"திங்க"க்கிழமை : பனீர் பட்டர்ஸ்காட்ச் பர்ஃபி - மதுரவர்ஷினி ரெஸிப்பி

 பனீர் பட்டர் ஸ்காட்ச் பர்ஃபி 

மதுரவர்ஷினி

தேவையான பொருட்கள்  

காய்ச்சிய பால் -   250 மி லி 

பனீர் -   200 கிராம் 

  

பால் பௌடர்   -  150 கிராம் முதல் 200 கிராம் முதல் 

சர்க்கரை   நான்கு ஸ்பூன் 

ஏலக்காய் பௌடர்   -  ரெண்டு டீஸ்பூன் 

பாதாம் பிஸ்தா முந்திரி   -  ஒவ்வொன்றும் எட்டு பருப்புகள்

பட்டர் ஸ்காட்ச் அல்லது வெனிலா எஸ்ஸென்ஸ் - உங்கள் தெரிவில் 

ஜஸ்ட் இருபது நிமிடங்களில் செய்து விடக்கூடிய இனிப்பு இது.  இந்த தீபாவளிக்கு மருமகள் வீட்டில் செய்தது.  

​முதலில் பனீரை சிறிய துகள்களாய்  துருவி வைத்துக் கொள்ள வேண்டும்.  பாதாம், முந்திரி பிஸ்தாவை ட்ரையாகவே அரைத்து வைத்துக் கொள்ள வேண்டும்.   தண்ணீர் சேர்க்காமல் காய்ச்சி இறக்கிய பாலில் பனீரை சேர்க்கவேண்டும்.  

பிறகு எடுத்துக் கொண்டிருக்கும் பால் பவுடரில் முக்கால் அளவு பௌடரை  இதில் சேர்க்க வேண்டும்.  கட்டி இல்லாமல் கிளறி விட்டு விட்டு அடுப்பில் ஏற்றலாம். 

அடிபிடிக்காமல் கிளறிக்கொண்டே இருக்க வேண்டும்.  ஒருநிலையில் அது திக்காக வர ஆரம்பிக்கும்.  சிறிய சிறிய குமிழ்கள் வரும். இந்த நிலையில் நான்கு ஸ்பூன் சர்க்கரை சேர்த்து விடவும்.  கிளறிக்கொண்டே இருக்கவும்.  அது திரண்டு செமி சாலிட் பதத்துக்கு வரும்போது கொஞ்சம் சுவைத்துப் பார்க்கவும்.  இங்கு தேவைப்பட்டால், திக்காக வரவில்லை என்றால் பாக்கி வைத்திருக்கும் பால் பௌடரை சேர்த்து விடவும்.  ஏலக்காய் பொடியை மற்றும் அந்த முந்திரி, பாதாம், பிஸ்தா பருப்புப்பொடியை அடுப்பை அணைத்துவிட்டு அதில் சேர்க்கவும்.  உடன் பட்டர்ஸ்காட்ச் அல்லது வெனிலா எஸ்ஸென்ஸை சேர்க்கவும்.  

ஏற்கனவே  நெய்யோ, வெண்ணெயோ தடவி வைத்திருக்கும் தட்டில் இதைக் கொட்டி பரப்பி விடவும்.  அது கொஞ்சம் நீர்ப்பதமாகவே இருக்கும் என்பதால் அதை அப்படியே ஃபிரிஜ்ஜில் வைத்து விடவும்.  பின் வெளியில் எடுத்து வில்லைகள் போடவும்.  தேவைப்பட்டால் அதன்மேல் பூவாகத்துருவிய தேங்காய்ப்பூ தூவி விடலாம்..