ஓரமாக ஒரு ஒற்றை யானை !

என் இளையவன் பாஸ் வயிற்றுக்குள் இருந்தபோது கடவுளிடம் என் வேண்டுதல் 'இரவு நேரத்தில் மட்டும் வலி வர வைத்து விடாதே...'  என்பதுதான்....  என்று சென்ற வாரம் முடித்திருந்தேன்...     அது தொடர்கிறது...




கடவுளுக்கு ஒரு பழக்கம் உண்டு.   சமயங்களில் எது நடக்கக்கூடாது என்று வேண்டுகிறீர்களோ, அதுதான் நடக்கும்.  கடவுள் கிண்டலாகச் சிரித்துக் கொள்வார்!  அதுபோல சரியாக நள்ளிரவு பனிரெண்டு மணிக்கு வலி வந்தது.  சாலைக்கு ஓடி, இங்கும் அங்கும் சைக்கிள் ஆட்டோவுக்கு அலைந்தேன்.  சாலையில் ஒருஇளநீர்க்கடையும், பெட்டிக்கடையும் இருக்கும்.  அதற்கு காவலுக்கு அந்த இளநீர்க் கடைக்காரர் அங்கு படுத்துக் கொள்வார்.  பாண்டியன் என்று பெயர்.

அவரை எழுப்பியதுமே  "என்ன வலி வந்து விட்டதா?" சரியாகக் கணித்துக் கேட்டுவிட்டு நீங்கள் இந்தப் பக்கம் போங்க...   நான் இந்தப் பக்கமாய் ஏதாவதுஆட்டோ வந்தால் வீட்டுக்கு அனுப்புகிறேன்"  என்றார்.  வீட்டில் இருபக்க பெரியவர்களும் இருக்கிறார்கள் என்று அவருக்குத் தெரியும்.

அதே போலவே ஒரு ஆட்டோவை மடக்கி உள்ளே அனுப்பியவர், தாண்டிச் சென்ற ஒரு பைக்காரரை நிறுத்தி, அவரிடம்  "சைக்கிளில் ஒருவர் அவர் மனைவிக்கு பிரசவ வலி கண்டு விட்டது என்று  ஆட்டோவுக்கு அலைந்து கொண்டிருக்கிறார்.  அழைத்து வர  சைக்கிளில் அங்கு சென்றிருக்கிறார்.   அவரிடம் பாண்டியன் ஆட்டோ நிறுத்தி அனுப்பிட்டார்னு சொல்லி உடனே அனுப்புங்க" என்று சொல்லி அனுப்ப, அவர் வந்து என்னைக் கண்டு  விசாரித்து விஷயம் சொல்ல, நான் திரும்பி ஓடி பாண்டியனுக்கு நன்றி சொல்லி உள்ளே சென்று ஆட்டோ ஏறி, ஏற்றி  ஆஸ்பத்திரி கிளம்ப....  களேபரம்.  

காலை நாலு மணிக்கு சுகப்பிரசவம் ஆனது.

ஸாரி, பாதுகாப்பு, திருட்டு சம்பந்தமாய் சொல்ல ஆரம்பித்து ஒரு கிளை பக்கவாட்டில் சென்று விட்டது!   மூன்று பாராக்கள் அதில் செலவழிந்து விட்டன!  மீண்டும் விஷயத்துக்கு வருகிறேன்.

ஆக, அப்படித் திட்டமிட்டு பாதுகாப்பாய் இருந்த காலங்களிலும் எனக்கு போலீஸைக் கண்டால்தான் அதிக பயம்.  ஒருவேளை அதற்கும் ஜூவியே காரணமாய் இருந்திருக்கும்.

அப்போது உள்ளூரில் இருந்த ஸ்டேஷன் போலீஸ்காரர்கள் ஒரு அறிவிப்பு செய்தார்கள்.  ஊருக்குச் செல்பவர்கள் முன்கூட்டியே எங்களிடம் தகவல் தெரிவித்து விட்டுச் செல்லுங்கள்.  நாங்கள் உங்கள் வீட்டுக்கு கூடுதல் கவனிப்பு தருவோம் என்பதே அந்த அறிவிப்பு. அந்த அறிவிப்பே கூடுதல் பயம் தந்தது!

எனக்கு என்ன சந்தேகம் வரும் என்றால்...

அலுவலகத்தில் ஒருமுறை ஒரு விஷயம் பேசிக்கொண்டார்கள்.  பிடிபட்ட திருடர்கள் எத்தனை வீட்டில் கை வைத்திருக்கிறார்கள் என்ற கணக்கு போலீசுக்குத் தெரியுமாம்.   அதற்கு சரியான கணக்கில் மாமூல் வராவிட்டால் அவர்களைத் துவைத்து விடுவார்களாம்.  அப்படித் துவைக்கப்பட்ட, அவர்களுக்குத் தெரிந்த ஒருவனைப் பற்றி பேசிக்கொண்டதிலிருந்து எனக்கு ஒரு எச்சரிக்கை உணர்வு!  பயம்!

எனவே முடிந்தவரை 'அவர்களி'டமிருந்து விலகியே இருப்பேன்.  ஊரில் திருடன், தாதா என்று அறியப்பட்ட ஓரிருவர் இருந்தனர்.  வேறு வழியில்லாத ஒரு சந்தர்ப்பத்தில் அவர்கள் எனக்கு அறிமுகமாகி இருந்தனர்.  அவர்கள் என்னிடம் மரியாதையாக இருந்ததோடு, ஓரிரு பிரச்சனையான சமயங்களில் உதவிக்கும் வந்தனர்.  அதற்காக என்னிடம் எந்தக் கட்டணமும் வாங்கிக் கொண்டதில்லை.  ஆனாலும் அவர்களிடமும் நான் ஜாக்கிரதையாக இருந்தேன்.  ஆனாலும் அவர்கள் எனக்கு உதவிதான் செய்திருக்கிறார்கள்.  ஆனாலும்...    ச்சே...   எத்தனை ஆனாலும்!

வீடு மாறிய நாளிலிருந்து அலுவலகம் சென்றுவர ஒரு இரு சக்கர வாகனம் வாங்குவது பற்றி யோசனை வந்திருந்தது.  ஆனால் மகன்கள் அதற்கு முற்றிலும் எதிர்ப்பு தெரிவித்தார்கள்.   முதலில் தலையாட்டிய பாஸும் இப்போது மகன்கள் பயமுறுத்துவதைப் பார்த்து வேண்டாம் என்றே சொல்கிறார்.

அலுவலகத்தில் முதலில் 'வண்டி வாங்குங்க ஸார்' என்றவர்கள்,  மகன், மனைவி கருத்தைப் பற்றி நான் சொன்னதும் "வேண்டாம்...   வாங்காதீங்க' என்கிறார்கள்.

பொதுவாய் நம்மிடம் ஒரு பழக்கம்.   நண்பர்கள் நம்மிடம் கேட்கும் கருத்துகளுக்கு அவர்கள் மனம் நோகாமல், அவர்கள் எப்படி எதிர்பார்க்கிறார்களோ அப்படியே பதில் கொடுத்து விடுகிறோம்.  அவர்கள் எப்படி எதிர்பார்க்கிறார்கள் என்பது அவர்கள் பேச்சோட்டத்தில் தெரிந்து விடும்.  பல சமயங்களில் அனாவசியமான, அல்லது கேட்கப் படுபவர்களுக்கு தேவையில்லாத விவாதங்களில் அவர்கள் மாட்டிக்கொள்ள விரும்புவதில்லை என்பதுதான் காரணம்.  "எதற்கு வம்பு" மனப்பான்மை! .  

இதனால் என்ன ஆகிறது என்றால் அபிப்ராயம் கேட்பவர்களுக்கு அதனால் பெரிய நன்மை எதுவும் விளையாது. அவரவர்கள் சொந்த முடிவையே எடுக்க வேண்டும்.

நம்மிடம் இன்னொரு பழக்கமும் உண்டு.  என்னதான் எல்லோரிடமும் அபிப்ராயம் கேட்டாலும்,  நம் மனதில் என்ன முடிவு செய்து வைத்திருக்கிறோமோ அதைதான் பெரும்பாலும் செயல்படுத்துவோம்.  செய்ய நினைக்கும் செயலில் விருப்பம், பிடிவாதம்.

ரிசல்ட் நல்லதாய் அமைந்து விட்டால் "எல்லோரும் என்னென்னவோ சொல்லிக் கொடுத்தார்கள்...   நான் கேட்கலையே...   நான் இப்படிச் செய்தேன்...  பாருங்க இப்போ..." என்று பீத்திக் கொள்ளலாம்.

சரியான ரிசல்ட் கிடைக்காவிட்டால் அமைதியாக இருந்து விடலாம்.  எதிராளி மனதுக்குள் புன்னகைப்பார் என்று தெரியும்!

அந்த வகையில் என் டூ வீலர் வாங்கும் ஆசை இங்கிட்டும் அங்கிட்டும் தள்ளாட்டம் போட்டது. 

'நான் டூ வீலர் ஓட்டி முப்பது வருடங்கள் ஆகிறது' என்றேன்.  'இப்போது கற்றுக்கொண்டு ஓட்டுபவர்களே நன்றாய் ஒட்டுகிறார்களே' என்று சொன்ன அலுவலகத் தோழி ஒரு அனுபவம் சொன்னார்.  அந்த அனுபவம் பற்றி எழுத வந்துதான் இத்தனைக் கதையும் அடித்திருக்கிறேன்.

அவர்களுக்குத் தெரிந்தவர் தனது டூவீலரில் சாலையில் சென்றிருக்கிறார்.  ஒருமுச்சந்தியிலிருந்து திடீரென சாலையில் ஏறிய  ஒரு கார்க்காரர், தாண்டிவிட்ட இவரை இடித்துவிட்டு ஓடிவிட்டார்.

போலீஸ் வந்து கேஸ் போட்டது.  சிசி டீவி வைத்து ஓடிய கார்க்காரரையும் கண்டு பிடித்து விட்டார்கள் என்றாலும் நண்பரை குடித்து விட்டு வண்டி ஓட்டினார் என்று கேஸ் எழுதி விட்டனர்.  

நண்பரின் மனைவி மருத்துவர்.  நேராக போலீஸ் ஸ்டேஷன் சென்றவர் அவர்களை பிடி பிடி என்று பிடித்துவிட்டாராம்.  ஏனென்றால் நண்பர் ஒரு டீடோட்லர்,. அவரைப்போய் குடித்து விட்டு வண்டி ஓட்டினார் என்று கேஸ் பதிந்தால்....    இவர் (மனைவி)  மருத்துவர் என்பதாலும், அரசுப்பதவியில் இருப்பதாலும் இவர் பிடி எடுபட்டு கேஸ் கைவிடப்பட்டது.

[  டீடோட்டலர் என்பது இங்கிலாந்தின் பிரெஸ்ட்டான் மாகாணத்தில் 19 ஆம் நூற்றாண்டில் உருவான வார்த்தை.  எந்த விதமான போதை, அல்லது கெட்ட பழக்கங்களும் இல்லாத செயலுக்கு டீடோட்டலிஸம் என்று பெயர்.  அதிலிருந்து உருவான வார்த்தை இது.  பிரெஸ்ட்டான் டெம்பரன்ஸ் மூவ்மெண்ட் என்ற இயக்கத்தைத் தொடங்கிய ஜோஸப் லிவ்சி என்பவர்தான் இந்த வார்த்தையை முதலில் பயன்படுத்தினாராம்.]

பாருங்கள், அப்போதும் கேஸ் கைவிடப்பட்டதே தவிர, கார்க்காரர் மேல் தப்பு என்று பதியப்படவில்லை.  அப்புறம் எப்படி போலீஸ் மேல நம்பிக்கை வரும்?" என்று முடித்தார்.   அந்த வார்த்தைதான் என்னை என் பழைய நினைவுகளுக்குக் கொண்டுபோனது.  இந்த மினி தொடருக்கும் காரணமானது!

"நாம ஒழுங்காதான் ஓட்டுவோம்.   பின்னால, முன்னால ஓட்டுறவனும் ஒழுங்காய் ஓட்டணுமே...   இல்லையா?" என்று அவர் கேட்ட கேள்வியை என் மகன் எதிரொலித்தான்.

"ஆண்ட்டி..   இவர் ரோட்ல நடக்கறதே ஒழுங்காய் இல்லை ஆண்ட்டி...  ஓரமா நடக்க மாட்டேங்கறார்...  பிளாட்பாரத்தை விட்டு விட்டு தார் ரோட்லயே நடக்கறார்.  இப்போ கூட, சிக்னல் போட்டுட்டாங்கன்னு உடனே க்ராஸ் பண்ணினார்...  கடைசியா போன பைக்காரன் மோதியிருக்க வேண்டியது...  திட்டிட்டு போறான்.."  - மகன் 

                  

"டேய்..   அது என் தப்பு இல்லைடா...   சிக்னல் விழுந்தும் அவசரப்பட்டு அவன் வந்தது தப்பு.."   என்றேன்.

                             

"அதைதான் நாங்களும் சொல்றோம்" என்றனர் கோரஸாய்!  "போலீஸ் பிடிச்சா அவங்க மாதிரி அந்த  அளவு உங்களால் பேசமுடியுமா?"

                  

==============================================================================================

ஓரமாக ஒரு ஒற்றை யானை !

=============================================================================================

=======================================================================================================

சும்மா அப்பா அப்பாங்காதீங்க...!

=====================================================================================================

கிட்டத்தட்ட ஏழு வருடங்கள் முடிந்திருக்கும் நிலையில் இந்த திட்டமிப்போது என்ன நிலையில் இருக்கிறதோ?  எனக்கு ஒரு ஆசை உண்டு.  சென்னையில் கொஞ்சம் உயரத்தில் சாலைக்கு மேலாக ஒரு பாரலல் சாலை போடவேண்டும் என்று..   அப்போதாவது சென்னையின் போக்குவரத்து நெரிசல் குறையுமா என்று பார்க்க வேண்டும்.   "இதைப் பெரிதாகச் சொல்கிறீர்களே... பெங்களூரு நெரிசல் தெரியுமா உங்களுக்கு?" என்று கேட்பவர்களுக்கு....    "நீங்களும் இதுமாதிரி ஒரு ஆகாய சாலை போட்டுக் கொள்ளுங்களேன்...  யார் வேண்டாம் என்றார்கள்?!!"

==============================================================================================

காய் ஆராய்ச்சி!  ராஜு ஜோக்.  இவர் குடி இருந்த வீட்டில்தான் எழுத்தாளர் வித்யா சுப்பிரமணியம் தற்சமயம் குடியிருக்கிறாராம்.  ஒருசமயம் பேஸ்புக்கில் சொல்லியிருந்தார்.