வெள்ளி வீடியோ : எந்த வேதனையும் மாறும் மேகத்தை போல : தொடர்கதை 2

வாணி ஜெயராம் குரலில்,

எம்  எஸ் வி இசையில்,

கண்ணதாசன் பாடல்.

அபூர்வராகங்கள்.   1975 இல் வெளிவந்த திரைப்படம்.  கமல் படம், ஸ்ரீவித்யா படம் என்றெல்லாம் சொல்லமுடியாது!  பாலச்சந்தர் படம்.

இந்தப்படத்தின் "என்னுடைய அப்பா...   யாருக்கு மாமனாரோ..." புதிர் ரொம்பப் பிரபலம் அப்போது.

நாகேஷின் பாத்திரத்தை ரொம்ப ரசித்தேன் அப்போது.  அதிராவின் அங்கிள் கண்ணதாசன் ஒரு காட்சியில் வருவார்!

படம் பற்றிய சுவாரஸ்யமான தகவல்கள் நிறைய உண்டு.  அவற்றை நீங்கள் விரும்பினால் இங்கு படிக்கலாம்.

வரிகளை மிக ரசிக்கலாம்.  செம பாடல்.   அழகிய ஸ்ரீவித்யா.

ஏழு ஸ்வரங்களுக்குள் எத்தனை பாடல்

ஏழு ஸ்வரங்களுக்குள் எத்தனை பாடல்

இதய சுரங்கத்துள் எத்தனை கேள்வி

ஏழு ஸ்வரங்களுக்குள் எத்தனை பாடல்

இதய சுரங்கத்துள் எத்தனை கேள்வி

காணும் மனிதருக்குள் எத்தனை சலனம்

காணும் மனிதருக்குள் எத்தனை சலனம் - வெறும்

கற்பனை சந்தோஷத்தில் அவனது கவனம்

கற்பனை சந்தோஷத்தில் அவனது கவனம்

ஏழு ஸ்வரங்களுக்குள் எத்தனை பாடல்

காலை எழுந்தவுடன் நாளைய கேள்வி

காலை எழுந்தவுடன் நாளைய கேள்வி - அது

கையில் கிடைத்த பின்னும் துடிக்குது ஆவி

கையில் கிடைத்த பின்னும் துடிக்குது ஆவி

ஏன் என்ற கேள்வி ஒன்று என்றைக்கும் தங்கும்

ஏன் என்ற கேள்வி ஒன்று என்றைக்கும் தங்கும் - மனிதன்

இன்ப துன்பம் எதிலும் கேள்விதான் மிஞ்சும்

இன்ப துன்பம் எதிலும் கேள்விதான் மிஞ்சும்

ஏழு ஸ்வரங்களுக்குள் எத்தனை பாடல்

எனக்காக நீ அழுதால் இயற்கையில் நடக்கும்

எனக்காக நீ அழுதால் இயற்கையில் நடக்கும்

நீ எனக்காக உணவு உண்டு எப்படி நடக்கும்

நமக்கென்று பூமியிலே கடமைகள் உண்டு - அதை

நமக்காக நம் கையால் செய்வது நன்று

நமக்காக நம் கையால் செய்வது நன்று

ஏழு ஸ்வரங்களுக்குள் எத்தனை பாடல்

ஆரம்பத்தில் பிறப்பும் உன் கையில் இல்லை

ஆரம்பத்தில் பிறப்பும் உன் கையில் இல்லை - என்றும்

அடுத்தடுத்த நடப்பும் உன் கையில் இல்லை

பாதை வகுத்த பின்பு பயந்தென்ன லாபம்

பாதை வகுத்த பின்பு பயந்தென்ன லாபம்

அதில் பயணம் நடத்திவிடு மறைந்திடும் பாவம்

பயணம் நடத்திவிடு மறைந்திடும் பாவம்

ஏழு ஸ்வரங்களுக்குள் எத்தனை பாடல்

நாளை பொழுது என்றும் நமக்கென வாழ்க - அதை

நடத்த ஒருவன் உண்டு கோவிலில் காண்க

நாளை பொழுது என்றும் நமக்கென வாழ்க - அதை

நடத்த ஒருவன் உண்டு கோவிலில் காண்க

வேளை பிறக்கும் என்று நம்பிக்கை கொள்க

வேளை பிறக்கும் என்று நம்பிக்கை கொள்க - எந்த

வேதனையும் மாறும் மேகத்தை போல

வேதனையும் மாறும் மேகத்தை போல

ஏழு ஸ்வரங்களுக்குள் எத்தனை பாடல்

இதய சுரங்கத்துள் எத்தனை கேள்வி

காணும் மனிதருக்குள் எத்தனை சலனம் - வெறும்

கற்பனை சந்தோஷத்தில் அவனது கவனம்

ஏழு ஸ்வரங்களுக்குள் எத்தனை பாடல்

=========================================================================================

நீயும் நானும் சேர்ந்தே செல்லும் நேரமே

- - - - - - - - - - - - - - - - -

ஸ்ருதி  :

சேலத்தில் கச்சேரி. அப்புறம் கோயில் கச்சேரி. இரண்டிற்கும் ப்ராக்டிஸ் செய்ய வேண்டும். ஆனால், என்னவோ இன்னது என்று சொல்ல முடியாத ஒரு டல்னெஸ். சமீப காலமாகத்தான். என்னென்னவோ எண்ணங்கள் வந்து அலைமோதியது. திருமணத்திற்கு முன் கொஞ்சம் யோசித்திருக்கலாமோ?

இரு வருடங்களுக்கு முன் டிசம்பர் கச்சேரி சீஸன். எல்லோரும் என் கச்சேரியை சிலாகித்து எழுதியிருக்க, முதல்தடவை என் கச்சேரியை அத்தனை விமர்சனம் செய்திருந்தார் ஒருவர் “துலா” என்ற பெயரில். நான் அன்று பாடிய சுத்த தன்யாசியில் ஆபேரி எட்டிப் பார்த்ததாம். ரொம்பவே விமர்சித்து ஏழு மணி ஸ்லாட்டுக்கு நிறைய உழைக்கணும் என்று பஞ்ச் வேறு போட்டிருந்தார்!

வயது முதிர்ந்தவர். இசையில் மிகுந்த அறிவும், நுணுக்கங்களும் தெரிந்த அனுபவசாலி போலும். அதான் கீறு கீறுன்னு நக்கீரர் போல என் பாட்டை மட்டுமல்ல பல சீனியர் வித்வான்களையும்தான் கிழித்திருந்தார். சீனியர்களையே போட்டுத் தாக்கிய போது வளர்ந்து வரும் என்னை விமர்சித்ததில் வியப்பில்லைதான் என்று நினைத்து அவர் யாரென்று தெரிந்து கொண்டு சந்திக்க நினைத்தேன். நுணுக்கங்களைத் தெரிந்து கொள்ளத்தான். யாரென்று என்னால் அறிய முடியவில்லை. நான் மிகவும் பிஸியாகவும் இருந்ததால் மறந்தும் போனேன்..

மேட்ரிமோனியலில் என் விவரங்களைக் கொடுத்திருந்தற்கு வந்த ப்ரொஃபைல்ஸ் என்று பொருந்திய சிலவற்றை அப்பா என்னிடம் காட்ட, கச்சேரி, ப்ராக்டீஸ் என்று இருக்கும் என்னைப் புரிந்து கொள்பவன் வந்தால்தானே நல்லது? ஈகோ மிகுந்த ஆணாக இருந்தால் எப்படி செட் ஆகும்? என்ற தயக்கத்துடன் பார்த்த போது ஃபோட்டோ இல்லாத ஒரு ப்ரொஃபைல் ஈர்த்தது. ஷ்ரவண். நல்ல வேலை, நல்ல சம்பளம் அதை விட இசையில் மிகுந்த ஆர்வம். பாடவும் செய்வான், கீ போர்ட் வாசிப்பான் என்ற குறிப்புகள் ஸ்வாரஸ்யமாகப்படவே அந்த ப்ரொஃபைலுக்கு ஓகே என்றேன். பெரியவர்கள் பேசிக் கொண்டார்கள். அவர்களுக்குச் சம்மதம். நாங்கள் இருவரும்தான் சந்திக்க வேண்டும்.

டிசம்பர் சீசன் தொடர்க் கச்சேரிகள் முடிந்து ஆங்காங்கே சில கச்சேரிகள் என்று வந்த சமயத்தில் ஒரு சபாவில் கச்சேரி முடித்ததும் என் அருகில்,

“கச்சேரி நன்னா இருந்ததுமா.” என்ற குரல்.

“தாங்க்யூ”

“ஸ்ருதி இது ஷ்ரவண், இவா ஷ்ரவணோட அம்மா அப்பா. உன்னைப் பார்க்கத்தான் வந்திருக்கா.” என்று அப்பா அறிமுகம் செய்து வைத்தார்.

எனக்கு ஆச்சரியம்! அந்த ப்ரொஃபைல்…ஷ்ரவண்…!

“நாங்க பேசிண்டாச்சு. நீங்க ரெண்டு பேரும்தான் பேசி ஒங்க முடிவை சொல்ல ணும். இங்க இல்லாம வெளில எங்கியாவது கூட போய் நீங்க பேசிக்கலாம்…..நீ ஃப்ரீதானேம்மா” என்று ஷ்ரவனின் பெற்றோர் கேட்க,

“இப்படியே வேண்டாம். நீங்க காஷுவல் ட்ரெஸ் சேஞ்ஜ் பண்ணிட்டு வந்தா கம்ஃபர்டபிளா இருக்குமேனு பார்க்கறேன்” என்று அன்று ஷ்ரவண் சொன்னது ஒரு வேளை நான் ஒரு பாடகியாக அவனோடு வெளியில் போவது அவனுக்கு அப்பவே பிடிக்கலையோ? அதை அவன் அப்பவே வெளிப்படையாகச் சொல்லியிருக்கலாமே.

வெளியில் சந்தித்தோம். ஒரு காஃபி ஷாப்பில்.

“ஹாய்!” என்ற சில பரிமாற்றங்களுக்குப் பிறகு அவன்தான் சட்டென்று தொடங்கினான்.

“என்ன காஃபி வேணும்? ஹாட் ஆர் கோல்ட்?”

“ம் ஹாட் காஃபி சர்க்கரை கம்மியா….” அவன் தனக்குக் கூல் காஃபி ஆர்டர் செய்தான்.

“பெயருக்கேத்தாப்போல ஸ்ருதி சுத்தமா பாடறீங்க”

“தாங்க்ஸ்”

“நீங்க ராகம் தானம் பல்லவி பாடறதுல எக்ஸ்பெர்ட்டா இருக்கீங்க. அதுவும் பெரும்பாலும் ஆர்டிபில ராகமாலிகையாகவேதான் பாடறீங்க. ப்ரில்லியன்ட். இன்னிக்குக் கூட ஆர்டிபி கரகரப்பிரியா அண்ட் ரசிகப்பிரியால பாடி எல்லாரையும் கட்டிப் போட்டு ரசிகர்களாக்கிட்டீங்க.”

“ஓ! தாங்கஸ் அகேய்ன்” என்ற எனக்கு……அப்படினா இவன் எனது முந்தைய கச்சேரிகளையும் கேட்டிருக்கிறான் என்று தோன்ற “அப்ப நீங்க என் கச்சேரிகளைத் தொடர்ந்து கேக்கறீங்களா?”

“அப்படியும் சொல்லலாம்” என்றவன் தொடர்ந்து, “செங்கல்பட்டு ரங்கநாதன்கிட்ட கத்துக்கிட்டீங்களோ? லயத்துக்கு ரொம்ப முக்கியத்துவம் கொடுப்பார். உங்க பாட்டுல நல்ல லயம் இருக்கு. லயம் ஒரு ராகத்தோட அழகைக் கொடுக்கும் எல்லா ராகத்தையும் எல்லா லயத்துலயும் பாட முடியாதே. அவர் நல்ல குருவா இருந்தார் பலருக்கும்…!”

“தாங்க்யூ ஃபார் யுவர் குட் வேர்ட்ஸ். ஆமா பல்லவி பாடறதுக்கு அவர்தான் குரு. ஐ மிஸ் ஹிம் எ லாட். அது சரி அவரை உங்களுக்குப் பெர்சனலா தெரியுமா!”

“ம்ம்ம் யா. நான் அவர்கிட்ட கொஞ்ச காலம் கத்துக்கிட்டேன்..” என்று அவன் அடுத்து சொல்வதற்குள்.

“என்னது அவர் உங்களுக்கும் குருவா! ஓ! பல்லவிக்கு மட்டுமா இல்ல….ரெகுலர் குருவா?”

“அட்வான்ஸ்டா கத்துக்க, பல்லவி எல்லாத்துக்கும். அதிருக்கட்டும், உங்களைப் பத்தி நல்ல விமர்சனங்கள் வருதே! அடுத்த வருஷம் மெயின் ஸ்லாட் கிடைச்சிரும் போல. வாழ்த்துகள்”

“ம்..தெரியலை. பார்க்கலாம். ஆனா, துலா ன்னு ஒருத்தர் க்ரிட்டிசைஸ் பண்ணி விமர்சிச்சிருந்தார். எங்களுக்குள்ள கொஞ்சம் விவாதங்கள் வந்துது. ஆனா அவர் ரொம்ப வித்வத் உள்ளவர்னு தெரியறது. ஸோ அவரை எப்படியாவது மீட் பண்ணனும்…..”

ஓ யெஸ் மீட் பண்ணலாமே!” ஷ்ரவணால் சிரிப்பை அடக்க முடியவில்லை.

“ஏன் சிரிக்கறீங்க? இந்த துலா கொஞ்சம் அப்போதைய சுப்புடுனு தோணித்தோ?”

“அப்ப நான் இப்போதைய சுப்புடுன்றீங்க நீங்க?”

ஒரு நிமிடம் வியப்பில் வாயடைத்துப் போனேன். “ஓ மை காட்! இஸ் இட்? அப்ப நீங்கதான் துலா? உண்மையாவா?”

“யெஸ்!”

இந்தச் சிறிய வயதில் பெரிய அனுபவ இசையறிஞர் போல இத்தனை நுணுக்கமான இசை அறிவா என்று. பார்க்க மட்டுமல்ல இசை அறிவிலும் சித் ஸ்ரீராம் போல இருக்கானோ? அவனிடம் ஏதோ ஒன்று என்னைக் கவர்ந்தது. என் எண்ணத்தை நினைத்து எனக்கே வியப்பாக இருந்தது அப்போது....

“நான் இன்னிக்கு உங்க கச்சேரிக்குக் கொஞ்சம் லேட். அம்மா அப்பா முதல்லேயே வந்துட்டாங்க. நீங்க “எப்ப வருவாரோ எந்தன் கலி தீர்க்க” ஆரம்பிக்கற சமயத்துல நான் ஹாலுக்குள்ள என்ட்ரி. என்ன? சினிமால வர ஹீரோ என்ட்ரி சீன் மாதிரி இருக்கோ?” என்று சிரித்தான்.

“நான் இன்னும் வாரணமாயிரம் பாடவே தொடங்கலையே”

“ஓ! ஸாரி. இட்ஸ் ஓகே!” என்று சொன்னாலும் அவன் தன்னைப் பற்றிச் சொன்னான்.

“நீங்கதான் எல்லாரையும் நக்கீரர் போலக் கீறுறீங்களே என் பாட்டையும் தான்…” என்று சொல்லிச் சிரித்தேன்.

“ஹா ஹா…… இன்னிக்கு நீங்க சாரங்காவையும், ஹமீர்கல்யாணியையும் நல்லா ஹேண்டில் பண்ணீங்க. ஒண்ணுக்குள்ள ஒண்ணு நுழையவிடாம….”

“ஓ! தாங்க்யூ….உங்க விமர்சனத்துலருந்து தப்பிச்சேன்…”

“ஹா ஹா….ஸாரி! நீங்க உங்க திறமைக்கு இன்னும் மேல வரலாம்…. வரணும்னு தோணித்து. ஸோ….ம்ம்ம் இன்னொன்னும் சொல்லிடறேன். சப்போஸ் நீங்க ஓகே சொல்லிட்டீங்கன்னா நான் உங்க கச்சேரி பத்தி பத்திரிகைல விமர்சிக்க மாட்டேன். ஆனா வீட்டுல விமர்சனம் தொடரும்…ஓகேதானே?.”

“ஷ்யூர்! நல்லதுதானே! அது என்னை இம்ப்ரூவ் பண்ணிக்க உதவுமே”

நானும் எனது இசைக்கனவுகள்,  இசையில் சில ஆராய்ச்சிகள் செய்ய விரும்புவது எல்லாமும் சொன்னேன். இந்திய இசை, உலக இசை என்று பேசினோம். நேரம் சென்றதே தெரியவில்லை. 

அப்போதுதான் எனக்கு உறைத்தது. நான் என்னை அறியாமலேயே ஈர்க்கப்பட்டு அவன் “வீட்டில் விமர்சனம் தொடரும் ஓகேயா” என்றதற்கு “ஷ்யூர்” என்று சொல்லியது நான் திருமணத்திற்கு ஓகே சொன்னது போலத்தானே!

ஒரு சுபயோக சுப தினத்தில் நாதஸ்வரத்தின் ஆனந்தபைரவியில், தவிலின் தாள, லயத்துடன் கல்யாணியும், மோகனமும் இணைந்து மோகனகல்யாணியாய் ஆனது எங்கள் வாழ்க்கை. ரிசப்ஷனுக்கு நிறைய விஐபிக்கள், பெரிய பெரிய பாடகர்கள், டிவிக்காரர்கள் என்று வந்து பிரபலமான டிவியில் கூட எங்கள் கல்யாணம் பேசப்பட்டது……

ஆனால்? கொஞ்சம் யோசித்திருக்கலாமோ என்ற எண்ணம் ஏனோ வருகிறது. வேண்டாம் நெகட்டிவ் சிந்தனை. கச்சேரிக்குப் ப்ராக்டீஸ் செய்ய வேண்டும். சிந்தனைகளைப் புறம் தள்ளினேன்.

------மீட்டல் தொடரும்....