அடி உதவற மாதிரி....

அடி உதவற மாதிரி.... 


​
   தென்னங்கன்றுகள் நன்றாக ஓங்கி வளர்ந்த பின்னும், அதாவது, பத்து ஆண்டுகள் கழித்தும் காய்க்கவில்லை என்றால், அந்த மரங்களுக்கு, உலக்கை பூஜை நடத்தினால், நன்றாக காய்க்க ஆரம்பிக்கும். வெகுநாட்கள் காய்க்காத மரம் எதுவென்று தெரிந்து, அந்த மரத்தை உலக்கையைக் கொண்டு, நன்றாக அடிக்க வேண்டும்.

   மரத்தின் அடிப்பக்கம், சுமார் மூன்று அடி உயரம் வரை சுற்றிச் சுற்றி வந்து, ஐம்பது அடியாவது அடிக்க வேண்டும். அதன்பின், உலக்கையின் பூண் சேர்க்கப்பட்ட பக்கத்தை கொண்டு, ஓங்கி ஓங்கிக் குத்த வேண்டும்.

உலக்கையின் பூண், மரத்தின் மேல், வட்ட வட்டமாக காயம் உண்டாக்க வேண்டும். அந்த அளவிற்கு அடிக்க வேண்டும். இவ்விதம், மூன்று தினங்களுக்கு ஒரு தரம், ஐந்து முறை செய்தால் போதும். அந்த மரம் நன்றாக காய்க்க ஆரம்பிக்கும்.

கொடுமையான முறையா இருக்கே....!!!

— ஆசைராஜா எழுதிய, 'தென்னைமரம்' என்ற நூலிலிருந்து.

=====================================================================================================

===============================================================================================================

ஓ...  தேவதாஸ்.....

​   

சரத் சந்திரர் எழுதிய தேவதாஸ் நாவலைத்தான் திரைப்படமாக எடுத்தார்கள்.

   //திரைப்படமாக எடுக்கப்பட்ட முதல் இந்திய நாவல் என்ற புகழ் பெற்ற தேவதாஸ் படத்தின் மூலக்கதையை எழுதியவர் வங்காள எழுத்தாளர் சரத் சந்திரர். 1917இல் எழுதப்பட்ட இந்த நாவல் 18 வருடங்களுக்குப் பிறகு படமாக்கப்பட்டது. தேவதாஸ், காதல் தோல்விப் படங்களின் முன்னோடி.//

   திரைப்பட வரலாற்றில் மிக அதிக முறை எடுக்கப்பட்ட படம் இதுவாகத்தான் இருக்குமோ... சந்திரமுகியாக லலிதா, வைஜயந்திமாலா, ஜெயந்தி, ரம்யா கிருஷ்ணன், மாதுரி தீக்ஷித் (ஐஸ்வர்யா ராய் பார்வதியாக), நடித்திருக்கிறார்கள்.   மலையாள வெர்ஷனில் நடிகை பார்வதியே பார்வதியாக நடித்திருந்திருக்கிறார்! 

   தமிழ் / தெலுங்கு படத்தின் பாடல்கள் வெகு பிரபலம்.  கண்டசாலா, சி ஆர் சுப்பாராமன், விஸ்வநாதன் ராமமூர்த்தி உபயத்தில். (படம் ரிலீஸ் ஆகும் முன் சி ஆர் சுப்பராமன் காலமாகி விட்டார்.  எனவே இந்த இரட்டையர்கள் முடித்து வைத்தார்கள். உலகே மாயம் பாடல் இந்த இரட்டையர் இசை அமைத்தது.  படம் அபார வெற்றி அடைந்தாலும் சி ஆர் சுப்பராமன் மனைவி தனக்கு சேர வேண்டிய பணத்துக்கு கோர்ட் படி ஏறவேண்டி இருந்ததாம்..  அதே போல சந்திரமுகியாக நடித்த லலிதாவும் கோர்ட் படி ஏறி தன் பங்கு பணத்தைப் பெற்றுக்கொண்டாராம்.

   இரட்டை இசை அமைப்பாளர்களில் 'ஜெகமே மாயா'  பாடலை தான் இசை அமைத்ததாய் டி கே ராமமூர்த்தி சொல்ல, கண்டசாலா ஒரு பேட்டியில் அந்தப் பாடலுக்கு இசை அமைத்தவர் எம் எஸ் விஸ்வநாதன் என்று சொல்லியிருந்தாராம்.

   தஞ்சாவூர் மருத்துவக்கல்லூரி சாலையில் இருந்த ராஜேந்திரா டூரிங் தியேட்டரில் நான் இந்தப் படத்தைப் பார்த்து அழுதேன்!

நன்றி விக்கி.

=================================================================================================

​

துணையில்லா வாழ்க்கையின்

வெறுமையை 

சொல்லிக்கொண்டே

இருக்கிறது 

ஓரமாய் ஒதுங்கிக் கிடக்கும் 

ஒற்றை  இருக்கை 

​

ஒத்தையா காத்திருக்கேன்

உட்கார ஒரு சோடிக்காய்ப் 

பார்த்திருக்கேன்.

இருக்கை கூட

ஈரமாகிறது 

அமர 

ஆள் இல்லாமல்.

​

அமர ஆளில்லாத 

தனிமை

எங்களுக்கில்லை 

ஒருவருக்கொருவர் 

துணையாய் 

நாங்களே  இருக்கிறோம்.

                                 

​

ஜோடி ஜோடியாய்

நீங்கள் 

அமர்ந்து 

கதைபேசிக் களித்திருந்துவிட்டு

சென்றபின்னர் தெரிகிறது 

தனிமையின் வெறுமை எங்களுக்கு.

=================================================================================================================

==================================================================================================