பணம் வாங்கிக்கொண்டு வாக்களிப்பதன் காரணம் என்னவாக இருக்கும்?

 

கேள்வி பதில்கள். 

நெல்லைத்தமிழன் : 

1. போட்டியிட்ட தொகுதிகளின் எண்ணிக்கையைக் கணக்கில் கொள்ளாமல், இந்தக் கட்சிதான் அதிக சதவிகித வாக்குகள் வாங்கியிருக்கிறது என்று சொல்வது சரியா? உதாரணமா, பீகாரில், தேஜஸ்வி யாதவின் கட்சி, தமிழகத்தில் ஸ்டாலினின் கட்சி   

# கூட்டணி கலாச்சாரம் வந்த பின் ஒரு தனிக்கட்சி யின் வாக்கு வலிமை சரியாகக் கணிப்பது இயலாது என்பது என் எண்ணம். உத்தேசமாக சரியாக இருக்கலாமோ என்னவோ தெரியவில்லை.

2. கொஞ்சம் வயதாகிவிட்டால், விமர்சனத்தைப் பொறுத்துக்கொள்ளும் மனநிலை குறைந்துவிடுகிறதா? ரொம்ப சென்சிடிவ் ஆகிவிடுகிறார்களா?  

# விமரிசனத்தை ஆக்க பூர்வமாக எடுத்துக் கொள்வது கஷ்டமான காரியம். வயது முதிர்ந்த நிலையில் அதை சகித்துக் கொண்டாலும் ஏற்றுக் கொண்டு திருத்திக் கொள்வது மிகக் குறைவு.

& கொஞ்சம் வயதாகிவிட்டால் என்றால் என்ன வயது? அஞ்சு வயதா! 👦

3.  நாம் பால் என்று வாங்குவது, நிஜமாகவே மாட்டுப்பால்தானா இல்லை செயற்கையாக உருவாக்கப்பட்டதா? அதாவது 30 சதம் பால், மீதி கலப்படம் என்று. நெய் வெண்ணெய் போன்றவற்றில் அதிக சதம் கலப்படம், வடநாட்டில் பால் ஸ்வீட்டுகளில் பெரும்பாலும் பாலின் சதவிகிதம் ஒரு சில சதவிகிதம்தான் மீதி துணிக்குப்போடும் சோப்பு போன்றவற்றின் கலப்படம் என்று படித்திருக்கிறேனே.  

# பல நாட்களாக என் மனதில் இருந்த சந்தேகத்தை நீங்கள் கேள்வியாகக்கேட்டு விட்டீர்கள். நாங்கள் வாங்கி உபயோகிக்கும் நந்தினி பால் அரசுத் துறையில் வாங்கி வழங்கப்படுகிறது. ஒவ்வொரு நாளும் ஒவ்வொரு மாதிரியாக இருக்கிறது. முக்கியமாக பாலாடையின் நிறம், ருசி, அடர்த்தி சில சமயம் விபரீதமாக மாறியிருக்கிறது. அரசுத் துறை என்பதால் நம்பிக்கை வைத்து வாங்கிக் குடிப்பது புத்திசாலித்தனமான செயல்தானா என்கிற ஐயம் எழுகிறது.

4. இப்போதெல்லாம் தெருவுக்கு ஒரு IVF எனப்படும் செயற்கைக் கருத்தரிப்பு மையங்களைப் பார்க்கிறேன். இதன் காரணம் என்னவாயிருக்கும்? (அந்த பிஸினெஸுக்கு இப்போ மௌஸ் ஜாஸ்தி என்று சொல்லித் தப்பிக்காதீர்கள்)   

# தரம் குறைந்த, கலப்படம் மிகுந்த உணவுப் பொருள்கள் என்பது மட்டுமே எனக்குத் தோன்றுகிற காரணம்.  சில சமயம் அடுத்த யுகம் ஆரம்பமாக இயற்கை மேற்கொள்ளும் முயற்சியின் அடையாளமோ என்று கூட நினைக்கத் தோன்றுகிறது.

5. கோயில்களில் கூட்டம், நம்பிக்கை அதிகம், ஆனால் வாக்களிப்பது பணம் வாங்கிக்கொண்டு அல்லது திருடர்கள் என்று தெரிந்தே வாக்களிப்பது என தமிழக வாக்காளர்களில் குறிப்பிடத்தகுந்த சதவிகிதம் மாறியுள்ளதன் காரணம் என்னவாயிருக்கும்?

# முதல் காரணம் மக்களில் பலரும் " எல்லாரும் ஒரே வகைதான். எனவே காசு தருபவருக்கு வோட்டைக்  கொடு " என்று நினைப்பதுதான்.‌ 

இரண்டாவது வோட்டின் முக்கியத்துவம் பெரும்பான்மையினருக்குத் தெரியாமல் இருப்பது.‌

மூன்றாவது யாரோ ஒருவருக்கு அல்லது ஒரு கட்சி அல்லது ஜாதிக்கு விசுவாசமாக இருக்க வேண்டும் என்ற எண்ணம். மூட பக்தி மேனியா.‌

& 'அரசியலில் எவனும் யோக்கியன் இல்லை. யாராக இருந்தாலும் பதவிக்கு வந்ததும் சம்பாதிக்கப் போகிறார்கள். நீ சம்பாதிக்க நான் வோட்டுப் போடவேண்டும் என்றால், நீ ஏதாவது பணம் கொடுத்தால், அதை வாங்கிக் கொண்டு உனக்கே வோட்டுப் போட்டுத் தொலைக்கிறேன். எப்படியோ போய்த் தொலையுங்கள்' என்ற எண்ணம் கூட காரணமாக இருக்கலாம்! 

= = = = = = = = = =

எங்கள் கேள்விகள். 

1) மனிதர்களுக்கு அடிப்படை தேவைகள், உடுக்க உடை, உண்ண உணவு, தங்கி வாழ இடம் ஆகிய மூன்று என்று சொல்வார்கள். உங்கள் பார்வையில், இந்த மூன்று அடிப்படை தேவைகளுக்குப் பிறகு அடுத்து முக்கியமான தேவைகள் என்னென்ன என்று வரிசைப் படுத்தவும் - குறைந்த பட்சம் அடுத்த மூன்று. 

2) இது இல்லாமல் என்னால் இருக்கவே முடியாது என்று நீங்கள் கருத்தும் ஒரு விஷயம் எது? 

= = = = = = = = 

படமும் பதமும் :

நெல்லைத்தமிழன் :

தில்லி இந்திராகாந்தி இண்டர்நேஷனல் விமான நிலையத்தில் பார்த்த யானைகளின் சிற்பம். அழகாக வடிவமைத்திருக்கிறார்கள். ஒவ்வொரு முறை பார்க்கும்போதும் கண்ணைக் கவரும், படமும் எடுத்துக்கொள்வோம்.

அங்கிருந்து பெங்களூர் விமான நிலையம் வந்தால், அங்கு, நாங்கள் என்ன தில்லிக்குச் சளைத்தவர்களா? இங்கு சந்தன மரங்கள் அதிகம். அதனால் மரத்திலேயே யானைக் கூட்டத்தைச் செய்துவைத்துள்ளோம் என்பதுபோல, விமான நிலையத்தில் பார்த்தேன். மிக அழகாக இருந்தன. 

--------------  -----------

இந்த முறை ஸ்ரீ கிருஷ்ண அனுபவம் என்ற யாத்திரை சென்றிருந்தபோது, மாடு மேய்க்கும் சிறுவனாக கிருஷ்ணரும் பலராமரும் சறுக்கு விளையாடிய இடம் என்று பாறையில் சறுக்குபோல அமைந்திருந்த இடத்தைக் காண்பித்தார்கள். அந்த இடத்தின் அருகில் இருந்த வீட்டில் மிகப் பெரிய எருமையைப் பார்த்தேன். கறுப்பு நிறத்துடன் பளபளவென இருந்தது (மடுவுமே மிகவும் பெரிது)

இன்னொரு இடத்தில் யசோதை குழந்தைகளைக் குளிப்பாட்டிய குளம் என்று ஒன்றைப் பார்த்தோம். அப்போதே நல்ல மழை. அந்தக் குளத்தின் படிக்கட்டின் அருகே மழையைப் பொருட்படுத்தாமல் நின்றுகொண்டிருந்த பிரம்மாண்டமான பொலிகாளை. அதன் வசீகரம் என்னை ஈர்த்தது. அருகில் சென்றும் படமெடுத்தேன்.

பானுமதி வெங்கடேஸ்வரன் :

இங்கிருக்கும் நூல் நிலையம். (கனடா) 

குழந்தைகள் பிரிவில் சிறு குழந்தைகள் விளையாடுமிடம். 

வருகைக்கும்,வாசிப்பிற்கும் காத்திருக்கின்றன இருக்கைகளும், புத்தகங்களும். 

= == = = = = = = = = = = = = =

KGG பக்கம்: 

துப்பார்க்குத் துப்பாய துப்பாக்கி.. 

சிறிய வயதிலிருந்தே எனக்கு துப்பறியும் கதைகள் என்றால் மிகவும் பிடிக்கும். நானும் பெரிய ஆளாக ஆனதும், துப்பறியும் நிபுணர் ஆகவேண்டும் என்று அடிக்கடி நினைப்பேன். 

துப்பறியும் திறனில் எனக்கு ஈடுபாடு வந்ததற்கு என்னுடைய இரண்டாவது மற்றும் மூன்றாவது அண்ணன்களும் முக்கிய காரணம். சில நிகழ்வுகளை அவர்கள் இருவருமே அலசி ஆராய்ந்து பல விஷயங்களை கூறுவார்கள். 

துப்பறியும் வேலை செய்ய எந்த காலேஜில் என்ன படிப்பு படிக்க வேண்டும் என்பது தெரியாததால், மூன்றாவது அண்ணன் படித்த பொறியியல் துறையையே (எங்க ஊர்ல அப்போ வேற கல்லூரிகள் கிடையாது!) நானும் தேர்ந்தெடுத்தேன். 

ஆனாலும் வேலை பார்த்த தொழிற்சாலையில், எனக்கு வாய்த்த சில projects என்னுடைய துப்பறியும் ஆர்வத்திற்கு தீனியாக அமைந்தது என்னுடைய அதிர்ஷ்டம் என்று சொல்லலாம்! 

நிற்க. 

நான் படித்த - து கதைகளில் அடிக்கடி யாராவது ' கொலை பற்றி துப்பு எதுவும் கிடைத்ததா ' என்று விசாரிப்பார்கள். 

துப்பு என்றால் என்ன என்று அடிக்கடி எனக்குத் தோன்றும். 

ரயில்வே நிலையங்களில், " இங்கே துப்பு " என்று ஒரு போர்டு எழுதி, ஒரு தொட்டி வைத்திருப்பார்கள். சிலர் அந்த போர்டு, தொட்டி எல்லாவற்றிலும் வெற்றிலை போட்டு மென்ற எச்சில் துப்பி மொழுகி வைத்திருப்பார்கள்! 

சரி - துப்பாக்கி, துப்பறிவது எல்லாம் வருகிறதே என்று ஒரு திருக்குறளை ஆராய்ந்தால் .. 

"துப்பார்க்குத் துப்பாய துப்பாக்கித் துப்பார்க்குத் துப்பாய தூஉம் மழை" என்ற குறளின் பொருள், உணவுப் பொருள்களை விளைவிப்பதுடன், பருகுவோருக்குத் தானும் ஒரு உணவாக இருப்பது மழையாகும் என்பதாகும். அதாவது, மழை நீரால் உணவுப் பயிர்கள் உருவாகின்றன, மேலும் அந்த மழையே அருந்துபவர்களுக்கு ஓர் உணவாகவும் பயன்படுகிறது. 

• துப்பார்க்கு: உண்பவர்களுக்கு
• துப்பாய: உணவாக இருக்கும் / தக்க உணவாக இருக்கும்
• துப்பாக்கி: உணவை உண்டாக்கும் பொருள்களை
• துப்பார்க்கு: பருகுபவர்களுக்கு
• தூஉம்: தானும்
• மழை: மழையாகும் 

இந்தக் குறள், வான்சிறப்பு அதிகாரத்தில் இடம்பெற்றுள்ளது, இது மழையின் முக்கியத்துவத்தை விளக்குகிறது. 

என்னுடைய அம்மா அடிக்கடி ' உப்பு அறி(?)ஞ்சயோ , துப்பு அறி(?)ஞ்சயோ ' என்று கூறுவார்கள். அதற்கு என்ன அர்த்தம் என்று இதுநாள் வரை எனக்குத் தெரியவில்லை. 

சில சமயங்களில் அவர்களே, என்னிடம், ' ஒரு வேலை சொன்னால் அதை ஒழுங்காக முடிக்கத் துப்பில்லையே உனக்கு என்பார்கள். 

எல்லோருக்கும் கடலை மிட்டாய் ஆளுக்கு ஒன்று என்று கொடுக்கும்போது, எனக்கு இரண்டு வேண்டும் என்று அடம் பிடிப்பேன் நான். அப்போ அம்மா, துப்பு கெட்டவனுக்கு இரட்டைப் பங்கு என்பார்கள். 

அக்பர் பீர்பால் கதை ஒன்று ஞாபகத்திற்கு வருகிறது. 

எல்லோரும் விருந்து உந்துகொண்டு இருந்தார்கள். 

அக்பர், தான் சாப்பிட்ட பேரிச்சம்பழங்களின் கொட்டைகளை பீர்பால் சாப்பிட்ட தட்டின் அருகில் ஒவ்வொன்றாக போட்டு விட்டு, அதை விருந்தினர்கள் எல்லோரிடமும் காட்டி, "இங்கே பாருங்க - துப்பு கெட்ட ஒருத்தர் நாம் சாப்பிட்ட பேரீச்சம்பழங்களில் இரட்டைப் பங்கு சாப்பிட்டிருக்கிறார்" என்று வேடிக்கையாக குறிப்பிட்டார். 

அதற்கு பீர்பால் மிகவும் அமைதியாக, " அது பரவாயில்லை மஹாராஜா - ஆனா இங்கே ஒரு பரக்காவெட்டி பேரீச்சம் பழங்களை கொட்டையோடு முழுங்கி வைத்துள்ளது" என்றாராம். 

------     ---------- 

நம்ம செ நு சொல்வது : 

“துப்பு” என்ற தமிழ் சொல்லுக்கு பல அர்த்தங்கள் உள்ளன. பயன்பாட்டைப் பொறுத்து வேறுபடும்:

துப்பு – முக்கியமான பொருள்கள்

1. சுடுதல் / துப்பாக்கி சுடுதல்

   • துப்பாக்கி துப்பு → Gun firing

   • சுடும் செயல்.

2. துப்பல் / துப்புவது (Spit)

   • வாயில் இருக்கும் துப்பை வெளியே விடுவது.

3. துப்புரவு / சுத்தம் செய்வது (Clean / dust-off)

   • வீடு துப்பு → வீட்டை சுத்தம் செய்.

4. தேடுதல் / விசாரித்தல் (Search / investigate)

   • துப்பு வேலை → களவுத் தடயங்களைத் தேடும் வேலை.

5. தூள் அல்லது நுண்துகள் (Fine dust / powder)

   • மணல் துப்பு → மணல் தூள்.

6. சிறிய துளி / துளைத்த துளி (speck / tiny drop)

   • தண்ணீர் துப்பு → சிறிய துளி.

= = = = = = = = = = = =