சில நேரங்களில்

 

நண்பர் அலைபேசினார்.  நீண்ட நாள் நண்பர்.

தனது உறவினருக்கு உடல்நிலை சரியில்லாததால் எந்த ஆஸ்பத்திரியில் சேரலாம் என்று கேட்டு, நான் சொன்னபடி சேர்த்திருந்தார்.

உறவினர் பற்றி அப்டேட் சொல்வார்.  அவ்வப்போது பேசுவார்.  ஒருநாளைக்கு இரண்டு மூன்று முறை பேசுவார்.

சம்பவம் நடந்த அன்றும் பேசினார்.  அப்போது மாலை பேசும்போது ராத்திரிக்கு டிஃபன் வாங்க சென்று கொண்டிருப்பதாக சொன்னார்.  கூடவே முதுகு வலிப்பதாகச் சொன்னார்.

"உங்களுக்கா?  அம்மாவுக்கா?"

"எனக்குதான்......   முதுகுல எலும்பெல்லாம் சேர்ந்து ஜாம் ஆயிடுச்சி.."

"அப்போ ராத்திரிக்கு ப்ரெட் வாங்கிடுங்க" என்றேன்.

வீட்டில் மகனும் பாஸும் 'பக்'கெனசிரித்து விட்டாலும் கடிந்து கொண்டார்கள்.  

"அவர் என்னப்பா நினைப்பார்?  பாவம் அவர் கஷ்டத்தை சொல்றாரு.."

"என் பேச்சு பாணிப்பா..  அவருக்கும் தெரியும்."

ஆனால் நண்பருக்கு புரியவில்லை போல...   "ப்ரெட் சாப்பிட்டா நலலதா?" என்றார் அப்பாவியாய்.

சரி, ஆரம்பித்து விட்டோம், எப்படியும் பின்வாங்க முடியாது என்று நானும் "ஆமாம், ஜாம் ஆயிடுச்சுன்னு சொன்னீங்க இல்லையா?" என்றேன்.

சற்று மௌனம்.  "சரி, நான் வைக்கிறேன்" என்று ஃபோனை வைத்து விட்டார் நண்பர்.

"கோச்சுக்கிட்டார்.  வருத்தப்பட வச்சுட்டீங்களே"  என்றார் பாஸ்.

"இனி பேச மாட்டார் "என்றான் மகன்.  

இரண்டு நாட்களுக்குமுன் இப்படிதான்..  

"ப்ரோ..   காம்பினேஷன் மாத்திரைகளே கவர்மெண்ட் ஆஸ்பத்திரியில சுத்தமா கிடைக்க மாட்டேங்குது.."  என்றார்.

"ஏன்?  கறையாயிருக்கா?"

"ப்ரோ?"

"குப்பைல போட்டு வச்சிருக்காங்களா?"

"இல்லை ப்ரோ...  சுத்தமா கிடைக்கவே இல்லை...  வெளிலதான் வாங்கறேன்"  - என் அறுவை அவருக்கு புரியவில்லை என்றதும் விட்டு விட்டேன்!

இப்போது, "என்னதான் 'நண்பர், எப்போதும் பேசுவது போல பேசுகிறேன்' என்று சொன்னாலும் நேரம் காலம் இருக்கு இல்லையா?" என்றான் மகன்.

நானும் இனி வாயை அடக்க வேண்டும் என்று நினைத்துக் கொண்டேன்.

பத்து நிமிடத்தில் அவரிடமிருந்து மறுபடி ஃபோன்.  தயக்கத்துடன் எடுத்தேன்.   'லொடக்காஸி ஜோக்கெல்லாம் அடிக்காம நிதானமா பேசுடா ஸ்ரீ....'

"இப்பதான் புரிஞ்சுது..  ஓ..  நீங்க அப்படி சொன்னீங்களா?" 

"எப்படி ரவி?"

"அதுதான்..  ஜாம் தொட்டுக்கிட்டு ப்ரெட் சாப்பிடலாம்னு...  ஒண்ணும் புரியலை.  அதான் வச்சுட்டேன்.   கொஞ்சம் கழிச்சு இப்பதான் புரிஞ்சுது..  நைட்டுக்கு பிரெட்டே வாங்கிட்டேன்..  ஆனா ஜாம் தனியா வாங்கிட்டேன்..  வைக்கவா?" என்று வைத்து விட்டார்.

அப்புறமும் பேசிக்கொண்டுதான் இருக்கிறார். 

========================================================================================

நியூஸ் ரூம் 

- சென்னை: முட்டையிலிருந்து தயாரிக்கப்படும் மயோனைஸ் விற்பனைக்கு ஓராண்டு தடை விதித்து தமிழக அரசு உத்தரவிட்டு உள்ளது. இது தொடர்பான உத்தரவு தமிழக அரசு அரசிதழில் வெளியிடப்பட்டுள்ளது.

- புதுடில்லி: இனி, 10 லட்சம் ரூபாய்க்கு மேல் விலை கொண்ட ஆடம்பர பொருள் வாங்கும்போது, டி.சி.எஸ்., எனப்படும் விற்பனையின்போதே வசூலிக்கப்படும் வரி 1 சதவீதம் விதிக்கப்படும் என, மத்திய நேரடி வரிகள் வாரியம் அறிவித்துள்ளது. நேற்று முன்தினம் முதல் இது அமலுக்கு வந்துள்ளதாகவும் தெரிவிக்கப்பட்டுள்ளது.

- ராமேஸ்வரம்: தனுஷ்கோடி - இலங்கை இடையே, கடலில் ராமர் அமைத்த பாலத்தைக் கண்டு தரிசிக்க, மே, 15ல் இலங்கை அரசு, சுற்றுலா படகு சவாரியை துவக்குகிறது.

- மதுரை: காஷ்மீரில் நேற்றுமுன்தினம் தீவிரவாதிகள் நடத்திய பயங்கர தாக்குதலில் இருந்து அதிர்ஷ்டவசமாக உயிர்தப்பிய 68 தமிழர்கள் பாதுகாப்பாக தமிழகம் திரும்பினர்.

- பெங்களூரு : யு டியூபில் விளம்பரம் பார்த்து புடவையை ஆர்டர் செய்த, கர்நாடகாவைச் சேர்ந்த, பெண் ஐ.ஏ.எஸ்., அதிகாரி ஏமாற்றப்பட்டார்.

- ஜெய்ப்பூர் : ராஜஸ்தானில் ஒரு ஹோட்டலில், வெறும் 10 நிமிடங்கள் கழிப்பறையை பயன்படுத்தியதற்கு, பெண்ணிடம் 805 ரூபாய் கட்டணம் வசூலித்துள்ளனர்.

- மதுரை: மதுரை நீதிமன்றத்தில், கஞ்சா வழக்கில் தண்டனை விதிக்கப்பட்ட இருவர் ரகளையில் ஈடுபட்டனர். ஒருவர் நீதிபதிக்கு கொலை மிரட்டல் விடுத்தார்.

-  சென்னை: தமிழக சைபர் கிரைம் போலீஸ் பிரிவு பெயர் மற்றும், 'லோகோ'வை பயன்படுத்தி, போலி சமூக வலைதள கணக்குகள் இருப்பதால், எச்சரிக்கையுடன் இருக்கும்படி, போலீசார் அறிவுறுத்தி உள்ளனர்.

நெல்லையில் தனியார் பள்ளி திடீர் மூடல் அனுமதியின்றி செயல்பட்டதாக சர்ச்சை.

- புதுடில்லி: கொரோனா தொற்று மற்றும் இந்தியா - சீனா இடையேயான எல்லை பிரச்னை காரணமாக, 2019க்குப் பின் ஐந்து ஆண்டுகளாக நிறுத்தி வைக்கப்பட்டிருந்த கைலாஷ் - மானசரோவர் புனித யாத்திரை, வரும் ஜூனில் துவங்க உள்ளது.

-  நீ சரணடைந்து விடு; நாங்களாவது நிம்மதியாக வாழ்கிறோம்! பஹல்காம் தாக்குதல் பயங்கரவாதியின் தாய் கதறல்.

- புதுடில்லி: பஹல்காம் பயங்கரவாத தாக்குதல் குறித்து என்.ஐ.ஏ., விசாரணையை துவக்கியது. சுற்றுலா பயணியருக்கு, 'ரீல்ஸ்' எடுத்து தரும் உள்ளூர், 'வீடியோகிராபர்' துப்பாக்கிச் சூடு சம்பவத்தை முழுமையாக, 'வீடியோ' பதிவு செய்துள்ளதை அடுத்து அவரை முக்கிய சாட்சியாக அதிகாரிகள் விசாரித்து வருகின்றனர்.

- சென்னை: அரசு போக்குவரத்து கழகங்களில், டீசல் செலவை குறைக்க, 1,000 பஸ்கள், சி.என்.ஜி., என்ற, 'காஸ்' தொழில்நுட்பத்துக்கு மாற்றப்பட உள்ளன. இந்த வகை பஸ்கள் வாயிலாக, ஒரு கி.மீ.,க்கு 3 முதல் 4 ரூபாய் வரை மிச்சமாகிறது.

- மதுரை: மதுரை மீனாட்சி அம்மன் கோவில், சித்திரை திருவிழா கொடியேற்றத்துடன் இன்று -29/4/25 - துவங்குகிறது. காலை 10:35 மணி முதல் 10:59 மணிக்குள், சுவாமி சன்னிதி முன் கொடியேற்றம் நடக்கிறது.

- நண்பா... நான் இருக்கேன்! பாகிஸ்தான் ஆதரவு: சீனா அறிவிப்பு.

- சென்னை: கர்ப்பிணியருக்கு ஏற்படும் உயர் ரத்த அழுத்தத்தை எளிதாக கண்டறிய, சென்னை ஐ.ஐ.டி., நவீன கருவியை உருவாக்கி உள்ளது.

- கடந்த ஏப்., 22ல், காஷ்மீர் பஹல்காம் அடுத்த பைசரன் புல்வெளியில் 26 சுற்றுலா பயணியர் பயங்கரவாதிகளால் கொல்லப்பட்டனர். அந்த 'கருப்பு செவ்வாய்' அன்று, பலர் உயிர் இழந்த நிலையில் ஒரு சிலிர்க்க வைக்கும் வீடியோ வலைதளங்களில் பரவி வருகிறது.

- சென்னை: சார் - பதிவாளர் அலுவலகத்துக்கு செல்லாமல், பத்திரப்பதிவு மேற்கொள்ளும் வகையில், 'ஸ்டார் 3.0' மென்பொருளில், புதிய வசதி அறிமுகப்படுத்தப்பட உள்ளது.

-  சி.பி.எஸ்.இ., 7ம் வகுப்பு புத்தகத்தில் முகலாயர், சுல்தான் பாடங்கள் நீக்கம்.

- நியூயார்க்: பிரபல அமெரிக்க நிறுவனமான, 'அமேசான்' நேற்று தனது முதல், இன்டர்நெட் இணைப்பு வழங்கும் செயற்கைக்கோள்களை விண்ணில் ஏவியது. அது, எலான் மஸ்க் தலைமையிலான 'ஸ்பேஸ் எக்ஸ்' நிறுவனத்தின் 'ஸ்டார்லிங்க்ஸ்' செயற்கைக்கோள் இணையதள நிறுவனத்திற்கு போட்டியாக கருதப்படுகிறது.

- லக்னோ: உத்தர பிரதேசத்தில், திருமண விருந்தின் போது பனீர் எனப்படும் பாலாடைக்கட்டி சேர்க்கப்பட்ட உணவு வகை ஏதும் பரிமாறப்படாததால் ஆத்திரமடைந்த உறவினர், மண பந்தலுக்குள் மினி பஸ்சை ஓட்டிச் சென்று மோதினார்.  பஸ்சை மோதச் செய்தவர் மீது மணப்பெண் வீட்டார் போலீசில் புகாரளிக்கவில்லை. இதனால் ஆத்திரமடைந்த மணமகன் வீட்டார், புகார் தந்தால் தான் திருமணம் என கூறிவிட்டனர்.

- 

=================================================================================================

இணையத்தில் ரசித்தது...

- 

=============================

===========================================================================================

"நானுறங்கும் நாள் வேண்டும்...  சாய்ந்துகொள்ள தோள் வேண்டும் என் கண்ணில் நீர் வேண்டும் சுகமாக அழவேண்டும்..."  -  வைரமுத்து  

தனிமையில் யோசிக்கும்போது 

தைரியமாகத்தான் இருக்கிறது 

சாய்ந்துகொள்ள 

ஒரு 

நெருங்கிய தோள் 

கிடைத்த உடன்தான் 

உடைந்து விடுகிறது.

எல்லா தோள்களிலும் 

சாய்ந்து கொள்ள  

முடிவதில்லை 

சுகமாக அழ, 

பாரம் இறங்க, 

கண்ணீர் சிந்த 

தனித்த ஒரு 

துணை வேண்டியிருக்கிறது 

=========================================================================================

ஹிஹிஹி......  சில வருடங்களுக்கு முன் பேஸ்புக்கில் பகிர்ந்தது...

'பொன்மேனி உருகுதே... என் ஆசை பெருகுதே...' போன்ற பாடல்களையும் 'நிலாக்காயுது நேரம் நல்ல நேரம்' போன்ற பாடல்களையும் பல விமர்சனங்களுக்கிடையே ரசித்துக் கொண்டிருக்கிறோம். இப்போதும் இது போலப் பல பாடல்கள் வருகின்றன.

எப்போதும் 'பெரிசுகள்' சொல்லும் வசனம் "காலம் கெட்டுப் போச்சு! அந்தக் காலத்துல..."

அந்த 'அந்தக் காலத்துல', அதாவது 1933ல் வெளிவந்த 'வள்ளி' படத்தில் முருகன் வள்ளியை நினைத்து பாடும் பாடல் வரிகள் இவை :

"ஆலோலமென்று குரல் காட்டி

இந்த அரும் புனத்தில்

சேலோடு கண்ணைத் தினைமீது

வைத்த சிங்காரி தன்னை

காலோடு கால் சேர்த்து அனு

ராக போக கலவி செய்தால்

பாலோடு சேர்ந்த பழம் போலும்

தித்திக்கும் பண்புறவே"

======================================================================================

படப்பிடிப்புக்கு வெளியூர் சென்று வந்த நாட்களிலும் வழியில் இருக்கும் அந்தச் சிறு கடையில் அங்கே சாப்பிட்டேன். இப்போது அந்தக் கடை அங்கே இருக்க வாய்ப்பில்லை என்றே நினைக்கிறேன்.

தனியாவும், மிளகாயும், மசாலாவும் அரைத்துச் சேர்த்த மாட்டிறைச்சியை உப்பிட்டு வேக வைத்து நன்றாக வெந்து வரும்போது அதில் மரவள்ளிக் கிழங்கை சுத்தம் செய்து சேர்க்கிறார்கள். பிறகு இரண்டும் ஒன்று கலந்து ஒட்டி உறவாடி பிரித்தெடுக்க முடியாமல் கொஞ்சம் கரைந்த பிறகு தேங்காய் எண்ணெயையும் கறிவேப்பிலையையும் சேர்த்து மூடிவிடுகிறார்கள். செயல்முறையைக் கேட்டால் சாதாரணமாக இருக்கும். ஆனால் விறகடுப்பில் நம் பாரம்பரியப் பாத்திரத்தில் தயாராகும் இந்த உணவின் ருசி பதினெட்டு வருடங்களுக்குப் பிறகும் என்னை ஏங்க வைக்கிறது. வீட்டில் அப்படிச் சமைக்க நான் முயற்சித் திருக்கிறேன். ஆனால் எப்போதும் மரவள்ளி தனியாகவும் மாட்டிறைச்சி தனியாகவும் பிரிந்து கிடந்த உணவாகத்தான் இருந்ததே தவிர, ஒன்று கலந்த ருசியுடன் மாறவேயில்லை.

மலப்புரத்தில் 'எடப்பாளி' என்ற இடத்திற்கும் Üகுட்டிப்புறம்ý என்ற இடத்திற்கும் இடையில் 'நிஷா' என்றொரு ஹோட்டல் இருந்தது. அங்கேயும் பலமுறை நான் நல்ல உணவைச் சாப்பிட்டிருக்கிறேன். புட்டு எடுத்து பீங்கான் கிண்ணத்தில் போடுவார்கள். எரிந்து கொண்டேயிருக்கும் அடுப்பிலிருந்து குழம்பை அள்ளி ஊற்றுவார்கள். எல்லா மசாலாவையும் ஒன்றாய்க் கரைத்து அதில் விதவிதமான கறிகளையும் காய் கறிகளையும் போட்டு, பல பெயர்களிட்டு பரிமாறும் வழக்கமே இந்தக் கடையில் இல்லை. ஒவ்வொரு குழம்பிற்கும் வெவ்றோன மசாலாக் கலவைகளை தனித்தனியாக சிரத்தையெடுத்து தயாரித்து மூடி வைத்து பரிமாறுவார்கள். மிகுந்த ஈடுபாட்டோடு இடையில் உணவு தீரத்தீர

நம்மைக் கேட்காமலேயே, போதுமென்று சொன்னாலும், 'கொஞ்சம் புட்டு வச்சுக்கோங்க. இன்னும் கொஞ்சம் கொழம்பு, ஒரு பீஸ்' எனப் பிரியத்துடன் பரிமாறுவார்கள். சாப்பிடுவதற்கு இணையாக போல பரிமாறுவதையும் அவர்கள் ரசித்து செய்தார்கள்.

கொச்சியில் 'காயிக்கா' பிரியாணியும், திருவனந்தபுரத்தின் 'கேத்தலின்' சிக்கன் குழம்பும் மலையாளிகளின் ருசியின் அடையாளமாக மாறிப்போனது வெறும் ருசியால் மட்டுமல்ல. அதில் அதீத அன்பும், அக்கறையும் பிணைந்திருக்கிறது. நன்றாக ருசித்துச் சாப்பிடுபவர்களுக்கு இங்கே பில்தொகை குறைவாகவே இருக்குமாம். சட்டக் கல்லூரியில் படிக்கும் காலத்தில் 'மாமாக்கடை' தான் எங்கள் கனவு. ஒரு ரூபாய் கொடுத்தால் சாப்பாடும், இருபத்தைந்து பைசா கொடுத்தால் மீனும் கிடைக்கும். 'குணம்பு', 'கரிமீன்' என்ற மீன்களில் தேங்காய் அரைத்துவிட்டு செய்த 'மீன்கறி' களுக்கு மறக்க முடியாத காலங்கள் கடந்த ருசியிருந்தது. நான் சொல்லும் இந்த உணவு வகைகளிலெல்லாம் மலையாளிகளின் அன்பும் சேர்ந்திருந்தது. இப்போதும் நல்ல சாப்பாடு கிடைக்கும் எத்தனையோ உணவு விடுதிகள் இருக்கிறது. நல்ல உணவு எங்கே கிடைத்தாலும் சாப்பிடும் மலையாளிகளின் ருசி உணரும் தன்மை மிகவும் விசாலமானது. இப்போதெல்லாம் சைனீஸ் உணவு அம்மா அப்பாக்களின் பெருமையாக உணரப்படுகிறது. அதைச் சாப்பிட குழந்தைகள் பழகிப் போயிருக்கிறார்கள். அதற்கு நம் குழந்தைகளைக் குறைசொல்ல முடியாது. புதிய உணவுகளான பீட்சாக்களுக்கு சில நேரங்களில் நல்ல ருசி இருக்கவே செய்கிறது. ஆனால் பதினெட்டு வருடங்கள் இருபது வருடங்கள் எனக் காலம் கடந்து நினைவில் தங்கும் ருசி அதற்கிருப்பதாய்த் தெரியவில்லை.

 

-  மூன்றாம் பிறை என்னும் சுயவரலாற்றுப் புத்தகத்தில் மம்மூட்டி  -

==============================================================================================

================================================================================================

படித்ததை, ரசித்ததை பகிர்கிறேன்.

நாலாயிரம் மக்கள் கூடியிருந்த ஒரு நிகழ்வில்தான் ஷைலஜா என்ற பெயரை நான் எனக்குள் பதித்துக் கொண்டேன். அதற்கும் பிறகான நாட்களில் நிகழ்ந்த எங்கள் உரையாடல்கள் வெறும் இலக்கியம் சார்ந்தவைகள் மட்டுமல்ல என்பதை இருவருமே உள்ளுக்குள் உணர்ந்திருந்தோம். அப்போதுதான் பறித்த ரோஜாப்பூக்களை கையிலேந்தி, இருப்பதைந்து வயதில் ஒரு இளைஞன் தெரு முனையில் காத்துக்கிடப்பது இலக்கிய உரையாடலை மட்டும் எதிர்பார்த்து இல்லைதானே?

நாங்கள் இருவரும் எழுதிய கடிதங்களுக்கு உதவியாக கல்யாண்ஜியை காலப்பிரியாவை, கலீப்கிப்ரானை எங்கள் கூடவே வைத்துக் கொண்டோம். ஒரே நாளில் ஐந்து கடிதங்களைக் கூட பறிமாறிக் கொண்டிருக்கிறோம். எங்கள் காதல் ஜாதி, மதம், இனம் மொழி மாநிலம் கடந்தது. இருவீட்டிலும் பெரிய எதிர்ப்பு என்று ஒன்றும் இல்லை. இப்போது யோசித்தால் எளிய மனிதர்களின் வாழ்வில் மூன்று வேளை உணவு, வசிப்பிடம், நல்ல உடை, இவைகளுக்கு அப்புறமே இந்த ஜாதி மதம் என புரிகிறது.

மாபெரும் மக்கள் திரளில் எங்கள் திருமணம் ஒரு ஞாயிறு மாலையில் நிகழ்ந்தது. அம்மா எனக்காக ஒவ்வொரு வருடமும் சேமித்து வைத்திருந்து பயன்படுத்தாமல் போன சொந்தநிலத்துஅரிசி, கத்திரிக்காய், தக்காளி எல்லாம் அந்தவருடம், எங்கள் திருமணத்திற்கு பயன்பட்டது.

திருமணம் முடிந்த அடுத்தநாளே, ஒரு கலைக்குழுவிற்கு பத்து நாட்களும் மூன்று நாட்களும் சமைத்து போட வேண்டும்.

என்ற என் வேண்டுகோளை அவள் ஒரு புன்னகையால் எதிர்கொண்டாள். இன்றுவரை அந்த வேண்டுதல்களும், புன்னகையும் அப்படியேதான் தொடர்கிறது. அல்லது வேண்டுகோள்கள் அவளிடமே நேரடியாய் செல்கிறது அவளே அதை தனி ஆளாக எதிர்கொள்கிறாள்.

திருமணத்திற்குப் பிறகான ஒரு வாரத்தில், ஜே.ஜே.சில குறிப்புகளில் வரும் ஏலிக்குட்டி என்ற பெண்ணைப்போல, இருநூறுப்பக்க நோட்புக்கில் அவள் அதுவரை எழுதியிருந்த கதைகளை கொண்டு வந்து என்னிடம் வாசிக்கத்தந்தாள். என் கண் விரிதலுக்காக அவள் காத்திருந்திருக்கலாம்.

ஷைலஜா மீது காதல் மேலோங்கி இருந்த காலம் அது.

அந்த எழுத்துக்களின் முதிரா தன்மையும், பழகிய வழித்தடமும் பத்து பக்கங்களுக்கு மேல் என்னை வாசிக்கவிடவில்லை. அவளிடமே அதைத் திருப்பித்தந்து, ‘இதைமொத்தமாக கிழித்துப் போட்டுவிட்டு புதிதாக வாசிக்க ஆரம்பி’ என்று சொன்னேன். அதன்பிறகான நாட்களில் கவனித்தேன், அவள் கைகளில் அம்பையும், பிரபஞ்சனும், ஜானகிராமனும் இருந்ததை. அவள் வாசிப்பின் முற்றலை மெல்ல அவதானித்தேன். நெல்கதிர்கள் பாலேறி முற்றி பொன்னிறத்திற்கு மாறுமில்லையா? அப்படி!

இப்போது எழுதத் தோன்றுமே ஏன் இன்னும் எழுதாமல் இருக்கிறாள்? என எனக்கு நானே கேட்டுக்கொண்டேன். அப்போதுதான் கேரளாவின் புகழ்பெற்ற கவிஞன் பாலச்சந்திரன் சுள்ளிக்காடு நாங்கள் நடத்திய ‘முற்றம்’ இலக்கிய நிகழ்விற்கு பங்கேற்க திருவண்ணாமலை வந்திருந்தார்.

நிகழ்வு முடிந்து எங்கள் வீட்டில் அன்றிரவு தங்கினார் அடுத்த நாள் காலை காபிதம்ளரோடு அவரின் புகழ்பெற்ற ‘சிதம்பரஸ்மர்னா’ என்ற அனுபவ பகிர்வுகள் கொண்ட மலையாளப் புத்தகத்தோடு எங்கள் வீட்டு ஹாலில் உட்கார்ந்து முதல் பாகத்தை தன் கணீர் குரலால் படிக்க ஆரம்பித்தார். இன்னும் அக்குரலின் வலிமை குறையவேயில்லை. அக்குரல் தந்த உத்வேகத்தில்தான் ஷைலஜா தன் முதல் மொழியெர்ப்பைத் துவங்கினாள். அது ஒரு காட்டாற்று சூழலைப்போல அவளை இழுத்துப்போனது.

- பவா செல்லதுரை

நன்றி:கனலி

===========================================================================================

==============================================================================================

பொக்கிஷத்தில் விட்டுப்போனது....

=====================================================================================================

உறவினர் வீட்டு ஜன்னலில்  டொக் டொக்கென்று கொத்தும் மைனா....அல்லது மைனாக்கள்.  சுற்றிலும் இருக்கும் ஜன்னல்களில் ஒன்றிரண்டாக வந்து அமர்ந்து சத்தப்படுத்துகின்றன.  சேலம், எடப்பாடி, பாலமலை அடிவாரத்தில் அழகான இயற்கை எழில் கொஞ்சும் இடத்தில் வீடு!

===================================================================================

உன் கண் உன்னை ஏமாற்றினால்...   

ரீல்ஸ் என்று அழைக்கப்படும் ஷார்ட்ஸ்ஸிலிருந்து எடுக்கப்பட்டது.  கடைசி படம் உண்மையைச் சொல்கிறது பாருங்கள்...

=========================================================================================

ஜோக்ஸ்...

இதயம் பேசுகிறது 1978 ல் வந்த சில ஜோக்ஸ்...

யாரிந்த VIP தெரியவில்லை.  பார்த்த முகமாயிருக்கிறது!