நம் பாரம்பரியத்தில் இல்லாத 'ஹாலோயின்' கொண்டாட்டங்கள் இப்போது நம் நாட்டில் கொண்டாடப்படுவதைப் பற்றி ..

 

கேள்வி பதில்கள் 

கீதா சாம்பசிவம்: 

ஒரு கதையைப் படிக்கையிலேயே இது ஆண் எழுதியது அல்லது பெண் எழுதியது எனக் கண்டுபிடிக்க முடியுமா?

# சில சமயம் முடியும்.‌ சில சமயம் முடியாது.‌ பெண்களை வர்ணிக்கும் போது ஆண் எழுத்தாளர்கள் மாதிரி பெண் எழுத்தாளர்கள் வர்ணிக்க மாட்டார்கள் என்பதை நான் கவனித்திருக்கிறேன்.‌ அதேபோல் அதீத வன்முறை சித்தரிப்புகள் பெண்கள் எழுதுவது இல்லை.

இப்போதைய இளம்பெண்கள் கணவனின் பெற்றோரைத் தங்களுடன் வைத்துக்கொள்வதை விரும்பவில்லை எனப் பரவலாகச் சொல்கின்றனர். அதே சமயம் தன்னுடைய பெற்றோர் தன்னுடன் இருக்கணும் என்றும் தன்னை வளர்த்து ஆளாக்கிப் படிக்கவைச்சிருக்காங்க, கைவிட முடியாது என்றும் சொல்கின்றனர். அதே போல் தானே கணவனின் பெற்றோர்களும்? அவங்களுக்கு மட்டும் இது பொருந்தாதா?

# தர்மரீதியாகவும் தர்க்க ரீதியாகவும் எது சரி எது தவறு,  எது செய்யலாம் எது செய்யக்கூடாது என்பதைக் கண்டுபிடிப்பது மிகவும் எளிது.  அவரவர் மனசாட்சிக்கு (அது ஆண்களானாலும் பெண்களானாலும்) எது சரி / தப்பு என்பது நிச்சயம் புரிந்திருக்கும். இதை மீறி தர்ம நியாயத்திற்குப் புறம்பாக யாரோ ஒருவர் ஏதோ ஒன்றை செய்கிறார் என்றால் அது அவருடைய பிறழ் மனப்பான்மையைக்  காட்டுகிறது. 

இது ஒரு புறம் இருக்க எப்பொழுதும் இளையவர்கள் மட்டுமே தவறு இழைக்கிறார்கள் என்று சொல்வதில் முழு உண்மை இருக்க முடியாது என்பது என் கருத்து. நம்மைப் போன்றவர்களின் கட்சியில் நாம் சேர்ந்து கொள்வது என்பது மனித இயல்பு.

பானுமதி வெங்கடேஸ்வரன்: 

நம் பாரம்பரியத்தில் இல்லாத  'ஹாலோயின்' கொண்டாட்டங்கள் இப்போது நம் நாட்டில் கொண்டாடப்படுவதைப் பற்றி என்ன நினைக்கிறீர்கள்?

# கேளிக்கையோ உட்பொருளோ இல்லாத ஒரு அனாவசிய விஷயம் என்றுதான் நான் நினைக்கிறேன். பீட்சா பர்கர் போன்ற வெளிநாட்டிலிருந்து இறக்குமதியான ஆனால் மூன்றாம் தலைமுறை  விரும்புகிற ஒரு மனப்பான்மையை நாம் வளர்த்துக் கொண்டு விட்டோம்.‌ அவ்வளவுதான்.

& குடியிருப்பில் உள்ள குழந்தைகளுக்கு ஒரு திரில் மற்றும் பொழுதுபோக்கு. ஏதோ சந்தோஷமாக இருக்கிறார்கள் என்று பார்க்கும்போது நமக்கும் ஒரு திருப்தி! காலையிலேயே zepto மூலம் ஆர்டர் செய்து பிஸ்கட் பாக்கெட்டுகள் வாங்கி வைத்திருந்தேன். வேடமணிந்து வந்திருந்த சிறுவர்களைப் பார்த்து என் உதவியாளர் மிகவும் சந்தோஷம் அடைந்தார்! 

எங்கள் குடியிருப்பில், வந்த குழந்தைகளிடம், trick யாரும் செய்யவில்லை! Treat மட்டும்தான்! 

கே. சக்ரபாணி சென்னை 28:

பாசஞ்சர் ரயில்கள்  மற்றும். குட்ஸ்  ரயில்களில்   கடைசி  பெட்டியில். கார்டு  என்று. ஒருவர்   இருப்பார்   அவர். இருப்பதை. எஞ்சின்  டிரைவர்  பார்க்கமுடியாது. எஞ்சின்  டிரைவரை  கார்டு  பார்க்க. முடியாது.   இன்னும். குட்ஸ்    ரயில் களில். எங்கோ. 30/40   பெட்டிகள்  தாண்டி  கார்டு  இருப்பார்.    ரயில்   ஓடும் போது. கார்டுகள்  அவர்கள். இருக்கையில்  அமர்ந்து விடுவார்கள்.   கார்டுக்கும்  எஞ்சின்  டிரைவருகும்  என்ன  கருத்து   பரிமாற்றம்   இருக்கும்.  Guard  க்கு  என்ன வேலை. என்று  God only. Knows. 

# கார்டு என்பவர் வண்டியின் கடைசிப் பகுதியில் இருப்பார் . வண்டி முழுவதுமாக ஒவ்வொரு நிலையத்தையும் தாண்டிச் செல்கிறது என்பதை உறுதி செய்வது இதனால் சாத்தியம்.  அதேபோல இன்ஜின் டிரைவர் வண்டியை ஓட்டுவதில் கவனமாக இருப்பதால் ஒரு இடத்தைத் தாண்டும் போது அதற்கு உண்டான சரியான சிக்னல்கள் இருக்கின்றனவா ஸ்டேஷன் மாஸ்டர் வண்டி கடப்பதைப் பார்த்துக் கொண்டிருக்கிறாரா என்பதை எல்லாம் சரி பார்ப்பது கார்டின் வேலை . அவர்  டிரைவரோடு பேச உள்நிலைத் தொலைபேசித் தொடர்பு இருக்கும் என்று ஊகிக்கிறேன். நிச்சயமாகத் தெரியவில்லை.

நெல்லைத்தமிழன் : 

1. திருமணத்திற்கு பெண்கள் மிகக் குறைவாகக் கிடைப்பதன் காரணம் என்ன? கன்சர்வேடிவ் ஆக நினைக்கிறேன் என்று எண்ணவேண்டாம். முன்காலத்தில் பெண்கள் சம்பாதிக்காமல் இருந்ததால், அதனை ஒரு அட்வாண்டேஜாக எடுத்துக்கொண்டு, அவர்களை அடிமைப்படுத்தியதால்தான், சம்பாதிக்கும் பெண்களுக்கு, எனக்கும் அவனுக்கும் என்ன வேறுபாடு? திருமணம் என்று வந்தாலே அது பார்ட்னர்ஷிப் மாதிரித்தான் என்ற எண்ணம் அதிகமாகிவிட்டதோ?   

#   உத்தியோகம் புருஷ லட்சணம் என்று இருந்த நிலை மாறி இப்பொழுது பெண்களும் வேலைக்கு போகிறார்கள் பல இடங்களில் பெண்கள் அதிகமாகவே சம்பாதிக்கிறார்கள் என்னும்போது அவர்களுடைய மனப்போக்கில் ஒரு மாற்றம் நிகழத்தானே செய்யும்.‌ பெண்களின் எண்ணிக்கை குறைவாகவும் அவர்கள் எதிர்பார்ப்புகள் அதிகமாகவும் ஆகிவிட்டதா நீங்கள் குறிப்பிடும் பலமும் நடப்பது உண்மைதான்.  ஆனால் இன்னும் பத்து வருடங்களுக்குள் நிலைமை மாறிவிடக்கூடும் என  நான் நினைக்கிறேன்.

2.   ஒரு மனிதனின் இறப்பு எப்போது நிகழும் என்று ஜோதிட ரீதியாக சரியாகக் கணிக்க முடியும் என்கிறார்களே. ஏன் எல்லோருக்கும் அவர்கள் அதனைக் கணித்துச் சொல்லக்கூடாது? வாழ்க்கைக்கு அது ரொம்ப உபயோகமாக இருக்குமே.  

# உயிர் பிரியும் நேரத்தை சரியாக கனித்து தெரிந்து கொள்வதால் எந்த வித நன்மையும் இருக்காது மாறாக பலருக்கும் அனாவசிய பயம் திகில் ஏற்படும் என்பது மட்டுமே உண்மை.

3. தொழிற்சாலைகள் குறைந்த விலையில் உணவு அளிக்கும் வழக்கம் ஏன் வந்தது? இதுவும் உற்பத்தியைப் பெருக்கும் உத்தியா இல்லை தொழிலாளர்களின் நலன் சார்ந்த காரணமா?  

# அக்கம் பக்கத்தில் உணவு வசதி இல்லாத தொழிற்சாலைகளில் தொழிலாளர்களுக்கு உணவளிப்பது அவசியமாகிறது .  அதைக் குறைந்த விலையில் அளிப்பது தொழிலாளர்களுக்கு மகிழ்ச்சி -  திருப்தி அளிப்பதுடன் அவர்கள் வேலையையும் சிறப்பாகச் செய்யச் செய்கிறது. கொடுக்கும் சம்பளத்தில் ஒரு பகுதியை இப்படியாகக் கொடுப்பது ஒரு நல்ல உத்திதானே.

4.  அரசு ஏற்றுச் செய்யும் எந்த ஒரு நிறுவனமோ தொழிலோ மக்கள் நலன் சார்ந்தவைகளோ உருப்படியாக இருப்பதில்லையே, அது ஆஸ்பத்திரிகளாகட்டும், பள்ளிக்கூடங்களாகட்டும், பேருந்துகளாகட்டும் இல்லை எதுவாகவேண்டுமானாலும் இருக்கட்டும். எதுவுமே உருப்படியாக இல்லாததன் காரணம் என்ன?  

# அரசியலில் ஊழல் மலிந்தது மட்டுமே பொதுத் துறை நிறுவனங்களில் இழப்பு ஏற்படுவதற்கு முழுமுதற் காரணம்.  HMT வாட்ச் பிரபலமாக இருந்த காலம் ஒன்று இருந்தது.‌ இன்று கூட அரசின் சாராய வியாபாரம் ஓஹோ என்று நடக்கவில்லையா ? அரசு கேபிள் ?

5. சிவாஜி ரசிகன், கமல் ரசிகன், ரஜினி ரசிகன், விஜய் அஜித் ரசிகன் என்று கூறிக்கொள்பவர்கள், வாழ்க்கை முழுவதுமே அந்த நடிகரது ரசிகர்களாக இருக்கிறார்கள். ஆனால் நடிகைகளின் ரசிகர்கள் அப்படியே விசுவாசமாக ஒருவருக்கே ரசிகனாக இருக்கிறார்களா?

# இந்த ரசிகர் கூட்டம் என்பது அறிவார்ந்த விஷயமல்ல. அதுவும் நடிகை என்று வந்துவிட்டால் அது அநேகமாக அழகை அடிப்படையாகக் கொண்டு ரசிக்கும் பட்டாளங்களின் கேலிக் கூத்து என்பதாக இருக்கும். காலப்போக்கில் அது நசிந்து போவது இயல்பு.  " இன்னாருடைய நடிப்பு எனக்குப் பிடிக்கும் " என்று சொல்வது புரிந்து கொள்ளக் கூடியது.‌  அதற்காக ஒரு மன்றம் அமைத்து ஆட்டம் போடுவது தேவையற்ற அறிவற்ற‌‌ நிலைப்பாடு.‌

= = = = = = = = = = =

படமும், பதமும். 

நெல்லைத்தமிழன் : 

ரொம்ப வருடங்களுக்கு முன்பு (சுமார் 20 வருடங்கள் இருக்கலாம்) துபாயில் ஹோட்டலில் தங்கியபோது, என் அறைக்கதவைத் திறந்ததும் அறையில் இருந்த தொலைக்காட்சிப் பெட்டியில் என்னை வரவேற்று ஒரு ஸ்லைட் போட்டிருந்தார்கள். அது எனக்கு ஆச்சர்யமாகத் தெரிந்தது. எனக்கு வழங்கப்பட்ட அறைக்கதவைத் திறந்ததும் இந்த மாதிரி மெசேஜைப் பார்ப்பதற்கு வித்தியாசமாக இருந்தது.

ஹோட்டலில் அறையை அலாட் செய்த பிறகு கார்ட் கொடுப்பார்கள். உடனேயே என்னுடைய அறைக்கதவைத் திறந்ததும் தொலைக்காட்சியில் இந்த டிஸ்ப்ளே இருப்பதைப் பார்க்கமுடியும். சில பல நேரங்களில் பழங்கள் நிறைந்த டிரே ஒன்றும் வைத்திருப்பார்கள் (ரொம்ப அடிக்கடி நான் தங்குவதால்). அங்கிருக்கும் மினி குளிர்சாதனைப் பெட்டியில் உள்ள எதையும் நான் தொட மாட்டேன். காசு பழுத்துவிடும். இது பற்றி என் அனுபவத்தை இன்னொரு பகுதியில் சொல்கிறேன்

- - - - - - - - -

இது லண்டனில் இருந்த வாக்கி டாக்கி டவர் (வாக்கி டாக்கி போல பில்டிங் இருப்பதால்). இதன் வளைவான முகப்பு ஒளியை பிரதிபலிக்கக்கூடியது. இதன் வளைவான தன்மையால், சூரிய ஒளி இதில் பட்டு, குழி ஆடியைப் போன்று பிரதிபலித்து, அந்தக் கட்டிடத்தின் எதிரே நிறுத்தியிருந்த ஒரு ஜாக்குவார் காரின் பாகங்களை உருக்கிவிட்டது (2013). இது பெரிய பேசுபொருளாக ஆனது. பில்டிங் டிசைனைப் பலரும் குறை சொன்னார்கள். பிறகு உடனேயே அதனைச் சரிசெய்தார்கள். இந்தப் படம் அந்தக் கட்டிடம் கட்டியபோது இருந்த நிலைமை. 

ஒளியைப் பிரதிபலிப்பதால் மற்றவர்களுக்கு இடைஞ்சல் என்று புரிந்துகொண்டு சரி செய்த பிறகு நான் எடுத்த படம். அந்தத் தெருவிலிருந்து எடுத்தால் சரியாக விழவில்லை (கட்டிடம் மிக உயரம் என்பதால்). அதனால் சிறிது தூரத்திலிருந்து இந்தப் படத்தை எடுத்தேன். 

= = = = = = = = = =

KGG பக்கம் 

எந்த ஆட்சியாக இருந்தாலும், பெண்களுக்கு எதிரான பாலியல் குற்றங்கள் என்பது ஆங்காங்கே நடந்துகொண்டுதான் உள்ளது. 

குற்றம் இழைப்போருக்கு அந்த தைரியத்தை அளிப்பது எது என்று யோசித்துப் பார்த்தால், மதுவும், போதை மருந்துகளும், முதலிடம் பெற்றாலும் போலீஸ் என்றாலே முன்பு இருந்த பயமும் மரியாதையும் போய், காசு கொடுத்தோ அல்லது கட்சி ஆதரவு கொண்டோ வெளி வந்து விடலாம் என்னும் நம்பிக்கையும் காரணம் ஆகிறது. 

ஊரைக் கெடுக்கின்ற சீரியல்கள், பாரம்பரியத்தையும் கலாச்சாரத்தையும் கேலி செய்யும் திரைக் காவியங்கள் எல்லாம் ஒருபக்கம் இளைஞர்களைக் கெடுக்கின்றது. 

இந்தக் குற்றங்களுக்கு கடுமையான தண்டனை, பொது இடத்தில் மரண தண்டனை நிறைவேற்றுதல் போன்ற கடும் நடவடிக்கைகள் இருந்தால்தான் இத்தகைய குற்றங்கள் குறையும் என்று தோன்றுகிறது. 

வாசகர்கள் என்ன நினைக்கிறீர்கள் என்பது பற்றி கருத்துரை பதியவும். 

- - - - - - - - - - - 

வாக்காளர் பட்டியல் திருத்தம் தமிழகத்தில் இந்த மாதம் நிகழ்கிறது. வாக்காளர்கள் எல்லோரும் சற்று சிரமம் பார்க்காமல், இந்த வாய்ப்பைப் பயன்படுத்தி உங்கள் விவரங்களைப் பதிவு செய்து, நீக்கப்படவேண்டிய வாக்காளர் விவரம், சேர்க்கப்படவேண்டிய வாக்காளர் விவரம் எல்லாவற்றையும் உங்கள் பூத் முகவர் துணையுடன் சரி செய்துகொள்ளவும். 

இப்போது தவற விட்டுவிட்டு வாக்குப் பதிவு நாளில் என் பெயர் இல்லை என்று குறைபட்டுத் திரிவத்தில் அர்த்தம் இல்லை. 

= = = = = = = = = = =