நாங்கள் தரிசனம் செய்த கோயில்கள் - 18 :: நெல்லைத்தமிழன்

 

பழையாறை வடதளி

பழையாறை வட தளிக்கும் திருநாவுக்கரசருக்கும் என்ன சம்பந்தம் என்று சென்ற வாரம் கேட்டிருந்தேன். இதைப் புரிந்துகொள்வதற்கு முன்பு, மிகச் சுருக்கமாக, உங்கள் எல்லோருக்கும் தெரிந்த திருநாவுக்கரசர் வரலாற்றைப் பார்த்துவிடலாம்.

மருள்நீக்கியார் (எவ்வளவு அழகான பெயர் பாருங்கள்) தந்தை புகழனாருக்கும் தாயார் மாதினியாருக்கும் திருவாரூரில் பிறந்தார். அவருடைய சகோதரி திலகவதியாருக்கு, கலிப்பகையார் என்பவரை மணம் பேசி முடித்திருந்தார்கள். பல்லவர் படையில் வாதாபி போருக்குச் சென்ற கலிப்பகையார் போரில் உயிர் நீத்தார். நிச்சயம் செய்தவர் மறைந்த தைக் கண்டு, புகழனாரும் மாதினியாரும் உயிர் விட்டனர்.  திலகவதியார் உடன்கட்டை ஏறுவார் என்பதை உணர்ந்த மருள்நீக்கியார், தாம் தனியாக வாழவேண்டுமே என்பதால், திலகவதியாரின் மனத்தை மாற்றினார். தமக்கையாரால் வளர்க்கப்பட்ட மருள்நீக்கியார், நன்றாகப் படித்து, பாடலிபுரத்திற்குச் சென்று சமண நூல்களைக் கற்று, சமண சமயத்தைத் தழுவி தருமசேனர் என்ற பெயர் பெற்றார். தமிழகம் வந்து சமண சமயப் பரப்புரையில் ஈடுபட்டார். சிவபெருமான் ஆட்கொள்ளும் காலம் கனிந்தது. தருமசேனருக்கு சூலை நோய் தோன்றியது (வயிற்றுவலி). சமணசமயத்தின் ஔடதங்களும் மந்திரங்களு பலிக்கவில்லை. வயிற்றுவலி தாள முடியாமல், தமக்கைக்கு ஆளனுப்பி மருந்து கேட்டார்.. திலகவதியார் இது கண்டு மனம் பதைத்து சிவபெருமானை வேண்டினார். தமக்கையாரோ தான் சமண மடத்திற்கு வரமுடியாது என்றும் அவரை தன் இருப்பிட த்திற்கு அழைத்தார்.  அவரை அடைந்த தருமசேனருக்கு, விபூதி அளித்து, வீரட்டானம் கோயில் இறைவனை வேண்டுவாயாக என்று திலகவதியார் கூற, தருமசேனரும், வீரட்டானம் உறை சிவபெருமானை நோக்கி பதிகம் பாடுகிறார்.

கூற்றாயினவாறு விலக்ககிலீர் கொடுமைபல செய்தன நான்அறியேன்

ஏற்றாய் அடிக்கே இரவும் பகலும் பிரியாது வணங்குவன் எப்பொழுதும்

தோற்றாது என் வயிற்றின் அகம்படியே குடரோடு துடக்கி முடக்கியிட

ஆற்றேன் அடியேன் அதிகைக் கெடில வீரட்டானத்து உறை அம்மானே. 

என்று தொடங்கும் பதிகத்தைப் பாடுகிறார்.

வீரட்டானத்தில் உறையும் சிவனே, என்னால் பொறுக்க ஒண்ணாத வயிற்று வலியை நீக்குவாயாக என்று வேண்டுகிறார்.

சிவபெருமான் அருளால் சூலை நோய் நீங்கியது. அசரீரி வாக்குக்கு ஏற்ப அவருக்கு நாவுக்கரசர் என்ற பெயர் ஏற்பட்டது.  இது கண்டு பாடலீபுத்திர சமணர்கள், அரசன் மகேந்திரவர்ம பல்லவனிடம் புகார் கூற, அரசன் நாவுக்கரசரை அழைக்கின்றான். அவருக்கு பல்வேறு துன்பங்கள் அளிக்கின்றான். சுண்ணாம்புக் காளவாயில் போடுகின்றான், நாவுக்கரசரோ மாசில் வீணையும் பதிகம் மூலம் அதனால் பாதிக்கப்படாமல் இருக்கின்றார். அடுத்து விஷத்தைக் கொடுக்கிறான். அதுவும் நாவுக்கரசரை பாதிக்கவில்லை. பிறகு மதம் பிடித்த யானையை ஏவிவிடுகிறான். அப்பொழுதும் பதிகம் பாடியதால், யானை இவரிடம் வந்ததும் மதம் நீங்கிவிடுகிறது. அரசன் பிறகு இவரை கல்லில் கட்டி கடலில் போட்டுவிடச் சொல்கிறான்.  அப்போதும் அவர் மனதில் சிவனைப் பற்றிய பதிகம் பிறக்கிறது.

சொற்றுணை வேதியன் சோதி வானவன்

பொற்றுணைத் திருந்து அடி பொருந்தக் கைதொழக்

கற்றுணைப் பூட்டியோர் கடலிற் பாய்ச்சினும்

நல் துணை ஆவது நமச்சிவாயவே.

வேதங்களின் நடுவாக இருப்பது யஜுர் வேதம். அதில் இருக்கும் ருத்ரம், நமசிவாய எனும் மந்திரத்தைச் சொல்கிறது. அப்படிப்பட்ட புனிதமான வேதங்களை அருளியவனும், ஜோதி வடிவமாக இருப்பவனுமாகிய சிவ பெருமானின் பொன் போன்று இருக்கும் திருவடி இணைகளை நமது மனத்தில் வைத்து கையால் தொழுது வழிபட்டால், கல்லில் நம்மைக் கட்டிவைத்து கடலில் தள்ளினாலும், நமக்குப் பெரிய துணையாக ஆவது நமச்சிவாய என்ற ஐந்தெழுத்து மந்திரமே என்று பாடல் சொல்கிறது.

அந்தக் கல்லோ மிதந்து திருப்பாதிரிப்புலியூர் அருகே கரைமீள்கிறது.

இந்த அதிசயங்களைக் கண்ட அரசன் மகேந்திர வர்ம பல்லவன், சைவ சமயத்தைத் தழுவுகிறான். திருநாவுக்கரசர் நாடெங்கும் திரிந்து சைவ சமயத்தைப் பரப்புகிறார், பல பதிகங்கள் இயற்றுகிறார்.  அப்படி இருக்கையில் பழையாறைப் பகுதியில் சமணர்கள் மிகுந்து சிவன் கோயிலை மறைத்து (லிங்கத்தை) அந்த இடங்களை ஆக்கிரமித்துக்கொண்டிருக்கின்றனர். அதற்காக உண்ணாவிரதம் இருந்து அரசனின் படைவீரர்களின் உதவியைப் பெற்று சமணர்களை அங்கிருந்து விரட்டி, சிவன் கோவிலை மீட்கிறார்.  (நான் ரொம்பவே சுருக்கமாக எழுதுகிறேன். ஆனால் வரலாற்றைப் படிக்கப் படிக்க வியப்பு. எப்படி சிவன் கோயிலை அவர்கள் சமணப் பள்ளியாக ஆக்கிக்கொண்டார்கள் என்பதெல்லாம்)

        தலை எலாம் பறிக்கும் சமண் கையர் உள்

       நிலையினால் மறைத்தால் மறைக்க ஒண்ணுமே

       அலையினால் பொழில் ஆறை வடதளி

       நிலையினான் அடியே நினைந்து உய்ம்மினே

இது பழையாறை வட தளியைப் பற்றிய பதிகம்.  வடதளி இறைவனின் அடியை நினைத்து நாம் உய்வோம் என்பது பாடல். (தலை எல்லாம் பறிக்கும் – சமணர்கள் மீண்டும் முடி வளரக்கூடாது என்று ஒவ்வொன்றாகப் பிடுங்கி எறிவார்கள். வலி பொறுத்துக்கொண்டு இதனைத் தவம் போலச் செய்வார்கள். ஆனால் பௌத்தர், கத்தியைக் கொண்டு மழித்தெடுப்பார்கள்)

என்னடா இது… துரை செல்வராஜு சாரின் தளத்திற்கு வந்ததுபோலத் தோன்றுகிறதா?

திருநாவுக்கரசர் வரலாற்றைப் படிக்கப் படிக்க மிக வியப்பாக இருக்கிறது. நான் கும்பகோணத்திலிருந்து திருக்கண்ணமங்கை, திருக்கண்ணபுரம், திருநாகை என்று பல தலங்களுக்குச் சென்றபோது வழியில் திருப்புகலூர் என்ற நுழைவாயிலைப் பார்த்தேன். அதில் அப்பர் முக்தியடைந்த தலம் என்று இருந்தது. அந்தக் கோயிலுக்குச் சென்றிருந்தேன். அங்குள்ளவர்களிடம், அப்பரின் பிருந்தாவனம் என்பதுபோல இருக்கிறதா என்று கேட்தற்கு, அப்பர் இங்குள்ள இறைவனை வணங்கும்போது அப்படியே உடலோடு கருவறையில் மறைந்துவிட்டார் என்று சொன்னார்கள். அந்தத் தலத்தின் படங்கள் இன்னொரு சமயம். ஆனால் எனக்கு அந்தத் தலத்தை தரிசிக்க வாய்ப்பு கிடைத்தது ஆச்சரியமே.

இந்தப் பழையாறை வடதளி, மிகப் பழமையானது. சோழர் காலத்தில் நன்கு சீர் செய்யப்பட்டது.

நரசிம்மரின் உக்கிர கோலம் ஏன் அம்மன் கோவிலின் மண்டபத்தில் செதுக்கியிருக்கிறார்கள்?  பொதுவாக நரசிம்மர் மற்றும் அனுமான் சிற்பங்கள் காவல் தெய்வங்களாகச் செதுக்குவது வழக்கம்.

 சிறிய இடத்தில் அழகுறச் செதுக்கப்பட்டுள்ள விநாயகர்.

அவர் தம்பிக்கு இடம் இல்லாமலா? சிறிய இடத்தில் அழகுறச் செதுக்கப்பட்டுள்ள மயிலேறும் மரகதம்.

பழையாறை கோயிலுக்கு ஒரு முறை சென்றிருந்தபோது (பல முறை இந்தக் கோயிலுக்குச் சென்றிருக்கிறேன். அதில் ஒரு முறை மிக மிக வயதான ஒரு பெண்மணி, உள்ளே கருவறை வரை சுத்தம் செய்து சிறிய விளக்கினை ஏற்றுவதைப் பார்த்தேன். பக்தி மனதிலிருந்து அதுவாகவே வரணும். நமக்கெல்லாம் எங்க?)

மண்டபத்தில் நின்றுகொண்டு என்னைப் பார்க்கிறாய். இருள் சூழ்ந்த பாதையில் உனக்கு ஒளியாக நான் இருக்கிறேன் என்கிறாரோ? 

எங்களிடம் அனுமதி பெற்றுத்தானே இறைவனை தரிசிக்கச் செல்கிறாய்?  நந்தி அப்படிச் செய்ய மறந்ததனால் எவ்வளவு வருடங்கள் தவம் செய்து தன் கஷ்டத்தை நீக்கிக்கொள்ள வேண்டி வந்தது என்பதை நந்திபுர விண்ணகரத்தைச் சேவித்துமா நீ அறிந்துகொள்ளவில்லை?

பழையாறை வட தளி சோமநாதஸ்வாமி தரிசனம். 

மங்கையற்கரசியின் பிறந்த ஊர் பழையாறைப் பகுதி. முதல் படம் பிற்காலத்தைய ஓவியம்போலத் தோன்றுகிறது. 

இது கர்ணனின் தேர் அல்ல…. சாபத்தினால் மண்ணில் அமிந்துபோக.  இது காலம் செய்த கோலம்.

கல்லின் ஓரங்களை எவ்வளவு அழகாக வளைத்துச் செதுக்கியுள்ளார்கள் பாருங்கள்.

நான் ஓடத் தயார்… ஆனால் சக்கரம் மண்ணில் புதையுண்டிருக்கிறதே.. என்ன செய்ய?

கற்றளிக்கு மேல் உள்ள கோபுரம் அதிலுள்ள சுதைச் சிற்பங்கள் மிகவும் பிற்காலத்தவை (சமீபகாலத்தைச் சேர்ந்தவை).

திருநாவுக்கரசர் வரலாற்றை மிகச் சுருக்கமாகப் பார்த்தோமல்லவா? (அதில் எனக்குத் திருப்தி இல்லை. அவருடைய வரலாற்றை மிக விரிவாகப் பார்த்தால்தான் அவருடைய பெருமை, சைவ சமயத்தை வளர்த்ததில்  அவருடைய பங்கு என்பதெல்லாம் நமக்குப் புரியும். அவர் சமண நூல்களைக் கற்று முழுமையான சமண சமயத்தவராக மாறி, தருமசேனர் என்ற பெயர் பெற்று சமணக் கல்வியைப் பிறருக்குக் கற்றுக்கொடுத்து பிறகு இறைவன் திருவருளால் சைவ சமயத்தைத் தழுவியதுமல்லாமல் பல்லவ அரசன் மகேந்திரவர்மனையும் சைவ சமயத்தைத் தழுவச் செய்தார். மகேந்திரவர்மனும், சும்மா சைவ சமயத்தை ஒத்துக்கொள்ளவில்லை. சமணர்களின் வேண்டுகோளை ஏற்று எவ்வளவு இடர்கள் திருநாவுக்கரசருக்குச் செய்யமுடியுமோ அவற்றைச் செய்து, அனைத்தையும் இறைவன் அருளால் வென்று வந்தபிறகு இது மனித யுக்தி அல்ல, தெய்வ சக்தி என்று புரிந்து சைவத்திற்கு மாறினான்.  இது போல, முதலில் சைவராக இருந்து, பிறகு மற்ற மதங்களையும் கற்று, கடைசியில் வைணவராக மாறி திருமாலே முழுமுதற் கடவுள் என்று திருமால் மீது பதிகங்கள் பாடியவர் திருமழிசை ஆழ்வார். அவரின் ஆரம்பகால வாழ்க்கை, அதன் மூலமாக அவர் பெற்ற சிவவாக்கியர் என்ற பெயர் என்ற வரலாறெல்லாம் மிகவும் ரசமானவை).

நிற்க… இதைத் தொடர்ந்து நாம் காணப்போவது அதே பழையாறை பகுதியைச் சேர்ந்த வைணவக் கோயில் ஒன்று. அதனால் பல்லவர்கள் வரலாற்றை இந்தச் சமயத்தில் சுருக்கமாகப் பார்த்துவிடலாம்.

ஏற்கனவே பதிவு வெகு நீளமாக ஆகிவிட்டபடியால், அடுத்த வாரம் தொடரலாம்.

  (தொடரும்)