"திங்க"க்கிழமை : கமலா ஆரஞ்சு தோல் பச்சடி- பானுமதி வெங்கடேஸ்வரன் ரெஸிப்பி

கமலா ஆரஞ்சு தோல் பச்சடி  

தேவையான பொருட்கள்:

கமலா ஆரஞ்சு பழத் தோல்(பழம் சற்று பெரிதாக இருந்ததால் நான் ஒரு பழத்தின் தோலை மட்டும் எடுத்துக் கொண்டேன். சிறியதாக இருந்தால் இரண்டு பழங்களின் தோலை எடுத்துக் கொள்ளலாம்)

பச்சை மிளகாய்   -  இரண்டு

புளி                        -  சிறிதளவு

வெல்லம்.           -  ஒரு சிறு கட்டி

உப்பு          - தேவையான அளவு

செய்முறை:

முதலில் கமலா ஆரஞ்சு தோலின் உள் புறத்தை நார்கள் இல்லாமல் சுத்தம் செய்து கொண்டு பொடியாக நறுக்கிக் கொள்ளவும்.  

பச்சை மிளகாயை நீள வாக்கில் கீறி வைத்துக் கொள்ளவும். 

ஊற வைத்த புளியை கெட்டி கரைசலாக கரைத்துக் கொள்ளவும். 

ஒரு வாணலியை அடுப்பில் வைத்து, எண்ணெய் ஊற்றி அது காய்ந்ததும் கடுகு போட்டு அது வெடித்ததும் பொடியாக நறுக்கப்பட்ட கமலா ஆரஞ்சு தோலில் மற்றும் ப.மிளகாயை சேர்த்து நன்கு வதக்கவும். பின்னர் புளி கரைசலை விட்டு மஞ்சள் தூள், உப்பு சேர்த்து கொதிக்க விடவும். புளி பச்சை வாசனை போக கொதித்ததும் வெல்லத்தை சேர்த்து அது கரையும் வரை கொதிக்க விடவும். இப்போது வேண்டுமானால் இன்னும் கொஞ்சம் தண்ணீர் சேர்க்கலாம். 

எல்லாம் சேர்ந்து கொதித்து ஒத்தார் போல் வந்ததும் இறக்கி விடவும். 

புளிப்பு, இனிப்பு, காரம் எல்லாம் சேர்ந்து ஒரு அலாதி சுவை கொண்ட பச்சடி இது.  

புளி சேர்க்காத பொரித்த குழம்பு, மிளகூட்டல் போன்றவைகளுக்கு நன்றாக இருக்கும்.