பண்டாரம்... எனக்கு வழி காட்டுங்க.. வானம் நிறைக்கும் அதிசய நிலா அனுஷ்கா அழகான பூ!

இப்போது ஊபர், ஓலா போன்றவை புக் செய்தபின் அவர்களுக்கு வழி சொல்லவேண்டும்.  அவர்களுக்குக் காட்டும் ஜி பி எஸ் ஸை நம்பினால் பெரும்பாலும் கதை கந்தல் ஆகிவிடும்!  நம் இருப்பிடத்துக்கு நேர் பின்னால் சாலை, அல்லது முன்னால் சாலையில் வந்து நின்றுகொண்டு கூப்பிடுவார்கள்.   

"இங்கதான் ஸார் உங்க சிக்னல் காட்டுது"

அங்கிருந்து அவர்கள் நாம் இருக்கும் இடத்துக்கு வரவேண்டும் என்றால் ஒரு ஒன்வே, இரண்டு வளைவுகள் என்று திரும்பி  பிரதான சாலையை மறுபடி பிடித்து, அப்புறம் நாம் சொல்லும் இடத்துக்கு வரவேண்டியிருக்கும்.

அதற்கு வழி சொல்லும்போதே அவர்களின் கோபத்துக்கு ஆளாகவேண்டியிருக்கும்.  சமயங்களில் ட்ரிப்பை கேன்சல் செய்துவிடுவார்கள்.  கொஞ்ச நேரம் ஆகிவிட்டாலும் நாம் கவனிக்கவில்லை என்றால் அடுத்த ட்ரிப்பில் 50 ரூபாய் நமக்கு பச்சா வைத்து விடுவார்கள்.

நான் சொல்ல வந்த விஷயம் வேற...  

வழி சொல்லும் கலை.  

நம் வீட்டுக்கு புதிதாக வருபவர்களுக்கோ,  இது மாதிரி வாடகைக்கார் ஓட்டுநர்களுக்கோ வழி சொல்வதும் ஒரு கலை.  

என் உறவினர் ஒருவர் வீட்டுக்குச் செல்லும் வழி எத்தனை முறை போனாலும் மனப்பாடம் ஆகாது.  குழப்பம்தான் வரும்.  சிக்கலான வழி.  முதல்முறை  போகும்போது வழி கேட்டுக்கொண்டு போனோம்.  அவர் சொன்ன வழியைக் கேட்டு மண்டை காய்ந்துபோய் "இருங்கள்..  நீங்கள் முதலில் சொன்ன லேண்ட்மார்க்குக்கு வந்து கால் செய்கிறேன்" என்று சொல்லி விட்டு அப்படியே செய்தோம்.

"ஆ...   வந்துட்டீங்களா?  உங்க ரைட்ல ஒரு ரோட் திரும்புதா?"

"ஆமாம்..."  டிரைவர் அங்கு வண்டியைத் திருப்பினார்.

"அங்கே திரும்ப வேண்டாம்...  நேரா வந்து லெஃப்ட்ல திரும்புங்க..."

"அட...  டிரைவர் சார்...  இங்க இல்லையாம்...  திரும்புங்க...  நேராப்போய் லெஃப்ட்.....   ம்ம்...   லெஃப்ட்ல திரும்பிட்டோம்..."

"ஒரு கோவில் வருதா?"

"ம்ம்ம்..."  டிரைவர் கிட்ட சிக்னல் செய்து மெதுவாய் போகச் சொன்னோம்.

"அதைத்தாண்டி வாங்க...  மூன்று ஸ்பீட் ப்ரேக்கர்ஸ் வரும்..."

மூன்றையும் தாண்டினோம்.  "தாண்டிட்டோம்"

"ஐயோ...   மூன்றையுமா?  இரண்டாவது ஸ்பீட் பிரேக்கர் தாண்டியதும் லெஃப்ட்ல திரும்பணும்"

"கடவுளே..  டிரைவர் ரிவர்ஸ் எடுங்க..."

டிரைவர் முனகிக்கொண்டே ரிவர்ஸ் எடுத்தார்.

"அப்புறம்"

"அங்க ஏர்டெல் னுப்போட்டு ஒரு கடை இருக்கா"

"டிரைவர் வண்டியைக் கொஞ்சம் நிறுத்திக்குங்க...நீங்க சொல்லுங்க...  அந்தக் கடை இருக்கு..  அப்புறம் எப்படிப் போகணும்?"

பொறுமை இழந்து கொண்டிருந்த டிரைவரை வைத்துக்கொண்டு ஒருவழியாய் அங்கு போய்ச் சேர்ந்தோம்.

"அப்பாடி...  ஸ்டெப் பை ஸ்டெப்பா இவங்களுக்கு ஒரு வழியாய் போன்லேயே வழி சொல்றதுக்குள்ள தாவு தீர்ந்துடுச்சு" னு அவர் அருகில் இருந்தவரிடம் சொல்லிக் கொண்டிருந்த போது அங்கு சென்றுவிட்டோம்.

என் பெரிய பையன் வாடகைக்கு கார் ஓட்டுநர்களுக்கு வழி சொல்லும்போது ஒரு கிலோ மீட்டருக்கு முன்னால் இருக்கும் இடத்திலிருந்து ஆரம்பித்துக் கொள்வான்.  அவன் அங்கிருந்து சொல்ல ஆரம்பிக்கும் வழியைக் கேட்க நமக்கே பொறுமை இருக்காது.  ஹோட்டல் பெயர்களாக சொல்லிக் கொண்டு வருவான்.

இதைச் சொல்லும்போது 80 களின் மதுரை நினைவுக்கு வருகிறது.  எந்த இடத்துக்கு வழி சொல்லவேண்டும் என்றாலும் ஒரு தியேட்டர் பெயரை வைத்தே வழி சொல்வார்கள்.  அந்த அளவு தியேட்டர்களும் இருந்தது மதுரையில்.

உங்கள் அனுபவம் என்னவோ?

================================================================================================================

"பண்டாரம்" என்பது அழகு தமிழ்ச் சொல். நம்முடைய அன்றாட வழக்கில் இந்தச் சொல், ஒன்றுமில்லாதவர்களை, ஓட்டாண்டிகளை, அன்றாடங் காய்ச்சிகளைக் குறிக்கும்.

ஆனால், பண்டாரம் என்றால் பொக்கிஷம் அல்லது கருவூலம் என்று பொருள். அதாவது பண்டங்களைக் கொட்டி வைக்கும் இடம்.

'அரச பண்டாரத்திலிருந்து பொருள் எடுத்து' என்று பழங்காலச் சொலவடைகள் உண்டு.; அரச கருவூலத்திலிருந்து செலவழிப்பதை இப்படிச் சுட்டிக் காட்டினார்கள்.

உலகியலை விட்டு விட்டு, இறையருளை நிரம்பச் சேமித்துக் கொண்டவர்களைப் 'பண்டாரம்' என்றழைத்தார்கள். காலப்போக்கில் சொல்லின் பொருளே சிதைந்து விட்டது.

ஓட்டாண்டி, அன்றாடங் காய்ச்சி போன்ற வழக்குகளும், யாந்திரீகப் பொருட்கள் மீது பற்று வைக்காமல், அவற்றைச் சேர்த்து வைக்காமல் (சேர்த்ததைப் பாதுகாப்பதற்காக மேலும் மேலும் சேர்த்துக் குவிக்காமல்), கிடைப்பதைப் புசித்துக் கடவுளையே சிந்தித்த, ஆனந்த நிலையைக் குறிப்பதற்காகத் தோன்றியவை ஆகும்.

' 2016  துக்ளக்'கில் டாக்டர் சுதா சேஷையன் 'பேசும் பரம்பொருள்' தொடரில்

===========================================================================================================

இது என்ன பூ?  தெரியாது.  ஆனால் என்ன அழகு?  என்ன கலைநயத்துடன் படைக்கப்பட்டுள்ளது இல்லை?  வெண்ணிதழ்கள்...

அதன்மேல் இழை இழையாக சிறு சிறு மென்கோட்டிழைகள்....

அதற்கும் அடுத்து லைட் பிங்க் நிறத்தில் ஒரு வட்டம்...

அதன்மேல் பச்சை நிறத்தில் ஒரு டிஸைன்...   அழகு!

இன்னொரு கோணத்தில்...

 மேலிருந்து... 

பக்கவாட்டிலிருந்து...  இன்னும் அழகாக...  இன்னும் தெளிவாக...

கொஞ்சம் பெரிய அளவில் பார்ப்போமா?!!

இவ்வளவு அழகான பூக்கள் பின்னர் அடுத்த கட்டத்தில் எப்படி கடுமையாக மாறுகின்றன பாருங்கள்....!!!

பூவின் எந்த பாகம் இப்படி முள்ளாக மாறுகிறது?

இயற்கையின் படைப்பில் என்ன ஒரு பாதுகாப்பு ஏற்பாடு!

============================================================================================================

சென்ற வாரம் கவிதை இல்லை என்று கீதா வருத்தப் பட்டிருந்தார்.  ரொம்பவே Feel செய்த அவருக்காக... !

====================================================================================================

என்னைக் காணோம்னு அதிராவெல்லாம் தேடறாங்கன்னு ஸ்ரீராம் சொன்னார்.  எப்படி இருக்கீங்க நண்பர்களே?  அ ர ம எப்படி இருக்கு?

அடுத்த வாரம் பார்ப்போமா....?