுக்கை அறைகள் கொண்ட வீட்டில் தாய் மட்டும் தனியே வசிக்கிறார்.  "அந்த பெரிய வீட்டில் அவர் எப்படி தனியாக இருக்கிறார்?" என்று நான் கேட்டதற்கு என் மகள், உனக்கு ரொம்ப இண்டியனைஸ்ட் தாட்" என்கிறாள்.  இருக்கட்டும். இந்த ஊரில் இந்த கொட்டும் பனியில் தனியாக கோலை ஊன்றிக் கொண்டு நடக்கும், கடைகளுக்கு வரும் முதியவர்களை பார்க்கையில் பரிதாபமாகத்தான் இருக்கிறது.

ASHWIN என்னும் நான்

அஸ்வின் ரவிச்சந்திரன்  'நீயா நானா' கோபிநாத்திற்கு அளித்த பேட்டியின் சில பகுதிகள்:

நான் பள்ளியில் படித்த பொழுது மற்ற மாணவர்களுக்கு என்னோடு பேசுவதில் ஒரு தயக்கம் இருந்தது. ஏன் அவர்களின் பெற்றோர்களுக்கே என்னோடு தங்கள் குழந்தைகள் பழகினால் நான் அவர்களையும் மைதானத்திற்கு அழைத்துக் கொண்டு போய் விடுவேனோ? என்ற பயம் இருந்தது. படிப்புதான் முக்கியம் என்று கருதிய காலம். இப்போது நிலமை மாறியிருக்கிறது.

வாழ்க்கையின் ஒரு நாளைத் தெரிந்து கொள்ளணும் என்றால் டி20 பாரு. அதில் ஒன்றுமே கிடையாது. மேட்ச் நடக்கும் நாள் நமக்கு நல்லதாக இருந்தால் எல்லாம் சரியாக நடக்கும், அப்படி இல்லை என்றால் எதுவும் வொர்க் ஆகாது. 

வாழ்க்கையை புரிந்து கொள்ள டெஸ்ட் மாட்ச் பாருங்கள். டெஸ்ட் மாட்ச் என்பது ஒரு தவம். ஐந்து நாட்கள் ஆட வேண்டுமென்றால் மேட்சிற்கு மூன்று நாட்கள் முன்பு ரெடியாக வேண்டும். நீச்சல், ஜிம், சாப்பாடு, தேவையான அளவு தண்ணீர் குடிப்பது, போதுமான அளவு தூக்கம் இவையெல்லாம் அவசியம். கண்டிப்பாக இரவு 10 மணிக்கு தூங்கி விட வேண்டும். 10:30க்கு தூங்கினால் மறுநாள் உடம்பு ஃப்ரெஷ் ஆக இருக்காது. அரை மணி நேரம்தான் வித்தியாசம்,ஆனால் உடம்பு ப்ரெஷ் ஆக இருக்காது. இப்படி மூன்று நாட்கள் ரெடியானால் ஐந்து நாட்கள் மேட்ச் ஆட முடியும். இப்படி எட்டு நாட்கள் இருக்க வேண்டும். அடுத்த டெஸ்ட் மாட்ச் ஆட  இதேமாதிரி எட்டு நாட்கள். ஒருவன் நூறு டெஸ்ட் மாட்சுகள் ஆட வேண்டும் என்றால் எப்படிபட்ட வாழ்க்கை என்று யோசித்து பாருங்கள். 

மேலும் ஐந்து நாட்களும் ஒரே மாதிரி இருக்காது. முதல் நாள் இருந்த மாதிரி பிட்ச் மூன்றாம் நாள் இருக்காது. வெதர் ஒரே மாதிரி இருக்காது, இப்படி பல விஷயங்கள்.

எனக்கு பீசா மிகவும் பிடிக்கும். அதில் இருக்கும் க்ளூட்டன் உடல் எடையை அதிகரிக்கும். இது தெரிந்த பிறகு, க்ளூட்டன் இல்லாத பீசா கிடைக்கும் வரை, பதினைந்து ஆண்டுகளுக்கு நான் பீசா சாப்பிடவில்லை.  சச்சின் எல்லாம் நிறைய தியாகங்கள் செய்திருக்கிறார்.  

கிரிகெட் விளையாடுவது பணத்திற்காகவோ, புகழுக்காகவோ அல்ல, அது கொடுக்கும் சந்தோஷத்திற்காக.

இப்போது புதிதாக விளையாட வருகிறவர்கள் சீக்கிரம் இலக்கை அடைய வேண்டும் என நினைக்கிறார்கள். என் பக்கத்து வீட்டுக்காரர் சீக்கிரம் போக வேண்டிய இடத்திற்கு போய் விடலாம், என்னால் முடியாது. பொறுமை அவசியம்.

வாய்ப்புகளை வாங்காதீர்கள். வாய்ப்புகள் அமைய வேண்டும், அதற்கான தகுதியை வளர்த்துக் கொள்ளுங்கள். 

தங்கள் குழந்தைகளுக்கு கிரிக்கெட் கற்றுக் கொடுக்கும் பெற்றோர்களுக்கு ஒரு வேண்டுகோள் உங்கள் குழந்தைகள் தமிழ் நாட்டிற்கு விளையாட வேண்டும், இந்தியாவிற்கு விளையாட வேண்டும் என்றெல்லாம் எதிர்பார்த்து அவர்களை விளையாடச் சொல்லாதீர்கள், சந்தோஷமாக, ஜாலியாக விளையாடச் சொல்லுங்கள். தேறி விடுவார்கள். பேஷனை(passion) பிரஷர் ஆக்கி விடாதீர்கள்.

வேகமாக பேசும் அஸ்வின் பந்தா எதுவும் இல்லாமல், இயல்பாக பேசுகிறார். இந்த பேட்டியில் தன்னுடைய பெற்றோர்கள் தனக்கு கொடுத்த ஊக்கத்தையும், உழைப்பையும் நெகிழ்ச்சியோடு குறிப்பிட்டார்.

உயர்திணை

-----------------------

எத்தனை வலியிருந்தாலும் 

எல்லாம் சரியாகிவிடும் 

என்பது போல் 

தொடங்கியது காலை.

பழக்கப்படுத்திய அத்தனை 

அலுவல்களும் 

முறைப்படி நடந்தேறின.

முற்றுப் பெறாததை 

அப்படியொன்றும் கண்டுகொள்ளவில்லை மனம்.

அந்தி வந்ததை 

அசதி வந்ததும் 

உணரமுடிந்தது.

காலத்தை 

தூக்கத்தால் 

கட்டிப்போட முடிந்தது. 

இருட்டுக்குப் பழகியது போர்வை. 

அறிந்ததெல்லாம் அடங்கும் 

தன்னிச்சையாக. 

------------

காலம் கவலையுடன் காத்திருக்கும் 

நீ வரும் நாள் என்றென. 

நான் சொல்வேன் அதனிடம் 

நீதானே வரவேண்டும் என்பதென. 

காலம் சொல்லும் என்னிடம் 

இணையலாம் ஒரு புள்ளியில் என்று.

சரி என்று சொல்லிவிட்டு 

செல்கிறேன் நானும் இன்று.

சிரித்து காலம் சொல்லும் நீ

ஒருநாள் இல்லாமல் போவாயே என்று.

சிரித்தபடி நானும் சொல்கிறேன் 

முன்பும் இல்லாததாகவே இருந்தேன் என்று.

--------------

அழிவின் வழி

--------------------------

நான் வசிக்கும் இடத்தில் 

காகங்கள் தென்படுவதில்லை. 

உணவுக்காகவும் வருவதில்லை. 

கா கா வென்றால் 

சோறு என்று பொருள் சொன்ன 

காக்கைகள். 

ஊர் சுற்றிக் காக்கைகள். 

ஊரெல்லையில் 

வேற்றூரின் தொடக்கத்தில் 

காணக்கூடும். 

எனினும் புறாக்கள் வரும்.

ஒவ்வொரு மூலையின் 

விளிம்புகளிலும் அவை 

வந்து போகும் அடையாளங்கள். 

உணவுக்காக வருவதில்லை. 

காக்கையின் உணவை புறா 

உண்பதில்லை.

சிறகின் சிறு தோகைகள் 

சிதறிக்கிடக்கும். 

உலகம் சுற்றும் புறாக்கள். 

இதுவும் ஒருநாள் வராமல் போகும்.

குருவிகள் போயின. 

காக்கைகள் காணவில்லை. 

புறாக்கள் மட்டுமென்ன !

ஒர இனம் அழிவதற்கு 

வழிகள் 

கிடைத்துக் கொண்டேயிருக்கும். 

மேற்படி கவிதைகளை எழுதியவர் சங்கர சுப்பிரமணியன்

என்னும் ஓய்வு பெற்ற வருமான வரித் துறை அதிகாரி. படிப்பும், இசையும் இவருக்கு மிகவும் விருப்பமானவை. ஒற்றை மழைத்துளி என்னும் வாட்சாப் குழுவில் தன் கவிதைகளை பகிர்வார். பெங்களூரில் எங்கள் குடியிருப்பில் வசிக்கிறார்.

முதல் மரியாதைக்குரிய தகவல்கள்: 

பாரதிராஜாவின் இயக்கத்தில் வெளியான முதல் மரியாதை படம் ரஷ்ய எழுத்தாளர் தஸ்தாவெஸ்கியின் வாழ்க்கையில் நடந்ததை அடிப்படையாக கொண்டு எழுதப்பட்டதாம். சாதாரணமாக முழு கதையையும் கேட்காமல் எந்த படத்தையும் ஒப்புக் கொள்ளாத சிவாஜி, பாரதிராஜாவின் மேலிருந்த நம்பிக்கையால் அவருடைய கதாபாத்திரத்தை பற்றி மட்டும் பாரதிராஜா கூறியதை கேட்டு ஒப்புக் கொண்டாராம். 

முதல் நாள் படப்பிடிப்பிற்கு திரிசூலம் ராஜசேகர் போல மேக்கப் போட்டுக் கொண்டு வந்த சிவாஜியைப் பார்த்து அப்செட் ஆன பாரதிராஜா பேசாமல் நகர்ந்து போய் சிகரெட் பிடிக்க ஆரம்பித்தார். ஒன்றும் புரியாமல் எல்லோரும் முழிக்க, பாரதிராஜாவின் உதவியாளரான சித்ரா லட்சுமணனை அழைத்து விசாரித்திருக்கிறார். டைரக்டர் பேக்கப் சொல்லிவிட மொத்த யூனிட்டும் காலை சிற்றுண்டி சாப்பிடுவதா வேண்டாமா என்று தவித்திருக்கிறது. 

இது எதுவும் தெரியாத கமலா இட்லி வார்த்து சிவாஜிக்கு எடுத்து வந்திருக்கிறார். மரியாதைக்கு டைரக்டரையும் அவர் அழைக்கச் சொல்ல, பாரதிராஜாவை அழைத்து வந்திருக்கிறார்கள். மேக்கப்பை கலைத்து விட்டு உட்கார்ந்திருந்த சிவாஜியைப் பார்த்த பாரதிராஜா, " இதாண்ணே வேணும், இப்படித்தான் நீங்க நடிக்கணும்" என்றாராம். தான் மேக்கபில்லாமல் நடித்தால் தன் ரசிகர்கள் ஒப்புக் கொள்வார்களா? என்ற சந்தேகம் சிவாஜிக்கு இருந்ததாம். பாரதிராஜா அவரை கன்வின்ஸ் செய்து நடிக்க வைத்தாராம். 

தவிர படத்தில் அவருக்கு பெரிய வசனங்கள் கிடையாது. "நடந்து வாங்க, அந்த மரத்துல கை வச்சு நில்லுங்க, திரும்பி பாருங்க" என்றே அவரிடம் வேலை வாங்கி இருக்கிறார். படப்பிடிப்பு முடிந்த பொழுது பாரதிராஜா மீது கொஞ்சம் மனவருத்தத்தில்தான் இருந்திருக்கிறார் சிவாஜி. வசன ஒலிப்பதிவு கூட எல்லோருடைய போர்ஷனையும் முடித்து விட்டு கடைசியில்தான் சிவாஜியின் பகுதியை டப்பிங் பேச அழைத்திருக்கிறார்.

இளையராஜாவுக்கு பணம் கொடுத்த பொழுது, "படம் கண்டிப்பாக ஓடாது, என்னிடம்தான் பணம் கேட்டு வருவான், அதனால் எனக்கு பணம் வேண்டாம்" என்று திருப்பி கொடுத்து விட்டாராம். பஞ்சு அருணாச்சலம்," இந்தக் குதிரை அதிர்ஷ்டத்தில் கூட ஓடாது" என்ராராம். ஆனால் படம் நன்றாக ஓடி, வாசூலைக் குவிக்க, இளையராஜா "படம்தான் ஓடி விட்டதே, எனக்கு சேர வேண்டியதை கொடுத்து விடுங்களேன்" என்று கேட்டதற்கு பாரதிராஜா, "எப்போ வேணாம்ணு சொல்லிட்டியோ அதோட முடிஞ்சது, விட்டுடு" என்று தர மறுத்து விட்டாராம். 

ரஷ்யன் கல்சுரல் சென்டரில் இருந்து முதல் மரியாதை படம் வேண்டும், ஒரு ப்ரிண்டிற்கு எவ்வளவு செலவாகும்? என்று விசாரித்திருக்கிறார்கள். அந்த காலகட்டத்தில் ஒரு பிரிண்டிர்கு இருபத்தைந்தாயிரம்தான் ஆகுமாம், பாரதிராஜா ஒரு லட்சம் ஆகும் என்று சொல்லியிருக்கிரார். உடனே ரஷ்யாவிற்கு 100 பிரிண்டுகள் வேண்டும் என்று கேட்டு ஒரு கோடிக்கு செக் வந்து விட்டதாம்.  

இப்படி பல தகவல்களை சொல்கிறது வகுப்பறை என்னும் வலைப்பூ. 

உங்கள் கிச்சன் சிங்க் உங்கள் குணத்தை சொல்லும்

சமைக்கும் பொழுதே கையோடு பாத்திரங்களை கழுவி சிங்கை சுத்தமாக வைத்திருக்கும் பெண்கள்

ஆளுமைத் திறன் கொண்டவர்களாக இருப்பார்களாம்

எதையும் ஒத்திப் போடாமல் உடனுக்குடன் செய்து முடிப்பார்களாம்

செய்வன திருந்தச் செய் என்னும் கொள்கை உடையவர்களாக இருப்பார்களாம். 

நேர மேலாண்மையில் சிறந்து விளங்குவதோடு, எதையும் திட்டமிடுவதில் வல்லுனர்களாக இருப்பார்களாம். 

திட்டமிடுவது என்பதில் சேமிப்பும் அடங்கும், எல்லா பணத்தையும் ஒரே இடத்தில் முடக்காமல், பிரித்து, பல வகையாக சேமிப்பார்களாம். 

பிரபலங்களின் திருமணங்கள்: 

M.S. சுப்புலட்சுமி,சதாசிவம் திருமணம்

இந்திரா,ஃபெரோஸ் திருமணம்

M.L.V. கணவருடன்

நூல் விமர்சனம்:

முரண்படும் திருமணங்கள் - வசந்தா கோவிந்தராஜன்

முக நூலில் வசந்தா வானமாமலை என்று அறியப்படும் வசந்தா கோவிந்தராஜன் சமீப காலத்தில்தான் எழுதத் துவங்கியிருக்கிறார் ஆனால் குறுகிய காலத்திலேயே நிறைய பரிசுகள் வாங்கி விட்டார். 

ஸ்ரீரங்கத்தில் கண்டிப்பான அப்பாவால் வளர்க்கப்படும் ராம் என்னும் ராமசந்திரன் அமெரிக்காவிற்கு மேல்படிப்பிற்குச் செல்கிறான். அதுவும் கூட அவன் அப்பா ஆசிரியராக பணி புரியும் பள்ளியின் தலைமை ஆசிரியர் தன் மகன் அமெரிக்காவில் பணி புரிவதைப் பற்றி மிகவும் அலட்டிக் கொள்வதைப் பார்த்து தன் மகனையும் அமெரிக்காவிற்க்கு அனுப்ப முடிவு செய்கிறார்.

அங்கு அவனுடன் படிக்கும் ஜெம்மா என்னும் அமெரிக்க பெண்ணுக்கும் அவனுக்கும் காதல் அரும்புகிறது. ஆனால் அதை அப்பா நிச்சயம் ஒப்புக் கொள்ள மாட்டார், தங்கைக்கு திருமணம் ஆகும் வரை பொறுத்திருந்து பின்னர் அவரிடம் சொல்லிக் கொள்ளலாம் என நினைக்கிறான். 

தங்கையை தன் தங்கை மகனுக்கே திருமணம் செய்து தருகிறார் அப்பா. மாப்பிள்ளை அதிகம் படிக்கவில்லை, அப்பாவின் வெல்ல மண்டியை கவனித்துக் கொள்கிறான். அந்த திருமணத்தில் மாப்பிள்ளையின் சித்தப்பா பெண்ணை ராமசந்திரனுக்கு பேசி முடிக்க அவர்கள் முடிவு செய்ததும் தன் காதலை தெரிவிக்க வேண்டிய நிர்பந்தம் அவனுக்கு. எதிர்பார்த்ததைப் போலவே அப்பா ஒப்புக் கொள்ளவில்லை. அதனால் ஜெம்மாஆசைப்பட்டது போல் இந்தியாவில் நடக்காமல், அமெரிக்காவில் கோவிலில் இந்திய முறைப்படி தாலி கட்டி திருமணம் நடக்கிறது. அமெரிக்க பெண்ணாக இருந்தாலும் ஒரு இந்தியப் பெண் போல நடந்து கொள்கிறாள் ஜெம்மா.

அதற்கு நேர் மாறாக இருக்கிறார் இந்திய மாப்பிள்ளை. மகளும் அண்ணன் அமெரிக்க பெண்ணை மணந்து கொண்டதை சாக்காக வைத்து தந்தையிடம் காசு பறிக்கிறாள். கணவன் டாஸ்மாக் கடையை ஏலத்தில் எடுக்க தந்தையிடம் பொய் சொல்லி பணம் வாங்க அவளே கணவனுக்கு ஆலோசனை சொல்கிறாள். கடைசியில் கணவன் ஒரு சின்ன வீடு செட்டப் செய்து இவளை புறக்கணிக்கிறான். ஒரு நாள் அவளை அடித்து கீழே தள்ள, அவள் கையில் இருந்த குழந்தைக்கு தலையில் பலமாக அடிபட, காது கேட்கும் சக்தியை இழக்கிறது.அதனால் பேச்சும் வரவில்லை. அதற்கு வைத்தியம் செய்யவும் கணவன் முன்வராததால் அவள் தாய்வீடு திரும்புகிறாள். அவள் திருமணத்திற்கு போட்ட நகைகளுக்குப் பதிலாக கவரிங் நகைகளை கொடுக்கிறான். சின்ன வீட்டின் உபதேசத்தால் டாஸ்மாக் கடையில் பொட்டலம் விற்க, கைதாகிறான். 

ஊரிலிருந்து வரும் ராம் தங்கைக்கு விவாகரத்து பெற்றுக் கொடுத்து, குழந்தையின் வைத்தியத்திற்காக பெற்றோர்களையும், தங்கையையும் சென்னைக்கு குடியேற்றுகிறான். தன் தவறுகளை உணர்ந்த தங்கை தான் ஒரு வேலையில் அமர்ந்ததும் அப்பாவையும் அமெரிக்கா அனுப்புகிறேன் என்று கூறி அம்மாவை அண்ணனோடு அனுப்பி வைக்கிறாள். 

அந்த வெள்ளைக்காரி ஆறு மாதத்தில் மகனை விட்டு பிரிந்து விடுவாள், இந்திய மாப்பிள்ளை நன்றாக தன் மகளை கவனித்துக் கொள்வார் என்ற கணிப்புகள் பொய்யாகின்றன. நாடு,மொழி, மதம், இனம் என்ற கண்ணுக்குத் தெரியாத கோடுகளால் நாம் பிளவு படுகிறோம் என்கிறார் கதாசிரியர்.

மேல்நாட்டு மருமகள் படத்தை பார்த்தது போல இருக்கிறது. சரளமான நடை படிக்க வைக்கிறது. அவர் அமெரிக்காவில் பார்த்த விஷயங்களை கதையில் புகுத்திய சாதுர்யத்தை பாராட்டலாம். 

லஷ்மி, ரமணி சந்திரன் கதைகளை ரசிப்பவர்களுக்கு பிடிக்கும்.   

 

அனுஷ்காவிற்கு பிறகு அழகிகள் வராததால் ஸ்ரீராம் புகைப்படங்கள் பகிர்வதை நிறுத்தி விட்டார். ஒரு வேளை ஸ்ரீலீலாவிற்குப் பிறகு  தொடரலாம்.  அந்தக் கால வைஜெயந்தி மாலாவை நினைவூட்டுகிறார் பராசக்தி கதாநாயகி.