என்ன சொல்லப் போகிறாய் எண்காலியே? 02

டிர்ரிங் ....டிர்ரிங்........ 

"ஹலோ இந்தப் பக்கம் ..... பால் கொண்ட பரந்தாமன். அந்தப் பக்கம் யாரு?"

"என்ன? பால் கொண்ட பரந்தாமனா? யாருடா உனக்கு அந்தப் பட்டம் கொடுத்தது?"

"பட்டம் எல்லாம் யாராவது கொடுப்பார்களா? நம்பதான் ஒரு கையால கொடுத்து, இன்னொரு கையில வாங்கிக்கணும். வலது கை கொடுப்பதை இடது கை அறியாமல் வைத்துக்கொள்ளவேண்டும். எல்லா நாளும் அரசியல்வாதிங்களுக்கு நடுவே ஜல்லி அடிச்சுகிட்டு இருக்கற உனக்குத் தெரியாதா?"

"சரி, என்ன ஆச்சு எண்காலி? வந்துடுச்சா?"

"அது வந்து சேர்ந்து ஒரு மணி நேரம் ஆயிடுச்சு. நீ வந்து கலெக்ட் பண்ணிக்கிறயா அல்லது டோர் டெலிவரியா?"

"எவ்வளவு செலவு ஆச்சு?"

"செலவா? அது ஆச்சு ஒன்றரைக் கோடி. பில் அனுப்புகிறேன்."

"பில் எல்லாம் எனக்கு அனுப்பாதே. பில் அமவுண்டை நீ சம்பாதிக்க ஒரு வழி சொல்லுகிறேன். அந்த ஐடியா வெச்சி நாம்ப செலவு பண்ணியதற்கு மேலாக சம்பாதிச்சிடலாம். ஆமாம் அது ஒரிஜினல் பால் தானே? டூப்ளிகேட் இல்லையே?"

"ஏண்டா போலி சான்றிதழ், போலி டாக்டர், போலி சாமியார், போலி மருந்து போல இதுலயும் போலி இருக்கும்னு நெனக்கிறியா? ஆனா போலி இல்லை ஒரிஜினல்தான் என்று வந்தவுடனேயே அதுக்கு ஒரு டெஸ்ட் வெச்சி தெரிஞ்சுகிட்டேன்."

"அட! என்ன டெஸ்ட் வெச்சே?"

"இன்றைக்கு நடக்கற வாய்ச் சண்டையில் யார் ஜெயிப்பாங்க என் மனைவியா அல்லது அம்மாவா என்று தெரிந்துகொள்ள, இரண்டு பேருங்க பெயரையும் ஒவ்வொரு சீட்டில் எழுதி, ஆக்டோபஸ் இருக்கின்ற புட்டியில் போட்டேன். அது என் மனைவி பெயர் கொண்ட சீட்டை, பவ்யமாக எடுத்து என்னிடம் எடுத்துக் கொடுத்தது."

"அப்புறம்?"

"அப்புறம் என்ன? அம்மா வாய்ச்சண்டையில் தோற்று, பக்கத்துத் தெருவில் இருக்கின்ற என் தங்கை வீட்டுக்குப் போய்விட்டார்கள்"

"அட! அப்போ உன்னிடம் இருப்பது ஒரிஜினல் பால்தான்!"

"இந்த ஆக்டோபஸ்சை  வெச்சிகிட்டு, நான் எப்படி ஒன்றரைக் கோடிக்கு மேல் சம்பாதிப்பது? அதைச் சொல்லு முதலில்."

"இரு. அமைச்சர், பி ஏ வோட வெளிநாடு டூர் போயிருக்காரு, நான் உன் வீட்டுக்குத்தான் வந்துகிட்டு இருக்கேன். ஒரு விளம்பரம் தயார் பண்ணியிருக்கேன். அதை எல்லா தினசரிப் பத்திரிகைகளிலும், ஒரு வாரம் தொடர்ந்து வெளியிடுவோம். பிறகு பாரு நமக்கு வருமானம் எப்படி வருகிறது என்று."

இருவரும் சேர்ந்து விவாதம் பண்ணி, பிறகு தயார் செய்த விளம்பரம் இது:

(தொடரும்) 

மே ரி மி அக்டோபர் பதினான்கு முதல் இருபது வரை - எங்கள் ஜோதிடம்

எங்கள் ஜோதிடம் - உங்களுக்கு - அக்டோபர் பதினான்கு முதல் ...

மேஷம் : நம்பவே முடியலே இல்லே? - ஆனாலும் உண்மைங்கோ! தலைவா / தலைவி - உங்களை முறையே தலைவி / தலைவர் முற்றுகையிடப் போறாங்கோ! கண்களால் கைது செய்யப் போறாங்கோ! உங்க கற்பூர புத்தி மற்றும் எளிதில் எடை போடும் கண்கள் உங்களுக்கு உறுதுணையாய் அமையும். வக்கீல்களும், விளையாட்டு வீரர்களும் பெரும் செல்வம் சேர்த்துக் கொள்வீர்கள். குழந்தைகள் இருக்கிறார்களா - அவர்களுடன் அதிக நேரம் செலவழியுங்க. வேற்று பாஷை பேசும் ஒருவருக்கு இடர் களைந்து ஆறுதல் அளிப்பீர்கள். எதிரிகளால் கூட நன்மை ஏற்படப் போகுதுன்னா பாத்துக்குங்களேன்!

ரிஷபம் : நீங்க நடந்துகொள்ளும் விதம் - உங்க குடும்பத்திலே உள்ள பெருசுகளை பேருவகை அடைய வைக்கும். சட்ட சிக்கல் ஒன்று இந்த வாரம் சரியாகப் போயிடும். முற்றிலும் பரிச்சயமில்லாத மனிதர் ஒருவரால் மன அமைதி இழக்க நேரிடலாம் - எச்சரிக்கையாக இருங்க. மனசிலே அன்பு இருக்கு - ஆனா வார்த்தையிலே மட்டும் அது வரமாட்டேங்குதே உங்களுக்கு - அது ஏன்? கடன் கேட்டிங்கன்னா கொடுக்கறத்துக்கு - நண்பர்கள் தயாரா இருப்பாங்க - அதுக்காக அதிகமா வாங்கி வம்புல மாட்டிக்காதீங்க! 'எனக்கொரு மகன் பிறப்பான் - அவன் என்னைப் போலவே இருப்பான் " எங்கியோ பாட்டுச் சத்தம் கேட்குதே - நீங்கதானா !! பாடுங்க, பாடுங்க, பாட்டையும் கேளுங்க!!

மிதுனம் : மேலதிகாரிங்களைப் பார்த்து, புன்னகைத்து, 'குட் மார்னிங்'' சொல்லுங்க - நிச்சயம் நன்மையுண்டு. பதவி உயர்வும் வரும். பிரதிபலனை எதிர்பாராமல் உதவும் உங்கள் குணம் எல்லோராலும் பாராட்டப்படும். நீண்ட காலமா அலட்சியமா போட்டு வெச்சிருந்த நீண்ட காலத் திட்டங்களை சோம்பல் பாக்காம சுறுசுறுப்பா கவனியுங்க. அட! நீங்க ரொம்ப நாளா மறந்துபோயிருந்த ஒரு நண்பர் உங்களுக்கு சரியான சமயத்தில் உதவப்போகிறார். அரசியல்ல இருக்கறவங்களுக்கு - சமூக அந்தஸ்து உயரப் போகின்றது. உங்க பாட்டு : 'வெற்றி மீது வெற்றி வந்து என்னைச் சேரும்......'

கடகம் : சொல்வதையும், செய்வதையும் - சிறப்பு கவனத்தோடு சொல்லுங்க, செய்யுங்க - கடவுளை நம்பினோர் கைவிடப்படார் - பயணங்களால் பலன் ஏற்படும். கண்ணையும், காதையும் கூர்மையாக வைத்துக்கொண்டு மற்றவர்கள் கூறுவதை திறந்த மனதோடு முதலில் கேளுங்க - அப்புறமா அவங்களுக்கு அறிவுரை கூறுங்க. இரும்பு வியாபாரிகளும், மரக்கடைக்காரர்களும் இரண்டு கைகளாலும் நிறைய பணம் அள்ளூவீங்க. ஏழைகளுக்கும் கொஞ்சம் கொடுங்க - அவங்க சந்தோசப்பட்டா - உங்க செல்வம் இன்னும் பெருகும். உங்க பாட்டு : ' உள்ளதைச் சொல்வேன், சொன்னதைச் செய்வேன், வேறொன்றும் தெரியாது'

சிம்மம் : முன்னெச்சரிக்கையான ஆள் நீங்க. அதனால எந்த வம்புலேயும் மாட்டிக்காம சந்தோஷமா இருப்பீங்க. இந்த வாரம் முழுவதும் தைரியமா, தன்னம்பிக்கையோட, 'அம்மா கும்மா செம ஸ்டிராங்கா' இருப்பீங்க. கெட்டிமேளச் சத்தம் சிலருக்கு ஒலிக்கும். நடைப் பயிற்சி, நடனப் பயிற்சி என்றெல்லாம் - நல்ல ஆரோக்கியம் தரும் வழிவகைகளில் மனம் செல்லும். ஆயிரக்கணக்கில் (கி மீ) பயணம் செல்வீர்கள். மருத்துவர்களுக்கு பொற்காலம். குடும்ப உறவுகள் முன்னேற்றமடையும். பொருளாதார அபிவிருத்தியும் தென்படுகிறது.

கன்னி: மறப்போம், மன்னிப்போம் - இதை இந்த வாரம் கடைபிடியுங்க. சந்தோசமும் சௌக்கியமும் உங்களை வந்தடையும். வார்த்தைகளால் கலக்கமடையாதீங்க. புகழ், செல்வம் ஓங்குகின்ற வாரம். உங்களின் இனிய சுபாவத்தால் - உடன் பணிபுரிபவர்களால் பாராட்டப்பெறுவீர்கள். உங்களின் நேர்மையான நடத்தை சுற்றிலும் உள்ளவர்களைக் கவரும். தொழில் முனைவோர் முன்னேற்றம் அடைவார்கள். தேர்தல்ல நின்னீங்கன்னா - எதுத்து நிக்கறவங்களுக்கு டிபாசிட் காலி ஆயிடுங்கோ! ஆனா என்ன - எதுத்து நிக்கறவரும் கன்னி ராசியான்னு பாத்துக்குங்க ... !

துலாம் : பதவி உயர்வு, வருமான அதிகரிப்பு எல்லாம் வருதுங்கோ! நம்பிக்கையோட இருக்கறது தப்பு இல்லே - ஆனா - அதீத நம்பிக்கைகளை சற்றுத் தள்ளி வையுங்க - அளவோட இருக்கறது எப்பவுமே நல்லது பாருங்க! இந்த வாரம் தனுசு ராசிக்காரங்க உதவுவாங்க. சொத்து சேரும். உங்க புகழைப் பார்த்து எதிரிங்க, கடைக்குப் போய் ஜெலுசில் வாங்கிச் சாப்பிடுவாங்க. தேக ஆரோக்கியம் சிறப்பாக இருக்கும். பிறர் பாராட்டும்படியான திறமைகள் வெளிச்சத்திற்கு வரும். விவசாயிகள் அதிகம் பயன் அடைவர்.

விருட்சிகம் : பாட்டு கேளுங்க, சினிமா பாருங்க - குஷாலா இருங்க - யாரு உங்கள கேக்கறதுங்கறேன்! ஆனா - உடம்பப் பாத்துக்குங்க - சாப்பிடும் பொருள் ஒன்றால் சுகவீனம் ஏற்படலாம் - ஆரோக்கியமானத, அளவோட சாப்பிடுங்க. குழந்தைகளால் மேன்மை - அதனால தலை நிமிர்ந்து வெற்றி நடை போடுவீங்க. பிரச்னைகள் எல்லாவற்றுக்கும் சுமுகமான முறையில் சரியாகும் - உங்க முயற்சியால. அதிர்ஷ்ட தேவதை உங்களைப் பார்த்துச் சிரிக்கிறாள். அதை அப்படியே அனுபவியுங்க.

தனுசு : அப்பா அம்மாவால நன்மைகள் நடக்கும். மாணவர்கள் நல்ல மார்க் வாங்குவாங்க. செல்வாக்கு அதிகரிக்கும். செயல் திறன் கூடும். புது வாகனம் - புக் பண்ணியது - வாசலில் வந்து ஹார்ன் அடிக்கும் - சந்தோசமா சவாரி போங்க. உங்க யோசனைகளுக்கு ஜிகினா ஒட்டி ஜிகு ஜிகுன்னு ப்ரெசெண்ட் பண்ணுங்க - நல்லா வியாபாரம் ஆகும். கொல்லன் தெருவிலே ஊசி விற்றீர்கள் என்றால் கூட - அதிக விலை கொடுத்து வாங்கிப்பாங்க. 'நினைத்தாலே இனிக்கும்' - ரசமலாய் கச முச கூட ஏதோ ஒன்று ஏற்படலாம் . உங்க பாடு ஜாலிதான்! ஏற்றுமதி யாவாரம் செய்பவங்க நிறைய லாபம் சம்பாதிப்பாங்க.

மகரம் : கலைஞர்களுக்கு பொன்னான வாரம். உங்க இரக்க சிந்தையும், தத்துவார்த்தமான போக்கும் - உங்க சிஸ்யப் புள்ளைங்களை ஊரெல்லாம் உங்க புகழ் பாடி போஸ்டர் ஒட்ட வைக்கும். உங்க வாரிசு ஒன்று உங்கள ரொம்பப் பெருமை கொள்ள வைக்கப்போகுது! ஓட ஓட உள்ள உறவு அத்தையோட ஒன்று விட்ட பேரனோட மச்சினன் - அல்லது ஆச்சானுக்குப் பீச்சான் - மதனிக்கு நேர் உடன் பிறந்தான் இப்படி ஏதாவது ஒருவரால் லாபம் ஏற்படும். உடன் பணிபுரிபவர்களுக்கு உங்க நிலைமையை, கருத்தை, புரியும்படியாக, விளக்கிச் சொல்லுங்க - இல்லாவிட்டி ஏதாவது பிரச்னை ஏற்படலாம்.

கும்பம் : புதிய வர்த்தக யோஜனை ஏதேனும் இருந்திச்சுன்னா உடனே செயல்படுத்துங்க. சீரும் சிறப்புமா செழித்தோங்கும். கல்யாண காலம் - சிலருக்கு கூடி வரும். வாழ்க்கையில் எந்த கடின நேரத்தையும் சமாளித்துவிடும் சர்வ வல்லமை பொருந்தியவரு நீங்க. தலைவலி ஜலதோசம் போல சில்லரைத் தொந்தரவுங்க தோன்றி அகலும் - கவலைப் படாதீங்க. முதிய வயது பெற்றோர் இருந்தால் - அவர்களின் ஆரோக்கியத்தில் அக்கறை செலுத்துங்க, அவர்களுடன் மனம் விட்டுப் பேசுங்க. மன நிறைவானப் பயணம் ஒன்றை மேற்கொள்வீர்கள்.

மீனம் : எதிரிங்க எல்லாரையும் புறமுதுகிட்டு ஓட வெப்பீங்க. சிலருக்கு முட்கள் நிறைந்த பாதையில் பயணம் போக வேண்டியதிருக்கலாம் - உறுதியான, முள் தைக்க முடியாத செருப்பு அணிந்துசெல்வது நல்லது. ஒவ்வொரு அடியையும் - நிதானமாக ஆனா உறுதியாக எடுத்து வையுங்க. மலை போலே வரும் சோதனை யாவும் பனி போல் நீங்கிவிடும் - எனவே அஞ்சற்க. உங்க கலகலப்பான சுபாவத்தால பக்கத்துல இருப்பவங்க எல்லோரும் பரவசப்படுவாங்க. அரசியல்ல வாத்தியாருங்களுக்கும், வாத்தியாருங்கள்ள அரசியல் செய்வோருக்கும் உசிதமான காலம் இது. நில உடைமைக் குறிப்பேடு இருக்குதா? தூசி தட்டி எடுத்து வெச்சிக்குங்க - லாபகரமான வரவுகளுக்கு உபயோகப்படும். சொத்தைப் பல்லு இருந்தா அதை அகற்றிடுங்க - இல்லாவிட்டி வீட்டுல இருக்கற / செய்யற ஸ்வீட்டுங்கள - நீங்க சாப்பிடாம - மத்தவங்களுக்குக் கொடுத்து, பல் வலி வராம பாத்துக்குங்க!

மே ரி மி !! எங்கள் ஜோதிடம் - உங்களுக்கு ...

2009  அக்டோபர்  ஏழு முதல் பதின்மூன்று வரையிலும் !

மேஷம் : செய்வன திருந்த செய்யுங்கள் - இந்த வாரம் உங்களுடையது.  வியாபார வெற்றி, சந்தோஷம் , வருமான உயர்வு எல்லாமே உங்களுடையது..  உடன் பணிபுரிபவர்கள் உங்களுக்கு சந்தோஷம் மொண்டு வருகிறார்கள். அதுல குளியுங்க.

ரிஷபம் : பிடிவாத குணத்தை கைவிட்டு - நண்பர்களிடமும் உறவினர்களிடமும் கொஞ்சம் இரக்கம் காட்டி - மன்னிப்பு கேளுங்கள். துணைவர் / துணைவி உங்களுக்கு நிபந்தனையற்ற ஆதரவு தருவார்கள். மகிழ்விடங்கள் செல்வீர்கள்...

மிதுனம் : சிலருக்கு தொழில் மாற்றம்; பலருக்கு தேர்வில் வெற்றி. உடல் உபாதை அறிகுறி ஏதேனும் தென்பட்டால் - மருத்துவ மனை செல்லுங்கள். அட்வைஸ் பெறுங்கள் - அதன்படி நடங்க - அசட்டையாக இருக்காதீங்க. புதிய நட்புக்கள் உருவாகப்போகின்றன.

கடகம் :  குழந்தைகளால் குதூகலம், கொண்டாட்டம். உங்களின் நிர்வாகத்திறனும், அறிவுரை வழங்கும் திறனும் ஓங்கி நிற்கும். சந்தோஷமா இருங்க - மற்றவர்களையும் சந்தோசப்படுத்துங்க! 

சிம்மம் : வீட்டு விவகாரங்கள், வேதனைகள் அகலும். பண விஷயங்களில் எச்சரிக்கை தேவை. இந்த வாரம் உங்க கற்பனை ஊற்றும், யோசனைகளும் - உங்களைச் சுற்றி இருப்பவர்கள் அதிசயித்து, (அவரவர்களின்) மூக்கின் மேல் விரலை வைக்கச் செய்யும். புது காரு, புது வீடு - புது (ஹாங்... அது கிடையாது ) -- ஜமாயுங்க. 

கன்னி :  ஒங்க கிட்ட உதவி பெறுவார்கள் பலர் - ஆனா அவுங்களுக்கு தமிழிலேயே பிடிக்காத வார்த்தை 'நன்றி' அதனால அதை உங்களிடம் சொல்ல மாட்டாங்க. அதனால என்ன? உங்களிடம் உள்ள தைரியம், தன்னம்பிக்கை, உற்சாகம் - மற்றவர்களின் நன்றியை எதிர்பாராதது.

துலாம் : ரொம்ப நாளா புத்தகம் எழுதனும்னு நெனச்சிருந்தீங்கன்னா - ஆரம்பியுங்க எழுத - இப்போ. பொதுப பணிகளில் வெற்றி உங்களைத் தேடிக் கொண்டிருக்கிறது - கதவைத் தட்டும்போது - திறங்க. வெள்ளிக் கிழமை தொடங்கும் பணியில் வெற்றி நிச்சயம். 

விருட்சிகம் : எதையும் திட்டமிட்டு நடத்தும் நீங்க - இந்த வாரம் - ஆடை ஆபரண சேர்க்கை என்று தூள் கிளப்பப் போறீங்க. அப்படியே - ரொம்ப நாளா செய்யனும்னு நெனச்சி பிரிட்ஜுல வெச்சிருந்த ப்ராஜக்ட் எதுவாக இருந்தாலும் (அது குலாப் ஜாமூன் செய்யும் ப்ராஜக்டா இருந்தாலும்) உடனே எடுத்துச் செய்யுங்க. செயம் உங்க பக்கந்தேன்!

தனுசு : நல்ல காலம் பொறக்குது - புது திட்டங்கள் பலன் அளிக்கப் போகுது; குழந்தைங்கள வெளியில - உல்லாசப் பயணம் கூட்டிப்போங்க. காசு விஷயத்துல எச்சரிக்கையா இருங்க. 

மகரம் : கூட இருக்கறவங்க பேச்சைக் கேளுங்க, பயன் பெறுங்க. மகளிர் அணித் தலைவி / மக்கள் அணித்தலைவர் உங்களைப் பார்த்துச் சிரிப்பாங்க - கல்யாணம் ஆகாத கண்ணனுக்கும், கன்னிக்கும் - கல்யாண மாலை விழப்போகுது. 

கும்பம் : சின்ன விஷயங்களுக்கு மனசை அலட்டிக்காம - கற்பனை திறனை வளர்த்துக் கொண்டு சந்தோஷமா இருங்க. ஆடம்பரப் பொருட்கள் ஆசையாய் வந்து சேரும். அலுவலகத்தில் ஒரு முக்கியமான பொறுப்பு வரும் - அதை சவாலாக ஏற்று வெற்றிகரமாக செய்து முடியுங்கள் - உங்கள் புகழ் உயரும். 

மீனம் : வீட்டை விட்டு வெகு தூரத்தில் உள்ளோருக்கு வெற்றி மீது வெற்றி வந்து சேரப் போகிறது. உடன் பணி புரிபவர்களின் பிரச்சனைகளை தீர்த்துவைத்து அவர்களின் நன்மதிப்பைப் பெறப் போகிறீர்கள்.