வெள்ளி வீடியோ : கால்வண்ணம் சதிராட கைவண்ணம் விளையாடும் தென்னாட்டுப் பொன்வண்ணமே

 சிவந்த மண்.  1969 இல் வெளிவந்த திரைப்படம்.  அயல் நாட்டில் படமாக்கப்பட்ட முதல் வண்ணத் திரைப்படம். 
இதன் பெரிய வெற்றி மற்ற தமிழ், தெலுங்கு திரைப்படங்களையும் வெளிநாட்டு லொகேஷன்களுக்கு ஓட வைத்தன.

கிருஷ் ஸார்...  கார்த்திக் ராஜா இசையில் தேடிப் பார்த்தேன்.  ஒன்றும் கிடைக்கவில்லை.  எனவே இந்தப் பாடலுக்கு வந்துவிட்டேன்!

ஸ்ரீதர் இயக்கத்தில் சிவாஜி, காஞ்சனா நடித்த திரைப்படம்.  ஸ்ரீதர் சிவாஜியை வைத்து திரைபபடங்களை இயக்கி வந்தாலும் பின்னர் அவர்களிடையே ஒரு பிளவும் ஏற்பட்டதை காலச்சக்கரம் நரசிம்மா தனது தொடரில் சொல்லியிருந்தார்.  அது பின்கதை.

இன்னும் சொல்லப் போனால் இந்தப் படமே "அன்று சிந்திய ரத்தம்" என்கிற பெயரில் எம் ஜி ஆரை வைத்து ஸ்ரீதர் எடுக்கத் திட்டமிட்டிருந்த படம்.  இறுதியில் சிவாஜியை வைத்து 'சிவந்த மண்'  என்று எடுக்கப்பட்டது.

இந்தப் படத்தில் எனக்கு மிகமிகப்  பிடித்த ஒரே பாடல் இதுதான் என்று சொல்லலாம்.  'ஒரு ராஜா ராணியிடம்' பாடல் பெரிய பாடல்.  'பட்டத்து ராணி' எல் ஆர் ஈஸ்வரிக்கும் எம் எஸ் விக்கும் பெயர் வாங்கித் தந்த பாடல்.  'ஒரு நாளிலே 'பாடல் கூட நல்ல மெலடிதான்.  ஆனாலும் இந்த பார்வை யுவராணி கண்ணோவியம் நான் மீண்டும் மீண்டுக் கேட்டு ரசிக்கும் பாடல்.

எம் எஸ் வி யின் ஆரம்ப இசையே அமர்க்களமாக ஆரம்பிக்கும்.  கண்ணதாசன் பாடல்.   எந்த வரியைத் தலைப்பாக்குவது என்று திணற அடிக்கும் பாடல் வரிகள்.

மிகவும் மனோகரமான டியூன்.  பல்லவி ஒரு கவர்ச்சி என்றால் சரணம் தனிக்கவர்ச்சி!  டி எம் சௌந்தர்ராஜன் மிக அருமையாக அனுபவித்துப் பாடியிருக்கிறார்.

பார்வை யுவராணி கண்ணோவியம் 

நாணம் தவறாத பெண்ணோவியம் 

பாவை பண்பாடும் சொல்லோவியம் 
இதுதான் நான் கேட்ட பொன்னோவியம் 

பாலென்று சொன்னாலும் பழமென்று சொன்னாலும் 

ஏனென்று தேன் வாடுமே 

நூலென்ற இடை இன்னும் நூறாண்டு சென்றாலும் 
தேர்க்கொண்ட ஊர்கோலமே 

இன்று நானும் கவியாக யார் காரணம் 

அந்த நாலும் விளையாடும் விழி காரணம் 

கால்வண்ணம் சதிராட கைவண்ணம் விளையாடும் 
தென்னாட்டுப் பொன்வண்ணமே 

மான் வண்ணம் என்றாலும் மலர்வண்ணம் என்றாலும் 
குறைவென்று தமிழ் சொல்லுமே 

வண்ணம் பாட புது வார்த்தை நான் தேடினேன் 

எங்கும் தேடி முகம் பார்த்து பதம்பாடினேன் 

ஒருபக்கம் நான் பார்த்து மறுபக்கம் நாள் பார்க்க 
ஒருநாளும் போதாதம்மா 
மணிமுத்தம் வாய்சிந்த சிறுவெட்கம் முகம் சொல்லும் 
அது மட்டும் போதாதம்மா..

என்கேள்வி சுகம் என்று உனைக்கேட்பது 

நான் சொல்வேன் சொன்னாலும் புரியாதது 

இந்த வார மொக்கைப்புதிர்  :  கண்ணில் இடும் மை பற்றி தமிழில் என்னென்ன திரைப்பாடல்கள் வந்துள்ளன?  எனக்கு உடனே ஒன்று நினைவுக்கு வருகிறது.  அதுதான் நீங்களும் முதலில் உடனே  சொல்லப் போவது...  மற்ற பாடல்களை அறியக் காத்திருக்கிறேன்!

இதையே பெயராகக் கொண்ட சரித்திரக் கதா பாத்திரம் ஒன்றும் எனக்கு நினைவுக்கு வருகிறது...   உங்களுக்கு?