வாரம் ஒரு பாசுரம், மற்றும் நான் படிச்ச கதை

 

              நாலாயிர திவ்யப் பிரபந்தம் – வாரம் ஒரு பாசுரம் தொடர்

நெல்லைத் தமிழன்

முன்னுரை – பகுதி 2 

வைணவ ஆச்சார்யர்கள் பரம்பரை என்பது நாதமுனிகள் முதல் தொடங்குகிறது. நாதமுனிகள் கிபி 823-903 வரை காட்டுமன்னார் கோயிலில் வாழ்ந்தவர். அவருடைய காலத்தில்தான் அவர் முயற்சியெடுத்து திருநெல்வேலிப் பகுதியில் இருக்கும் நம்மாழ்வார் அவதரித்த  திருக்குருகூர் என்ற ஊருக்குச் சென்று நம்மாழ்வார் எழுந்தருளியிருந்த புளிய மரத்தின் அடியில் அமர்ந்து பிரார்த்தித்தார். நம்மாழ்வாரும் நாதமுனிகளுக்குக் காட்சி தந்து திருவாய்மொழி மற்றும் அல்லாமல் மற்ற பிரபந்தங்களையும் , அவற்றின் உட்பொருள்களையும் நாதமுனிகளுக்கு வழங்கினார்.   

நாலாயிரம் என்று சொல்வதால் நான்கு ஆயிரங்கள் இருக்கின்றன என்று பொருளில்லை. கிட்டத்தட்ட நாலாயிரம் பாசுரங்கள்.  

எதனால் நாலாயிர திவ்யப் பிரபந்தத்தை திராவிட வேதம் என்று சொல்கின்றனர்? சனாதன தர்மத்திற்கு அடிப்படை சமஸ்கிருத மொழியில் அமைந்திருக்கும் வேதம். அதில் கூறப்பட்ட கருத்துக்களையே மிக எளிதாகவும் சந்தேகத்திற்கு அப்பாற்பட்டும் தமிழில் சொல்லப்பட்டுள்ளதால் அதனை திராவிட வேதம் என்கின்றனர்.  

தான் பெற்ற பிரபந்தங்களைத் தொகுத்து நான்கு ஆயிரங்களாகப் பிரித்தார் நாதமுனிகள்.   முதலாயிரம், இரண்டாமாயிரம்-முழுவதும் திருமங்கையாழ்வார் இயற்றிய பிரபந்தங்கள், மூன்றாமாயிரம்-இயற்பா, நான்காம் ஆயிரம்-திருவாய்மொழி-நம்மாழ்வார் இயற்றியது.

முதலாயிரத்தில், பெரியாழ்வார் இயற்றிய 473 பாசுரங்கள் பெரியாழ்வார் திருமொழி என்ற தலைப்பிலும், ஆண்டாள் இயற்றிய 173 பாசுரங்கள், (திருப்பாவை 30ம், நாச்சியார் திருமொழி 143ம்), குலசேகரப் பெருமாள் அருளிய 105 பாசுரங்கள் பெருமாள் திருமொழி என்ற தலைப்பிலும், திருமழிசையாழ்வாரின் 120 பாசுரங்களைக் கொண்ட திருச்சந்த விருத்தமும், தொண்டரைப்பொடி ஆழ்வார் அருளிய 45 பாசுரங்களைக் கொண்ட திருமாலையும், பத்து பாசுரங்கள் கொண்ட திருப்பள்ளியெழுச்சியும், திருப்பாணாழ்வார் அருளிச் செய்த பத்து பாசுரங்களைக் கொண்ட அமலனாதிபிரானும், மதுரகவி ஆழ்வார் அருளிய 11 பாசுரங்களைக் கொண்ட கண்ணிநுண் சிறுத்தாம்பும் அடங்கும். (மொத்தம் 947 பாசுரங்கள்)

இரண்டாம் ஆயிரத்தில் திருமங்கையாழ்வார் அருளிய, 1084 பாசுரங்கள் கொண்ட பெரிய திருமொழியும், 20 பாசுரங்கள் கொண்ட திருக்குறுந்தாண்டகமும்,30 பாசுரங்கள் கொண்ட திருநெடுந்தாண்டகமும் அடங்கும் (மொத்தம் 1134 பாசுரங்கள்)

மூன்றாம் ஆயிரத்தில், பொய்கையாழ்வார் அருளிய 100 பாசுரங்களைக் கொண்ட முதல் திருவந்தாதியும், பூத த்தாழ்வார் அருளிய 100 பாசுரங்களைக் கொண்ட இரண்டாம் திருவந்தாதியும், பேயாழ்வார் அருளிய 100 பாசுரங்கள் கொண்ட மூன்றாம் திருவந்தாதியும், திருமழிசையாழ்வார் அருளிய 96 பாசுரங்கள் கொண்ட நான்முகன் திருவந்தாதியும், நம்மாழ்வார் அருளிய 100 பாசுரங்கள் கொண்ட திருவிருத்தமும், நம்மாழ்வார் அருளிய 7 பாசுரங்கள் கொண்ட திருவாசிரியமும், நம்மாழ்வார் அருளிய 87 பாசுரங்களைக் கொண்ட பெரிய திருவந்தாதியும், திருமங்கையாழ்வார் அருளிய 1 பாசுரம் கொண்ட திருவெழுக்கூற்றிருக்கையும், திருமங்கையாழ்வார் அருளிய, கொண்டது என்று வகைப்படுத்தப்பட்ட  (இதில் வேறு கருத்துக்கள் உள்ளன) சிறிய திருமடலும், பெரிய திருமடலும், ஆக மொத்தம் 593 பாசுரங்கள்.   

நான்காம் ஆயிரத்தில், நம்மாழ்வார் அருளிச் செய்த 1102 பாசுரங்கள் கொண்ட திருவாய்மொழியும், கடைசியாக திருவரங்கத்தமுதனார் இராமானுசர் மீது இயற்றிய 108 பாசுரங்கள் கொண்ட இராமானுச நூற்றந்தாதியும் உண்டு. இராமானுஜ நூற்றந்தாதி இராமானுசரின் கடைசி காலத்தில், திருவரங்கத்து அமுதனாரினால் இயற்றப்பட்டது என்றாலும், நாலாயிர திவ்யப் பிரபந்தத்தில் அதுவும் உண்டு. நாதமுனிகள் காலத்திய நாலாயிர திவ்யப் பிரபந்தத்தில் இராமானுச நூற்றந்தாதி கிடையாது. 

எதனால் முதலாயிரத்தில் இந்தப் பிரபந்தங்கள் இருக்கின்றன, ஏன்  நம்மாழ்வார் பிரபந்தங்கள் எல்லாம் ஒரே ஆயிரத்தில் சேர்க்கவில்லை என்பதெற்கெல்லாம் விளக்கம் கிடையாது.

  

தொடர்வோம்...

-----------------------------------------------------------------------------------------------------------------------------

எனக்குப் பிடித்த கதை

By

திருவாழிமார்பன்

 

Henryk Sienkiewicz என்ற நோபல் பரிசு பெற்ற போலந்து எழுத்தாளர் 120 ஆண்டுகளுக்கு முன்னால் (1904)  நம் சனாதன மும்மூர்த்திகளையும், வாழ்வையும், மரணத்தையும் வைத்து  ஒரு அருமையான சிறுகதை எழுதியிருக்கிறார்!

தம் இன/நாட்டு மக்களுக்கு சற்றும் பரிச்சயம் இல்லாத தூரதேசத்து சமயத்தை அறிமுகப்படுத்துவதில் மிகுந்த கண்ணியத்துடன் கையாண்டிருக்கிறார்.

ஒரு மாறுதலாக, பிரம்மாவுக்கு இக்கதையில் ஒரு லீட் ரோல் (தலைமைப்பொறுப்பு) கிடைத்திருக்கிறது. விஷ்ணு, அவ்வப்போது வரும் பிரச்னைகளை கை தேர்ந்த மேலாளர் போல பொருள்/நேர விரயமின்றி சாம தான பேத தண்டம் என்ற வரிசையில் எளிதாகவும், நளினமாகவும் தீர்த்து வைக்கிறார். 

தத்துவம், சமய ரீதியான  கலைச்சொற்கள் என்றெல்லாம் குழப்பிக்கொள்ளாமல் நமக்குப்பரிச்சயமான R K Narayan போல, எளிய சொற்களும் நடையும்  கொண்டு, சிறுவர்கள் முதல் மேதாவிகள் வரை ரசிக்கும் வண்ணம் ஆக்கியிருப்பதில்  எழுத்தாளரின் மேதைமை புலனாகின்றது. எடுத்துக்கொண்ட விஷயம் என்னவோ சிறுவர்கள் கிரிக்கெட் மேட்ச் போலன்றி, மனிதர்களின் ஆதாரப்பிரச்னைகளையும், கடவுளரின் (இது நாள் வரையிலான) தீர்வுகளையும் பற்றியது!  

கடவுள் வல்லவர்; சரி. நல்லவர்? நல்லவரானால் எதற்காக பயம், வலி இத்யாதி எதிர்மறை சமாச்சாரங்களை படைக்க வேண்டும்? படித்துதான் பாருங்களேன்?!!

Life and Death (And Other Legends and Stories) என்ற பெயரில் ஆங்கிலத்தில் பிரசுரிக்கப்பட்டுள்ளது. ஆங்கில மொழிபெயர்ப்பு சுட்டி இங்கே: 

எஸ். சங்கரநாராயணன் என்னும் அத்புத எழுத்தாளர்  தமிழில் மொழிபெயர்த்து தன் வலைப்பதிவில் (ஞானக்கோமாளி) பதிந்திருக்கிறார்.  தமிழ் மொழிபெயர்ப்பு  சுட்டி இங்கே: கீழே 

ஞானக்கோமாளி வலைத்தளம் ஸ்க்ரோலபிள் பி எட் எஃப்

தளத்தின் ஸ்க்ரோலபிள் பிடிஎஃப் ஐ ட்ரைவில்வாசிக்க  இதோ சுட்டி

பின்குறிப்பு :

PDF ரீடர் இணைப்புக்கு அமைப்புக்கும் நன்றி கீதா ரெங்கன்.