நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 08 : நெல்லைத்தமிழன்

 

நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 08

Bபேட் துவாரகைத் தீவில் ஸ்ரீகிருஷ்ணரைத் தரிசித்துவிட்டு மன நிறைவோடு நிலப்பகுதியை நோக்கிய எங்கள் படகுப் பயணம் தொடர்ந்தது. தீவை நோக்கிய பிரயாணத்தில் பார்த்தது போலவே சீகல் பறவைகள். அவைகளைக் கண்டுகளித்து, அவைகளுக்கும் விடை கூறி, நிலப் பகுதியை அடைந்தோம்.

படகுகளின் நிறுத்தம். பார்க்கவே மிக அழகாக இருந்தது. 

மத்தியில் பாஜக ஆட்சி வந்த பிறகு, இந்தப் படகுகளில் எல்லாம் தேசியக் கொடிகள் பறக்கின்றன. இதைப்போலவே வாரணாசியிலும் மற்ற பகுதிகளிலும். இந்த வித்தியாசத்தை நான் காண முடிந்தது. 

திரும்பிச் செல்லும்போது எங்களுக்காக தீவில் ஏதேனும் வாங்கி வந்தீர்களா என்று பார்க்கிறது போல..

நீயெல்லாம் நம்மாள், அதனால் பயமில்லை என்று சொல்வதுபோல பறவைகள் வெகு அருகிலேயே படகில் உட்கார்ந்துவிட்டன.

நாங்களும் சமாதானப் புறாக்கள்தாம் என்று சொல்கின்றனவோ?

இரண்டு மணி நேரங்கள் நிலப்பகுதியிலிருந்து பேட் துவாரகை சென்று தரிசனம் செய்து மீண்டும் நிலப்பகுதிக்கு வருவதற்கு ஆகியிருந்தது. அரை மணி நேர பேருந்துப் பயணத்திற்குப் பிறகு நாங்கள் கோமதி துவாரகையில் தங்கியிருந்த இடத்திற்கு வந்து சேர்ந்தோம் (இரவு 8 மணி). அருகிலேயே கோமதி துவாரகை கோவிலுக்கு ஆட்டோவில் சென்றுவிட்டு, முடிந்தால் தரிசனம் செய்துவிட்டு 9 மணிக்குள் சாப்பிடும் இடத்திற்கு வந்துவிடுங்கள் என்று யாத்திரைக் குழுத் தலைவர் சொன்னார். 

எங்களில் சிலர் மாத்திரம், ஆட்டோக்களில் கோவிலுக்குச் சென்று சில புகைப்படங்கள் எடுத்துக்கொண்டோம். நேரக் குறைவினால் கோவிலுக்குள் செல்லவில்லை. அருகிலிருந்த கடைகளில் பாலில் செய்யப்பட்ட இனிப்புகள் எங்களை வாங்கிக் கொள்ளுங்கள் என்று சொல்வதுபோல இருந்தது. 9 மணிக்கு அவசர அவசரமாக, உணவு உண்ணும் இடத்திற்குப் போய்ச் சேர்ந்தோம்.

இரவு உணவாக சாதம், குழம்பு, ரசம், கறியமுது கூட்டு என்று எப்போதும்போல நன்றாகவும் சூடாகவும் தந்தனர். அதிகாலை 3:45க்கு காபி தரப்படும் எனவும், அதனால் அதற்கு முன்பாகக் குளித்துவிட்டு தங்குமிட த்திலிருந்து உணவு உண்ணும் இடத்திற்கு லக்கேஜுடன் வந்துவிடவேண்டும் என்றும் 4 ½ க்கு கோமதி துவாரகையிலிருந்து கிளம்பிவிடுவோம் என்றும் கூறியிருந்தார்கள். 

வண்ண விளக்குகளால் ஜொலித்த கோவில் கோபுரம்

காலை 3 ¾ க்கு காபி கொடுக்கும் இடத்திற்குச் செல்லவேண்டும் என்றால், காலை 2 ½ மணிக்கே எழுந்து குளித்துத் தயாராக இருக்கவேண்டும்.  யாத்திரை என்பதால் எல்லோரும் குளித்துத் தயாராகிவிடுவார்கள். இந்த மாதிரிப் பயணங்களில் முழுமையான தூக்கம் இருக்காது. நானும், இரவு உணவை மிக மிகக் குறைவாகத்தான் எடுத்துக்கொள்வேன். 

காலை 3 ½ க்குத் தயாராகி, 4 ¼ க்கு காபி குடித்துவிட்டு, விஷ்ரோலியா அதிதி பவன் என்னும் இடத்திற்கு விடை கொடுத்துவிட்டு, 4 ¾ க்கு கோமதி துவாரகையை விட்டு மூல் துவாரகை நோக்கிப் பயணப்பட்டோம்.

மூலத் துவாரகை 

மதுராவிலிருந்து கிளம்பி ஸ்ரீகிருஷ்ணர் துவாரகைக்கு வரும்போது, இங்குதான் முதலில் தடம் பதித்தாராம். இந்த இடம் போர்பந்தர் அருகிலுள்ள வைசாவ்தா (விசாவ்தா) என்ற கிராமமாகும்.

ஜராசந்தனின் குழந்தைகளை கிருஷ்ணர் அழித்த தனால், அவர் மீது தொடர்ந்து போர் தொடுத்தும் கிருஷ்ணரிடம் அவன் தோல்வியடைந்தான். ஜராசந்தன் பீமாவின் கரங்களால்தான் மடியவேண்டும் என்பதால், கிருஷ்ணர் அந்த இடத்தை விட்டு விலகி, துவாரகை நோக்கிச் சென்றார்.  இந்த மூலத் துவாரகை, மஹாபாரதம் காலத்தைய இடமாகும்.

மூலத் துவாரகையும், அதன் எதிரில் இருந்த மண்டபமும்

விஷாவாடா என்று அழைக்கப்பட்ட இந்த இடத்தில், நிறைய விஷ்ணு கோவில்களும், சிவன் சன்னிதியும், மற்றும் ஸ்ரீகிருஷ்ணரின் பாதமும் இருக்கின்றன. கிருஷ்ணர் உபயோகித்த நீர்நிலையும் இங்கு உண்டு என்கிறார்கள்.

கோவில் வளாகத்தில் நிறைய சிறு சிறு கோவில்கள் உள்ளன. 

மூல துவாரகை துவாரகாதீஷ்

வளாகத்திலிருந்த சிறு சிறு கோவில்கள். 

வண்ண விளக்குகளால் ஒளிர்ந்த சிவன் சன்னிதி, துவாரகாதீஷ் எதிரில் இருக்கும் கோவிலில்

மூலத் துவாரகை துவாரகாதீஷ்.. 

மூலத் துவாரகை கோவிலில் நான்.

இந்தக் கோவிலில் 20 ரூபாய்க்கு மைதாவினால் செய்யப்பட்ட ஒரு இனிப்பு பிரசாதமாகக் கொடுத்தார்கள். ஒரு தடவை நாங்கள் காலை 5  க்கு கோமதி துவாரகையில் புறப்பட்டு, 6 ½ மணி வாக்கில் மூலத் துவாரகையை அடைந்தோம். இன்னொரு முறை காலை 6 மணிக்குக் கிளம்பி, 7 ½ க்கு மூலத் துவாரகை வந்து சேர்ந்தோம். இந்த மாதிரி சில நேரங்களில் தாமதமாகிவிடுவதால், காலை பாலபோகம் தருகின்ற இடம் மாறிவிடும். ஒரு முறை மூலத் துவாரகை தரிசனத்திற்குப் பிறகு வளாகத்திலேயே பின்புறம் நாங்கள் காலை பாலபோகம் சாப்பிட்டோம். இன்னொரு முறை, சுதாமா கோவிலில் தரிசனத்திற்குப் பிறகு சாப்பிட்டோம்.

பொதுவாக யாத்திரையில் காலை 6 மணிக்கு காபியும் (டீ அல்லது பால் கொடுப்பார்கள் தேவையானவர்களுக்கு. ஆனால் இதனை யாத்திரையின் முதல் நாளிலேயே சொல்லிவிட வேண்டும்). பிறகு 10 ½ அல்லது 11 மணிக்கு காலை உணவு (முழு உணவு), பிறகு மாலை 4 ½ க்கு காபி, ஒரு இனிப்பு மற்றும் காரம், இரவு 8 ½ மணிக்கு முழு இரவு உணவு என்று கொடுப்பார்கள். பிரயாணத்தால் இந்த நேரங்கள் மாறுபடும். காலை உணவு, கிட்ட த்தட்ட மதிய நேரம்தான் வழங்க முடியும் என்று இருக்கும் சமயங்களில், பால போகம் என்று சிறு உணவாக, உளுந்து சாதம், எலுமிச்சை சாதம் என்று வழங்குவார்கள். பொதுவாக யாத்திரை நடத்துபவர், இவ்வளவுதான் தருவோம் என்று சொல்வதில்லை. கேட்கும் அளவு தருவார்கள். ஆனால் பாலபோகத்தையே அதிகமாகச் சாப்பிட்டுவிட்டால், மதிய உணவு சாப்பிட முடியாது என்பதால் ஜாக்கிரதையாக இருப்பார்கள். பாலபோகத்தைப் பற்றி எழுத இந்த இடம்தான் கிடைத்தது.

தரிசனம் முடிந்ததும் அங்கிருந்து கிளம்பி, சுதாமாபுரி என்று அழைக்கப்படும், குசேலர் பிறந்த இடத்திற்குச் சென்றோம். சுமார் 1 மணி நேரத்திற்கும் குறைவான பிரயாணம்.

அந்த இடத்தைப் பற்றி வரும் வாரத்தில் பார்க்கலாமா?