வெளி கிரகத்திலிருந்து வந்திருக்கும் உயிரினம் போல.. வேதகாலம், சிந்து திராவிட காலம் - அரட்டை

வேதகாலம், சிந்து திராவிட காலம்

ஜனவரி 30,  2015 - - தி இந்து -

வேத கால பண்பாட்டைவிட சிந்துவெளி நாகரிகம் மிகப் பழமையானது: ஐராவதம் மகாதேவன் பேச்சு :

சிந்துவெளி நாகரிகம் வேத கால பண்பாட்டைவிட மிகப் பழமையானது, அது திராவிட மொழிக் குடும்பத்தைச் சார்ந்தது என்றார் கல்வெட்டு ஆய்வாளர் ஐராவதம் மகாதேவன்.

தமிழ்ப் பல்கலைக்கழக கடல்சார் வரலாறு மற்றும் கடல்சார் தொல்லியல் துறை சார்பில் நேற்று நடைபெற்ற முனைவர் எ. சுப்பராயலு, முனைவர் செ.ராசு அறக்கட்டளைச் சொற்பொழிவில் அவர் பேசியதாவது:

சிந்துவெளி நாகரிகம் திராவிட சமுதாயத்தைச் சார்ந்தது. மொகஞ்சோதாரோவில் கிடைத்த முதுகைக் காட்டி உட்கார்ந்த நிலையில் உள்ள விலங்கு வடிவம், கொக்கி வடிவம், நாற்சந்தியைக் குறிக்கும் வடிவம், குவளை வடிவம் ஆகியவை கொண்ட முத்திரைகள் ஆய்வு செய்யப்பட்டன.

சிந்துவெளியில் காணப்படும் சிந்துவெளி எழுத்துக்களின் இறுதியில் காணப்படும் ‘அன்’, நகரத் தலைவன், பாண்டி, பாண்டியன் போன்றவற்றைக் குறிக்கின்றன. இதற்கு இணை யான வார்த்தைகள் பழந்தமிழிலும் உள்ளன. இந்த 4 எழுத்துகளையும் சேர்த்து வாசிக்கும்போது நகர வணிகன் என்ற வாக்கியம் கிடைக்கிறது. இதை, மாற செழிய வழுதி/பாண்டியன் எனவும் வாசிக்க முடியும்.

இதையெல்லாம் ஆராய்ந்து பார்க்கும்போது, சிந்துவெளி மக்கள் பேசியது திராவிட மொழி. அங்கு வாழ்ந்த மக்களே புலம்பெயர்ந்து தென்னகத்துக்கு வந்ததால், சிந்துவெளி மொழிக் கூறுகள் பழந்தமிழ் மொழியில் காணப்படுகின்றன என்பது என் கருத்து.

பாண்டியர்களின் மூதாதையர்கள் சிந்துவெளியில் வணிகத்தில் ஈடுபட்டிருக்கலாம். அவர்கள், தெற்கு நோக்கி நகர்ந்து, திராவிட மொழி பேசியிருக்கலாம். குறிப்பாக, பண்டைய தமிழ் பேசியவர்களாக இருந்திருக்கலாம்.

வெளியிலிருந்து வந்த ஆரியர்கள் சிந்துவெளியில் குடியேறிதன் காரணமாக அங்கு இந்திய- ஆரிய சமுதாயம் உருவாகியிருக்கலாம். இந்திய- ஆரிய பண்பாட்டில் இருந்த ரிக் வேதத்தில் உள்ள வார்த்தைகள் சிந்துவெளியில் இருந்து கடன் பெற்றவை. ரிக் வேதத்தில் வரும் பூசன் என்ற கடவுளின் பெயர் சிந்துவெளி மக்களிடம் இருந்து எடுக்கப்பட்டது.

சிந்துவெளி குறியீடுகளுக்கும் பண்டைய தமிழ் வார்த்தைகளுக்குமான தொடர்பு அதிகமாக இருப்பதை சங்க காலத் தமிழ்ச் சொற்கள் மூலமாக அறியலாம். இதன் மூலம், சிந்துவெளி நாகரிகம், வேத பண்பாட்டைவிட காலத்தால் மிகப் பழமையானது என்பதும் சிந்துவெளி நாகரிக மொழி, தொல் திராவிட வடிவம் கொண்டது என்பதும் எனது முடிவு என்றார் ஐராவதம் மகாதேவன்.

துணைவேந்தர் ம.திருமலை, புதுச்சேரி பிரெஞ்சு ஆய்வு நிறுவனத்தின் இந்தியவியல் துறைத் தலைவர் எ.சுப்பராயலு, பதிவாளர் சே.கணேஷ்ராம், சுவடிப்புலத் தலைவர் சு.ராசவேலு, பேராசிரியர் ந.அதியமான் உள்ளிட்டோர் பங்கேற்றனர்.

"இதன் மூலம் தாங்கள் சொல்ல வருவது......?"

=============================================================================================================

காதல் மழை 

"காதல்....   இதுல நானும் க்ளீன் பௌல்ட்  ஆனவன்தான்..."

=========================================================================================================

வண்ணக்கவி 

​

எதிர்காலம்

என்ன நிறமென்று தெரியவில்லை

கடந்தகாலம்

கருப்பு வெள்ளையில்

நிகழ் காலம்

மட்டுமே

வண்ணங்கள் காட்டுகிறது.

"என்னை விடுங்கோ...   என்னை விடுங்கோ...  ஆரும் என்னைத் தடுக்காதீங்கோ...   நான் ரைன்ல குதிக்கப் போறேன்...."

===================================================================================================================

ஷாங்காய்

[ கொஞ்ச நாட்களுக்கு முன்னால் ஜப்பானியர் பாவம் என்று மொகுசாட்சு வில் பார்த்தோம்..  அவர்களின் மறுபக்கம்! ]

1937 இல் ஜப்பானியர் வந்து சீனாவின் ஷாங்காய் நகரை ஆக்ரமிக்கிறார்கள்.  அந்நிய ஆக்ரமிப்பு மக்களிடையே மனக்கசப்பை வளர்த்தது.  

சர்வதேச செட்டில்மென்ட், பிரெஞ்சுப்பகுதி இரண்டையும் வேறுபடுத்தி நகரின் சீனப்பகுதியை ஜப்பானியர் வளைத்துக் கொண்டார்கள்.  நகரின் இருபகுதிகளையும் இணைக்கும் தங்கப் பாலத்தடியில் ஜப்பானிய பாராக்காரர்கள் நின்றார்கள்.  

அந்தப் பாலத்தைக் கடக்கும் ஒவ்வொரு சீனனும் சீனச்சியும் நெடுஞ்சாண்கிடையாக தரையில் விழுந்து அந்த பாராக்காரர்களை தண்டனிட வேண்டும்.  தவறினால், 'பட்பட்டென சீனன் அல்லது சீனச்சியின் கன்னங்களில் அறை விழும்.  அந்த ஜப்பானியனின் கோபம் அடங்கும்வரை இப்படி அறை விழுந்து கொண்டே இருக்கும்.   

கண்ணியம் வாய்ந்த முதியவர்களை இந்த அவமதிப்புக்கு உள்ளாக்குவதிலே ஜப்பானியனுக்கு விசேஷ ஆனந்தம்.  வயது முதிர்ந்த எந்த சீன ஆணையோ, பெண்ணையோ ஜப்பானியன் அடிக்கும்போதெல்லாம் சீனர்களால் அதைப் பார்த்து சகிக்க முடியவில்லை. எனவே, பெரும்பாலான சீனர்கள் அந்த பால வழியருகில் நாடவேயில்லை.  அயலார் பகுதியில்  இருந்த சீனர்களுக்கும், சீனப்பகுதியில் இருந்த சீனர்களுக்கும்  நடுவே இடைவெளி விழுந்தது.`

ராபர்ட் லோ - Escape from Red China (சீனாவிலிருந்து தப்பினேன்) என்கிற புத்தகத்தில் 

"கில்லாடிப்பா ஜப்பான் ஆளுங்க....  ஆனா நான் இன்னும் கொஞ்சம் அதிகமா எதிர்பார்ப்பேன்"

=================================================================================================================

மதுரை  நாக தீர்த்தம் செல்லும் வழியில் உள்ள பழமையான மரம். என்ன வயதிருக்குமோ...

பரந்து, கைகளைப் பரப்பிக் கொண்டு நிற்கும் ஒரு ராட்சத மனிதனைப்போல...

வெளி கிரகத்திலிருந்து வந்திருக்கும் உயிரினம் போல..

பார்த்துக் கொண்டேயிருந்தால் மனதில் தோன்றும் பல காட்சிகள்!

"மரமாம்...   மரத்துல உருவமாம்....   ஹா...   ஹா...   ஹா... வெட்டி வேலை.."

=================================================================================================

"இந்த வாரம் அவ்வளவுதானாம்..   ஸ்ரீராம் கிளம்பச் சொல்றான்..  வர்றேன்..."