"திங்க"க்கிழமை : ஆப்பிள் Pie பை - நெல்லைத்தமிழன் ரெஸிப்பி.

என் பையனின் பிறந்த நாள் டிசம்பரில் வந்தது. அவனுக்கு சர்ப்ரைசாக இருக்கட்டும் என்று என் ஹஸ்பண்டும் பெண்ணும் பெங்களூருக்கு முந்தின நாள் இரவு சென்றார்கள். அப்படிப் போகும்போது அவனுக்காக, என் பெண் ஆப்பிள் Pie செய்துகொண்டு போனாள். அவள் ஆப்பிள் Pie படத்தை எனக்கு வாட்சப் மூலமாகப் பகிர்ந்துகொண்டிருந்தாள். அதன் அழகில் கவரப்பட்டு, Step by Step புகைப்படம் எடுத்திருந்தால் ‘திங்கக் கிழமை’ பதிவுக்கு அனுப்பியிருப்பேனே என்று சொன்னேன். பெங்களூரில், தாத்தா/பாட்டிக்காக அவள் மீண்டும் இதனைச் செய்தாள். ஆனால் அங்கு Cake Oven இல்லை. அதனால், ‘குழிப்பணியாரம்’ செய்யும் தாவாவை உபயோகப்படுத்திச் செய்தாள்.

சென்னையில் செய்தது, ஒரு பெரிய ஆப்பிள் Pie. பெங்களூரில் செய்தது மினி ஆப்பிள் Pies. பதிவில் பெரிய ஆப்பிள் Pie படத்தையும் கொடுத்திருக்கிறேன்.

நான், உணவு விஷயத்தில் ரொம்ப கன்சர்வேடிவ். (டிரெடிஷனலில் வராத) புதிய உணவு எதையும் try பண்ணமாட்டேன் அதனால்தான் Bhel Puri சாப்பிட்டுப்பார்க்கலாமே என்று என் மனது ஒப்புக்கொள்வதற்கு 20 வருடங்களுக்குமேல் ஆகிவிட்டது. இதுபோல பாவ் பாஜியும்தான். வெளிநாட்டு உணவுவகைகள், பிட்சாவைத் தவிர வேறு எதையுமே சாப்பிட்டதில்லை (Unfortunately எனக்குத்தான் எல்லாவித உணவையும் சாப்பிடும் வாய்ப்பு கிடைக்கிறது. ஆனால் அந்த எல்லாச் சந்தர்ப்பங்களிலும் நான் பழ வகைகளும், Fresh Juiceம் சாப்பிடுவேன். கிடைக்கும் இடங்களில் சாதம்/Dhalஐயும் வாங்கிக்கொள்வேன். சொன்னா ஆச்சர்யமா இருக்கும். லண்டன்ல ரொம்பப் புகழ்பெற்ற உணவகத்துல நாங்க-Business dinnerக்குப் போயிருந்தபோது, எனக்கு மட்டும் அங்கு அரிசி சாதமும் Dதாலும் கேட்டு வாங்கிக்கொண்டேன். வேற வழியே இல்லைனா, பிரெட், பட்டர் சாப்பிடுவேன்). எனக்கு ஆப்பிள் Pie செய்துகொடுத்திருந்தால் விருப்பப்பட்டு சாப்பிட்டிருக்கமாட்டேன். ஆனால் எல்லோரும் ரொம்ப நன்றாக இருந்தது என்று சொன்னார்கள். அதனால்தான் ஆப்பிள் Pie திங்கக் கிழமை பதிவாக வருகிறது.

எப்போவும் சாத்துமது, கீரை வடை, மோர்க்குழம்பு என்று வருவதற்குப் பதிலாக, அப்போ அப்போ, ‘ஒடியல் கூழ்’ போன்று வித்தியாசமான சமையல் குறிப்புகள் வருவது நல்லதுதானே.  அதனால், என் பெண்கிட்ட செய்முறை அனுப்பச்சொல்லி, அதனை மொழிபெயர்த்துப் பதிவாக அனுப்பியிருக்கிறேன். இப்போ, எப்படிச் செய்வது என்று பார்ப்போம்.

தேவையான பொருட்கள்

Base மாவுக்கு

1 ½ கப் மைதா  (அல்லது 1 ¼ கப்)

2/3  கப் வெண்ணெய். உருக்காதது, கட்டியானது (Frozen)

துளி உப்பு

குளிர்ந்த நீர் (தேவைனா ஃப்ரீசர்ல கொஞ்ச நேரம் வச்சுக்குங்க)

ஆப்பிள் Fillingக்கு

4 பெரிய ஆப்பிள்

இலவங்கப் பட்டை பவுடர் Cinnamon – சுவையைப் பொருத்து

ஜீனி – தேவையான அளவு – சுவையைப் பொருத்து

செய்முறை

முதல்ல மாவைத் தயார் செய்துகொள்ளணும். இது 6 மணி நேரத்துக்கு முன்னாலயே தயார் செய்யணும்.

ஒரு பாத்திரத்தில், மாவையும் தேவையான உப்பையும் போட்டுக்கொள்ளவும். அத்துடன் சிறிது சிறிதாக கியூப் வடிவத்தில் வெட்டிய கட்டி வெண்ணெயைச் சேர்க்கவும். இதை உதிர் உதிராக ஆகும்படி நன்றாகப் பிசையவும் (படத்தைப் பார்த்துக்கொள்ளுங்கள்). அதன்பிறகு, 2 ஸ்பூன் குளிர்ந்த தண்ணீர் விட்டு, பூரி/சப்பாத்தி மாவு பதத்திற்குப் பிசைந்துகொள்ளவும். இதனை குளிர்சாதனத்தில் 3-5 மணி நேரத்துக்கு வைத்துவிடவும். 

ஆப்பிளை ஸ்லைஸ் செய்யுங்கள் (மெலிதாக படத்தில் இருப்பதுபோல் திருத்தவும்)

ஒரு கடாயில், கொஞ்சம் ஜீனியை evenஆகத் தூவி, அதில் ஆப்பிள் லேயர்களை வைத்து அதன் மேல் இலவங்கப் பட்டைப் பொடியைத் தூவவும். இதைப்போலவே திரும்பவும், ஜீனி தூவணும், அதன்மேல் ஆப்பிள், அதன் மேல் சின்னமன் பொடி தூவவும். இதனை எல்லா ஆப்பிள் சீவல்கள் முடியும் வரை செய்யவும். ஞாபகம் இருக்கட்டும், ஜீனி மிகவும் குறைவாகத் தூவணும். அதுபோல் இலவங்கப்பட்டைப் பொடியும் ரொம்பக் கொஞ்சமாகத் தூவணும். Cinnamon ரொம்ப strong flavor. அனேகமா ¾ டீ ஸ்பூனுக்கும் குறைவான cinnamon 4 ஆப்பிளுக்கும் போதுமானது.

இப்போ அடுப்பில் வைத்து லைட்டாக சூடுபடுத்தவும். ஜீனி caramelize ஆகி உருகட்டும். ஆப்பிளும் முக்கால் பதம் வேகட்டும். ஆப்பிள் ஸ்லைஸை நாம மடக்கும்படி கொஞ்சம் நெகிழ்வா இருக்கணும். அதுதான் பதம். இப்போ அடுப்பை அணைத்துவிட்டு, ஆப்பிள் திருவல்களை எடுத்து ஒரு தட்டில் போட்டுக்கொள்ளவும். கடாயில் இருக்கும் ஜீனி, Cinnamon, ஆப்பிள் வாசனை கலந்த தண்ணீர் (பாகுபோல்) அப்படியே இருக்கட்டும்.

இப்போ Pieக்கு அடி மாவு (base) தயார் பண்ணணும். நாம, மாவை குளிர்சாதனத்திலிருந்து எடுக்கும்போது, கட்டியா Frozen ஆகியிருக்கும். (வெண்ணெயின் காரணமாக). வெளியில் வைத்து கொஞ்சம் சாஃப்ட் ஆனதும், நன்றாக மீண்டும் ஒருமுறை பிசைந்து மாவு பதத்திற்கு வரவைங்க.

இந்த மாவை ½ சென்டிமீட்டர் தடிமனில் வட்டமாக ரோல் பண்ணிக்கோங்க. பிட்சா பேஸ் போல இருக்கும். நாம உபயோகப்படுத்தப்போற Panஐவிட இது கொஞ்சம் பெரிதாக இருக்கணும். அதாவது, அந்த Baseஐ Panல் வைக்கும்போது, அடியையும் அது மறைக்கணும், ஓரங்களையும் மறைக்கணும். அப்புறம் இதை, கேக் அவனில் ஒரு 10 நிமிடத்திற்கு வைக்கவும். பிறகு அதை வெளியில் எடுக்கவும்.

அதன் மீது ஆப்பிள் திருவல்களை அடுக்கவேண்டும். தோல் பகுதி மேலாக இருக்கணும். தட்டையான அடிப்பகுதி கீழே இருக்கணும். அடுத்த ஸ்லைஸ் ஓரங்களுக்கு எதிராக அடுக்கும்போது, ஒன்றை ஒன்று overlap செய்ததுபோல் இருக்கும். அப்படி அடுக்கும்போதுதான் அழகாக ரோஜாப்பூபோல் வரும். இல்லைனா வரிசையா அடுக்குனதுபோல் ஆகிடும். இந்தமாதிரி அடுக்குவதை, வெளிப்பாகத்திலிருந்து உள் பாகத்துக்கு ஒவ்வொரு லேயரா பண்ணிண்டு வரணும். இப்படியே மத்திய பாகத்துக்கு வரும்போது ஒரு ரோஜாப்பூப்போல் செய்யவேண்டும்.

அதுக்கு, படத்தில் காண்பித்ததுபோல் சிறிய அளவு மாவின் மீது, ஆப்பிள் திருவல்களை நீளவாக்கில் அடுக்கி அதனை ரோஜாப்பூ போல் சுருட்டவேண்டும். இதனை நடுவில் வைக்கவேண்டும். பொதுவா இடைவெளி இல்லாதவாறு இவற்றைச் செய்யவேண்டும். Tightஆ இருந்தாத்தான் அழகா இருக்கும். (படத்தில் இருப்பதுபோல்)

அப்புறம் இதை அவன்ல வைத்து Bake பண்ணணும். 20-40 நிமிடங்கள் ஆகும். Base cook ஆயிடுத்தான்னு பார்த்துக்கணும்.

இப்போ, கடாய்ல ஜீனி, Cinnamon, ஆப்பிள் ஜூஸ் மீதி இருக்கும். அதில் தேவைப்பட்டால் (ஜூஸின் அளவைப் பொறுத்து) இன்னும் கொஞ்சம் ஜீனி, Cinnamon Powder போட்டு சுட வைக்கணும். கொதிக்கறதுக்கு முந்தைய ஸ்டேஜில், அதில் ஒரு கியூப் வெண்ணெய் போட்டு, அது கரையும்வரை காத்திருக்கவும். கலக்கிவிடவும். ஒரு நிமிடம் கழித்து அது ‘சாறு’ sauce வடிவத்துக்கு வந்ததும் அடுப்பை அணைத்துவிடவும். உடனே இதனை, Bake செய்திருக்கும் Pieமீது பரவலாக விட்டுவிடவும். கொஞ்சம் சூடாக அந்த ஜூஸ் இருக்கும்போதே அதனைச் செய்யணும். ‘சாறு’ ஆறிவிட்டால் அல்வா பதத்துக்குப் போயிடும்.

இப்போ ஆப்பிள் பை Pie ரெடி.

செய்துபாருங்கள். நிச்சயம் இளைஞர்களுக்குப் பிடிக்கும்.

அன்புடன்

நெல்லைத்தமிழன்

பின் குறிப்பு  :  நெல்லைத்தமிழன் இதை முன்னாலேயே எனக்கு அனுப்பி வைத்திருந்திருக்கிறார்.  நான் இது இருப்பதை மறந்து, தாமதம் செய்து விட்டேன்.  நெல்லைத்தமிழன் மன்னிக்கவும். - ஸ்ரீராம்