புதன் 200422 : ஊரடங்கினால் பொது மக்களுக்குக் கிடைத்த நன்மை என்ன? தீமை என்ன?

கீதா சாம்பசிவம்: 

1. நடை, உடை, பாவனைகள் ஒழுங்காக இருந்தாலும் மனதளவில் பலரும் வேறே முகத்தைக் கொண்டிருக்கிறார்களே? அது ஏன்?


# மன இயல்பு நடை உடை பாவனைகளில் வெளிப்பட்டு விடுமானால் இந்த உலகில் வாழ்வது சிரமமாகிவிடும்.

& அஞ்சு விரலும் ஒரே பெயர் கொண்டிருந்தாலும், ஒரே மாதிரியாவா இருக்கு (என்று கேட்டு, மனதை சமாதானப்படுத்திக்கொள்ளலாம். )

2. ஒருவர் மேல் பகைமை 50 வருடங்கள் ஆனாலும் நீடிக்குமா என்ன? தொலைக்காட்சித் தொடர்கள், திரைப்படங்களில் வருகிறாப்போல்! அப்படி ஒருத்தர் இருக்கார். அவர் தன் எதிரியின் பெயரை எப்படியானும் நாசமாக்கவேண்டும் என்றே செயல்படுபவர்!

 # விரோதபாவம் எவ்வளவு நாட்களுக்கு தீவிரமாக நீடிக்கும் என்பது அது உண்டான சூழலின் கடுமை, பாதிக்கப்பட்டவரது மனப்பக்குவம் ஆகியவற்றைச் சார்ந்திருக்கும்.

& மனிதர்கள் மாறலாம் என்று தெரிந்துகொண்டோம் என்றால், பகைமை உணர்ச்சி எல்லாம் காலத்தால் மாறிவிடும். 

என்னுடைய சின்ன அண்ணனின் நண்பர்களில் இருவர். ஒருவருக்கொருவர் கீரியும் பாம்புமாக எஸ் எஸ் எல் சி வகுப்பு வரையிலும் இருந்து வந்தனர். ஒருவரோடு ஒருவர் பேசமாட்டார்கள். அப்புறம் கல்லூரி நாட்களில் இருவரும், வெவ்வேறு ஊர்களில், வெவ்வேறு படிப்பு படித்தார்கள். வேலை பார்த்ததும் அப்படியே. கிட்டத்தட்ட நாற்பது வருடங்கள் கழித்து, அண்ணனின் நாகை நண்பர்கள் எல்லோரும் அயோத்யா மண்டபம் பக்கத்தில், ஒரு நண்பரின் வீட்டில் சந்தித்தார்கள். நானும் அங்கே இருந்தேன். குறிப்பிட்ட அந்த இரண்டு பேரும் சொன்னது - " ஏதோ சில்லி காரணங்களால் நாங்க சண்டை போட்டு ஒருவருக்கொருவர் பேசாமல் இருந்தோம். இப்போ நினைத்துப் பார்த்தால்தான் அவை எவ்வளவு சில்லி காரணங்கள் என்று தெரிகிறது. " (ஒரு சில்லி காரணம் - யார் நல்ல நடிகர் - சிவாஜியா அல்லது ஜெமினியா !) 

3. ஒரு நிகழ்வில் கலந்து கொள்ள நம்மை அழைத்தவர்கள், நமக்கு முன்னுரிமை எனச் சொன்னவர்கள், நாம் அங்கே போய்ச் சேர்வதற்குள்ளாக அதை நடத்தி முடிப்பது பற்றி? கடைசியில் நாம் வந்திருக்கிறவங்க கிட்டே கெட்ட பெயர் வாங்கிப்போம், முன்னாடியே வரமாட்டியானு! ஆனால் நமக்குச் சொன்ன நேரமும் அவங்க நடத்தி முடிச்ச நேரமும் வேறேயாக இருக்கும்!

 # இந்த மாதிரி மனக்குறைகள் சரியல்ல.  நமக்குச் சொல்லப் பட்ட நேரம் தான் காரணம் என்றால் அதை தெளிவாக சொல்லிவிட வேண்டியதுதான். 

& இந்த மாதிரி நிகழ்வுகள் எப்பவும் நடைபெற சாத்தியம் இல்லை. Communication gap தான் இந்த வகை ஏமாற்றங்களுக்கு முதல் காரணம். சொல்பவர், சரியாக உறுதியாக சொல்லி, அதை கேட்டவர் சரியாகப் புரிந்துகொண்டாரா என்று உறுதிப் படுத்திக்கொண்டால் எல்லாம் சரியாக இருந்திருக்கும். அழைப்பு விடுப்பவர், எல்லோருக்குமே சம்பிரதாயமாக உபச்சார வார்த்தைகள் சேர்த்துத்தான் அழைப்பார்கள். அழைப்பை ஏற்பவர், எந்த நாள், எந்த இடம், எந்த நேரம் என்பதை ஒன்றுக்கு இரண்டுமுறை கேட்டு, நிச்சயப்படுத்திக்கொண்டு, " நிச்சயம் வருவேன் " என்று உறுதி அளித்திருந்தால், அழைத்தவர் அதை மீறி எதுவும் செய்ய வாய்ப்பில்லை. அதையும் மீறி செய்தார் என்றால், மன்னிப்போம், மறப்போம் என்று விட்டுவிடுதல் நலம். 


4. இன்னும் சிலர் இருக்கிறார்கள். தாய், தந்தையிடமிருந்தே சகோதர, சகோதரிகளைப் பிரித்துவிடுவார்கள். அப்படிப் பிரிக்கிறார்கள் என்பதை சம்பந்தப் பட்டவர் உணரும் முன்னரே இது நடந்து முடிந்து விடும். கடைசியில் பாதிக்கப்பட்டவர் வார்த்தைகள் சபையில் ஏறாது! இப்படியான மனிதர்களைக் கையாளுவது எப்படி?

# அடுத்தவர் நம்மைப் பற்றிச் சொல்வது அல்லது நினைப்பது பற்றிய கவலைகள் வீணான சஞ்சலம் தவிர வேறு அல்ல.

& தாய் தந்தையரிடமிருந்து சகோதர சகோதரிகளைப் பிரிக்கிறவர் யார்? சகோதர சகோதரிகளில் ஒருவரா? வேறு சொந்தமா? வேறு பந்துக்களா? தாய் தந்தையரிடமிருந்து பிள்ளைகளை பிரிக்க ஒருவரால் முடிகிறது என்றால், அந்தத் தாய் தந்தையோ அல்லது பிள்ளைகளோ உடன்படாமல் யாரும் பிரிக்கமுடியாது. 

5. உள்ளுணர்ச்சி சொல்லுவதை நீங்கள் நம்புவீர்களா? எனில் அப்படி நம்பி நடந்த ஏதேனும் நிகழ்ச்சி?

# மிகச்சரியான உள்ளுணர்வுகள் எல்லாருக்கும் வருபவைதான்.  சொல்லக்கூடிய அளவுக்கு முக்கியத்துவம் வாய்ந்த எதுவும் அண்மையில் இல்லை. 

& ஒருநாள் மொபைல் ஃபோனில், ஸ்க்ரீன் லாக் வேண்டாம், அதை அகற்றிவிடலாம் என்று ஓர் உள்ளுணர்வு தோன்றியது. உடனே செயல்படுத்தி, ஸ்க்ரீன் லாக்கை அகற்றினேன். 

அதற்கு சில நாட்கள் கழித்து ஒரு நாள் ( 26-06-2017) மாலை நேரம் - தன்னந்தனியனாக ஷாப்பிங் முடித்து திரும்பிக் கொண்டிருந்த என்னை அடையாளம் தெரியாத வாகனம் ஒன்று மோதி, ரோடின் ஓரத்தில் தூக்கிப்போட்டது. அப்பொழுது நினைவிழந்து இரத்த வெள்ளத்தில் கிடந்த என்னைக் காப்பாற்றியது என் சட்டைப் பையில் நான் வைத்திருந்த மொபைல் ஃபோன். அதை எடுத்துப் பார்த்த ஆட்டோக்காரர்(?) ஒருவர், அதில் எனக்கு சமீபத்தில் வந்திருந்த அழைப்பு எண்களைப் பார்த்து, அவர்களுக்கு விபத்து பற்றி அறிவித்ததால், மின்னல் வேகத்தில், உறவினர்களும் நட்புக்களும் அந்த இடத்திற்கு விரைந்து வந்து என் உயிரைக் காப்பாற்றினார்கள். 

நான் முன்பு மொபைல் ஸ்க்ரீன் லாக் அகற்றாமல் இருந்திருந்தால் - விபத்து பற்றிய செய்தி யாருக்குமே சென்றிருக்காது, நானும் பிழைத்திருக்கமாட்டேன். உள்ளுணர்வு என்னைக் காப்பாற்றியது. 

6. மனித குணங்களை உள்ளுணர்ச்சியால் கண்டு பிடிக்கலாம் என்பதை நான் நம்புகிறேன். நீங்கள்?

 # நான் நம்ப மாட்டேன்.

& சில சமயங்களில். ஆம். 

7. திட்டம் போட்டுப் பழி வாங்குபவர்கள் தொலைக்காட்சிகளில் மட்டுமில்லாமல் நிஜ வாழ்க்கையிலும் இருக்கிறார்களே! அவங்களுக்குக் குற்ற உணர்வே வராதா?

 # பழி வாங்குவது என்றால் அவர்களுக்கு நாம் ஏதோ பாதகம் செய்தால்தானே பழி வாங்க வேண்டி வரும் ? அப்படியானால் குற்ற உணர்வு வர நியாயமில்லை.

& திட்டம் போட்டுப் பழி வாங்குபவர்கள் என்று பன்மையில் சொல்லியிருப்பது ஆச்சரியமாக உள்ளது. ஏதேனும் உதாரணம் கொடுக்கவும். பொதுவில் சொல்ல இயலவில்லை என்றால் வாட்ஸ் அப் மூலமாக விவரங்கள் அனுப்புங்கள். பதில் அனுப்புகிறேன்.                 

8. காரணமே இல்லாமல் ஒருவரை அவர் ரொம்பவே பெர்ஃபெக்டா இருக்கார் என்பதாலும் எல்லாவேலைகளையும் திறம்படக் கையாளுகிறார் என்பதாலும் வெறுப்பது சரியா?

# சரியல்ல.

& நீங்க சொல்றது வேடிக்கையா இருக்கு. நான் ரொம்ப பெர்ஃபெக்டாக இருந்துகொண்டு,  வேலை எல்லாவற்றையும் திறம்படக் கையாளுகிறேன் என்றால், என்னைப் பார்த்துப் பொறாமை கொள்ளுபவர்கள் இருக்கலாம். ஆனால், அதற்காக என்னை வெறுப்பவர்கள் இருக்கமுடியுமா? அப்படி வெறுப்பவர்கள் காரணமே இல்லாமல் என்னை வெறுக்கிறார்கள் என்று எப்படி சொல்லமுடியும். அவர்கள் வெறுப்பதற்கான காரணம், நம்முடைய திறமைகள் என்று தெரிந்துவிட்டதே! அப்படியே யாராவது இருந்தாலும், அவர்களின் வெறுப்பு நம்மை என்ன செய்துவிடும்! 

9. பலருக்கும் ஸ்ட்ரெயிட் ஃபார்வர்ட் என்றால் பிடிக்கவில்லை. ஏன்? அப்படி இருப்பவர்களைப் பின்னால் கேலி செய்கின்றனரே! ஏன்?

# ஸ்ட்ரெய்ட் ஃபார்வர்ட் நபர்கள் பலரும் ஏதோ அகில உலகமும் தம்மை மதிக்க வில்லை என்று தவறாக நினைக்கிறார்கள் என்று நான் நினைக்கிறேன். 

10.இந்தக் கொரோனா ஊரடங்கினால் பொது மக்களுக்குக் கிடைத்த நன்மை என்ன? தீமை என்ன?

 # இது பற்றி ஒரு கட்டுரையே எழுதலாம். 

& நன்மை : self introspection செய்துகொள்ள நிறைய நேரம் கிடைத்தது. புத்தகங்கள் படிக்க, வீட்டுச் சொந்தங்களுடன் நிறைய பேச, பழக. எவை எல்லாம் நம்முடைய அத்தியாவஸ்யத் தேவைகள் என்பதைத் தெரிந்துகொள்ள. குறுக்கீடுகள் எதுவும் இன்றி, வீட்டுக்குள் நாம் நினைத்த வேலைகளை செய்ய நேரம் கிடைத்தது. வாகனங்கள் எதுவும் இயங்காததால், சுவாசிக்க சுத்தமான காற்று. 

தீமை : மக்களின் சுயநல போக்கு அதிகரித்தது. நெருக்கடி தேவைகளை உடனடியாக பூர்த்தி செய்துகொள்ளுதலில் சட்டக் குறுக்கீடுகள், சிக்கல்கள். வறிய மக்களும், நோயாளிகளும் நிறைய சிரமப்பட்டு காலம் தள்ளவேண்டிய சூழ்நிலை. 

11. குடும்பத்தில் எல்லோரும் சேர்ந்து இருந்தாலும் கணவன் இருப்பதால் மனைவிக்கும், மனைவியுடன் வீட்டில் தங்கி இருப்பதால் கணவனுக்கும் அவரவர் தனிப்பட்ட உரிமைகள் போய்விட்டன எனச் சண்டை வருவதாகப் பத்திரிகைகள் சொல்கின்றன. அப்படியா?

# எந்தப் பத்திரிகை இப்படிச் சொல்கிறது ? இதில் உண்மை இருப்பதும் இல்லாததும் தனி நபர் அனுபவம் சார்ந்தது. 

& நிச்சயம் அப்படி இல்லை. வீட்டு வேலைகளை குடும்ப உறுப்பினர்கள் எல்லோரும் பகிர்ந்துகொண்டால் எல்லோரும் சந்தோஷமாக இருக்கலாம். 

12. கணவன்மார்கள் மனைவிக்கு உதவலாம், ஆனால் இந்தப் பாத்திரம் தேய்ப்பது, துணி தோய்ப்பது போன்ற நகைச்சுவைத் துணுக்குகள் அனைத்தும் பொய் தானே? உண்மையிலேயே செய்வாங்களா?

# லாக் டவுனில் நான் தினசரி பாத்திரம் தேய்க்கிறேன். மெஷின் வந்தபின் துணி துவைப்பது யாவரும் செய்வதுதான்.

& இந்த எந்திர உலகத்தில் எல்லாவற்றுக்கும் எந்திரம் வந்துவிட்டது. உண்மையில் இந்த வேலைகளை செய்கின்ற ஆண்கள் யாரும் இது பற்றி நகைச்சுவை துணுக்குகள் எழுதமாட்டார்கள். அப்படி எழுதுபவர்கள் அந்த வேலைகளை செய்துகொண்டிருக்கமாட்டார்கள். 


============================================