"திங்க"க்கிழமை : ரவா ஜாமுன் - நெல்லைத்தமிழன் ரெஸிப்பி

 ரவா ஜாமூன் - நெல்லைத்தமிழன்

 

இதனை இணையத்தில் எங்கோ படித்தபோது குறிப்பு எடுத்துவைத்துக்கொண்டேன். எந்தத் தளம் என்பது மறந்துவிட்ட து. கடையில் ஜாமூன் மிக்ஸ் வாங்கி ஜாமூன் செய்வதற்குப் பதிலாக இதனைச் செய்துபார்க்கலாமே என்று நினைத்து, கிச்சன் என் வசம் வந்த அன்று செய்தேன்.

 

தேவையானவை

 

ரவை 1 கப்

6-7 முந்திரியை அரைத்த பவுடர்

காய்ச்சின பால் 2 ½ கப்

ஜீனி 1 கப்

தண்ணீர் 1 கப்

ஏலக்காய் தூள், நெய் 1 ஸ்பூன்

பொரிக்கத் தேவையான எண்ணெய்

 

செய்முறை

 

ரவை பெரிதாக இருந்தால் மிக்சியில் ஒரு சுற்று சுற்றிக்கொள்ளவும்.

கடாயில் ரவையை வெறும்ன வறுக்கவும். நிறம் மாறக்கூடாது. அத்துடன் முந்திரி பவுடர் சேர்க்கவும்.

ஒரு நிமிடம் வறுபட்ட தும், அடுப்பை மீடியமில் வைத்து, காய்ச்சின பாலைச் சேர்த்துக் கலக்கவும். கட்டிகள் இருக்க க்கூடாது. நன்றாக கிளறி, ரவை, பாலை எல்லாம் உறிஞ்சிய பிறகு அடுப்பை அணைத்து கலவையை ஆறவிடணும்.

இன்னொரு கடாயில் ஜீனியும் தண்ணீரும் சேர்த்து, சர்க்கரைப் பாகு தயார் செய்யணும். பாகு பிசுபிசுப்பாக இருந்தால் போதும். அதில் வாசனைக்கு ஏலக்காய் தூள் சேர். அதற்குப் பதில் வெனிலா அல்லது ரோஸ் எஸென்ஸும் சேர்க்கலாம்.

ரவை கலவை ஆறின பிறகு, 1 ஸ்பூன் நெய் விட்டு அழுத்தி சாஃப்ட் ஆகப் பிசையவும். அதில் ஒரு பகுதியை சப்பாத்திக் கல்லில் அரை இஞ்ச் தடிமனில் இட்டு, ஒரு வட்டக் கிண்ணம் அல்லது மூடியினால் வட்ட வட்ட பிஸ்கட் சைஸில் பாதுஷா போல கட் செய்யவும்.  இப்படியே மொத்த கலவையையும் பிஸ்கட்டுகளாகச் செய்துவைத்துக் கொள்ளவும்.

பிஸ்கட்டுகளின்மீது ஃபோர்க்கினால் சிறிய துளைகள் போட்டுக்கொள்ளவும். இது பொரியும்போது உப்பக்கூடாது என்பதற்காக.

எண்ணெய் நன்கு சூடானதும், மிதமான தீயில் Golden Brown நிறத்துக்கு பொரித்தெடுக்கவும்.

எடுத்ததை, உடனே தயார் செய்துவைத்திருக்கும் சூடான சர்க்கரைப் பாகில் பத்து நிமிடங்கள் போடவும்.  பாகு உள்ளே புகுந்து நன்கு ஜாமூன் மாதிரி ஊறியிருக்கும்.

இந்த இனிப்பு பரவாயில்லாமல் இருந்தது.  ரவா ஜாமூனில், என்னவோ மிஸ்ஸிங் என்று தோன்றியது. ரொம்ப மெதுவாகத்தான் செலவழிந்தது. மகள், பிளாண்டாக இருக்கிறது என்று சொன்னாள். கொஞ்சம் இனிப்பு கோவா சேர்த்திருக்கலாமோ என்று தோன்றியது. பார்வைக்கு ரொம்ப அழகான ஸ்வீட்.  இனிப்பு கோவா சேர்த்துச் செய்து பாருங்கள்.