'திங்க'க்கிழமை : பாகற்காய் உப்பு சார் - கீதா ரெங்கன் ரெஸிப்பி

பாகற்காய் உப்பு சார்  (என்ன ஸார்?!!  உப்பு சார்!)

ஹாய் ஹாய்! நண்பர்களே! ரொம்ப நாளாச்சு இல்லையா நம்ம எபி சிக்கன்…ஓ காட் டங்க் ஸ்லிப் ஆகிப் போச்சு எபி ஆசிரியர்கள் மன்னிக்கவும்!!! எபி கிச்சன் திங்க தொடர் வழக்கம் போல் ஓடிக் கொண்டிருந்தாலும் நம்ம தொடருக்கு நாம சந்திக்க தாமதமாகிடுச்சு. அது சரி புயலையும், அமெரிக்க கிழக்குச் சீமையையும் காணலையே!! ஆப்ஸென்டோ?

நான் ஃபர்ஸ்டூனு தர்க்கம் பண்ணிக் கொண்டே ரெண்டு பேரும் வர….. ஏற்கனவே மத்தவங்க எல்லாம் இங்க ஆஜர்!!! உள்ள வாங்க சத்தம் போடாம என்று உட்கார வைத்தாயிற்று. ஸ்ப்பாஆஅ. புயலுக்கு, ஏற்கனவே ஏஞ்சல் இருப்பதைப் பார்த்து கர்ர்ர்ர்ர். ஓகே கைஸ் ஏற்கனவே லேட்டு ஸோ நேரா க்ளாஸுக்குப் போயிடுவோம்

இன்று என் மாமியாரின் ரெசிப்பி “பாகற்காய் உப்பு சார்” செய்முறை. உப்புசார் என்றதும் ஊறுகாயோ என்று நினைத்திட வேண்டாம். இதுவும் ஒரு குழம்பு வகையே. ஆனால் ஏன் இதை உப்பு சார் என்று சொல்கிறீர்கள் என்று என் மாமியாரிடம் கேட்க அவரும், “அப்படித்தான் சொல்றது” என்று சொல்லிவிட்டார். ஸோ கப்சிப்!

சரி செய்முறைக்குப் போகும் முன் பாகற்காய் பற்றிய மருத்துவ குணங்களை நம் எபி கிச்சனில் கேள்விகளுக்குப் பதிலாகச் சொல்லப் போவது உணவுத் துறையில் பல ஆண்டுகளாகப் பணியாற்றி வரும் அன்பான மனிதர். அவர் சொல்லுவது போல நான் சொல்லுவதை விட அவரே சொன்னால் நன்றாக இருக்கும் என்று அவரிடம் கேட்ட போது உடன் மகிழ்வுடன் இயைந்தார். நம் எல்லோருக்கும் நன்றாக அறிமுகமான, நம்மைக் கட்டிப் போடும் அழகு தமிழில் ஆன்மீகம் மற்றும் விழிப்புணர்வு கட்டுரைகளைப் பல இலக்கியப் பாடல்களுடன் தரும் நம் அன்பு சகோதரர் திரு துரை செல்வராஜு அவர்கள். அருமையான கதைகளும், கவிதைகளும் எழுதுவார். நல் வாக்குகளும், அன்புமே உருவான நம் அன்பு சகோதரரை நம் எபி கிச்சனுக்கு திங்க தொடருக்கு வருக வருக என வரவேற்போம் நண்பர்களே!

அழைப்பு மணியின் சத்தம் ஒலித்தது. ஆகா! அவர்களாகத் தான் இருக்கும்! ஒரே சமயத்தில் பல குரல்கள்..ஒன்று மட்டும் பரிச்சயம்.. அது தேவகோட்டை ஜி...தவிரவும் தேவகோட்டையாருடன் அபுதாபியில்பழக்கம்...மற்றவை மகளிர் மாநாடு போல ஒரே கூச்சல். ஓ! என, சந்தோஷக் குரல்கள் முன்னே செல்ல வாசற்கதவு திறக்கப்பட்டது...

அடுத்த சில விநாடிகளில் எ பி யின் சமையலறை கூடத்தில்...

“நான் தான் ஃபர்ஸ்ட்டூடூடூடூ..ஊ!.”. - புயலரசி.. இளவரசி!.. - என, போட்டிக்குப் போட்டி...சில விநாடிகளில் கீரை வடையுடன் (!?) காஃபி!..”என்ன பார்க்கிறீங்கள்.. சாப்பிடுங்கோ!.. கீரை வடை நான்.. நானேதான் செய்தனான்...”

“அதுதானே யோசனையா இருக்கு!?.” எல்லாரும் சிரித்தார்கள். நல்லவேளை வெகுதொலைவில் தேம்ஸ் இருந்ததால் தப்பித்தது. மகிழ்ச்சியுடன் கீரைவடையைத் தீர்த்துக் கொண்டிருந்த வேளையில் -

“அண்ணன்.. நீங்கள் சொல்லுங்கோ.. பாவக்காய் மேலுக்கு நல்லம் தானே!.”

“ஆமாம்.. நல்லது தான்!.. இல்லை என்று யார் சொன்னது!..

”

“இவையள்.. இவையள் தான் சொல்லுறாங்கோ!...”

“பாகற்காய் நல்லது தான்.. ஆனாலும் அதிகம் பாவிக்கப்படாது!..”

“அது எப்படி..ன்னு சொல்லுங்க ஜி!.”.- தேவகோட்டையார் மீசைக்குள்ளிருந்து பேசினார்...

“பாகற்காயை ஏன் ராத்திரியில் சாப்பிடக் கூடாது?”. - கீதா..

பொதுவாகப் புளிப்பு, கசப்பு சுவைகளை இரவில் தவிர்க்கச் சொல்வது பாரம்பர்ய வைத்தியம்... மென்மையான இனிப்பு தவிர மற்ற சுவைகள் இரவு நேரத்துக்கு ஆகாது. அந்தச் சுவைகள் இனிய இல்லறத்திற்கு எதிர்விளைவுகளைக் கொடுக்கும். வெற்றிலையின் காரம்.. பாக்கின் துவர்ப்பு நல்லது. அதனால தான் இரவில் தாம்பூலம் தரிப்பது. இரவு நேரத்துக்கு எளிமையான உணவு.. ஒரு குவளை பால். பனங்கற்கண்டு போட்டுக்காய்ச்சியது.. அது போதும்..ன்னு சொல்றவங்களும் இருக்காங்க.”

“ஓஹோ.. இப்படியெல்லாம் இருக்குதா!.. நமக்குத் தெரியாமப் போச்சே!.”

“அதெல்லாம் இஸ்கோலுக்குப் போயிருந்தாத் தெரியும். கர்ர்ர்ர்ர்ர்ர்”

”மற்றபடிக்கு சின்ன வயதிலிருந்தே பாகற்காய் கீரை வகைகளுக்குப் பழக்கி விட்டால் பின்னாளில் பல குறைபாடுகளில் இருந்து தப்பிக்கலாம். எல்லாரும் சொல்வது என்ன?... என் பிள்ளை பாகற்காய் சாப்பிட மாட்டான்.  என் மகள் கீரை சாப்பிட மாட்டாள்... என்னவோ இவங்க எல்லாவற்றையும் சாப்பிடுவது மாதிரி!. பிஸ்கட் சாக்லேட் விளம்பரத்துக்கு வர்ற ஆர்வம் - இயற்கை உணவுகள்..ல இல்லை..ங்கறது தான்.. வேதனை...”

“உண்மை தான் ஜி!.”

“பிஸ்கட் சாக்லேட்  அதீத இனிப்பு வகை இதுங்களா..ல வயிற்றுக்குக் கேடு உண்டாகுதா இல்லையா!... அதை சரி செய்ய மருந்து..ங்கற பேர்ல.. வேறொரு ரசாயனம்..  நூற்றுக் கணக்கில செலவு வேற. ஆனால் - பாகல்இலைகளைக் கொதிக்க வைத்து வடிகட்டி மிதமான சூட்டில் ஒரு குவளை குடித்தால் - வயிற்றில் எந்தப் பிரச்னையும் இருக்காது. மலச்சிக்கல் வராது.. பூச்சி புழு தொந்தரவுகள் இல்லாமல் போகும்... வேப்ப இலைக்குநிகரானது பாகல் இலை.”

“ஆச்சர்யமா இருக்கு!..”

“வாரம் ஒருநாள் பாகற்காயை சாப்பாட்டுல சேர்த்துக் கொள்வது ரொம்ப நல்லது. அதிக காரம் அதிக புளிப்பு இல்லாம செய்யணும்..  பாகற்காய் சமையல்..ல கொஞ்சம் வெல்லம் போடுறது வழக்கமா இருக்கு,ஊடகங்கள்..லயும் அப்படிச் சொல்றாங்க..”

“ஏங்!.... அது தப்பா?..”

“அதற்குப் பாகற்காயை சமைக்காமலே இருக்கலாம். ஆங்கில மருத்துவம் பரவலாக ஆவதற்கு முன்னால பாகல் இலையில சாறெடுத்து கண்ணாடி விரியன் கட்டு விரியன் இந்த மாதிரி விஷங்களுக்கு விஷ முறிவுசெஞ்சிருக்காங்க.”

“ஓ!..”

“ஆனால் அதெல்லாம் முறையான சித்த வைத்தியர்கள் தான் செய்யணும். சமீப காலமா எல்லாரும் பாகற்காயை விரும்புறதுக்கு ஒரே காரணம், எல்லாருக்கும் சர்க்கரை பிரச்னை வந்தது தான். அலட்சியத்தினால. நமக்குநாமே வரவழைத்துக் கொள்வது தான் இது. ரெண்டு வருஷத்துக்கு முன்னால நானும் சர்க்கரையினா..ல பாதிக்கப்பட்டேன். இன்றைக்கு முற்றும் முழுவதுமா நான் நன்றாக இருப்பதற்குக் காரணம் இயற்கை உணவுமுறைதான். ஆங்கில மருத்துவம் எப்படியோ எனக்குத் தெரியாது. ஆவாரம் பூ, நாவற்பழம், வெந்தயம் முக்கியமா பாகற்காய்.. இதெல்லாம் தான் எனக்குக் கை கொடுத்த அற்புதங்கள். பாகற்காய் இரத்தத்திலசர்க்கரையோட அளவைக் குறைக்கிறது..ங்கிறது முற்றிலும் உண்மை.  ஆனாலும் முறையான சித்த மருத்துவர்களோட மேற்பார்வை அவசியம்.  அந்தக் காலத்தில் பாகற்காய் எல்லாம் வீட்டு வேலியில் பரவிக் கிடக்கும்.இன்றைக்கு வீடெல்லாம் புறாக் கூண்டு போல ஆனதும் தோட்டம் எல்லாம் காணாமல் போய்விட்டது. எதையும் வருமுன் காப்பது மிக மிக நல்லது... அதற்காகப் பாகற்காயை தினமும் சாப்பிடுவதும் ஆபத்து.

கேளப்பா நீயுந்தான் செவிகளையே தீட்டி

தீரப்பா நோயைத்தான் பாகலையே காட்டி

நாளப்பா நல்லதுதான் தீயினிலே வாட்டி

ஓரப்பா உண்பதுதான் உணவுக்குள் ஊட்டி..” அப்படின்னு பெரியவங்க சொல்லியிருக்காங்க.”

“நல்லா சொன்னீங்க ஜீ! அதுவும் நீங்களே எழுதிய பாடலோடு”.  - தேவகோட்டையார் கை தட்டினார்.

“ஆகா!.. அருமை அருமை அப்போ இன்னிக்கு மதிய விருந்து பாகற்காய் குழம்போடுதான்!!...” மாஸ்டர் செஃப் மரைன் லிண்டாவிடம் உற்சாகம் மிய்யா..வ்வ்.. என்றது.

“ம்ஹூம்... வீட்டுக்கு முதன்முதலா வந்திருப்பவர்களுக்கு பாகற்காய் பரிமாறுவது தமிழர் பண்பாடு இல்லை...”

“அப்படி..ன்னா.. நான் புதுசா ஸ்வீட் 66 செய்றேன்...”

“இல்லை.. இல்லை.. நான் தான் செய்வன்...”   கர்ர்ர்ர்ர்ர்.. கர்ர்ர்ர்ர்ர்!...- அங்கே சந்தோஷம் தழைத்து விளையாட மதிய உணவு களைகட்டியது..

பாகற்காய் – 1 பெரியது/நீளமாக

புளி – எலுமிச்சை அளவு ஊற வைக்கவும்

உப்பு – தேவையான அளவு

அரைக்க/பொடிக்க

கொத்தமல்லி விரை – 2 டீஸ்பூன் (டீஸ்பூன் அளவு என்பது நான் எப்போதும் உபயோகிப்பது  அளவு ஸ்பூன் படத்தில் உள்ளது

மிளகு – 1 டீஸ்பூன்

ஜீரகம் _ 1 டீஸ்பூன்

துவரம் பருப்பு – 1 டீஸ்பூன்

கடலைப்பருப்பு – 1 டீஸ்பூன்

உளுத்தம்பருப்பு – 1 டீஸ்பூன்

வெந்தயம் – 1 டீஸ்பூன்

எள்ளு – 1 டீஸ்பூன்

பச்சரிசி – ½ ஸ்பூன்

(இவை அனைத்தும் ஸ்பூன் விளிம்பின் மேலேயும் இருக்குமாறு அளந்து கொள்ளவும்)

கொப்பரை/வறுத்த தேங்காய்/வெயிலில் காய வைத்த ட்ரை தேங்காய் – 2 டேபிள் ஸ்பூன் பூ வறுத்தது. ஸ்பூன் விளிம்பிற்குள் இருப்பதாக..

மிளகாய் வற்றல் – 3

பாகற்காயைக் கொஞ்சம் பெரிய துண்டுகளாக நறுக்கிக் கொள்ளவும். படத்தில் உள்ளது போல்.

வாணலியில் (நான் இக்குழம்பை மண் சட்டியில் செய்வது வழக்கம்) நல்லெண்ணை ஒரு டேபிள் ஸ்பூன் விட்டு காய்ந்ததும் கடுகு தாளித்து நறுக்கி வைத்திருக்கும் பாகற்காயைப் போட்டு நன்றாகக் கலர் மாறும் வரை வதக்க வேண்டும். (படத்தில் உள்ளது போல்). கறிவேப்பிலையும் சேர்த்துக் கொள்ளுங்கள். காய் முக்கால் பதம் வெந்திருக்கும் போது தேவையான உப்பு போட்டு, புளி முழுவதும் நன்றாகக் கரையும் வரை கரைத்து வாணலியில் விடவும். மாமியார் இதற்கு மஞ்சள் பொடி சேர்க்க மாட்டார். ஆனால் நான் ஒரு சிட்டிகை சேர்ப்பேன்.

அது கொதிக்கட்டும். அதற்குள் அரைக்க/பொடிக்கக் கொடுத்திருப்பதில் கொப்பரையைத் தனியாக வறுத்துக் கொள்ளவும். எண்ணை இல்லாமல் உ பருப்பு வெந்தயம் சேர்த்து வறுத்து லைட்டாக வறுபட்டு வரும் போது மற்ற பொருட்களையும் சேர்த்து வறுத்து எல்லாம் சிவந்து வரும் சமயம் எள்ளு பச்சரிசி சேர்த்து வறுத்து, எல்லாம் ஆற வைத்துப் பொடித்தோ இல்லை சிறிது தண்ணீர் சேர்த்து அரைத்தோ கொள்ளவும். 

பாகற்காய் வெந்ததும் அதில் பொடித்ததைப் போடவும். அரைத்துச் சேர்த்தால் கட்டித் தட்டிடாமல் கிளறிக் கொண்டே சேர்க்கவும். சிம்மில் வைத்துக் கொதிக்க விடவும். கொஞ்சம் நல்லெண்ணை ஒரு டேபிள் ஸ்பூன் சேர்த்துக் கறிவேப்பிலையும் சேர்க்கவும். கொதிக்கும் சமயம் வெல்லம் கொஞ்சம் சேர்க்கலாம். 

நான் சேர்ப்பதுண்டு. (ஸ்ரீராம் திதிக்காது. இருந்தாலும் கைஸ் வெல்லம் சேர்க்காம கொஞ்சம் தனியா எடுத்துக் கொதிக்க வைத்துடுவோம்! திங்க வின் டைரக்டருக்கும், சிறப்பு விருந்தினருக்கும்!!!) கொதித்து வட இந்திய க்ரேவி போல் வந்ததும் ஆஃப் செய்யவும். ஆற ஆற இன்னும் கொஞ்சம் கெட்டியாகும்.

இக்குழம்பு செய்தவுடன் சாப்பிடுவதை விட மறுநாள் சாப்பிட இன்னும் நன்றாக இருக்கும். கொஞ்சம் எண்ணை இன்னும் சேர்த்தால் குளிர்காலம் என்றால் 4,5 நாள் வரை கெடாமல் இருக்கும். ஃப்ரிட்ஜில் வைத்தும் சாப்பிடலாம் ஒரு வாரம் வரை கூட நன்றாக இருக்கும். ஆனால் கைஸ் ஃப்ரிட்ஜில் வைத்துச் சாப்பிடுவதைத் தவிர்க்கவும் என்று பல ஆரோக்கியக் குரல்கள் கேட்கிறது. சரி இத்துடன் இன்றைய எபிசோட் முடிகிறது!

அழகாய்ப் பேசி எ பி கிச்சன் தொடரைச் சிறப்பித்த சகோதரர் துரை செல்வராஜு அவர்களுக்கு எங்கள் அனைவரது நன்றிகளும்! திங்க டைரக்டர் ஸ்ரீராமுக்கும் மிக்க நன்றி! செய்முறையைச் செய்து படங்கள் எடுத்து உதவிய நெல்லைத் தமிழனுக்கும் எங்கள் மனமார்ந்த நன்றிகள் பல!

தமிழ்மணம்.