ஒரு கோவிலுக்குச் செல்லும் பொழுது அதற்கு அருகில் இருக்கும் ..

 

நெல்லைத்தமிழன் : 

1. கட்சி சார்பானவர்கள், பத்திரிகையாளர் என்ற போர்வையில் வளைய வருவது கேலிக்கிடமாக இல்லையா? 

# கட்சிகள் தம் சார்பில் பத்திரிக்கைகள் , தொலைக்காட்சி ஆகியவற்றை நடத்துவது இந்தக் கால வழக்கமாகிவிட்டது . இந்த மாதிரியான ஊடகங்களில் உண்மையான செய்திகள் உலா வராது என்பதைப் புரிந்து கொள்ளும் பக்குவம் பார்வையாளர்களுக்கும் , வாசகர்களுக்கும் இருக்க வேண்டும் .

& அதைக் கூட புரிந்துகொள்ளலாம் அல்லது ஏற்றுக் கொள்ளலாம் - ஆனால் ஒரு சானலில் 'மயில்சாமி - பொருளாதார நிபுணர் ' என்று போட்டார்களே - அதைத்தான் இப்போதும் நினைத்தால் சிரிப்பு வருகின்றது! 

2. சாப்பாடே பிடிக்க மாட்டேன் என்கிறது (இனிப்புகளைத் தவிர). என்ன காரணமாக இருக்கும்?

# வயிறு மந்தமாக பசி குறைந்து போவதற்கு சில காரணங்கள் உண்டு . இவற்றுக்கு உணவில் இஞ்சி , மிளகு , சீரகம் , ஓமம்,  அதிகம் சேர்த்துக் கொள்வதும் , சாப்பிட்ட பிறகு அஷ்ட சூரணம் போன்ற ஆயுர்வேதப் பொடிகளை எடுத்துக் கொள்வது நல்லது . வெறும் சுக்குப்பொடியில் வெல்லப் பொடி சேர்த்து வைத்துக்கொண்டு அதில் ஒரு சுண்டைக்காய் அளவு உட்கொண்டாலும்  நல்ல குணம் தெரியும் . வாரம் ஒரு முறை அல்லது மாதம் இருமுறை இரண்டு வேளை உணவை தவிர்த்து வழக்கப் படுத்திக் கொண்டால் ஜீரண சக்தி அதிகம் ஆகும்.

இனிப்பு அதிகம் சேர்த்துக் கொள்பவர்களுக்கு குடலில் பூச்சிகள் வர வாய்ப்பு உண்டு அதையும் சரிபார்த்துக் கொள்ள வேண்டும் .

3. மதிப்பெண் குறைவாகப் பெற்றதால், ஆசிரியர்களை மாணவர்கள் மரத்தில் கட்டிவைத்து அடித்தனர். இது ஜார்கண்டில். இந்தச் செய்தி பற்றி உங்கள் அபிப்ராயம் என்ன? இது தமிழகத்திலும் வருமா?

# இது விபரீத புத்தி. தமிழகத்தில் வராது, வரக்கூடாது, வரவேண்டாம்.

& நேற்றுதான் ஆசிரியர்கள் தினம் கொண்டாடினோம். இன்றைக்கு இப்படி ஒரு கேள்விக்கு பதில் எழுத்தவேண்டுமா ! சிவ சிவா !! (பதில் எழுதிய நாள் 6.9.22) 

4. பிளாக்குகளில் எழுதுபவர்கள் ஏன் குறைந்துவிட்டனர்? அதைவிட முகநூல் நல்லா ரீச் ஆகுதா இல்லை மற்றவர்கள் படித்து என்ன பயன், லைக்ஸ் க்ளிக்கினால் போதும் என்று நினைத்துவிட்டார்களா?

# இதற்கு பதில் சொல்ல நம்மால் இயலாது. படிப்பவர்களை ஈர்த்து வைத்துக் கொள்வதும் புதியவர்களைக் கவர்ந்து இழுப்பதும் விரும்பத்தக்கதுதான்.  ஆனால் இயலவில்லை. எங்கள் குடும்பத்தில் கூட பலர் எங்கள் பிளாக் பக்கம் வருவதில்லை. என்ன செய்ய ?

& முகநூல் என்பது fastfood கடை. அவசர உலகம் - போகிற போக்கில் எதையாவது போட்டு likes comments பார்த்தவண்ணம் பயணிக்கின்றனர். முகநூலில் சிலருடைய பதிவுகள் தவிர பெரும்பாலானவை மொக்கை பதிவுகள்தான். 

5. கான்ஸ்டிபேஷன் வந்ததுபோல முகத்தை வைத்துக்கொண்டு, அல்லது முக சேஷ்டைகளுடன் பாடும் பாடகர்களைப் பார்த்து, இதுக்கு பேசாம mp3 CD மாத்திரம் போடப்படாதா... ஏன் பார்வையாளர்களை இம்சைப்படுத்தணும் என்று நினைத்திருக்கிறீர்களா?

# நாம் போவது இசை கேட்பதற்கு. முக பாவத்தை கோணலாக வைத்துக் கொள்வதோ கையை வீசுவது போன்ற சேட்டைகளோ இசையை பாதிக்காதவரை ஆட்சேபிக்க ஏதுமில்லை.  காரணம் அவை பாடும்போது சிலருக்கு  இயல்பாக ஏற்படுபவை.

நாம் போவது இசை கேட்பதற்கு. முக பாவத்தை கோணலாக வைத்துக் கொள்வதையோ , கையை வீசுவது போன்ற சேட்டைகளையோ  இசையை பாதிக்காதவரை ஆட்சேபிக்க நியாயம்  ஏதுமில்லை.  காரணம் , அவை பாடும்போது சிலருக்கு  இயல்பாக ஏற்படுபவை.

எவ்வளவு உயர்ந்த ரகமான CDயாக இருந்தாலும்  ஒரு கச்சேரியை நேரில் கேட்கும் அனுபவத்துக்கு ஈடாகாது.

6. ஒத்தை விக்கெட்டை எடுத்துவிட்டு, ஏதோ உலக மஹா சாதனை செய்ததுபோல முஷ்டியை நீட்டுவதும், கீழே பூமியை நோக்கி கையைக் குத்துவதுபோல அங்க சேஷ்டைகள் செய்யும் பவுலர்களின் சின்னத்தனத்தைப் பற்றி நீங்க என்ன நினைக்கறீங்க?

# எனக்கும் அது பிடிக்கவில்லைதான் . ஆனால் அப்படி ஓவராக ரியாக்ட் செய்ய வேண்டும் என்று சொல்லிக் கொடுத்து இருப்பார்கள் போல் தெரிகிறது . பார்வையாளர்களை கட்டிப்போடும் முயற்சி . 

பெண்கள் டென்னிஸ் போட்டிகளில் குட்டைப் பாவாடை போல் இதுவும் ஒரு வியாபார தந்திரம்.

& நாம் ஆதரிக்கும் அணி செய்தால் ரசிப்போம்; எதிர்அணி அதையே செய்தால் நமக்கு ரசிக்காது! 

பானுமதி வெங்கடேஸ்வரன் : 

ஒரு கோவிலுக்குச் செல்லும் பொழுது அதற்கு அருகில் இருக்கும் உணவகங்கள், அங்கு கிடைக்கும் சிறப்பான உணவுகளின் நினைவு வருவதை தவிர்க்க முடியவில்லையே?

$ வரக்கூடாது என்று நியதி எதுவும் உண்டா ?

# அன்ன தேவோ பவ':   பக்தி உணர்வோடு கூட விரசம் இல்லாத வேறு உணர்வுகள் இருப்பது தவறில்லை.

= = = = =

ஆகஸ்ட் 24 ஆம் தேதி பதிவில் நாங்கள் கேட்ட கேள்விகள் : 

எங்கள் கேள்விகள் :

1) யார் அழகு ? வரிசைப் படுத்துங்கள் 

a ) ஐஸ்வர்யா பச்சன் b ) ஐஸ்வர்யா லக்ஷ்மி c ) ஐஸ்வர்யா ராஜீவ் d ) ஐஸ்வர்யா சுரேஷ் e ) ஐஸ்வர்யா கபூர் 

2) கீழ்க் கண்டவைகளில் - வரிசையில் சேராதது எது? ஏன் ? 

2 a :  7 , 17 , 21, 41, 61, 71 

2 b : குமுதம், விகடன், கல்கி, குங்குமம், பாக்யா, ராணி 

2 c :  சன், மூன், ஸ்டார், காமெட் 

2 d : புத்தகம், நோட்டு, பேனா, பென்சில், பலப்பம் 

சில கேள்விகளுக்கு சிலர் சரியான பதில் அளித்திருந்தனர். 

சரியான பதில்கள் இங்கே. 

1) முதல் கேள்வி. படங்களை நாங்கள் வெளியிடாததற்கு காரணம் ( படங்கள் எங்கே என்று கேட்டவர்களுக்கு கூகிள் மூலம் பார்த்துக்கொள்ளச் சொன்னதன் காரணம்)  - கீழே உள்ள படங்களைப் பார்த்தால் தெரிந்துகொள்ள இயலும்! 

1 a )   ஐஸ்வர்யா பச்சன் 

1 b ) ஐஸ்வர்யா லக்ஷ்மி 

1 c) ஐஸ்வர்யா ராஜீவ் 

1 d) ஐஸ்வர்யா சுரேஷ் 

1 e) ஐஸ்வர்யா கபூர் 

ஐஸ்வர்யா கபூர் என்பவர் ரிபப்ளிக் டி வி யின் news எடிட்டர்களில் ஒருவர். இதை யாராவது கண்டுபிடிக்கின்றீர்களா என்று பார்க்கத்தான் அந்த கேள்வி. யாரும் கண்டுபிடிக்கவில்லை! 

2 a ) 21 - (மற்ற எண்கள் எல்லாம் prime numbers. )

2 b ) பாக்யா ( மற்ற எல்லா பெயர்களிலும் திரைப்படங்கள் வந்துள்ளன. பாக்யா என்ற பெயரில் இதுவரை எந்தத் திரைப்படமும் வரவில்லை ) 

2 c ) காமெட் - ( மற்ற மூன்று பெயர்களிலும் தமிழ் டி வி சானல் உள்ளன. )

2 d ) பலப்பம் - (புத்தகம், நோட்டு இவற்றில் பேனா அல்லது பென்சிலால் எழுதலாம். ஆனால் பலப்பம் கொண்டு  புத்தகம் நோட்டில் எழுத இயலாது. )

எதிர்வினை ஆற்ற நினைக்கும் வாசகர்கள் கருத்துரையில் ஆற்றலாம்!! 

= = = = = =

'திங்க'கிழமை சமையல் பகுதிக்கு உங்களிடமிருந்து சமையல் குறிப்புகள் வரவேற்கப்படுகின்றன. எல்லோரும் அனுப்பவும். 

= = = = = = =