"திங்க"க்கிழமை : சாமை பாயசம்..- துரை செல்வராஜூ ரெஸிப்பி

சாமை பாயசம்..

துரை செல்வராஜூ 

==============

அக்கா... அக்காவ்!...

அடடே.. தாமரை!.. வாம்மா!.. வா!...

என்னக்கா.. ஏலக்காய் வாசனை வருது!?...

ஆமம்மா!.. அத்தான் சாமைப் பாயசம் செய்யச் சொன்னாங்க!...
நான் செஞ்சிக்கிட்டுருக்கேன்!..

என்னது.. சாமையா?...

ஆமாம்.. சாமை தான்!...

அதை அவிச்சு குதிரைக்கில்ல கொடுப்பாங்க!...

குதிரைக்குக் கொடுக்கிறது கொள்ளு!... இது சாமை!..
சிறு தானிய வரிசையில சிறப்பானது..ம்மா இது!..

அப்படி என்ன சிறப்பு!?... அரிசி, கோதுமைய விட!?...

நம்ம ஊரு அரிசி, தினை, சாமை, வரகு, கேழ்வரகு இதுங்களோட பெருமைக்கெல்லாம்
கோதுமை ஈடு கொடுக்க முடியுமா!...

என்னக்கா... இப்படிச் சொல்றீங்க!...

நிஜந்தான்....டா செல்லம்!...
சாமையை தொடர்ந்து சாப்பிட்டா..நீரிழிவு வராம செய்றதோட -
வந்துட்டா ஒரு கட்டுக்குள்ள வைக்குது....

அரிசியை விடவும் அதிகமா நார்ச்சத்து இருக்கிறதால
ஜீரண சக்தி பெருகுது... வயிற்றுக் கோளாறுகள் ஏற்படாது...

எல்லாத்தையும் விட வேறொரு நல்லதும் செய்யுது!...

அது என்னக்கா!...

அதை அப்புறம் சொல்றேன்.. இப்போ சாமை பாயசம் சாப்பிட்டுப் பாரு!...

அக்கா... வாசமே ஆளத் தூக்குதே!.. எப்படிக்கா.. செஞ்சீங்க!?..
விவரமா சொல்லுங்க எழுதிக்கிறேன்!...

சாமை 2 கப் (150 கிராம்), சேமியா 1 கப் (75 கிராம்) - இது பங்களாதேஷ் சேமியா..
சேமியாவுக்கு அங்கே ஷெமாய்..ன்னு பேரு!..
இனிப்பு இல்லாத சோன்பப்டி மாதிரி இருக்கும்!..

பங்களா தேஷ் சேமியாவா!?.. அதெப்படி கிடைச்சது?..

அண்ணாச்சி ஊர்ல இருந்து வந்தப்போ கொடுத்தாங்க!.. சரி.. நீ எழுதிக்க!..

வெல்லம் 150 கிராம்,
தண்ணீர் அரை லிட்டர்... தேங்காய்ப் பால் 100 மில்லி,
வெண்ணெய் 10 கிராம், கொஞ்சம் ஏலக்காய், திராட்சை,
பாதாம் பருப்பு இல்லேன்னா முந்திரி...

அவ்வளவு தானா அக்கா!...

ஆமாம் தாமரை... இப்போ எப்படி செய்றது...ன்னு பார்ப்போமா!..

ஓ!..

சாமையை ரெண்டு தரம் அலசி இந்த மாதிரி வடிகட்டியால வடிகட்டி
அஞ்சு நிமிஷம் ஊற விடணும்....

வடிகட்டி எதுக்கு அக்கா!..

கையால கழுவி எடுக்கிறப்ப வழிஞ்சு ஓடிப்போகும்.. கைக்குப் பிடிபடாது..

ம்ம்.. சொல்லுங்க!..

இந்த அஞ்சு நிமிஷத்துக்குள்ள
வெல்லத்தை கொஞ்சம் தூளா உடைச்சுக்கணும்..
ஏலக்காயை நசுக்கிக்கணும்...

இப்போ தண்ணி நல்லா தழைச்சிருக்கும்... சாமையை சிந்தாம சிதறாம கொதிக்கிற
தண்ணியில போட்டு ஒரு தரம் கிளறி விட்டுட்டு

இன்னொரு அடுப்பில பத்து கிராம் வெண்ணெயைப் போட்டு
அது உருகுனதும் பாதாம் திராட்சையைப் போட்டு வதக்கிக்கணும்...

இப்போ சாமை கொதிச்சு வரும்.. இந்த நேரத்தில சேமியாவைப் போட்டு
தேங்காய்ப்பாலை ஊற்றி மறுபடியும் ஒரு தரம் கிளறி விடணும்...

அடிக்கடி கிளற வேண்டாமா அக்கா!...

தேவையில்லை... தண்ணி தாராளமா இல்லேன்னா
இன்னொரு குவளை சுடு தண்ணி ஊத்திக்கலாம்!...

தளதள...ன்னு கொதித்து வர்றப்போ - சாமை வெந்திருக்கும்..
கடைசியா ஏலக்காய் வதக்கி வைச்சிருக்கிற பாதாம் திராட்சை
இதெல்லாத்தையும் போட்டு கிளறி பாத்திரத்தை மூடி
அடுப்பை அணைத்து விட்டால் முடிந்தது வேலை...

பத்து நிமிஷம் கழித்து அழகா எடுத்து சாப்பிட வேண்டியது தான்!...

அக்கா... அக்கா!.. எவ்வளவு சுலபமா இருக்கு..
இத்தனை நாள் தெரியாம போச்சே!..

அதுசரி... சாமையைப் பத்தி என்னமோ
கடைசியா சொல்றேன்னு சொன்னீங்களே!.. என்ன அது?..

அதுவா!... வாலிபப் பசங்களுக்கு தாது விருத்தியாகும்..
பொண்ணுங்களுக்கு இரத்த சோகை வராது.. கர்ப்பப்பை பலப்படும்!...

இதையெல்லாம் மறந்ததால தான்
செயற்கை கருவூட்டல் மையம் - எங்கே இருக்கு..ன்னு கிளம்பியிருக்காங்க!..

இவ்வளவும் உங்களுக்கு எப்படிக்கா தெரியும்!?..

எல்லாம் உங்க அத்தான் கத்துக் கொடுத்தது தான்!...

நல்ல அத்தான்... நல்ல அக்கா!...

சரி.. சாமை பாயசம் எப்படி இருந்தது!.. அதைச் சொல்லலையே!...

இதைத்தான் Blog ல போடப் போறீங்களே..
அவங்க சொல்லுவாங்க!..
நான் வரட்டுமா அக்கா!..

சரிம்மா.. கவனமா போய்ட்டு வா!...
ஃஃஃ

அன்பின் நண்பர்களே...

இப்போது முதல் தித்திக்கத் தித்திக்க
திங்கட்பதிவுகளில் நானும் உங்களுடன்!..

ஜாம்பவான்களுக்கு மத்தியில் அல்ல..
சும்மா ஒரு ஓரத்தில்!..

அன்பின் ஸ்ரீராம் அவர்களுடைய அழைப்பின் பேரில் -
சாமைப் பாயசம் கொண்டு வந்திருக்கின்றேன்...

அவ்வப்போது என்னளவிற்கு நானாக செய்வது இது...

மேலே குறித்த பொருட்களுடன்
தேங்காய்ப் பாலுக்குப் பதிலாக -
Instant Coconut Milk Powder 100 கிராம் பயன்படுத்தி உள்ளேன்..
தேங்காய் வாங்கி - பால் பிழிந்தெடுப்பதெல்லாம் சற்றே சிரமம்...

சாமை சரியாக ஊறவில்லை என்றால்
மேலும் தண்ணீர் வாங்கும்..
கவனத்தில் கொள்ளவும்...

பாத்திரத்தில் பாயசம் கொதிக்கும் நிலையை
எடுக்க மறந்து போனேன்...

சமையலறையில் பொதுவான அடுப்பு..
சற்றே கசடுகளுடன் இருக்கும்...
தவறாகக் கொள்ள வேண்டாம்..

நேரம் கிடைக்கும்போது
சாமை பாயசம் செய்து பாருங்கள்...

நமக்கு நல்லது செய்யும் தானியம் சாமை...

சாமையை வாழ வைப்போம்..
நம்மையும் சாமை வாழவைக்கும்..

உங்கள் கருத்துரைகளை எதிர்நோக்கி
என்றென்றும் அன்புடன்...