"திங்க"க்கிழமை – கருவேப்பிலைக் குழம்பு -நெல்லைத்தமிழன் ரெஸிப்பி

(நன்றி.. சமீபத்தில் மீண்டும் பார்த்த ஏ.பி.நாகராஜனின் திருவிளையாடல் படம்)  

     

வாருங்கள் எங்கள் பிளாக் ஆசிரியரே. உமக்கு வணக்கம்.

நன்றி ‘நண்பர்களே.  எங்கள் பிளாக் வளர்ச்சிக்குக் காரணமாய் இருக்கும் உங்கள் அனைவரையும் வாழ்த்துகிறேன்.

உங்கள் வாழ்த்தில் சுரத்தே இல்லையே! என்ன காரணம் என்று இந்தச் சபை அறியலாமோ.

உங்களிடம் சொல்லியிருந்தேனே.. எனக்கு இருக்கும் கவலைக்குத் தீர்வு சொல்ல யாராகிலும் வரலாம் என்று எல்லோருக்கும் சொல்லியாகிவிட்டதா?

‘என்ன கவலை என்று எங்களிடம் சொல்லியிருந்தால் நாங்களே பிரச்சனையைத் தீர்த்துவிடுவோம். நீங்களோ, ஏதோ காரணத்திற்காக வெளிப்படையாக என்ன பிரச்சனை என்று சொல்லத் தயங்குகிறீர். ஆயினும், நாங்கள் எல்லோரிடமும், உங்களுக்கு ஏதோ ஒரு பிரச்சனை, அதைத் தீர்த்துவைக்கும் ரெசிப்பியை திங்கக் கிழமைக்குத் தாருங்கள் என்று சொல்லிவிட்டோம்”

‘இன்னுமா யாரும் வரவில்லை’?

எங்கள் பிளாக் அனைவருக்கும் வணக்கம். நான் நெல்லைத் தமிழன். இந்த வார திங்கக் கிழமைப் பதிவுக்கு……..

ஐயா… எங்கள் பிளாக் ஆசிரியர் ஸ்ரீராம் அங்கு இருக்கிறார். அவரிடமல்லவா முதலில் சொல்லவேண்டும். எங்களிடம் சொல்லி என்ன பயன். அங்கே போய்ச் சொல்லும். அவர் ஏற்றுக்கொண்டு வெளியிட்டால் நாங்கள் படித்துப் பார்த்துக் கருத்து சொல்றோம்.

ஸ்ரீராம்… வணக்கம். உங்கள் பிரச்சனையைத் தீர்க்கும் ரெசிப்பி வேண்டும் என்று எல்லோரும் அறிவித்திருந்தார்களே. அதைக் கொண்டு வந்திருக்கிறேன்.

"வருக நெல்லைத் தமிழரே.. இந்த வாரத்துக்கு என்ன எழுதிக்கொண்டு வந்திருக்கிறீர்?"

எங்கள் பிளாக் ஆசிரியரே… நான் செய்துபார்த்து எழுதிக் கொண்டு வந்திருப்பது ‘கருவேப்பிலைக் குழம்பு’.

‘ஆஹா.. அருமை.. அற்புதம்.. இதனைத்தான் நாம் எதிர்பார்த்துக்கொண்டிருந்தோம். நடிகர் அஜீத் போல் தலைமுடி சால்ட்-பெப்பர் நிறத்துக்குப் போய்க்கொண்டிருக்கிறதே.. எங்கே விரைவில் தலைமுடி முழுவதும் பஞ்சுப்பொதியாகிவிடுமோ என்று கவலைப்பட்டுக்கொண்டிருந்தபோது, எமக்கு உதவும் முகமாக நல்ல ரெசிப்பி கொண்டுவந்திருக்கும் நெல்லைத் தமிழரே நீவிர் வாழ்க. மற்ற எல்லா இடுகைகளையும் கொஞ்சம் தள்ளிவைத்துவிட்டு இதனை உடனே யாம் வெளியிடுவோம். உங்கள் ரெசிப்பியைச் சொல்லும் பார்ப்போம் நிச்சயம் அது எம் தலையாய பிரச்சனையை ஒரே நாளில் தீர்த்து, மீண்டும் Dye அடிக்காமல் எம் தலைமுடியைக் கருகருக்கச் செய்யும் என்ற நம்பிக்கை எமக்கு வந்துவிட்டது. ம்.. ஆரம்பியும்.  சற்றுப்பொறுங்கள்..   அதற்கு முன்னால் ஒரு சந்தேகம்..  கருவேப்பிலையா? கரிவேப்பிலையா"  

(‘நெல்லை மனதுக்குள்:  என்னது... மெயின் விஷயத்தை விட்டு விட்டு சம்பந்தமில்லாத பிரச்னை எல்லாம் கிளப்பறார்...  சிலபஸ்லயே இல்லாத விஷயம்னா இது?  அதைவிட, தலையாய பிரச்னையை ஒரேநாளில் தீர்த்தா?  இது ஒரே நாள் வித்தையா? அரச மரத்தைச் சுத்தினால் வயிற்றில் புழு பூச்சி உண்டாகும் என்பதைப் படித்துவிட்டு, நாலுமுறை அரசமரத்தைச் சுற்றிவந்து அடி வயிற்றைத் தொட்டுப்பார்த்த கதையாக இருக்கிறதே. நம்மை நம்பி இதை ஸ்ரீராம் செய்துபார்த்து, மறு நாளே தலைமுடி கன்னங்கரேல் என்று இருக்கும் என்று எதிர்பார்ப்பாரோ… என்னவெல்லாம் பிரச்சனை இந்த இடுகை கொண்டுவரப்போகிறதோ… சொக்கா… ஐயோ.. அவரைக் கூப்பிட்டுப் பயன் இல்லை. ரங்கா… இந்த ஸ்ரீராமிடமிருந்து பிரச்சனை வராமல் நீங்கள்தான் என்னைக் காப்பாற்றவேணும். வேணுமென்றால், அத்தி பூத்தார்ப்போல் உம்மைத் தரிசிக்க வரும் கீ.சா மேடத்தை அடிக்கடி வரச்சொல்லுகிறேன்)

***

செய்முறை

தேவையானவை

ஆய்ந்த கருவேப்பிலை 1 கப்  (சிறிது அதிகமாக இருந்தால் நல்லது)

மிளகு 2 ஸ்பூன்

வற்றல் மிளகாய் 2 அல்லது 3.  மிளகைக் குறைத்தால், மிளகாயை அதிகமாக்கிக்கொள்ளலாம்.

பெருங்காயத் துண்டு சிறிது

புளி ஜலம் – 1 ½ டம்ளர். (புளிப்பு இருக்கணும். 1 எலுமி சைஸ் புளி உபயோகப்படுத்தணும். நான் 1 ஸ்பூன் புளிப் பேஸ்ட் உபயோகித்தேன்)

மஞ்சள் தூள் கொஞ்சம்

உப்பு தேவையான அளவு

எப்படிச் செய்வது?

கடாயில் சிறிது நல்லெண்ணை விட்டு, மிளகு, வற்றல் மிளகாய், பெருங்காயத் துண்டுகளை நன்கு வறுத்துக்கொள்ளவும்.

  

அதே கடாயில், அடுப்பை அணைத்தபின்பு, சூட்டோடு சூடாக, கருவேப்பிலையைப் பிரட்டிக்கொள்ளவும்.

கொஞ்சம் ஆறினபின்பு, வறுத்தவற்றை மிக்சியில் ஒரு சுத்து சுத்திவிட்டு, அதிலேயே கருவேப்பிலையையும் போட்டு நன்றாக அரைக்கவும். தேவைன, துளி தண்ணீர் விட்டு வழுமூன அரைக்கவும்.

புளி கரைத்து 1 ½ டம்ளர் புளி ஜலம் தயார் செய்துகொள்ளுங்கள். ஒரு பாத்திரத்தில் புளி ஜலமும், மஞ்சத்தூளும் போட்டு கொதிக்கவைக்கவும். கொஞ்சம் கொதிக்கும்போதே, கருவேப்பிலை பேஸ்டையும் சேர்த்து தேவையான உப்பையும் சேர்த்துக் கொதிக்கவைக்கவும். இப்போது இதில் 1 ½ ஸ்பூன் நல்லெண்ணையும் சேர்க்கவும்.

எண்ணெய் பிரிவது தெரிந்தபின்பு, அடுப்பை அணைக்கவும். இதில் கடுகு திருவமாறிவிடவும்.

கருவேப்பிலைக் குழம்பு, சூடான சாதத்திற்கு சாப்பிட ரம்யமா இருக்கும்.

‘நான் இதைச் செய்துபார்த்த அன்று, தொட்டுக்கொள்ள சேம்பு ரோஸ்ட் செய்திருந்தேன். கருவேப்பிலைக் குழம்பு சாதத்திற்கு எந்தப் பச்சிடியும் நன்றாக இருக்கும். இது கடுத்த தோசைக்கும் தொட்டுக்கொள்ள யம்மியாக இருக்கும்.

இதைச் சாப்பிட்டு உங்கள் பிரச்சனையைத் தீர்த்துக்கொள்ளுங்கள் ஸ்ரீராம்.

ஸ்ரீராம் ;  "இன்னொரு சந்தேகம் நெல்லையாரே...  பச்சிடியா?  பச்சடியா?"

நெல்லை : (மைண்ட்வாய்ஸில்)  போச்சுடா...  இவர் எது முக்கியமோ அதைப் பார்க்க மாட்டார் போலிருக்கே...

****

இப்போது, எங்கள் பிளாக்கில் பெரும்பாலும் முதல் பின்னூட்டம் எழுதி ஆரம்பித்துவைக்கும் துரை செல்வராஜு சார்…..

நெல்லைத்தமிழரே…  இப்படி வருகீறீரா?

“ வரமாட்டேன்.  வெளியிடும் தேதி வாங்கி பின்னர் வருவேன்.  அதற்குள் என்ன ஐயா அவசரம்? 

அதில்தான் பிரச்னை இருக்கிறது..  சற்று இப்படி வாரும்...

வந்தேன்...  என்ன ஐயா பிரச்னை? எதற்கு? என்ன இப்போது’

‘இல்லை.. இந்தச் செய்முறையை நீர்தான் எழுதினீரா?’

உமக்கென்ன சந்தேகம் ஐயா.. எங்கள் பிளாக்கே ஒத்துக்கொண்டுவிட்டது. ஸ்ரீராமுக்கு வராத சந்தேகம் உமக்கு ஏன் வருகிறது?

நீங்களே செய்துபார்த்து அனுப்பிய ரெசிப்பியை எங்கள் பிளாக் வெளியிடுகிறது என்றால் படித்துப்பார்த்துவிட்டு, மகிழ்ச்சியோடு முதல் பின்னூட்டம் இடுபவன் நாந்தான். அதே சமயம், வேறு யாரோ சொன்ன செய்முறையைக் காப்பி அடித்து தங்களுடைய ரெசிப்பி என்பதுபோல் எழுதி அனுப்பினால் அதைக்கண்டு சீறுபவனும் நான்தான்.

ஓஹோ.. இந்த எங்கள் பிளாக்கில் எல்லாமே நீர்தானோ. இதைவிட வேறு எப்படி ஐயா செய்முறை எழுதுவது?  கருவேப்பிலையை கடாயில் விட்டு... எண்ணெய் விட்டு...  எல்லாம் சரியாய்த்தானே இருக்கிறது?   சரி..சரி.. என்ன பிழை கண்டீர்? செய்முறையிலா அல்லது எழுதிய விதத்திலா?

செய்முறையில் பிழையிருந்தாலும் சுட்டிக் காட்டிவிடலாம். அது மன்னிக்கக்கூடிய விஷயம்தான். ஆனால் நீர் எழுதிய விதத்தில்தான் பிழையிருக்கிறது.

என்ன பிழை இருக்கோ அதைத் தனியாக என்னிடம் சொன்னால் போதாதா? இப்படி எல்லார் முன்னிலையிலும் என்னைக் கேள்வி கேட்டு டார்ச்சர் செய்யவேண்டுமா?

‘அது சரி… கருவேப்பிலைக் குழம்பு தலைமுடியை கருகருவென ஆக்கும் எனச் சொன்ன உமக்கு தலைமுடி ஏன் சால்ட்-பெப்பர் நிறத்தில் இருக்கிறது?’

‘நானென்ன எங்கள் பிளாக் ஓனரா ஐயா…  தினமும் கருவேப்பிலைக் குழம்பு சாப்பிடுவதற்கு. அல்லது கீதா சாம்பசிவம் மேடமா. கருவேப்பிலையிலேயே பத்துவகை செய்முறைகளைச் செய்து சாப்பிடுவதற்கு? இல்லை.. தினமும் எனக்குச் செய்து தருவதற்கு என் மனைவிதான் என்னுடன் இந்த ஊரில் இருக்கிறாளா? ஏதோ அப்போ அப்போ நேரம் கிடைக்கும்போது திங்கக் கிழமைப் பதிவுக்கு ஆடிக்கு ஒன்று, அமாவாசைக்கு ஒன்றுமாக செய்முறை எழுதி அனுப்புபவன். என்னைப் போய் கூண்டில் நிற்க வைத்து, நீர் கேள்விகள் கேட்கிறீரே’

அது இருக்கட்டும். இந்தச் செய்முறை.. உங்களுடைய சொந்த செய்முறையா? இப்படித்தான் நீங்கள் இதுவரை கருவேப்பிலைக் குழம்பு செய்துவந்தீர்களா?

ஏன்… உமக்கு அதில் என்ன சந்தேகம். நான்… நான்... நானேதான்… எங்கள் பாரம்பர்ய முறையில்தான் செய்துபார்த்து படங்களோட அனுப்பியிருக்கேன் ஐயா.. போட்டிருக்கும் படத்தில் எங்கள் வீட்டு பெருமாள் சன்னிதியும் வந்திருக்கிறதே… அப்படியும் உமக்கு ஏன் சந்தேகம்?.

எனக்குப் பதில் சொல்லும்போது ஏன் இப்படி நடுங்குகிறீர்… இந்தச் செய்முறையை நாங்கள் எல்லோரும் இதற்கு முன்பே, எங்கேயோ படித்தமாதிரி இருக்கிறதே. உண்மையைச் சொல்லுகிறீரா இல்லையா?

(மனதுக்குள்: அட இந்த ஆளுகிட்டேர்ந்து தப்பிக்க வழியே இல்லை போலிருக்கிறதே. இப்படி கண் கொத்திப் பாம்புபோல் படித்த இடுகைகளையெல்லாம் ஞாபகத்தில் வைத்துக்கொண்டு குற்றம் சுமத்தும் இவர் போல் பலர் இருந்தால்… ஏன் இவர் ஒருவரே போதும்.. இணையஉலகம் உருப்பட்டாற்போல்தான். எழுதி எழுதி விரலும் வலிக்குது. புலம்பிப் புலம்பி குரலும் போயிடப்போகுது)

ம்ம்..இல்லை ஐயா. சமீபத்தில் ஒரு பிளாக்கில் கருவேப்பிலைக் குழம்பு செய்முறையைப் படித்ததிலிருந்து ஆசைப்பட்டு, எங்கள் வழக்கப்படி சில மாறுதல்கள் செய்து, எழுதி அனுப்பினேன்.

அப்படியானால், அவருடைய பெயரையும் அவருடைய பிளாக்கையும் இங்கே குறிப்பிட்டு எழுதியிருக்கலாமே. அதை ஏன் செய்ய மறந்தீர்.

‘போற வர்றவங்கள்ளாம் அப்படித்தானே அடுத்தவங்க இடுகைகளை அபேஸ் பண்ணறாங்க. சொந்த இடுகைபோல் தங்கள் தளத்துல போட்டுக்கறாங்க. நான் வாழ்க்கைல ஒருமுறை அதுமாதிரி அபேஸ் பண்ணினா அதுல உமக்கு என்ன ஐயா பிரச்சனை?”

‘இன்றைக்கு ஒருமுறைதான் அபேஸ் பண்ணினேன் என்பீர். நாளை எம் தளத்தில் உள்ள இடுகைகளையும் இதேபோல அபேஸ் செய்வீர். இதையெல்லாம் எப்படிப் பார்த்துக்கொண்டு சகிப்பது?”

(மனதுக்குள்: ம்.. அவருக்கு இருக்கும் பரந்த மனம் உமக்கு எங்கே இருக்கிறது? எதையும் காப்பி அடிக்கவிடாமல் உம்மைப் போல் உள்ளவர்கள், Lock செய்து வைத்துக்கொள்கிறீர்கள். உங்களுக்கெல்லாம் பின்னூட்டமிடுவதற்குள் தாவு தீர்ந்துவிடுகிறது. இந்தக் கவலையெல்லாம் உங்களுக்கு எங்க தெரியப்போகுது. இதில் என்னைக் குறை சொல்ல வந்துவிட்டார்)

திங்கக் கிழமைப் பதிவுக்கு ஒரு செய்முறை எழுதி படங்களோடு அனுப்பியது குத்தமாய்யா? இதற்கா இப்படி என்னை காலையில் முதல் ஆளாக வந்து வறுத்தெடுக்கிறீர்? சரி..சரி.. உங்களிடம் ஏன் எனக்கு வீணான பிரச்சனை? இதோ, இதையும் இடுகையோடு சேர்த்து வாசித்துக்கொள்ளுங்கள். இனி ஆளை விடுங்கள். நான் வருகிறேன்.  முடிந்தால் ஸ்ரீராமிடம் சொல்லுங்கள்...  அவர் வெளியிடும் தேதியை எப்போது வேண்டுமானாலும் வச்சுக்கட்டும்...

ஸ்ரீராம் :  நெல்லை...  தாவு என்றால் என்ன?  எங்கிருந்து, எப்போது, எவ்வளவு கிடைக்கும்?   அது எப்படி தீரும்?

இந்த கருவேப்பிலை குழம்பு நான் செய்து பார்ப்பதற்கு இன்ஸ்பிரேஷனாக இருந்தது இரண்டு. ஒன்று பிரபல பதிவர் கீதா சாம்பசிவம் மேடம்.   சமீபத்தில் அவர்கள் தளமான ‘சாப்பிடலாம் வாங்க’வில் எழுதியிருந்த கருவேப்பிலை குழம்பு செய்முறைக் குறிப்பு. அவரது தளம்/இடுகை http://geetha-sambasivam.blogspot.com/2018/01/blog-post_24.html. அவங்களோட உணவுக் குறிப்புகள் மிக உபயோகமானவை, பெரும்பாலும் எங்கள் வழக்கத்தில் அமைந்தவை. Practicalஆ எது செய்தால் சரியா வருமோ அப்படி எழுதியிருப்பாங்க. இரண்டாவது, என்னிடம் மிக அதிக அளவில் இருந்த கருவேப்பிலை (உங்க ஊர் மாதிரி இல்லை. நினைத்தபோதெல்லாம் எல்லா இடத்திலும் கருவேப்பிலை கிடைப்பதற்கு. அப்போ அப்போ காய்கறி வாங்கும்போது, இலவசமா கொடுக்கற சில ஆர்க்குகளைச் சேகரித்து குளிர்சாதனப் பெட்டியில் வைத்திருப்போம்). கருவேப்பிலை ஜாஸ்தியா இருந்தால் நான் அடைக்கு அரைப்பேன். ஆனால் இந்த முறை, கருவேப்பிலைக் குழம்பு.

பின் குறிப்பு :

உரிமையோடு ஸ்ரீராம், துரை செல்வராஜு சார், கீதா சாம்பசிவம் மேடம் பெயர்களை உபயோகப்படுத்தியுள்ளேன். நகைச்சுவையாக எடுத்துக்கோங்க.

ஸ்ரீராம் : ரெஸிப்பி உண்மையானதுதானா?  இல்லை, அதுவும் நகைச்சுவையா?!!

கொடுத்துள்ள படம் ஸ்ரீராமோடது இல்லையே என்பவர்கள்.... (இதற்குப்பின் வரும் வரிகள் ஆ'சிரி'யரால் நீக்கப்பட்டது!)

நெல்லை?  ஏன் என்னுடைய கேள்விகள் எதற்கும் பதில் வ(ர)ல்லை?