வெள்ளி வீடியோ 180302 : பாராட்ட நீராடினாள் .. தாலாட்ட உனைத் தேடினாள் ..

     பத்மப்ரியா பார்க்கக் கொஞ்சம் ஹேமமாலினி போல இருப்பார்.   

      வைர நெஞ்சம் படத்தில் நடிக்க ஹேமமாலினியிடம் ஸ்ரீதர் கால்ஷீட் கேட்டிருந்தாராம்.  இதோ  அதோ என்று நாட்கள் ஓட, பத்மப்ரியாவை வைத்து எடுத்து விட்டார்.   ஹேமமாலினி தன்னை முதலில் நிராகரித்த ஸ்ரீதரைப் பழி வாங்கி விட்டதாய் நினைக்கக் கூடாது!

     1975 இல் வெளிவந்த படம்.  நான் தஞ்சையில் இருந்த காலம்!  கண்ணதாசன் பாடலுக்கு எம் எஸ் விஸ்வநாதன் இசை.   பத்மப்ரியா 1997 இல் காலமாகி விட்டதாக விக்கி சொல்கிறது.  இவர் நடிப்பில் சில படங்கள் பார்த்திருக்கிறேன்.  தாய்மொழி கன்னடம் என்றாலும் தமிழ், தெலுங்கு, மலையாளம் எல்லாம் சகஜமாகப் பேசக்கூடியவராம்.

     டி எம் எஸ் சுசீலா குரலில் ஒரு தேன் பாடல்.  (கண்ணே என்பதை கிட்டத்தட்ட கல்ண்ணே என்பது போல பாடுவார் டி எம் எஸ்.)  சுசீலா ஆஹா என்று ஹம்மிங்குடன் தொடங்குவதே இனிமை.

     சிவாஜி தமிழ்ப்பட ஸ்டைலின்படி ஒரு ரகசிய போலீஸ் அதிகாரி.  "டெல்லி துப்பறியும் இலாக்கா"வைச் சேர்ந்தவர்!  

     இளமையான ப்ளஸ் ஒரு இனிமையான பாடல்.  சிவாஜியைப் பார்க்க விரும்பாதவர்கள் கண்ணை மூடிக்கொண்டு பாடல் கேட்கலாம்!  இளமையான, ஒல்லியான சிவாஜி.  அந்தக் கால தமிழ்ப்பட கதாநாயகிகளுக்கே உரிய சேஷ்டைகளுடன், பாடலின் நடுவே தேவையில்லாமல் அவ்வப்போது சிரித்துக்கொண்டு  அழகிய பத்மப்ரியா..  பாடல் முழுவதும் ஒரே உடை.

செந்தமிழ் பாடும் சந்தன காற்று 

தேரினில் வந்தது கண்ணே .. கண்ணே 

தேரினில் வந்தது கண்ணே 

தென்மலை மேகம் தூதுவனாக 

என்னிடம் சேர்த்தது உன்னை .. கண்ணே 

என்னிடம் சேர்த்தது உன்னை 

முன்னூறு வைரங்கள் 

பொன்மாலை சூடும் 

பூமாது பண் பாடினாள் 

பூச்சூடி கொண்டாடினாள் 

பறவைகளின் ஒலியமுதம் 

பருவமகள் இசையமுதம் 

பாராட்ட நீராடினாள் .. 

தாலாட்ட உனைத் தேடினாள்  

கல்யாண மன்றங்கள் 

கண்காட்சி கண்டேன் 

நம் வாழ்வில் எந்நாளடி 

நல்வாக்கு சொல்வாயடி 

அருகில் வரும் தருமதுரை 

உறவு தரும் புதிய கலை 

ஆனந்தம் அந்நாளிலே  

என் மேனி உன் மார்பிலே 

செவ்வந்திப்பூ மீது 

வெண்நீல வண்டு 

ஜில்லென்று நீராடுது 

சிந்தாமல் தேனூறுது 

பதுமையுடன் புதுமை மது 

பசியறியும் இளமை நதி 

பாலூட்ட நீயில்லையா 

சீராட்ட நானில்லையா