எம் எஸ் வி யும் நௌஷாதும் மற்றும் சில அரட்டைகள்

MSV - Naushad The Legends! 

ராணிமைந்தனின், 'மெல்லிசை மன்னர் எம்.எஸ்.வி.,' நூலிலிருந்து:

மும்பையில் சண்முகானந்தா அரங்கில், இசை நிகழ்ச்சி நடத்த விஸ்வநாதன் - ராமமூர்த்திக்கு அழைப்பு. டி.எம்.எஸ்., சுசீலா, சந்திரபாபு, சீர்காழி கோவிந்தராஜன், ஏ.எம்.ராஜா, ஜிக்கி, பி.பி.ஸ்ரீனிவாஸ் உள்ளிட்ட பின்னணி பாடகர்கள் மற்றும் தன் இசைக் குழுவினருடனும், எம்.எஸ்.வி., மாபெரும் இசை நிகழ்ச்சி நடத்த ஏற்பாடானது.

நிகழ்ச்சியை ஏற்பாடு செய்த ஏ.எல்.சீனிவாசன், 'எவ்வளவு சம்பளம் எதிர்பார்க்கிறீங்க?' என்று எம்.எஸ்.வி.,யிடம் கேட்டார். உடனே விஸ்வநாதன், 'அது இரண்டாம் பட்சம்; எனக்கு வேண்டியதெல்லாம் ஒன்றுதான். மும்பை நிகழ்ச்சியில் பிரபல இந்தி இசையமைப்பாளர் நவுஷத் அலி கலந்து கொண்டு, என்னை வாழ்த்த வேண்டும். இது தான் என் ஆசை; அதற்கு நீங்கள் ஏற்பாடு செய்தால், அதைவிடப் பெருமை எனக்கு வேறில்லை. சம்பளத்தைப் பற்றி பின் பேசலாம்...' என்றார்.

நிகழ்ச்சி அமைப்பாளர்கள், நவுஷத் அலியுடன் தொடர்பு கொண்டனர். 'சனிக்கிழமை நிகழ்ச்சி வைத்திருக்கிறீர்கள். அன்று எனக்குக் கொஞ்சம் வேலையிருக்கிறது. இருந்தாலும், நிச்சயம் நிகழ்ச்சிக்கு வந்து, விஸ்வநாதனை வாழ்த்து வேன்; ஆனால், நிகழ்ச்சியை முழுவதுமாக ரசிக்க முடியாத நிலை. பரவாயில்லையா?' என்றார் நவுஷத்.

'வந்தாலே போதும்...' என்று ஒப்புக்கொண்டனர்.

சண்முகானந்தா அரங்கம் நிரம்பி வழிந்தது. நிகழ்ச்சியைத் துவங்கினார் எம்.எஸ்.வி., குறித்த நேரத்தில் நவுஷத் அலியும் வந்து விட்டார்.

நிகழ்ச்சியின் இடையில் மேடை ஏறிய நவுஷத் கையில், ஒரு பை இருந்தது. விஸ்வநாதனின் தலை மீது, கை வைத்து ஆசிர்வதித்த நவுஷத், தன் கையிலிருந்த பையைக் கவிழ்த்துக் கொட்டினார். கத்தை கத்தையாகக் கடிதங்கள்!

'இவையெல்லாம் எனக்கு விஸ்வநாதன்ஜி எழுதிய கடிதங்கள். முதல் கடிதத்திலேயே என் இசை பற்றிய நுணுக்கங்களைப் பாராட்டி எழுதியிருந்த தன்மையைப் பார்த்ததும் புரிந்து கொண்டேன்... இவர் பின்னாளில், இசையுலகில் உயர்ந்த இடத்தைப் பிடிப்பார் என்று! என் கணிப்பு பொய்யாகவில்லை...' என்று அவர் கூறியதும், அரங்கில் பலத்த கரவொலி.

வாழ்த்திவிட்டு மேடையிறங்கினார் நவுஷத். ஏற்கெனவே சொன்னதுபோல், அவர் தன் வேலையை கவனிக்கப் போய்விடுவார் என்று நினைத்து, அவருக்கு நன்றி கூறி மேடையிலிருந்து வழியனுப்பி வைத்தார் எம்.எஸ்.வி., ஆனால், நவுஷத் வெளியே போகவில்லை. மீண்டும், தன் இருக்கையில் சென்று அமர்ந்தார்.

இசை நிகழ்ச்சி நீண்டு கொண்டே போனது. நவுஷத் தன் இருக்கையிலேயே அமர்ந்திருப்பதைப் பார்த்து, பரவசப்பட்டார் விஸ்வநாதன்.

திடீரென மேடைக்கு ஒரு சீட்டு வந்தது. பி.பி.ஸ்ரீனிவாஸ் அதைப் படித்து, விஸ்வநாதனிடம் ஓடிவந்து, 'நவுஷத்ஜி எழுதியனுப்பியிருக்கிறார்... 'ஓடம் நதியினிலே ஒருத்தி மட்டும் கரையினிலே...' என்ற பாடலைக் கேட்க விருப்பப்படுகிறார்...' என்றார்.

ஒரு நிமிடம் அசந்து போனார் எம்.எஸ் .வி., 'என் பாடல்களையெல்லாம், அவர் கேட்டிருக்கிறாரே...' என்று புளங்காகிதப்பட்டு, உடனே சீர்காழி கோவிந்தராஜனை, அந்தப் பாடலை பாடச் சொன்னார்.

நிகழ்ச்சி முடிந்ததும், மீண்டும் மேடைக்கு வந்து விஸ்வநாதனையும், மற்ற கலைஞர்களையும் பாராட்டிவிட்டு சென்றார் நவுஷத்.

- தினமலர் - திண்ணை -

 8-2-15


========================================================================================================================

==================================================================================================================================


இனிய வாசக நண்பர் ஒருவரின் சமீபத்து பின்னூட்டம்...   எங்கள் தளத்தின் ஒரு பழைய இடுகைக்கு!  அந்த வாசகர் யார் என்று சொல்லித்தான் தெரியனுமா என்ன!

அச்சச்சோ எனக்கு காண்ட்ஸும் ஓடல்ல லெக்ஸ் உம் ஆடல்ல... ஒரே பதட்டமா இருக்கு, ஆனா ஸ்ரீராம் கூலா நகைச்சுவையா எழுதியிருக்கிறார்... நண்பனுக்கு எதுவும் ஆகியிருக்கக்கூடாது என வேண்டிக்கொண்டே பகுதி 2இல் நுழைகிறேன்... ஒரேஏஏஏஏஏஏஏஏஏஏஏஏஏஏ ரென்சனா இருக்கெனக்கூஊஊஊஊஊ:))..

கெள அண்ணனுக்கு 20 டிக் டிக்:) எனக்கு 80 டிக் டிக்:))  

கடவுளே எதுவும் ஆகவில்லை எனும்போது மகிழ்ச்சியே, ஆனா இது உண்மையில் உண்மைச் சம்பவமோ?:) என்னால நம்பவே முடியவில்லை.. அதெப்படி நண்பன் மருந்து குடித்து விட்டார் எனத் தெரிந்தும் பேசாமல் இருந்தீங்க..:).. தொல்லை வேண்டாம் போய்த் துலையட்டும் என நினைச்சீங்களோ?:)...

ஒருவேளை அன்று ஏதாவது நடந்திருப்பின், வாழ்நாள் முழுக்க துன்பமாகவே உங்கள் வாழ்க்கை நகர்ந்திருக்குமே:)).. எல்லாம் கும்பிடும் பலன் தான் காப்பாற்றியது எல்லோரையும்.. ஹா ஹா ஹா.. சுபம்!!!  

///அதுவரையிலும் ஒன்றும் நேராதது வேறு எங்களுக்குக் கவலையைத் தந்திருந்தது! ///
கர்ர்ர்ர்ர்ர்ர்ர்ர்ர்ர்ர்:) எல்லோரையும் தேம்ஸ்ல தள்ளோணும்:) என்னா நினைப்பு இது..

////நமக்குத் தெரிந்த ஒரு விஷயத்தை அடுத்தவரிடம் பகிர முடியாத தருணங்களின் பாக்கு மென்று தண்ணீர் குடித்தது போல் நெஞ்சடைக்கும் தவிப்பு இருக்கிறது பாருங்கள்.... அனுபவித்தால்தான் தெரியும்! //

ஹா ஹா ஹா கர்ர்:) இது லவ்வூ ஸ்டோரியை விட மோசமா இருக்கும்போல இருக்கே:) கர்:)  

=============================================================================================================

நெஞ்சு வலியும், மாரடைப்பும் ஒன்றல்ல!

சென்னையைச் சேர்ந்த இதய நோய் மருத்துவ நிபுணர் தியாகராஜமூர்த்தி:

நம் இதயம் ஒரு தசை. நிமிடத்துக்கு, 70 - 80 முறை துடிக்கும். இந்த தசைப் பகுதிக்கு ரத்தத்தைக் கடத்தும் மூன்று முக்கிய ரத்தக் குழாய்களில் சிதைவு ஏற்பட்டால், ரத்தக் கட்டி உருவானால் அல்லது இன்னும் சில காரணங்களால், இதயத்துக்குச் செல்லும் ரத்த ஓட்டம் தடைபடுவது தான் மாரடைப்பு.

தசைப் பிடிப்பு, நெஞ்சு எலும்பிலோ, உணவுக் குழாயிலோ பிரச்னை போன்ற பல காரணங்களால் நெஞ்சு வலி ஏற்படலாம்; அது மாரடைப்பல்ல.

சாதாரண நெஞ்சு வலி, தாங்க முடிகிற அளவில் இருக்கும். மாரடைப்பின்போது நெஞ்சில் மிக அதிக வலி இருக்கும். அந்த வலி இடது கையில் பரவும்; அதிகமாக வியர்க்கும்; மூச்சடைக்கும்; மயக்கமும், உச்சபட்சமாக மரணம் கூட ஏற்படும். பொதுவாக முதல், 'அட்டாக்'கில், 10 - 20 சதவீதம் பேர், மருத்துவமனைக்கு வருவதற்குள்ளாகவே இறந்து விடுகின்றனர்;

அந்தளவுக்கு அது தீவிரமாக இருக்கும்.பெரும்பாலும் நடுத்தர வயதினர் மற்றும் முதியவர்களையே இலக்காகக் கொண்டிருந்த மாரடைப்பு, இப்போது, 20 வயதினருக்கு கூட ஏற்படுகிறது. மரபு, சர்க்கரை நோய், புகைப்பழக்கம், மன அழுத்தம், அதிக கொலஸ்ட்ரால் போன்றவை, மாரடைப்பின் காரணிகள்.

தேங்காய் எண்ணெயில் சமைத்தால், 'ஹார்ட் அட்டாக்' வரும் என்பது தவறான தகவல். தேங்காய் எண்ணெய், குறிப்பாக, 'வெர்ஜின் தேங்காய் எண்ணெய்' நம் உடலுக்கு நல்லதே. இதய நோயாளிகள், காய், பழங்கள் அதிகமாகவும், சாதத்தைக் குறைத்தும், எண்ணெய் உணவுகள், வெண்ணெய், நெய் போன்றவற்றைத் தவிர்த்தும், சாப்பிட வேண்டியது அவசியம்.

விலை குறைவாகக் கிடைக்கும் மத்தி மீனில், இதயத்துக்கு ஆரோக்கியம் தரும், 'ஒமேகா 3' ஆயில் இருப்பதால், அதற்கு முக்கியத்துவம் கொடுத்து சாப்பிடலாம்.

பத்து ஆண்டுகளுக்கு மேல் சர்க்கரை நோய் இருப்போருக்கு, 'சைலன்ட் அட்டாக்' வர வாய்ப்புகள் அதிகம். இவர்களுக்கு நரம்புகள் பாதிப்படைந்திருக்கும் என்பதால், மாரடைப்பு வந்தாலும் நெஞ்சுவலி தெரியாது. வாந்தி உணர்வு, மூச்சு விட சிரமம் மற்றும் வியர்வை போன்ற அறிகுறிகளை உணரலாம்.

இதய நோயாளிகள், ஆஸ்பிரின், அடோர்வாஸ்டாடின், க்ளோபிடாப் மாத்திரைகள், கையுடன் வைத்திருக்க வேண்டியவை என்றும், ஹார்ட் அட்டாக் வந்த நேரத்தில், உடனடியாக இவற்றை சாப்பிட்டால், மூன்று மணி நேரத்துக்கு ஆபத்தில்லை என்றும், ஒரு செய்தி பரவலாக இருக்கிறது. இந்த மாத்திரைகளை சாப்பிடுவதால் தப்பில்லை.

முதல் ஒரு மணி நேரத்துக்குள் இந்த மாத்திரையை உட்கொண்டால், மேலும் ரத்தக் கட்டி உருவாவதை தடுக்கும். ஆனால், இது மட்டுமே சிகிச்சை அல்ல; இது, முதலுதவி மட்டுமே.

================================================================================================

ஃபிப்ரவரி 27...  சுஜாதா மறைந்த தினம்.

========================================================================================================


இனிய பிறந்த நாள் வாழ்த்துகள் அதிரா...  தகவல் அறிய உதவிய உங்கள் அன்பு செக். க்கு நன்றி.  இன்று போல என்றும் வாழ்க...  பல்லாண்டு வாழ்க...

====================================================================