"திங்க"க்கிழமை : பருப்புருண்டைக் குழம்பு - மனோ சாமிநாதன் ரெஸிபி

 பருப்பு உருண்டைக்குழம்பு

மிகப் பழமையான குழம்பு இது. ஒவ்வொருத்தரும் ஒவ்வொரு மாதிரி செய்வார்கள்.  கிராமத்துக்குழம்பு என்று சொல்லலாம். சுடச்சுட சாதத்துக்கு ஊற்றி சாப்பிடலாம். இட்லி, தோசைக்கும் மிகச் சுவையான பக்கத்துணை. இதைச் செய்த அன்றே சாப்பிடுவதைக்காட்டிலும் மறு நாள் காலை பழைய சோற்றில் தண்ணீரை வடித்து உப்பும் கட்டித்தயிரும் போட்டுப்பிசைந்து
இந்த உருண்டைகளையும் குழம்பையும் தொட்டுக்கொண்டு சாப்பிடுவது அத்தனை ருசி! கொதிக்கும் குழம்பில் உருண்டைகளைப்போட்டு வேக வைப்பது ஒரு கலை. ரொம்ப பேர் முதலில் ஆவியில் வேக வைத்து எடுத்துக்கொன்டு பிறகு குழம்பு கொதிக்கும்போது போடுவார்கள். அது
அத்தனை சுவையாக இருக்காது. என் மாமியார், அம்மா இருவருமே தேங்காய்த்துருவலை உருண்டையில் சேர்ப்பார்கள். சமயத்தில் கெட்டுப்போக வாய்ப்பு என்பதால் நான் சேர்ப்பதில்லை. குழம்புக்கு உபயோகித்த உருண்டைகள் போக, மீதமுள்ள உருண்டைகளை வடைகளாகத்தட்டி எண்ணெயில் போட்டெடுப்பது வழக்கம். தொட்டுக்கொள்ள இந்த
வடைகளும் பொரித்த அப்பளங்களும் மட்டும் தான்!. என் மாமியார் வீட்டில் இந்த வடைகளையும் குழம்பில் போடுவார்க‌ள். இனி சமையலுக்குச் செல்லலாம்!

பருப்பு உருண்டைக்குழம்பு

தேவையான பொருள்கள்:

உருண்டைக்கு:

துவரம்பருப்பு 2 கப்

கடலைப்பருப்பு 2 கைப்பிடி

சோம்பு 11/2 ஸ்பூன்

மெல்லியதாக அரிந்த வெங்காயம் 2

சிறு துண்டுகளாக நறுக்கிய பூண்டிதழ்கள் 2 மேசைக்கரண்டி

கறிவேப்பிலை,

அரிந்த கொத்தமல்லி 2 மேசைக்கரண்டி

மிளகாய்த்தூள் 1 ஸ்பூன்

மஞ்சள் தூள் அரை ஸ்பூன்

தேவையான உப்பு

குழம்பிற்கு:

புளி 2 பெரிய எலுமிச்சம்பழம் அளவு

மிளகாய்த்தூள் 2 மேசைக்கரண்டி குவியலாக‌

கொத்தமல்லித்தூள் 3 மேசைக்கரண்டி குவியலாக‌

மஞ்சள் தூள் அரை ஸ்பூன்

தேவையான உப்பும் நல்லெண்ணையும்

வெந்தயப்பொடி 2 ஸ்பூன்

சின்ன வெங்காயம் 2 கைப்பிடி

மசித்த தக்காளி 1 க‌ப்

கறிவேப்பிலை 2 ஆர்க்

முருங்கைக்காய் 2

பெருங்காயத்தூள் அரை ஸ்பூன்

செய்முறை:

முதலில் உருண்டைக்கு வரலாம். இரண்டு பருப்பு வகைக‌ளையும் போதுமான நீரில் 1 மணி நேரம் ஊற வைக்கவும்.பின் நீரை வடித்து உப்பு, சோம்பு சேர்த்து வடைக்கு அரைப்பது போல கொரகொரப்பாக அரைத்துக்கொள்ளவும். அதில் ஒரு கைப்பிடி மட்டும் ஒன்று பாதியாக அரைக்கவும். மாவு முழுவதையும் ஒரு பாத்திரத்தில் போட்டு தூள்கள், வெங்காயம், பூண்டு, கறிவேப்பிலை, மல்லி சேர்த்து நன்கு பிசைந்து பெரிய எலுமிச்சம்பழ அளவு உருண்டைகள் உருட்டி வைக்கவும்.

வடைகளாக பொரித்து எடுப்பதற்கு சில உருண்டைகளை எடுத்து வைத்துக்கொள்ளவும்.

புளியை போதுமான சுடுநீரில் ஊற வைத்து கரைத்து வடிகட்டி வைத்துக்கொள்ளவும்.ஒரு அகன்ற வாணலியில் நல்லெண்ணையை சற்று தாராளமாக ஊற்றி சூடானதும் சின்ன வெங்காயங்களைப்போட்டு வதக்கவும். வெங்காயம் வதங்கியதும் தக்காளி, மஞ்சள் தூள், கறிவேப்பிலை, பெருங்காயம் சேர்த்து நன்கு குழைந்து மேலே எண்ணெய் தெளியும் வரை வதக்கவும்.  வெந்தயப்பொடியை சேர்த்து 2 நிமிடம் வதக்கவும். புளி நீர், தூள்கள் உப்பு சேர்த்து
தேவையான நீர் சேர்த்துக் கலக்கவும். குழம்பு சற்று தண்ணீராகவே இருப்பது நல்லது.

உருண்டைகள் போடப் போட குழம்பு கெட்டியாகிக்கொண்டே வரும். இப்போது
குழம்புக்கரைசலில் முருங்கைக்காய்த்துண்டுகளைப்போட்டு கொதிக்க விடவும். இரண்டு கொதி கொதித்ததும் நான்கு உருண்டைகளைப்போடவும்.

சிறிது நேரத்தில் அவை வெந்து மேலே வந்து மிதக்கும். அப்போது மறுபடியும் நான்கு உருண்டைகளைப்போடவும். இப்படியாக உருண்டைகள் முழுவதும் போட்டு அவை வெந்து வருவதற்குள் முருங்கைக்காய் துண்டுகளும் வெந்து குழம்பும் பதமாக எடுத்து ஊற்றும் தன்மைக்கு வந்திருக்கும்.

அடுப்பை சிம்மில் வைத்து 1 கரண்டி நல்லெண்ணெய் ஊற்றி ஐந்து நிமிடம் வைத்திருக்கவும்.  சுவையான பருப்பு உருண்டைக்குழம்பு தயார்!

இப்போது வடைகளுக்கான உருண்டைகளை வடைகளாககத் தட்டி எண்ணெயில் பொரித்தெடுக்கவும்.