நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 33 : நெல்லைத்தமிழன்

 

நந்தகோபர் மாளிகையை அடைந்தது வரை சென்ற வாரத்தில் குறிப்பிட்டிருந்தேன். சென்ற வாரத்தில் பகிர்ந்த யமுனை நதி, அதே ஆண்டு மார்ச் மாதத்தில் சென்றிருந்தபோது எப்படி இருந்தது என்பதைக் கீழே பாருங்கள். தொழிற்சாலையிலிருந்து வந்து சேரும் கழிவுகளால் நுரைத்துக்கொண்டு கெமிக்கல் நுரைகள் நீரை மறைக்க, யமுனை பாய்கிறது.

 

இதை எழுதும்போதே, ஜீன்ஸ் துணிகள், சாயப்பட்டறைகள் போன்றவற்றிர்க்காக நீர் அளவுக்கு அதிகமாகச் செலவழிகிறது என்ற காரணத்தால் இத்தகைய தொழிற்சாலைகளை, வளர்ந்த நாடுகள் இந்தியா, பங்களாதேஷ் போன்றவற்றில் வைத்துக்கொள்கிறது (அல்லது அவர்களுக்கு பிஸினஸ் கொடுக்கிறது). பண வரவா இல்லை நீர் நிலை பாதுகாப்பா என்பதில் நம் அரசியல்வாதிகள் தேர்ந்தெடுப்பது நம் நாட்டின் நிலைமைக்கு முக்கியக் காரணம். சரி.. அரசியலை விட்டுவிட்டு யாத்திரைக்கு வருவோம்.

 

கோகுலம்… யமுனை ஆறு (மார்ச் மாதத்தில்)

 

நீரையே மறைக்கும் அளவு கெமிக்கல் நுரை

 

நந்தகோபர் மாளிகையின் முதல் தளத்தில்தான் ஸ்ரீகிருஷ்ணர், குழந்தையாக இருந்த இடம் இருக்கிறது (இதையெல்லாம் ஒரு குறியீடாகத்தான் நாம் பார்க்கவேண்டும்). அந்தச் சன்னிதியில் ஸ்ரீகிருஷ்ணர் தன் பரிவாரங்களுடன் இருந்தாலும், சிறிய தொட்டிலில் குழந்தைக் கிருஷ்ணரை வைத்திருக்கிறார்கள். பக்தர்கள் அந்தத் தொட்டிலை ஆட்டவும் வாய்ப்பு தருகிறார்கள். நன்கொடை வாங்கிக்கொண்டு ரசீதும் கொடுக்கிறார்கள் (பல தலைமுறைகளாக அந்த நன்கொடைப் புத்தகங்கள் காப்பாற்றப்பட்டு வருகின்றன என்று சொல்கிறார்கள்)

 

 

 

இந்தச் சுவற்றின் எதிரே உள்ளது நந்தபவன் .

 

சில படிகளைக் கடந்து ஏறினால், முதல் தளத்தில் இடதுபுறம் நந்த கிலா என்று சொல்லப்படும் நந்த அரசின் குழந்தை கிருஷ்ணரின் சன்னிதி. அதன் எதிரே, மூன்று நான்கு சிறிய சன்னிதிகள் இருக்கின்றன.

 

குழந்தை கிருஷ்ணர் சன்னிதி

 

 

குழந்தை கிருஷ்ணர் இருக்கும் சன்னிதி (மண்டபம்) எதிரே சிறு சிறு சன்னிதிகள் உள்ளன. அவற்றில் க்ருஷ்ணன் கோகுலத்தில் இருந்தபோது நட ந்தவைகளுள் சிலவற்றை சிற்பமாக வைத்துள்ளார்கள். அங்கு இரண்டு மூன்று பண்டாக்கள் இருக்கின்றனர்.  முதல் தடவை அந்தச் சன்னிதிகளை நான் பார்த்தேன். அப்போது எடுத்த படங்களை இங்கு பகிர்கிறேன்.

 

இவற்றையெல்லாம் தரிசனம் செய்த பிறகு தொட்டில் கிருஷ்ணர் இருக்கும் மண்டபத்துக்குச் சென்றோம். கருவறையில் ஸ்ரீகிருஷ்ணருடைய பரிவாரங்கள் இருக்கின்றார்கள் (பெரிய சிலை வடிவத்தில்). கருவறையின் முன்பகுதியில் சிறிய தொட்டிலில் குழந்தை கண்ணன் இருக்கிறார். தொட்டிலின் இரு கயிறுகள் நெடிதாக இருக்கின்றன.

 

சன்னிதியில் சிறிது நேரம் காத்திருந்த பிறகு, இரண்டு இரண்டு பேராக முன் சென்று கருவறையில் ஸ்ரீகிருஷ்ணரின் சிறு தொட்டிலை ஆட்டினோம். எப்போதும் போல டொனேஷனுக்கு (நிஜமாகவே டொனேஷன்) 50-200 ரூபாய் கொடுப்பவர்களுக்கு பிரசாதம் தந்தார்கள். அது சரி.. மூடியிருக்கும் சன்னிதியைக் காண்பித்தேன். (அதுதான் கருவறை). அதில் உள்ள மூலவர்களைக் காண்பிக்கவில்லையே என்று பார்க்கிறீர்களா?

 

 

ஸ்ரீகிருஷ்ணர் பரிவாரங்களுடன். கீழே தெரிவது ஊஞ்சலில் குழந்தை கிருஷ்ணர்.

 

படங்கள் எடுக்கக் கூடாது என்று ரொம்பவே ஸ்டிரிக்டா இருக்கிறார்கள். எப்படியோ நான் படங்கள் எடுத்தேன்.

 

தொட்டிலை ஆட்டி பிரசாதம் பெற்றுக்கொண்ட பிறகு, கருவறையை வலம் வந்தோம். கருவறையின் வலது புறத்தில் கல்கண்டு பிரசாதம் தருகிறார்கள். அந்த இடமும் திறந்திருப்பதால் கருவறையை நெருக்கமாக தரிசிக்க முடியும்.

 

மண்டபத்தை விட்டு வெளியில் வந்த பிறகு, அங்கிருக்கும் பெரிய சாளரத்தின் வழியாகப் பார்த்தால் யமுனை ஆறு ஓடுவது தெரியும். யமுனை ஆற்றை அங்கிருந்து சில படங்கள் எடுத்துக்கொண்டேன்.

மார்ச் மாதங்களில் யமுனையின் நிலை. பனிப்பாளங்கள் செல்வதுபோல கெமிக்கல் நுரைகள். தண்ணீர் முழுமையாக மாசடைந்திருக்கிறது.

 

இது இன்னொரு வருடம் மார்ச் மாதத்தில்

 

மே மாதத்தில் சிறிது பரவாயில்லையோ?  இரண்டு சமயத்திலும் படகுகள் யமுனை ஆற்றில் செல்வதைக் காணலாம்.  அது சரி… நான் யமுனை ஆற்றில் படகுப் பயணம் மேற்கொண்டேனா என்ற சந்தேகம் வருகிறதா?  யமுனையில் படகில் சென்றேன், ஆனால் கோகுலத்தில் அல்ல, விருந்தாவனத்தில். அதைப் பிறகு காணலாம்.

 

 நந்தகீலாவில் குழந்தை கிருஷ்ணரை தரிசனம் செய்த பிறகு, நாங்கள் பலராமர் அவதார இட த்தை (கோகுலத்தில்) தரிசிக்கச் சென்றோம்.  ஸ்ரீ கிருஷ்ணரின் ந ந்த பவனமும், பலராமர் அவதாரத் தலமும் மிகவும் ப்ராசீனமான (புராதானமான) இடங்கள் என்று போட்டிருந்தார்கள். வழிவழியாக அந்த இடங்களில் கோவில்கள் இருந்திருக்கும். அதனைப்பற்றி அடுத்த வாரம் காணலாமா?

 (தொடரும்)