வெள்ளி வீடியோ 180216 : ஒன்றை விட்டு ஒன்றிருந்தால் தாபம் மனதில் வளருமே

   சச்சின் டெண்டுல்கர் விளையாடும் புயல் விளையாட்டில் அவருடன் விளையாடிய கங்குலியின் ஆட்டமோ, டிராவிடின் ஆட்டமோ கண்ணில், கவனத்தில் படாமல் சென்றுவிடும் பார்த்திருக்கிறீர்களா?  உண்மையில் அதுவும் சிறப்பான விளையாட்டாய்த்தான் இருக்கும்.  ஆனால் இந்தப் புயலில் அது காணாமல் போயிருக்கும்.  

   19 வயத்துக்குட்பட்டோர் உலகக் கோப்பையை இளம் இந்திய அணி வென்றிருக்கிறது.  அதன் மூல காரணம், முழுக் காரணம் ராகுல் டிராவிட்.  இரண்டு வருடங்களுக்கு முன் மேற்கிந்தியத்தீவுகள் அணியிடம் இறுதி ஆட்டத்தில் இந்தியா தோற்றபோது டிராவிட் கவலைப்படவில்லை.  அவர் பார்வை தொலைவில் இருந்தது.வருங்கால இந்திய அணிக்கு நல்ல ஆட்டக்காரர்களை வார்த்தெடுப்பதில் கவனமாக இருந்தார்.  சாதித்தும் காட்டியுள்ளார்.

   டிராவிட் என்றதும் இந்த நினைவு வந்ததால் அங்கு சென்று விட்டேன்.  பாடலுக்கு வருகிறேன்.  பூந்தளிர் என்றொரு படம்.  அதில் எனக்கு(ம்) பிடித்த மிக மிக மிக மிக மிக இனிமையான "வா பொன்மயிலே" என்றொரு மெகா பாடலில் காணாமல் போனது இன்றைய இந்தப் பாடல்.  அதே படத்தில் இடம்பெற்ற பாடல்.

   1979 இல் வெளியான படம்.  பஞ்சு அருணாசலத்தின் பாடலுக்கு இசைஞானி இசை. சிவகுமார் கதாநாயகன் என்றாலும் இந்தக் காட்சியில் வருபவர் சிவச்சந்திரன்.  படம் நான் பார்த்ததில்லை.  காட்சியுடன் பாடலைக் கேட்டாலும், காட்சியைக் காணாமல் ஒருமுறை பாடலை தயவுசெய்து ரசியுங்கள்.  எப்போதுமே பாடகரின் குரலின் வசீகரம் அப்போதுதான் முழுவதும் புலப்படும்.

   இடையில் வரும் ஓரிரு வசனங்கள் திருஷ்டிப்பரிகாரம்.  MP3 யில் இந்தக் கஷ்டம் இருக்காது.  ஆனால் இன்று 'வெள்ளி வீடியோ' பதிவாச்சே!

   எஸ் பி பாலசுப்ரமணியம், எஸ் பி ஷைலஜா பாடிய பாடல்.  எஸ் பி ஷைலஜாவுக்கு பல்லவியை மட்டும் இரண்டு முறை பாடுவது தவிர பெரும்பாலும் ஹம்மிங்குக்கு மட்டுமே வாய்ப்பு.  

   மற்றபடி முழுக்க முழுக்க எஸ் பி பி ராஜாங்கம்.  அலையில் மிதந்தாடும் படகு போல சரணத்தில் வரும் வரிகளை எஸ் பி பி பாடியிருப்பார்.  நான் மிகவும் ரசிக்கும் பாடல்களில் ஒன்று.  வரிகளில் பெரிய ஆழமோ, கவர்ச்சியோ இல்லை.  கவர்ச்சி முழுக்க முழுக்க இளையாராஜா டியூனிலும், எஸ் பி பி குரலிலும்தான்.   ரசித்துவிட்டுச் சொல்லுங்கள்.  இளைமையை ஆட்சி செய்யும் பாடல்.  எளிமையான, இனிமையான ஒரு பாடல்.

தனிமை இருளில் உருகும் நெஞ்சம் துணையை விரும்புமே 

துணையை விரும்பி இணையும்பொழுது அமைதி அரும்புமே 

ஒன்றை விட்டு ஒன்றிருந்தால் தாபம் மனதில் வளருமே 

காதலின் பார்வையில் சோகம் விலகும் 

நடந்து முடிந்த கதையை மறந்து புதிய வழியிலே 

புதிய வழியில் புதிய உறவில் புதிய உலகிலே 

செல்லுங்களேன் செல்வங்களே உலகம் மிகவும் பெரியது 

கருணையின் கைகளில் தாய்மை மலரும்