திங்க'க்கிழமை : பொரிச்ச இட்லி

 அஞ்சு இட்லியை வச்சு அஞ்சுபேர் பசியாற முடியுமா?  முடிந்தது!

மழைபெய்துகொண்டிருந்த காலை.  கரண்ட் இல்லை.

பாஸ் பக்கத்தில் வந்தார்.  "மாவு கம்மியாதான் இருக்கு.  காலை என்ன செய்யலாம்?"

வீட்டில் ஏழு ஜீவன்கள் இருந்தன - என்னையும் சேர்த்து!

"ரவா கலந்துடு..."

"எங்கே இருக்கு?  மளிகை லிஸ்ட் போட்டாச்சு...  பிரவீண் இன்னும் கொண்டு வரலை"

சற்றுநேரம் மௌனம்.  "சும்மா இருந்தால் எப்படி?"

"என்ன செய்யச்சொல்றே?  விடு...  சமையல் முழுசா சமைச்சுடு..  நேராய் சாப்பாடே சாப்பிட்டுடலாம்"

"இட்லி சாப்பிட்டு நாளாச்சு...   எனக்குப் பிடிக்கும்..."  - நடுவில் சந்தர்ப்பம் தெரியாமல் காது கேட்காத மாமியார்!

"பத்து இட்லி வார்த்துடலாம்...  மூன்று பசங்களும் மேகி பார்த்துக்கட்டும்..." - பாஸ்.   

எப்போதும் போல கேள்வியும் அவரே..  பதிலும் அவரே...

"சரி...  நானும் மேகி சாப்ப்பிட்டுடறேன்"

இட்லி வார்த்து, கொஞ்சநேரம் கழித்து மாமியார் அனவுன்ஸ் செய்தார்...  "நான் மூன்று இட்லி எடுத்துண்டேன்!"

பாஸ் "எனக்கு ரெண்டு போதும்" என்றார்.  அஞ்சு இட்லி மீதி.  அண்ணனுக்கு அதைக் கொடுத்து விடலாம்.

மேகி செய்யப்போன இளைய மகன் அறிவித்தான் "மேகி காலி போல...   இல்லவே இல்லை!"

இருப்பது அஞ்சு இட்லி.    கடை ஏதும் இருக்குமா?  தெரியவில்லை.  ரவா, அரிசிமாவு எதுவும் கைவசம் இல்லை.  என்ன செய்ய!

நான் களத்தில் இறங்கவேண்டிய நேரம் வந்து விட்டது!  கீதா அக்கா சொல்வது போல திப்பிசம் செய்ய வேண்டிய நேரம் வந்து விட்டது!

இரண்டு பெரிய வெங்காயம், ஒரு தக்காளி எடுத்து பொடியாய் நறுக்கிக்கொண்டேன்.  இரண்டு பல்  பூண்டு நசுக்கிப் போட்டேன்.  (நெல்லை மன்னிக்கவும்!) வாணலியில் இரண்டு ஸ்பூன் தேங்காய் எண்ணெய் விட்டு வதக்கத் தொடங்கினேன்.  தேவையான உப்பு, காரப்பொடி சேர்த்து, அடுப்பை சிம்மில் வைத்து வற்ற வற்ற அதை தண்ணீர் விட்டு, தண்ணீர் விட்டு வதக்கிக்கொண்டே 

இருந்த ஐந்து இட்லிகளை கத்தியால் சிறு துண்டுகளாக நறுக்கிக் கொண்டேன்.  அவற்றை எண்ணெயில் பொரித்து எடுத்துக் கொண்டேன்.  கொஞ்சம் ப்ரெட் துண்டங்கள் இருக்க அவற்றையும் அதே எண்ணெயில் பொரித்து எடுத்துக் கொண்டேன்.

நன்றாக மையாக வதங்கியிருந்த வெங்காயம் தக்காளி  க்ரேவியில்  இவற்றைக் கலந்து திருப்பி விட்டு கொத்துமல்லியைப் பொடியாய் நறுக்கித் தூவி விட்டேன்.

பாருங்க...   இட்லி எவ்வளவு ஆரோக்யமான பண்டம்!  'அய்யே...   இட்லியா' என்று முகம் சுளித்து அதை அப்படியே சாப்பிட மறுக்கும் மகன்கள் கூட இப்படிச் செய்தால் உடனே சரி என்று காலி செய்து விடுகிறார்கள்.  ஆளுக்கு ஒரு கப்.   வயிறு 'டம்' என்று நிறைந்து விட்டது.

கடையில் சில்லி இட்லி ஃப்ரை என்று வாங்கி இருக்கிறோம்.  வேறு ஏதோ பெயரிலும் வாங்கி இருக்கிறோம்.  அதில் எல்லாம் இட்லி சொதசொத என்றுதான் இருக்கும்.  இதில் மொறுமொறுப்புடன் லேசாக வெங்காயதக்காளி க்ரேவியில் நனைந்து சாப்பிடவும் நன்றாய்தான் இருந்தது.