ஜோதிடம் தெரிந்த நண்பர் ஒருவர் தொலைபேசினார். 'அட்சய திரிதியைக்கு ஒன்றும் வாங்கவில்லையா?' என்று கேட்டார்.
'யாரு அது? திரிஷாவின் தங்கச்சியா? அவருக்கு நாங்கள் என்ன வாங்குவது?' என்று கேட்டோம்.
'நெசமாவே உங்களுக்கு அட்சய திரிதியைப் பற்றி ஒன்றும் தெரியாதா? அல்லது நடிக்கிறீர்களா?' என்று கேட்டார்.
'உங்களுக்கு அட்சய திரிதியைப் பற்றி எவ்வளவு வருடங்களாகத் தெரியும்?'
'எனக்கா? எனக்கு பத்து வருடங்களாகத்தான் தெரியும்.'
'எப்படித் தெரியும்?'
'டி வி சானல்களில் பார்த்துத்தான் தெரியும்.'
'டி வி சானல்களில் யார் அதிகம் இது பற்றி பேசுகிறார்கள்?'
'ஜோதிடர்கள்'
'அதுதான் சமாச்சாரம்! சிலர் வாங்கினால் நல்லது என்கிறார்கள். சிலர் தானம் கொடுத்தால் நல்லது என்கிறார்கள். அதனால் நான் தானம் வாங்கிக்கொள்வது என்று முடிவு செய்துவிட்டேன்! நீ ஏதாவது எனக்குத் தருகிறாயா?'
'ஓ? அப்படி வருகிறாயா? சரி. இலவசமாக உனக்கு ஒரு ஐடியா மட்டும் தருகின்றேன். அதைச் செய். இன்றைக்கு மே ஐந்தாம்தேதி. வருடம், மாதம் தேதி கூட்டுத் தொகை கூட ஐந்து வருகிறது. இன்றைக்கு, கூட்டுத் தொகை ஐந்து வருகின்ற மணி / நிமிட சமயத்தில் ஒரு பதிவு போடு. எங்கள் ப்ளாக் நியூமராலாஜி ஐந்து, ஐந்து ஆசிரியர்கள். இப்படி ஒரே ஐந்து மயமாக இருப்பதால், இந்த அட்சய திரிதையில் நான் சொன்ன மாதிரி ஒரு பதிவு போட்டால், அடுத்த அட்சய திரிதயைக்குள் உங்கள் ரசிகர் மன்ற உறுப்பினர்கள் எண்ணிக்கை பல மடங்குகள் அதிகரிக்கும். இந்தப் பதிவுக்குப் பின்னூட்டம் இடுபவர்கள் அடுத்த அட்சய திருதியைக்குள் அதிகப் பிரபலம் அடைவார்கள்.'
'இது என்னப்பா! மூர் மார்க்கெட் பிளாட்ஃபாரத்தில் விற்கிற மருந்து வியாபாரி மாதிரி ஏதேதோ சொல்லிகிட்டே போறே!'
'ப்ளாக் எழுதிப் போட்டுவிடுகிறாயா?'
'சரி - போடுகிறேன். ஒரு சின்ன சந்தேகம். பதிவு எழுதாவிட்டால் என்ன ஆகும்?'
' #$#$%% ^%^%$$# **(&^) @ !! ?? << "_+<, !! '
'சரி சரி பதிவு எழுதிவிடுகிறேன், ஆளை விடு'
***** ******
மனைவி: என்னங்க, அட்சய திரிதியைக்கு எதையாவது வாங்கியே ஆகணுமாம். டிரைவர் இன்றைக்கு லீவு. காரை நீங்களே ஓட்டி என்னை தி நகர்ல கொண்டுபோய் விடுங்க!
கணவன்: எதையாவது வாங்கியே ஆகணும் என்று சொல்லிச் சொல்லி, ஏன் என் உயிரை வாங்குறே?'
***** *****
