பூவின் தற்கொலை

பிரேக்கிங் நியூஸ் : யாரும் தன்னைப் பறிக்காத சோகத்தில் பூ ஒன்று செடியிலிருந்து குதித்து தற்கொலை செய்து கொண்டது.  

சென்னை,  மே 1 :  யாரும் தன்னைப் பறிக்காததால் தான் அழகாயில்லை என்று நினைத்து பூ ஒன்று செடியிலிருந்து குதித்துத் தற்கொலை செய்து கொண்டது.  குதித்துப் பலமணிநேரம் ஆகியும் அந்தப் பூ வாடாமல் இருந்தது சிறப்பு மட்டுமல்லாமல் காண்போர் கவனத்தைக் கவர்ந்து, நெஞ்சத்தை உருக்குவதாக இருநதது.

அதே செடியில் மலர்ந்திருந்த இன்னொரு மலர் அங்கேயே இருந்தது.  அதனிடம் இது பற்றி விசாரித்தபோது "எனக்கும் புரியவில்லை.  இதில் என்ன இருக்கிறது?  செடியிலிருந்து பறித்தால் சில மலர்கள் தெய்வத்திடம் சேர்கின்றன.  சில மலர்கள் பெண்கள் கூந்தலை அலங்கரிக்கின்றன.  ஏன் இந்த மலர் அவசரப்பட்டது என்று தெரியவில்லை.  ஒரே கொடியில் பூத்த நான், இதோ இங்கேயேதான் இருக்கிறேன்.  ஏன் எனக்கு அந்த எண்ணம் வரவில்லை?  இது அவரவர் மனநிலையைப் பொறுத்தது.  மரணம் இயற்கையாக வரட்டுமே..  நாளை நானும் வாடத்தான் போகிறேன்" என்றது.

அருகிலிருந்த எருக்கம் மலர்கள் எங்களை பார்த்து சோகமாகப் புன்னகைத்து விட்டுப் பேசியதாவது :  

"ஒரு நாள் பறிக்கா விட்டாலே இவைகளுக்கு மன பலவீனம் வந்து விடுகிறது.  மனிதன் பறித்தால்தான் உசத்தியா?  இவைகளுக்கு சுய கௌரவமே இல்லை.  நாம் பிறந்த இடத்திலேயே இருந்தால் இளப்பமா?  விலை போகவில்லை என்று அர்த்தமா?   எங்களைப் பாருங்கள்..  வருடத்தில் ஒருநாள்தான் எங்களுக்கு மவுசு.  விநாயகர் சதுர்த்தி அன்று மட்டும் வந்து பறித்துப் போவார்கள்.  மற்ற நாட்களில் செடியிலேயே இருந்துதான் வாடுகிறோம். காயாகிறோம்.  யார் எங்களை மதிக்கிறார்கள்?  எங்களை மதிக்காத அவர்களை நாங்கள் ஏன் மதிக்க வேண்டும்?  இதற்கு ஏன் தற்கொலை?" என்று கேள்வி கேட்டன.

முதலில் பேசிய இந்த மலர் மெல்லிய குரலில் சொன்னது " எருக்கம் மலர்களுக்கு காயாகும் வாய்ப்பு இருக்கிறது.  எங்களுக்கு அந்த வாய்ப்பில்லை.  என்றாலும் அதன் கருத்தையும் மதிக்கிறேன்"


பின் குறிப்பு : படங்கள் என்னால் எடுக்கப்பட்டவை.

========================================================================================

எங்கிருந்தோ பணமோ, நகையோ, செல்வமோ கிடைப்பதாகக் கனவு கண்டால் மறுநாளிலோ, வரும் காலங்களிலோ நிஜத்திலும் நமக்கு அப்படி நடக்கும் என்கிற நம்பிக்கை வருவதில்லை.  ஆனால் கெட்ட கனவு ஏதாவது கண்டால் மட்டும் 'நடந்து விடுமோ?' என்கிற அச்சமும் குறுகுறுப்பும் வருவதேன்?

===================================================================================================

இந்தப் புகைப்படம் நான்கு வருடங்களுக்கு முன்னால் எடுக்கப்பட்டது.  சென்ற வாரம் இந்தப் பக்கம் சென்றபோது அய்யனார் எதிரே ஒரு குதிரையும் காணப்பட்டது.  வண்டியில் வந்ததாலும், வேகமாகத் தாண்டி விட்டதாலும், அலைபேசியை எடுத்துப் படமெடுக்க நேரமில்லாததாலும் அதை எடுக்கவில்லை!

======================================================================================================

நேற்றைய புதிரின் விடைகள் :

  1)  கை கொடுக்கும் கை என்பது மிகப் பொருத்தம்.  இணைந்த கைகளும் ஓகே.  2)  'தீ' என்பது பொருத்தம்.  நெருப்பு என்றொரு படம் இருக்கிறதா என்று நினைவில்லை.  'நெருப்புடா' என்றொரு புதிய படம் வருகிறதாம்.   3)  நீலமலர்கள்.  4)  ரயில் பயணங்களில் (நான் நினைத்தது)  'பயணங்கள் முடிவதில்லை'யும் பரவாயில்லை என்றே தோன்றுகிறது!  5) சூரியகாந்தி  6)  நீலவானம்  7)  கன்னத்தில் முத்தமிட்டால்   8)  'அலைகள்' என்பது நான் நினைத்தது.  அலைகள் ஓய்வதில்லை, கரையைத் தொடாத அலைகள் (யாரும் சொல்லவில்லை) பானு அக்கா மட்டுமே இதற்கான சரியான விடை சொல்லி இருந்தார். கடலோரக்கவிதைகள், கடல் ஆகிய பதில்களும் சரியானவையே.  9)  "மேகத்துக்கும் தாகமுண்டு" என்கிற படத்தைச் சொல்ல முயன்றிருக்கிறேன்.  விடை தெரிந்தபின் மறுபடி அந்தப் படத்தைப் பாருங்கள்.  ஓகேயா என்று சொல்லுங்கள்.  (இதை நான் எழுதி வைத்து இரண்டு மணி நேரம் கழித்து கோமதி அக்கா சரியான விடை சொல்லியிருந்தார்கள்.  ஆச்சர்யம்) 10) அச்சாணி என்பது மிகச் சரியான விடை.  அதற்காகவே படத்தை ஜும் செய்திருக்கிறேன்.  வண்டிச்சக்கரமும் ஓகே.  சக்கரம் என்னும் பதிலும் ஓகே!

=============================================================================================================

நாய் பெற்ற தெங்கம்பழம்!

======================================================================================================================================

வரவேண்டும் மகாராணி.....

=======================================================================================================================

மீண்டும் அடுத்த வியாழன்....