டீக்கடை

 டீக்கடை அனுபவம் என்பது தனி அனுபவம்.  அந்த டீயை இடது கையில் வைத்துக் கொண்டு, அவ்வப்போது மெல்ல சுழற்றி ...  ஏதோ உலகமகா பிரச்னையை தீர்ப்பது எப்படி என்று யோசிப்பது போல் யோசித்துக் கொண்டு மெதுவாக வாயில் ஒரு 'சிப்' உறிஞ்சி...

காலி கோப்பையைக் கொடுக்கும்போது மனசே இல்லாமல் மெதுவாய் கொடுப்பார்கள்.  வீட்டில் கூட இப்படித்தான் டீ குடிப்பார்களா என்று எனக்குத் தோன்றும்.

டீயில் அப்போதெல்லாம்  மூன்றே வகைகள்தான்.  ஸ்ட்ராங் டீ,  நார்மல் டீ, கட்டிங் டீ..  

கட்டிங் என்பது அரை கிளாஸ்தான்.  நீர் குறைவாக ஊற்றப்பட்ட, அல்லது சுண்டிய பாலில் ஸ்ட்ராங் டிகாக்ஷன் போட்டு வரும்.  சுவையும், காசும் கூட. 

அப்போதைய டீக்கடைகளில் ஆண்கள் மட்டும்தான் 98.7% டீ குடிப்பார்கள்.  பெண்கள் அப்படி நின்று குடித்தால் வினோதமாக பார்ப்பார்கள்.  ஏனோ?!

கடையை அடைந்து, நின்று தினத்தந்தி பேப்பரின் ஒரு பக்கத்தை மேய்ந்தபடியே டீ குடித்துக்கொண்டும், தம்மடித்துக் கொண்டிரும் நிற்பவர்களைத் தாண்டி, மாஸ்டரிடம் சென்று 'மாஸ்டர் ஒரு டீ' என்று ஆர்டர் கொடுத்து விட்டு, ஒதுங்கி நிற்க ஒரு இடம் தேடி நின்று கொள்ள வேண்டும்.  மாஸ்டர் டீயை நீட்டினால் வாங்கி கொள்ளும் தூரத்தில் நின்றால் உத்தமம்.  வாங்கி கொண்டு அப்புறம் அங்கிருந்து வேறு இடம் சென்று கொள்ளலாம். கடைக்காரர்கள் செய்தித்தாளை வடை மடித்துக் கொடுக்கத்தான் வாங்குகிறார்கள் என்றாலும் அந்த பேப்பரைப் படிக்க என்று டீ குடிக்க சில பேர் வருவார்கள்.  செய்தித்தாளின் ஒவ்வொரு பக்கமும் ஒவ்வொரு டீ குடிக்கும் நபரிடம் இருக்கும்!    

இப்போதெல்லாம் பேபப்ரின் இடத்தை செல்போன் ஆக்ரமித்துக் கொண்டிருந்தாலும், ஒரு ஆச்சர்யம், சாதாரண தெருவோர கூண்டு டீக்கடைகளில் செல்போன் இல்லாமல், ஏன் பேப்பரும் இல்லாமல்  சிந்தனாவாதிகள்தான் டீ குடிக்கிறார்கள்.

மழைக்காலங்களில், குளிர்காலங்களில் இது மாதிரி டீக்கடைகளுக்கு மவுஸு அதிகம்.  சட்டென மழைத் தூறலுக்கு ஒதுங்கி, சும்மா நிற்காமல் ஒரு பஜ்ஜி, ஒரு டீ அடிப்பவர்கள் உண்டு.  பெய்யும் மழையைப் பார்த்தபடியே எங்கோ கவனமாக டீ நிதானமாகக் குடிப்பது ஒரு சுகம்.

சிலர் ஒரு கையில் சிகரெட்டும், மறுகையில் டீ க்ளாஸுமாய் இருப்பார்கள்.  என் நண்பர் ஒருவர் டீயில் அந்த சிகரெட்டை நசுக்கி குடிப்பார்!  சிலர் ரொட்டியோ, பன்னோ, உடன் ஊறுகாய் போல தொட்டுக்கொண்டு டீ குடிப்பார்கள்.  அல்லது அதை ஒரு கடி, டீயை ஒரு சிப் உறிஞ்சல்...

மதுரைக்கு வந்த பிறகு டீக்கடைகள் சற்று அதிகமாக கண்ணில் பட்டன.  அவை கூட பள்ளிகளை ஒட்டியோ, கல்லூரி, அலுவலகங்களை ஒட்டியோ காணப்பட்டன.  பள்ளி நண்பர்கள் டீக்கடையில் குழுவாக நின்று டீ உறிஞ்சுவதைப் பார்த்திருக்கிறேன்.  என் நண்பன் ஜெரோம் அப்போதே புகை பிடிப்பான்!  இவர்கள் வழக்கம் என்ன என்றால், டீ குடிக்க, அப்படியே குச்சி மிட்டாய் சாப்பிட - அதுதாங்க புகை பிடிக்க - கடைக்குப் போகும்போது என்னைப்போல யாராவது பச்சாவை துணைக்கு அழைத்துக் கொண்டுதான் போவார்கள்.  சிகரெட் புகைத்து பெரிய மனித feel பெற்றவர்கள் இவர்கள்!

கிட்டத்தட்ட என் பள்ளி இறுதி நாட்களில்தான் நான் முதன் முதலில் டீக்கடை அனுபவம் பெற்றேன்.   முதலில் நண்பர்களுடன் சென்று ஒதுங்கி நின்று அவர்கள் ஆர்டர் செய்து வாங்கி கொடுக்கும் டீயை, கூட நின்று பேசியபடி, குடித்து விட்டு வருவோம்.  அப்புறம் நானே தனியாக டீக்கடை சென்று டீ குடித்து வரும் தைரியம் ( !! )) வந்தது.

சிகரெட் பழக்கம் போல டீ கடையில் நின்று டீ குடிப்பதும் ஒருவித போதை ஆகிவிடுகிறது.  போதாக்குறைக்கு சூடாக வடையும், காலப்போக்கில் அதற்கு சட்னி, கடப்பா என்றெல்லாம் வந்து விட, டீக்கடை தவிர்க்க முடியாத விஷயம் ஆனது.  'கடப்பா எங்கடா குடுக்கறாங்க' என்று நீங்கள் கேட்கலாம்.  மதுரை தல்லாகுளம் ஹெட் போஸ்ட் ஆபீஸ் எதிரே ஒரு கடை - ஒரு தபால்காரரே வைத்திருந்தார் - அந்தக் கடையில் மொறுமொறு மெதுவடை, பொன்னிற போண்டா எல்லாம் சுடச்சுட கிடைக்கும்.  துணைப்பொருட்களாக இந்த கடப்பா, சிவப்பு சட்னி, வெள்ளை சட்னி..  அப்பா தினசரி மாலை அலுவலகத்திலிருந்து திரும்பும்போது இந்தக் கடையிலிருந்து சுடச்சுட போண்டா, வடை வாங்கி வருவார்!  வீட்டுக்குள் நுழைந்து அவர் ஆபீஸ் bag ஜிப்பை திறந்ததுமே வாசனை கம்மென்று அடிக்கும்!  மோத்தி உட்பட எல்லோரும் உஷாராகி தயாராவோம்.

சிலருக்கு வெங்காயம் துருத்திக் கொண்டு நிற்கும் மசால்வடைதான் பிடிக்கும்.  இந்த மசால்வடைதான்  பாதி அரசு ஊழியர்களுக்கு மதிய சாப்பாட்டுக்கு வெஞ்சனம்!

வீட்டில் மட்டும் இரண்டு காபி குடித்தது போக டீக்கடைகளில் அவ்வப்போது  நின்று இப்படி டீ குடிப்பது எனக்கும் வழக்கமானது.  டீக்கடையில் காஃபி குடிக்க மாட்டேன்!    இந்த வழக்கத்தில் பின்னாட்களில் அலுவலக வேலை நடுவே,  வெளியே எழுந்து போகாமல், மாதாந்திர கணக்கில், இருக்கும் இடத்துக்கு டீ, வடை கொண்டு வரச்சொல்லி குடிப்பதும், சாப்பிடுவதும்  வழக்கமானது.  அலுவலக வாசலிலேயே அருமையான டீக்கடை.

அப்போதெல்லாம் நம்மூர்க்காரர்கள்தான் டீ போடுவார்கள்.  அவரை டீ மாஸ்டர் என்று அன்புடன் அழைப்போம்!  அவர் டீ போடும் அழகே தனி.  கிளாஸை வெந்நீரில் கழுவி வரிசையாக வைத்து, அதில் சர்க்கரை போட்டு கொஞ்சம் பாலை ஊற்றி, இந்தப் பக்கம் இன்னொரு அடுப்பில் இருக்கும் டீ டிகாக்ஷனை எடுத்து அதில் லாவகமாக வரிசையாக ஊற்றி, ஒவ்வொன்றாக எடுத்து இன்னொரு கிளாஸை இடது கையில் பிடித்து ஒரு தட்டு தட்டி, அதில் நீளமாக, உயரமாக ஒரு ஆற்று ஆற்றி க்ளாஸ் அடிப்பாகத்தை ஒரு தட்டு தட்டி அந்த மேடை நுனியில் வைப்பார்.  நாம் அதை எடுத்து அதன் விளிம்புகளை மறுபடி அங்கேயே தடவி எடுத்துக் கொள்ள வேண்டும்!

பத்து பைசா, 15 பைசாவுக்கெல்லாம் டீ கிடைத்தது,  அப்புறம் அது 50 பைசாவாங்கி ஐந்து ரூபாயாகி ஏழு ரூபாயாகி இப்போது நார்மல் டீ பெரும்பாலும் 10 ரூபாய்.

இப்போதெல்லாம் எல்லா இடங்களிலும் வட மாநிலத்தவர்தான் டீ போடுகிறார்கள்..  மேலும் இஞ்சி டீ, ஏலக்காய் டீ, பேப்பர் டீ, கிரீன் டீ, வெண்டைக்காய் டீ என்று ஏகப்பட்ட வெரைட்டிஸ்...

பள்ளிக்காலங்களில் வீட்டிலேயே காஃபி குடித்து விடுவதால் டீக்கடையில் தேவைகள் எனக்கு இருந்ததில்லை என்பது மட்டுமில்லை, அப்போதெல்லாம் இப்படி  டீக்கடைகள் இருந்ததுமில்லை.  உதாரணமாக தஞ்சை ஹௌசிங் யூனிட்டிலிருந்தோ, மருத்துவக்கல்லூரி குடியிருப்பிலிருந்தோ பள்ளிக்கு கிளம்புகிறேன் என்றால் பள்ளி வரும்வரை டீக்கடை எதுவும் கண்ணில் பட்டதில்லை.  மருத்துவக் கல்லூரி குடியிருப்பிலிருந்தாவது பஸ்ஸில் வருவேன்.  ஹௌசிங் யூனிட்டிலிருந்து நடைதான்.

பள்ளி தாண்டி ரயில்வே ஸ்டேஷன் இருக்குமிடம் சென்றால் அங்கே 'மேனகா காபி பார்' என்று ஒரு கடை இருக்கும்.  வெளியில் நின்றும் குடிக்கலாம், உள்ளே அமர்ந்தும் டீ, காபி குடிக்கலாம்.  அப்போதெல்லாம் ஒரே வகை  டீதான்.  இஞ்சி டீ, ஏலக்காய் டீ எல்லாம் அப்புறம் பத்து வருஷத்துக்கப்புறம் அறிமுகமானது.  முதலில் அது தம் டீ என்று சொல்லப்பட்டது!  

அந்த 'மேனகா காபி பாரு'க்கும் எனக்கும் இருந்த ஒரு சிறு தொடர்பு பற்றி தற்கொலை என்கிற முந்தைய பதிவொன்றில் எழுதி இருக்கிறேன்!

இப்போதெல்லாம் சென்னையில் எந்த இடத்தில் பத்துப் பதினைந்தடி நடந்தாலும் அந்தக் குறுகிய இடத்துக்குள் குறைந்தது நான்கு காஃபி, டீ ஷாப் நீங்கள் பார்த்து விடக்கூடும்.  அதுவும் என்னென்ன பெயர்கள் என்கிறீர்கள்?  டீ பாய், சாய் கிங்ஸ், காஃபி ஒன்லி, வாங்க டீ சாப்பிடலாம்,   வாய்க்கு வந்த பெயர்களை எல்லாம் கைக்கு வந்தபடி எழுதி வைத்திருக்கிறார்கள்.

அதிலும் சமீபகாலமாக கருப்பட்டி காஃபி ரொம்ப புகழடைந்து விட்டது.  அது நல்லதா, கெட்டதா தெரியாது.  வெள்ளைச் சர்க்கரையைவிட நாட்டுச் சர்க்கரை நல்லதென்று வாட்ஸாப்பில் படித்து விட்டோமானால் நச்சென்று வலையில் விழுந்து விடுவோம்.  அவர்கள் நிஜமாக கருப்பட்டி காஃபிதான் கொடுக்கிறார்களா என்றும் ஆராய்வதில்லை.  அப்படி கொடுக்கிறார்கள் என்றே நம்புவோம்.  அப்படி நம்பிதான் ஒவ்வொரு கடையிலும் மக்கள் கூட்டம் கூட்டமாக ஆரோக்ய பானம் அருந்துவதாக அகமகிழ்ந்து போகிறார்கள்!

இபப்டியான கடைகளை பார்த்துப் பார்த்து சாதாரண நம்மூர் பழைய மாடல் டீக்கடையைப் பார்க்க ஒரு ஏக்கமே வந்து விட்டது என்றால் பார்த்துக் கொள்ளுங்கள்.  தினத்தந்தி பேப்பரில் பஜ்ஜியை நசுக்கி எண்ணெய் பிழிவதற்கு ஈடாகுமா இந்தக் கடைகள்!

ஆலடிப்பட்டியான் கருப்பட்டி காபி என்றொரு கடை சரவணா ஸ்டோர் போல நகரமெங்கும் கிளை விரித்து வியாபித்து வருகிறது.  முதலில் ஓரிரு இடங்களில்தான் அதைப் பார்த்தேன்.  இப்போது திரும்பும் பக்கமெல்லாம் பார்க்கிறேன்.  

பல்வேறு பெயர்களில் இன்றைய நாளில் அனைத்து இடங்களிலும் நிறைந்திருக்கும் இந்த புது மாதிரியான டீக்கடைகளில் ஆண், பெண், குழந்தைகள் என்று எல்லோருமே அமர்ந்து பானம் அருந்துகிறார்கள்.  அவர்கள் ஆரோக்கியத்தைப் பேண கிரீன் டீ லென்னும் டீ என்றெல்லாம் ஆர்டர் செய்து குடிக்கிறார்கள்.  கிரீன் டீ என்பது ஃபிராட் என்று ஒரு மருத்துவர் சொன்ன காணொளி பார்த்திருக்கிறேன்,.

இங்கேயும் பழைய வாக்கியத்தைதான் - எப்போதும், எதற்கும் சொல்லும் வாக்கியத்தைதான் - சொல்லப் போகிறேன்.  

என்ன இருந்தாலும் அந்த கால டீக்கடைகள்தான் சுவாரஸ்யம்.  அந்தக் கால டீக்கடைகள் போல இல்லை இந்த கால டீக்கடைகள்!

==============================================================================================

நியூஸ்ரூம் 

பானுமதி வெங்கடேஸ்வரன் 

-  கொழும்பு : ஆஸ்திரேலியாவின் சிட்னியிலிருந்து இலங்கையின் கொழும்புக்கு வந்த 'ஸ்ரீலங்கன் ஏர்லைன்ஸ்' விமானத்தில், தன்னிடம் சொல்லாமல் கழிப்பறைக்கு சென்ற உதவி பைலட்டை காக்பிட்டுக்கு வெளியே நிற்க வைத்து, விமான கேப்டன் பூட்டிய சம்பவம் அதிர்ச்சியை ஏற்படுத்தி உள்ளது.

-  ஒட்டாவா: நிஜ்ஜார் கொலை வழக்கில், இந்திய உளவாளிகளின் பங்கை நிரூபிக்க வலுவான ஆதாரம் இல்லை என கனடா பிரதமர் ஜஸ்டின் ட்ரூடோ ஒப்புக்கொண்டார்.   ஒட்டாவா: கனடா அரசியல் களத்தில் பாகிஸ்தான் ஆதிக்கம் செலுத்துவதாகவும், இங்குள்ள காலிஸ்தானியர்களுக்கு ஆதரவாகவே அவர்கள் செயல்படுவதாகவும் கனடாவின் உளவுத்துறை இயக்குனர் வனீசா லாயட் பேசியது, சமூக வலைதளங்களில் வேகமாக பரவி வருகிறது.

-  சென்னை : குற்றவாளியைக் கண்டுபிடிக்க, கொதிக்கும் நெய்யில் கையை வைக்கும்படி கொடுமையான தண்டனையை, மராட்டியர்கள் வழங்கிய தகவல், தஞ்சை பெரிய கோவில் கல்வெட்டு வாயிலாக தெரிய வந்துள்ளது.

-  மகாராஷ்டிரத்தில் ரூபாய் ஒரு கோடி வரதட்சிணை கேட்டு கணவர், மாமியார், மாமனார் கொடுமைப்படுத்தியதால் பெண் மருத்துவர் தூக்கிட்டு தற்கொலை செய்துகொண்டார்.  டாக்டரானாலும் பெண்.  ஹூம்...

-  மழை காரணமாக சென்னையில் ஒரே நாளில் 43 பாம்புகள் பிடிபட்டன.

-  உ பி காசியாபாத்தின் சாந்திநகர் பகுதியில் வசித்துவரும் தொழிலதிபர் வீட்டில் பணிபுரியும் பெண்மணி ஒருவர் அங்கு சமைக்கப்படும் உணவில் தனது சிறுநீரை கலந்திருப்பது கண்டுபிடிக்கபப்ட்டுள்ளது...  உவ்வே....  பெண்மணி அவள் கண்மணி!

-  உத்தரகண்டில், இஸ்லாமிய கல்வியை போதிக்கும் 416 மதரசாக்கள் உள்ளன. இவை, உத்தரகண்ட் மதரசா கல்வி வாரியத்தின்கீழ் பதிவு பெற்று செயல்படுகின்றன. இங்கு, 70,000 மாணவர்கள் கல்வி பயில்கின்றனர். இந்த மதரசாக்களில் சமஸ்கிருதத்தை கட்டாய பாடமாக்க மதரசா கல்வி வாரியம் முடிவு செய்துள்ளது. இது தொடர்பாக, மாநில சமஸ்கிருத துறைக்கு கடிதம் அனுப்பியுள்ளது. சமஸ்கிருத துறை அனுமதி அளித்த பின், 416 மதரசாக்களிலும் சமஸ்கிருதம் கட்டாய பாடமாக கற்பிக்கப்பட உள்ளதாக உத்தரகண்ட் மதரசா கல்வி வாரிய தலைவர் முப்தி ஷமூன் குவாஸ்மி தெரிவித்துள்ளார்.

-  லக்னோவில் உள்ள ஒருவருக்கு பாஸ்போர்ட் தபாலில் வந்துள்ளது. அந்த பாஸ்போர்ட்டை சம்பந்தப்பட்டவருக்கு தர அங்குள்ள தபால்காரர் ரூ.500 லஞ்சமாக கேட்டார். பணத்தை தர அவர் மறுத்ததால் தபால்காரர் கோபம் கொண்டு பாஸ்போர்ட்டில் உள்ள முக்கிய பக்கம் ஒன்றை கிழித்துள்ளார்.

-  லக்னோ: கணவனின் நீண்ட ஆயுளுக்காக கர்வா சவுத் என்ற விரதம் இருந்த மனைவி, தன் கணவனுக்கு விஷம் கொடுத்து கொலை செய்த சம்பவம் உ.பி.யில் நடந்துள்ளது.

-  சென்னை: சென்னையில், நள்ளிரவில் போலீசாரிடம் ஆபாசமாக பேசி வம்பிழுத்த ஜோடி கைது செய்யப்பட்டனர். 'கொஞ்சம் ஓவரா போயிட்டோம். எல்லோரும் மன்னிச்சுடுங்க' என்று அந்த நபர் மன்னிப்பு கேட்கும் வீடியோவை, போலீசார் வெளியிட்டுள்ளனர்.  அந்த ஜோடி போலீசிடம் உதார் காட்டும் விடீயோவையும், மன்னிப்பு கேட்கும் வீடியோவையும் கட்டாயம் பாருங்கள்...  கொடுமை!

-  மூத்த பதிப்பக  ஆளுமையும், உமா பதிப்பக நிறுவனருமான திரு ராம லட்சுமணன் உடல்நலக்குறைவால் அக்டோபர் 21 ஆம் தேதி சென்னையில் காலமானார்.  அவருக்கு வயது 74.

-  செயற்கைக்கோளிலிருந்து நேரடி சேவை. BSNL - Viachat  சோதனை வெற்றி. இதனால் நெட்வொர்க் போன்ற இடைநிலை அமைப்புகள் எதுவுமின்றி செயற்கைக்கோள் வாயிலாக நேரடி இணைப்பு பெறலாம். நெட்ஃபிளிக்ஸ்

போன்றவை ஸ்மார்ட் டி.வி, ஸ்மார்ட் ஃபோன்களில் நேரடியாக திரைப்படங்களை வழங்கலாம். இரு சாதனங்களுக்கிடையே கோப்புகள் பரிமாறலாம். நோட்டிஃபிகேக்ஷன் மற்றும் குறுஞ்செய்திகள் பயணர்களுக்கு நேரிடையாக அனுப்பலாம்.

-  ரயில்களில் முன்பதிவு வசதி 120 நாட்களில் இருந்து 60 ஆக குறைப்பு. 120 நாட்களுக்கு முன்னரே டிக்கெட் முன்பதிவு செய்யும் வசதியால் டிக்கெட் ரத்து செய்வது அதிகமாகி வருகிறது. இதைப் பயன்படுத்தி தனியார் ஏஜென்சிகள் முறைகேடுகள் செய்கின்றன. அதை தடுக்கவே முன்பதிவு நாட்களை குறைக்கும் ஏற்பாடு.

-  பீஹார்: பாட்னாவில் தன்னைக் கடித்த கண்ணாடி விரியன் பாம்பை தன் கழுத்தில் போட்டுக் கொண்டபடி மருத்துவமனைக்கு வந்தார் பிரகாஷ் மண்டல் என்பவர். இதைப் பார்த்து பயந்து அலறி ஓடினர் அங்கு காத்திருந்த மற்ற நோயாளிகளும், மருத்துவர்களும். 

-  உ.பி., பிஜ்னோர்: வயலில் வேலை செய்து கொண்டிருந்த தேர்வர் சிங் என்பவரை திடீரென சிறுத்தை ஒன்று தாக்கி, அவரை புதருக்கு இழுத்துச் செல்ல முயன்றது. அதோடு போராடிய தேர்வர் சிங் அருகிலிருந்த கம்பை எடுத்து, சிறுத்தையின் தலையில் அடித்தார். பலத்த காயமடைந்த சிறுத்தை இறந்தது. தேக்வீர் சிங்கின் நிலை கவலைக்கிடம். 

- புதுடில்லி: உலகளவில் தேவை அதிகரித்துள்ளதால், நடப்பு நிதியாண்டின் முதல் பாதியில் காபி ஏற்றுமதி 55% உயர்ந்துள்ளதாக இந்திய காபி வாரியம் அறிவித்துள்ளது.

-  சென்னை: தங்கம் விலை உயர்வால் ஏற்பட்ட மாற்றம். தங்கம் விலை எப்போதும் இல்லாத வகையில் உயர்ந்து வருவதால் மொத்த பணம் கொடுத்து நகை வாங்க முடியாது என்ற காரணத்தால் தங்க நகை சேமிப்பு திட்டத்தில் சேருவார் எண்ணிக்கை 25% அதிகரிப்பு. 

-  தங்கம் விலை உயர்வால் ஏற்பட்டிருக்கும் மற்றொரு நல்ல மாற்றம் வங்கிகளில் தங்கநகைகள் மீது கடன் வாங்கியவர்கள் இருக்கும் நகையை காப்பாற்றிக் கொள்ளலாம் என்ற நோக்கில் அதற்கு ஒழுங்காக வட்டி கட்டத் தொடங்கியுள்ளனர்.

-  பெங்களூரு: இலவசமாக ஆட்டோ ஓட்டும் பயிற்சி அளிக்கும் 'நம்ம யாத்ரி' நிறுவனம் பெண்களுக்கு வேலை வாய்ப்பு ஏற்படுத்தும் நோக்கில் 'மஹிளா சக்தி' என்ற திட்டத்தை 2023ல் செயல் படுத்தியது. இதன் மூலம் 108 பெண்கள் ஆட்டோ ஓட்டும் பயிற்சி பெற்று ஆட்டோ ஓட்டத் துவங்கியுள்ளனர். 

-  சாயல்குடி: ராமநாதபுரம் மாவட்டம், சாயல்குடி அருகே வி.வி.ஆர். நகரில் கருவாடு உற்பத்தி நிறுவனங்கள் உள்ளன. மழைக்காலம் துவங்கியுள்ளதால் கருவாடு உற்பத்தி பாதிக்கப்பட்டு, கருவாடு கிலோ ரூ.200 வரை உயர்வு.

-  பெரம்பலூர் மாவட்டம், லப்பைக்குடிகாடு ஆரம்ப சுகாதார நிலையத்தில் தடுப்பூசி போடப்பட்டது. அதற்குப்பிறகு அர்ஜுன் என்னும் 15 வயது மாணவனுக்கு கை வீங்கத் தொடங்கி,புண்ணும் ஏற்பட்டது. அதற்காக திருச்சி அரசு மருத்துவமனையில் அறுவை சிகிச்சை செய்யப்பட்டு வீடு திரும்பினார். தடுப்பூசி போட்டுக்கொண்ட மற்ற மாணவர்களுக்கு எந்த பாதிப்பும் இல்லை.

-  44 வயதான பெட்ரோல் பங்க் ஊழியர் எம்.எல்.ஏ.-விடம் பெண் பார்க்க உதவி கேட்கிறார். "நான் உங்களுக்கு வாக்களித்துள்ளேன், வாக்களித்ததால் உதவி கேட்பதாக அந்த ஊழியர் தெரிவிக்க, நிச்சயமாக என எம்எல்ஏ உறுதியளித்தார்.

-  நாட்டில் வயதானவர்களைவிட இளைஞர்களின் எண்ணிக்கை குறைந்து வருவதால் எல்லோரும் அதிக பிள்ளைகளை பெற்றுக் கொள்ளுங்கள் என ஆந்திர முதல்வர் சந்திரபாபு நாயுடு வேண்டுகோள். 

-  தீபாவளிக்கு 700 புதிய ரக சேலைகள் கோ-ஆப்டெக்ஸ் அறிமுகம்.

அடுத்த வாரம் சந்திக்கலாம். வாசகர்களுக்கு இனிய அட்வான்ஸ் தீபாவளி நல்வாழ்த்துகள்!

====================================================================================================

இணையத்தில் ரசித்தது...

Crowded Ship

The RMS Queen Elizabeth sails into New York, filled with American service members returning from Europe after WWII. Launched in 1938 from Clydebank, Scotland, this majestic liner boasted luxurious accommodations and was the world’s largest passenger ship at the time.  During the war, it was repurposed as a troopship capable of transporting up to 15,000 troops across the Atlantic. Known for its speed and safety, Queen Elizabeth completed numerous missions, playing a crucial role in the Allied war effort. The vessel John Brown & Company built was named after the Queen Mother, the wife of King George VI.

=====================================================================================================================

இந்த தீபாவளிக்கு 

வரமாட்டார்கள் 

மகனும் பேரனும்.. 

கலங்கிப் போயிருக்கிறாள் 

காப்பகத்தில் 

தனியாய் இருக்கும் 

தாய்.

உடன் இருந்த கணவன் 

காலமாகி விட்டதால் 

தீபாவளி கிடையாது 

இந்த வருடம் 

அடுத்த தீபாவளி வரை 

காத்திருக்க வேண்டும் 

கண்ணில் நிற்கும் 

உறவுகளைக் காண 

=========================================================================================

படித்ததைப் பகிர்வது.....

எஸ்.ரா. மனைவி சந்திரபிரபா ஒரு நேர்காணலில் சொன்னது

நீங்கள் தான் அவரது துணையெழுத்தா?

ஆனந்த விகடனில் அவர் எழுத ஆரம்பிச்சது தான், எழுத்துலகில் அவருக்கு கிடைச்ச பெரிய பிரேக். ஆனந்த விகடனில் மாணவ பத்திரிகையாளராக வேலை செய்தார் என்பதால் விகடன் எம்.டி பாலசுப்ரமணியத்திற்கு இவர் மீது தனி ப்ரியம். ஆசிரியர் அசோகன், கண்ணன் எல்லோரும் அவரது நண்பர்கள். ஆகவே துணையெழுத்தை தொடராக எழுத சொன்னார்கள். அவர் முதலில் தயக்கம் காட்டினார். நான் தான் உற்சாகம் கொடுத்தேன். துணையெழுத்தை வாசகர்கள் கொண்டாடினார்கள்.

அதுவே அவருக்கான பரந்த வாசகர்களை உருவாக்கியது. வாரவாரம் துணையெழுத்தை படித்துவிட்டு போனில் பாராட்டுகிறவர்கள் ஏராளம். நிறைய பேர் வீட்டிற்கே தேடி வருவார்கள். அப்போது கே.கே.நகரில் இருந்தோம். துணையெழுத்தை தொடர்ந்து கதாவிலாசம், தேசாந்திரினு அவரது தொடர்கள் பெரிய வரவேற்பை பெற்றன. விகடனில் அதிக தொடர்கள் எழுதியது இவர் ஒருவர் தான். அதுவும் எனது இந்தியா வந்த போது நூறு வாரங்களுக்கும் மேலாக எழுதினார். அந்த புத்தகத்தை ஐ.ஏ.எஸ் படிக்கிற மாணவர்கள் பாடமாக படிக்கிறார்கள் என்பதை கேட்க சந்தோஷமாக இருக்கிறது

அவரின் பயணத்தில் உங்களின் பங்கு...

அவர் எவ்வளவு கஷ்டம் வந்தாலும் பிள்ளைங்களையோ என்னையோ விட்டுக் கொடுக்கவே மாட்டார். நாங்களும் அப்படித்தான். குடும்ப பொறுப்பை நான் முழுமையா எடுத்துக்கிட்டேன். அதனால அவரால் சுதந்திரமா எழுத முடிந்தது. அவர் இலக்கியத்தை நேசித்ததை போல நாங்க இவரை நேசித்தோம். எழுத வேண்டியதை முழுமையாக திட்டமிட்டு பெரிய ஷெட்யூல் போட்டு வேலையை செய்து முடிப்பார். எழுத்து எழுத்துனு மட்டுமே நினைப்பு. ஒரு நாள் கூட சும்மா இருக்கமாட்டார். வீட்டை பார்த்துக் கொள்வது எளிதானதில்லை.

ஆனால் அவர் அதை புரிந்து கொண்டிருந்தார். இப்போது அவரது புத்தகங்களை வெளியிட ஒரு பதிப்பகம் ஆரம்பித்துவிட்டேன். டால்ஸ்டாயின் மனைவி இப்படி செய்ததாக ஒருமுறை சொன்னார். அந்த உத்வேகம் எனக்கும் தொற்றிக் கொண்டது. தேசாந்திரி பதிப்பகம் ஆரம்பித்த பிறகு எனக்கு அதை கவனித்துக் கொள்வது கூடுதல் பணியாக ஆனது. ஆனால் சந்தோஷமாக அதை கவனித்துக் கொள்ள துவங்கினேன். இப்போது அது எஸ்.ராவின் நூறு புத்தகங்களை வெளியிட்டிருக்கிறது. வரக்கூடிய ஆண்டுகளில் பலரது புத்தகங்களையும் வெளியிட திட்டமிட்டு இருக்கிறோம்.

இவர் எழுதியதில் பிடிச்சது....

இவர் எழுதியதில் பிடிச்ச புத்தகம் ‘துயில்’ என்ற நாவல். அதில் மனிதர்கள் மீதான அன்பையும் கருணையையும் எப்படி வெளிப்படுத்துவதுன்னு ஒவ்வொரு கதாபாத்திரம் மூலம் அழகா வெளிப்படுத்தி இருப்பார். அன்பை உங்க பெற்றோர், உடன் பிறந்தவர்கள், உறவினர்கள், சுற்றி இருப்பவர்களிடம் பகிரலாம். ஆனால் அதையும் தாண்டி உலகத்தில் இருக்கும் அத்தனை பேரிடமும் இரு கை நீட்டி பகிர்வது எப்படின்னு இதில் விளக்கி இருப்பார். ஒவ்வொரு கதாபாத்திரமும் ஒருவித அன்பினை வெளிப்படுத்தும்.

சென்னை வாழ்க்கை எப்படியிருக்கிறது?

திருமணமாகி வந்தபுதிதில் மிரட்சியாக இருந்தது. இப்போது பழகிவிட்டது. நிறைய நண்பர்கள் இருக்கிறார்கள். நானே புதியவர்களுடன் பழகி நட்பை வளர்த்துக் கொள்வேன். வேலை வேலை என எல்லோரும் ஓடிக் கொண்டேயிருக்கிறார்கள். பரபரப்பு. வாகன நெருக்கடி. அதை நினைத்தால் பதற்றமாகத்தான் இருக்கிறது.

கணவராக எஸ்.ரா....

மிகவும் அன்பானவர். வீட்டில் அவ்வளவு கஷ்டம் இருந்த போதிலும் அதை வெளியே காண்பித்துக் கொள்ளமாட்டார். எங்க நாங்க சங்கடப்படுவோமோன்னு தனக்குள் அந்த மனஉளைச்சலை ஏற்றிக் கொண்டார். எழுத ஆரம்பிச்சிட்டா தன்னையே மறந்திடுவார். அந்த சமயத்தில் என்னங்க, எங்களையும் கொஞ்சம் கவனியுங்கன்னு சொன்னா போதும், எல்லாத்தையும் மூட்டைக்கட்டி வச்சிட்டு, குடும்பத்தோடு டூர் கிளம்பிடுவோம். கார் பயணம் என்பதால், எல்லாரும் பேசிக்கொண்டு, விரும்பிய பாடல்களை கேட்டுக்கொண்டு, நினைக்கும் இடத்தில் சாப்பிட்டு செல்லும் போது அந்த சுகமே தனிதான். இரண்டு பையன்கள். மூத்தவன் ஹரி பிரசாத் அண்ணா பல்கலைக்கழகத்தில் மீடியா சயின்ஸ் படித்து முடித்து விட்டான்.

அடுத்து சினிமா இயக்கப் போகிறான். அது தான் அவனது கனவு. போன வருஷம் பெண்கள் கிரிக்கெட் பற்றி க்ளீன் போல்ட் என ஒரு குறும்படம் எடுத்தான். நல்ல வரவேற்பு கிடைச்சது. இப்போது தேசாந்திரி பதிப்பக வேலைகளையும் சேர்த்து பார்த்துக் கொள்கிறான். அடுத்தவன் ஆகாஷ். +1 படிக்கிறான். அவனுக்கு இசையில் ஆர்வம் உண்டு. கீபோர்ட் படித்தான். வீட்டில் உலகின் சிறந்த படங்களை எல்லோரும் ஒன்றாக உட்கார்ந்து பார்க்கிறோம். அரசியல், சமூகம். இலக்கியம்னு எல்லா விஷயங்களையும் ஒண்ணா உட்கார்ந்து பேசுவோம். அவரோடு ஜப்பானுக்கு போய்வந்தேன். இலங்கைக்கு போய் வந்தேன். ராஜஸ்தான் முழுவதும் சுற்றினோம். அதெல்லாம் மறக்க முடியாத அனுபவம்’’ என்றார் சந்திரபிரபா

நன்றி: குங்குமம், நன்றி R. கந்தசாமி ஸார்.

==================================================================================================

பொக்கிஷம்  :  

சத்தியமா கட்டம் எல்லாம் கட்டி ஜோக்குன்னுதான் போட்டிருக்காங்க....

நகைசீட்டு மாதிரி புத்தகசீட்டு