ரீட்டா & மீட்டா 14 : அருண் எடுத்த முடிவு.

 

போலீஸ் ஜீப் ஓட்டுநர், அருண் சொன்ன விலாசத்தில் உள்ள பங்களா வாசலை அடைந்ததும், காம்பவுண்ட் உள்ளே செல்ல ஜீப்பைத் திருப்பினார். 

அப்பொழுது பங்களா உள்ளிருந்து, வெள்ளை வேட்டி, வெள்ளை சட்டை போட்ட ஒருவர் அவசரமாக வெளியே வந்தார். அருணிடம், " சார்! உங்கள் ஜீப்பை தயவு செய்து திருப்பி அனுப்பிவிடுங்கள். நீங்கள் மட்டும் உள்ளே வாங்க. இங்கே  உள்ளேயோ வெளியிலோ போலீஸ் ஜீப் ரொம்ப நேரம் நின்றால் அது அக்கம் பக்கத்தவர் கவனத்தை இழுக்கும். பாஸ், உங்களை மட்டும் உள்ளே வரச்சொன்னார்" என்றார். 

அருண், ஓட்டுநரிடம் " சரி - நீங்கள் ஜீப்பை ஸ்டேஷனுக்கு ஓட்டிச் செல்லுங்கள். நான் அப்புறம் வருகிறேன். மார்த்தாண்டம் சாரிடம் சொல்லிடுங்க" என்றான். 

பங்களா காம்பவுண்ட் உள்ளே நுழைந்து வாசலை நோக்கி நடந்த அருணின் கவனம் அங்கே உள்ளே நிறுத்தப்பட்டிருந்த கார்களின் பக்கம் சென்றது. 

ஒரு இன்னோவா கார், ஒரு வோக்ஸ் வாகன் கார், சில மாருதி கார்கள் எல்லாம் கண்ணில் பட்டன. அவற்றுக்கு இடையே, ஒரு நீல நிற BMW கார். அந்தக் காரின் பதிவு எண் 3888. அருண் அதை கவனிக்கத் தவறவில்லை. 

வீட்டின் உள்ளே வரவேற்பறையில், அந்த அரசியல் பிரமுகர் உட்கார்ந்திருந்தார். அருணை உள்ளே அழைத்துச் சென்றவர், மிகவும் பவ்யமாக அவரிடம், " சார் - டி எஸ் பி அருண் இவர்தான். இவரிடம் நீங்க பேசுறீங்களா - இல்லை நான் .. " என்று இழுத்தார். 

அ பிரமுகர் : " நானே பேசுகிறேன். நீ இங்கே பக்கத்திலே உக்காந்துக்கோ "

அ வ : " சரி சார்"

அ பிரமுகர்: (அருணிடம்) " ஊரப்பாக்கம் பெண் தற்கொலை கேஸ் பற்றி நீங்கள்தான் விசாரணை செய்து வருகிறீர்களா? "

அருண் : " தற்கொலை இல்லை சார் - கொலை. " 

பிரமுகரும் மற்றவரும் ஒருவரை ஒருவர் பார்த்துக்கொண்டனர். 

பிரமுகர்: " கொலையா! யார் கொலை செய்தார்கள் ?"

அருண் : " அந்தப் பெண்ணின் படுக்கை அறையில் இருந்த ஏர் கண்டிஷனரில் வைக்கப்பட்டிருந்த ஒரு விஷ ஜாடியிலிருந்து வந்த விஷ வாயுவை சுவாசித்ததால் அந்தப் பெண் இறந்துவிட்டாள். "

பி : "அந்த விஷ ஜாடியை யார் அங்கே வைத்தார்கள் என்று கண்டுபிடித்தீர்களா? " 

அருண் : " யார் வைத்தார்கள் என்பதை நிரூபிக்க சாட்சி இருக்கிறது. "

பி : " அப்படியா! அந்த விஷ ஜாடி எங்கேயிருந்து வந்தது? "

அருண் : " அது சீனாவிலிருந்து வந்த ஜாடி என்பதை அதன் மீதில் இருந்த சீன எழுத்துகளை வைத்துக் கண்டுபிடித்தேன். அந்த சீன கம்பெனியிடமிருந்து அதை யார் வாங்கினார்கள் என்று தெரிந்துகொண்டேன். " 

பி : " அது யார்? "

அருண் : " அண்ணா நகரில் இருக்கும் மார்ஸ் கார் கராஜ் விலாசத்திற்கு வந்த ஜாடி அது. மதிவாணன் என்ற பெயருக்கு அனுப்பப்பட்ட ஜாடி. "

இந்த நேரத்தில் அந்த அரசியல் பிரமுகரின் மொபைல் ஃபோனில் ஏதோ அழைப்பு வந்தது. மொபைல் போனை எடுத்துப் பார்த்த அ பி, " மினிஸ்டர் கூப்பிடுகிறார். இதோ (அருணை உள்ளே அழைத்து வந்தவரைக் காட்டி) என்னுடைய   பி ஏ விடம் கொஞ்சம் பேசிக்கொண்டிருங்கள். நான் மினிஸ்டரிடம் பேசிவிட்டு வருகிறேன்" என்று சொல்லியபடி போனை எடுத்துக்கொண்டு பக்கத்து அறைக்குச் சென்றார். 

பி ஏ : " அருண் - நீங்க வந்தவுடனேயே உங்கள் ஜீப்பை ஏன் திருப்பி அனுப்பச் சொன்னேன் தெரியுமா? "

அ : " காரணத்தைதான் அப்போ சொன்னீங்களே !" 

பி ஏ : " அது உண்மையான காரணம் இல்லை. நீங்க இங்கேயிருந்து திரும்பிப் போவது எங்க கையிலதான் இருக்கு. நீங்க இங்கே வந்தது எத்தனை பேர்களுக்குத் தெரியும்?"

நிலைமை தீவிரமாவது அருணுக்குப் புரிந்தது. 

அ : " கிட்டத்தட்ட பதினேழு பேர்களுக்குத் தெரியும். யார் அவர்கள் என்று சொல்லவா?"

பி ஏ கொஞ்சம் யோசித்து, பிறகு, " சரி - நமக்குள் வாதம் வேண்டாம். அந்தப் பெண் தற்கொலை செய்துகொண்டுதான் இறந்தாள் என்று நீங்க ஒரு ரிப்போர்ட் தயார் செய்து கொடுக்கவேண்டும். மேலும் நீங்க இந்தக் கேஸ் சம்பந்தமாக இதுவரை சேமித்த தடயங்கள் குறிப்பாக இறந்து போன பெண்ணின் ஃபோன், லாப் டாப், ஏர் கண்டிஷனரிலிருந்து எடுத்த விஷ வாயு ஜாடி, அந்த ஜாடி வாங்கப்பட்ட விலாசம் பற்றிய தகவல் - எல்லாவற்றையும், மதிவாணன் ஒரு விலை கொடுத்து வாங்கத் தயாராக உள்ளார். எல்லாவற்றிற்கும் என்ன விலை என்று சொல்லுங்க. " 

அ : " நீங்க என்ன சொல்கிறீர்கள் என்று புரிந்தது.  தற்கொலை என்று ரிப்போர்ட் தயார் செய்யவேண்டும் என்றால், அதற்கு இறந்துபோன ரீட்டாவின்  பெரியம்மா வாக்குமூலம் முக்கியம். அவங்க சொல்வதை வைத்து, தற்கொலை என்று ரிப்போர்ட் செய்து கேஸை முடித்துவிடுகிறேன். ரீட்டாவின் இறப்பு, அவளுடைய பெரியம்மாவுக்கு பெரிய இழப்பு. பெரியம்மா, ரீட்டாவின் ஆதரவில்தான் பல வருடங்களாக வாழ்ந்துகிட்டு இருக்காங்க. ரீட்டாவின் பங்களாவை கொஞ்சம் விரிவு செய்து அங்கே, ' ஆதரவற்ற பெண்கள் காப்பகம்' ஒன்றைத் தொடங்குவதாக இருக்காங்க.  அதற்கு அவங்களுடைய அக்கவுண்ட்டுக்கு ஒரு கோடி ரூபாய் நன்கொடை மதிவாணன் அனுப்பவேண்டும். அக்கவுண்ட் விவரங்கள் இதோ இந்த பேப்பரில் எழுதியுள்ளேன்" 

பி ஏ பேப்பரை வாங்கிக்கொண்டார். 

பி ஏ : " அப்புறம்? " 

அ : " நான் சேகரித்த சாட்சியங்கள், தடயங்கள் எல்லாம் என்னுடைய அலுவலகத்தில் மேலதிகாரி மார்த்தாண்டம் கட்டுப்பாட்டில் உள்ளன. அவற்றை அவரிடமிருந்து பெறவேண்டும் என்றால், அவருக்கு பதவி உயர்வு கொடுக்கப்படவேண்டும். " 

பி ஏ : " சரி. உங்களுக்கு எதுவும் வேண்டாமா ?" 

அ : " எனக்கு எதுவும் வேண்டாம். " 

பி ஏ, அருணை ஆச்சரியமாகப் பார்த்தார். 

பி ஏ : " கொஞ்ச நேரம் இருங்க. நான் போய் பாஸ் கிட்ட பேசிவிட்டு வந்து உங்களிடம் எங்கள் முடிவை சொல்கிறேன் " 

பி ஏ அடுத்த அறைக்குச் சென்றார். 

ஐந்து நிமிடங்கள் கழித்து வெளியே வந்தார். 

பி ஏ : " சரி. தொகை கொஞ்சம் அதிகமாக இருந்தாலும் பாஸ் ஒப்புக்கொண்டுவிட்டார். நீங்க போய் நாங்க கேட்ட எல்லா பொருட்களையும் கொண்டு வந்து எங்க கிட்ட ஒப்படைத்த உடனேயே தொகை அனுப்பிவிடுவோம். உங்கள் மேலதிகாரிக்குப் பிரமோஷன் கொடுப்பது பற்றி சம்பந்தப்பட்ட அமைச்சரிடம் பாஸ் இன்றைக்கக்கே பேசி ஏற்பாடு செய்துவிடுவார். " 

அ : " என் மீது உங்களுக்கு நம்பிக்கை இல்லையா?  தொகையை இப்பொழுதே அனுப்புவதில் உங்களுக்கு என்ன பிரச்சனை? நான் உங்களை ஏமாற்றிவிட்டு எங்கும் போய்விட மாட்டேன். " 

பி ஏ மீண்டும் உள்ளே சென்று தன்னுடைய பாஸிடம் பேசிவிட்டுத் திரும்ப வந்தார். 

பி ஏ : " நாங்கள் உங்களை நம்புவதோ அல்லது நீங்கள் எங்களை நம்புவதோ பிரச்சனை இல்லை. இரண்டு பக்கங்களிலும் ஒருவரை ஒருவர் ஏமாற்றாமல் அல்லது ஏமாறாமல் இருக்கவேண்டும். " 

அ : "அப்போ நான் ஒரு வழி சொல்கிறேன். முதலில் பாதி தொகையை நீங்க நான் குறிப்பிட்டுள்ள அக்கவுண்டுக்கு அனுப்புங்க. நான் போய் தடயங்களை எடுத்துக்கொண்டு வந்து இங்கே கொடுப்பதைவிட - உங்களுக்கு மிகவும் நம்பகமான ஆள் ஒருவரை என்னுடன் அனுப்புங்க. நான் தடயங்களை என்னுடைய அலுவலகத்திலிருந்து எடுத்து வந்து, அவரிடம் ஒப்படைக்கின்றேன். அவர் எல்லாவற்றையும் சரி பார்த்து, உங்களுக்கு ஃபோன் செய்து சொல்லட்டும். தகவல் கிடைத்ததும், நீங்க மீதி தொகையை அந்த அக்கவுண்ட்டுக்கு அனுப்பிடுங்க. மார்த்தாண்டம் சாரின் பதவி உயர்வுக்கு அமைச்சரிடம் சிபாரிசு செய்துவிடுங்கள். உடனடியாக ரீட்டா தற்கொலை செய்துகொண்டதாக ரிப்போர்ட் தயார் செய்து, மார்த்தாண்டம் சார் அறிக்கை வெளியிடுவார். நான் இங்கே வந்தது, பேசியது, நீங்கள் பேசியது எல்லாவற்றையும் நானும் மறந்துவிடுகிறேன்; நீங்களும் மறந்துவிடலாம் " 

பி ஏ அவருடைய பாஸிடம் பேசிய பிறகு இந்த யோசனைக்கு ஒப்புக்கொண்டார். 

அருணும் அந்த உதவியாளரும் வெளியே வந்தபோது ஒரு இன்னோவா, வோக்ஸ் வாகன், மற்றும் முதலில் பார்த்த அந்த நீல நிற BMW கார் மட்டுமே அங்கு இருந்தன. மற்ற கார்களைக் காணோம். முதலில் நின்றுகொண்டிருந்த அந்த  BMW கார் அருகே இருவரும் சென்றனர். 

அ : " கார் சாவியைக் கொடுங்க. நீங்க அனுப்புகின்ற நம்பகமான ஆள் யாரு? அவரை பின்னாலே உடக்காரச் சொல்லுங்க. அவருக்கு டிரைவிங் தெரியுமா, திரும்ப இந்தக் காரை நான் கொடுத்து அனுப்புகின்ற பொருள்களோடு பத்திரமாகக் கொண்டுவந்து உங்களிடம் கொடுத்துவிடுவாரா ? " 

பி ஏ : " சார் - இந்தக் கார் பாஸின் பையனுடையது. இந்தக் காரை அவரைத் தவிர வேறு யாரும் எப்பொழுதும் ஓட்டுவதில்லை. எங்களுக்கு அவரைவிட நம்பகமான ஆள் யாரும் கிடையாது. அவரே உங்களை உங்கள் அலுவலகத்தில் கொண்டு போய் சேர்த்து, நீங்கள் கொடுக்கின்ற பொருட்களை பத்திரமாகக் கொண்டுவந்து எங்களிடம் ஒப்படைத்துவிடுவார். " 

உள்ளேயிருந்து வந்த இளைஞனிடம் பி ஏ " அபி இவர்தான் அருண். போலீஸ் அதிகாரி. இவரைக் கொண்டுபோய் விட்டுவிட்டு இவர் கொடுக்கின்ற பொருட்களை வாங்கி, எல்லாம் லிஸ்ட்படி இருக்கிறதா என்று சரிபார்த்து, உடனே ஃபோன் செய். " 

அருண் நீட்டிய கையைப் பற்றி லேசாகக் குலுக்கிவிட்டு டிரைவர் சீட்டில் ஏறி அமர்ந்தான் அபி. 

பக்கத்து சீட்டில் உட்காருவதற்காக முன் பக்கத்து கதவைத் திறந்த  அருணிடம், அபி, " இந்த சீட்டில் என்னுடைய ப்ரீஃப் கேஸ் வைத்துள்ளேன். நீங்கள் பின் சீட்டில் உட்கார்ந்து வரலாம். " 

கார் செல்லும்போது, மௌனமான சூழ்நிலையை மாற்ற அருண், அபியிடம் " உங்க முழுப்பெயரும் 'அபி'யா ? " என்று கேட்டான். 

அபி : " இல்லை - முழுப்பெயர் அபிமன்யு. கார் ஓட்டும்போது என்னுடைய முழு கவனமும் ஓட்டுவதில்தான் இருக்கும். அதனால் நான் கார் ஓட்டும்போது என்னிடம் எதுவும் பேசாதீர்கள்.  " 

அருண், ' அபி தன்னைப் பற்றி அதிக விவரங்கள் சொல்ல விரும்பவில்லை'  என்பதைத் தெரிந்துகொண்டான். அருண் மௌனமாக தன்னுடைய மொபைல் ஃபோன் செய்திகளைப் பார்த்தான். 

நடுவே திடீரென்று காரின் புளுடூத் ஸ்பீக்கரிலிருந்து ஒரு அழைப்பு. " அபீ - எங்கே இருக்கே? பிரச்சனை தீர்ந்ததா?" 

அபி : " மதி - டிரைவிங் பண்ணிக்கிட்டு இருக்கேன். அப்புறமா கால் பண்ணுகிறேன் " என்று சொல்லி அழைப்பைத் துண்டித்தான். 

அருணின் மொபைல் போனுக்கு சில வாட்ஸ் ஆப் செய்திகள் வந்திருந்தன. 

அருண் அலுவலகத்தின் சிஸ்டம்ஸ் டிபார்ட்மெண்ட் அதிகாரி " சார் - நீங்க கேட்டுக்கொண்டபடி ரீட்டாவின் லாப்டாப்பில் சேமித்து வைக்கப்பட்டிருந்த தகவல்கள், மொபைல் போனில் இருந்த தகவல்கள் எல்லாவற்றையும் ஒரு 512 GB - மைக்ரோ எஸ் டி கார்டில் காபி செய்துவிட்டேன் "

அருண் பதில் செய்தி அனுப்பினான். " நன்றி. ரீட்டாவின் லாப்டாப், மொபைல் ஃபோன், ஏர் கண்டிஷனரிலிருந்து நாம் கைப்பற்றிய CV 235 காலி ஜாடி, மதிவாணன் பெயர் + விலாசம் காணப்படும் சீனக் கம்பெனி கடிதம், (மற்ற பெயர்கள் & விலாசங்கள்  வேண்டாம்) எல்லாவற்றையும் தயாராக எடுத்து வைக்கவும். "

அடுத்த செய்தி, ரீட்டாவின் பெரியம்மா மாதுரி அனுப்பியிருந்தது. 

" சார் - என்னுடைய அக்கவுண்ட்டுக்கு ஐம்பது லட்ச ரூபாய் கிரெடிட் ஆகியிருக்கிறது. " 

அருண் பதில் செய்தி அனுப்பினான். " நல்லது அம்மா - மேலும் ஒரு ஐம்பது லட்ச ரூபாய் உங்கள் அக்கவுண்ட்டுக்கு வரும். விரைவில் நீங்கள் - ' ரீமா ஆதரவற்ற பெண்கள் காப்பகம்' ஆரம்பிக்கலாம். வாழ்த்துகள். " 

அருணின் அலுவலகம் அருகே காரை நிறுத்தினான் அபி. அருண் எழுந்திருக்கும் முன்பு காரின் இருக்கைக்கும் சாயும் பகுதிக்கும் இடையில் தன்னுடைய பாண்ட் பையிலிருந்து எதையோ எடுத்து வைத்துவிட்டு எழுந்தான். 

அ: " அபி சார் - நான் உள்ளே போய் உங்க அப்பா சொன்ன எல்லாவற்றையும் எடுத்து வந்து கொடுக்கின்றேன். என்னுடைய மேலதிகாரியைப் பார்த்துப் பேசி அவரிடம் விவரமாக சொல்லி, தடயங்களை எடுத்துவரவேண்டும். அந்த சமயம் நீங்க என் கூட இருந்தால், அது உங்களுக்குப் பிரச்சனை ஆகிவிடும். நீங்க காரிலேயே இருங்க. நான் உள்ளே போய் பத்தே நிமிடங்களில் எல்லாவற்றையும் கொண்டு வந்து கொடுக்கின்றேன். நீங்க பொருள்களை சரிபார்த்து, உடனடியாக உங்க அப்பாவுக்கு ஃபோன் செய்யுங்க " 

அபி 'சரி' என்றான். 

**** 

உள்ளே சென்ற அருண், மார்த்தாண்டமிடம் , " சார் நீங்க சொன்னபடியே சுமுகமாக பிரச்சனையைத் தீர்க்கப் போகிறேன். நான் சேகரித்த தடயங்களை ஒருவரிடம் ஒப்படைக்கப் போகின்றேன். உங்களுக்கு பிரமோஷன் நிச்சயம் வந்துவிடும். " 

மா : " சரி அருண். என்ன செய்யவேண்டுமோ அதை செய்து முடி. எனக்கு ஆட்சேபணை இல்லை. " 

அருண் சிஸ்டம்ஸ் பகுதி அதிகாரியிடமிருந்து, தான் சொல்லியிருந்தவைகளை வாங்கி எல்லாவற்றையும் ஒரு பெட்டியில் போட்டு, அபியின் காரை நோக்கி நடந்தான். காபி செய்யப்பட்ட மைக்ரோ எஸ் டி கார்டை தன்னுடைய மேஜை டிராயரில் வைத்துப் பூட்டினான். 

அபி யாரிடமோ ஃபோன் பேசிக்கொண்டிருந்தான். அருண் வருவதைப் பார்த்ததும், பேச்சை முடித்தான். 

அ: " அபி சார். காரின் பின் கதவை unlock செய்யுங்க. உள்ளே வந்து இவைகளைக் கொடுக்கிறேன். " 

உள்ளே பின் சீட்டில் உட்கார்ந்த அருண், தான் கொண்டு வந்த பெட்டியை முன் சீட்டில் இருந்த அபியிடம் கொடுத்து, "பெட்டியைத் திறந்து எல்லாம் சரியாக இருக்கின்றதா என்று பாருங்க" 

அபி அவ்வாறே செய்தான். அபி சரிபார்த்துக்கொண்டிருந்த சமயம், அருண் தான் பின் சீட்டில் விட்டுச் சென்ற பொருளை (அது ஒரு சிறிய ரெகார்டிங் டிவைஸ்)  திரும்ப எடுத்து பையில் போட்டுக்கொண்டான். தன்னுடைய பாண்ட் பையிலிருந்து வேறு ஒரு பொருளை டிரைவர் சீட்டுக்குப் பின்னே இருந்த பவுச் பகுதியில் போட்டான். 

அபி : " எல்லாம் சரியாக இருக்கிறது. "

அ : " அப்பாவுக்கு ஃபோன் செய்து சொல்லுங்க" 

அபி ஃபோன் செய்து " எல்லாம் சரியா இருக்கு. மீதி பணத்தை அனுப்பிடலாம் " என்றான். 

அருண் நன்றி சொல்லி காரிலிருந்து இறங்கி, அலுவலகத்திற்கு திரும்பிச் சென்றான். 

மாதுரியிடமிருந்து மீண்டும் ஒரு வாட்ஸ் ஆப் செய்தி. " நன்றி சார். மேலும் ஐம்பது லட்ச ரூபாய் கிரெடிட் ஆகியிருக்கிறது. " 

அருண், " ரீ மா ஆதரவற்ற பெண்கள் காப்பகத்திற்கு வாழ்த்துகள் " என்று செய்தி அனுப்பினான். 

மேலதிகாரி மார்த்தாண்டமிடம் தனக்கு லீவு சொல்லிவிட்டு ஹைதராபாத் புறப்பட்டான். 

= = = = = = = =

ஹைதராபாத் ஆனந்தின் அலுவலகத்திற்கு சென்று, ஆனத்திடம் நடந்த எல்லாவற்றையும் சுருக்கமாக சொன்னான். " ஆனந்த் - இனிமேல் நீங்க ஃப்ரீ bird. நிம்மதியா, சந்தோஷமா இருங்க. இந்தாங்க நீங்க ஆர்டர் செய்து வாங்கிய CV235 காலி ஜாடி. இனி யார் கேட்டாலும், நீங்க வாங்கிய ஜாடியை சோதனைக்கு உபயோகித்ததற்கு சாட்சியாகக் காட்டலாம். " என்று சொன்னான். 

ஆ : " மிக்க நன்றி அருண். பெரிய உதவி செய்துள்ளீர்கள்.  மறக்கவே மாட்டேன். ஒரு சந்தேகம் கேட்கலாமா?" 

அ: " கேளுங்க" 

ஆ : " அவர்களிடம் நீங்க ஏன் உங்களுக்காக எதுவும் கேட்டு வாங்கிக்கொள்ளவில்லை?"

அ : " கொலை செய்யும் நோக்கத்தோடு நானும் CV235 விஷ ஜாடி வாங்கியதால், நானே எனக்கு அளித்துக்கொண்ட தண்டனை அது. "

ஆ : " நானும்தானே அப்படி கொலை செய்யும் நோக்கத்தோடு CV235 ஜாடி வாங்கினேன் ! " 

அ : " அதற்கு தண்டனையாக - நீங்க ரீட்டாவுக்கு அனுப்பிய பத்து லட்ச ரூபாய் - ரீ மா ஆதரவற்றப் பெண்கள் காப்பகத்திற்கு நன்கொடையாக எடுத்துக்கொள்ளப்பட்டது ! மேலும் ரீ மா ஆ பெ கா விற்கு இனிமேல் நீங்க இலவசமாக பிசினஸ் கன்ஸல்டன்ஸி ஆலோசனைகள் சொல்லவேண்டும். நான் அந்த காப்பகத்திற்கு காவல்துறையிலிருந்து ஏதாவது உதவிகள் தேவை என்றால் அதை செய்துகொடுப்பேன்." 

ஆ : " இன்னும் ஒரே ஒரு சந்தேகம் " 

அ : " அதையும் கேளுங்க " 

ஆ : " நான் வாங்கிய CV235 ஜாடியை என்னிடம் கொடுத்துட்டீங்க - மதிவாணன் வாங்கிய CV235 ஜாடியை அபியிடம் திருப்பிக் கொடுத்துட்டீங்க. நீங்க வாங்கிய அந்த மூன்றாவது ஜாடி எங்கே?" 

அ : " அதை,  கை தவறி  அபியின் கார் டிரைவர் சீட்டுக்குப் பின்னே உள்ள பவுச்ல போட்டுட்டேன். கார் சர்வீசிங் செய்யும்போது அதிலே தண்ணீர் விழ வாய்ப்பு இருக்கு." 

= = = = = = = = = = = = = = =

பின் குறிப்பு : கதையில் வந்த பெயர்கள் (CV235 உட்பட ) சம்பவங்கள், கார், எல்லாமே  நூறு சதவிகிதம் கற்பனையே. 

= = = = = = = = = = = =

இந்தக் கதை சம்பந்தமாக மின்நிலா பத்திரிக்கையில் கேட்கப்பட்ட கேள்விகளுக்கு அதிகபட்சம் சரியான பதில்கள் எழுதிய கே சக்ரபாணி, பதிமூன்றாம் பகுதி பின்னூட்டத்தில் அருணுக்கு ஆலோசனை சொன்ன கோமதி அரசு, கமலா ஹரிஹரன் ஆகியோருக்கு பரிசு உண்டு. 

பரிசுத் தொகையை எந்த மொபைல் எண் அல்லது அக்கவுண்ட்டுக்கு அனுப்பவேண்டும் என்பதை 9902281582 (குரல் அழைப்புகள் வேண்டாம்) என்கிற - கௌதமன் எண்ணிற்கு SMS அல்லது வாட்ஸ் ஆப் மூலமோ அல்லது engalblog@gmail.com என்ற மின்னஞ்சல் முகவரிக்கோ அனுப்பவும். 

நன்றி. 

= = = = = = = = = = = = = = = =

பரிசு பெற்றவர்களுக்கு வாழ்த்துகள். 

= = = = = = = = = = = =

கதை சம்பந்தமாக ஏதேனும் சந்தேகங்கள் இருந்தால், கருத்துரைப் பகுதியில் பதிவு செய்யுங்கள். உடனுக்குடன் பதில் கொடுக்கப்படும். நன்றி. 

= = = = = = = = = =