நாங்கள் தரிசனம் செய்த கோயில்கள் - 21:: நெல்லைத்தமிழன்

 

பஞ்சவன் மாதேவி பள்ளிப்படை

அன்றைக்கு பஞ்சவன் மாதேவி பள்ளிப்படைக்குச் செல்லலாம் என்று தோன்றியது.  மனைவிக்கோ, விஷ்ணு கோயிலுக்குச் சென்ற பிறகு எதற்கு பள்ளிப்படையெல்லாம் செல்வது என்று கேட்டாள். வருவதற்கு அவளுக்கு அவ்வளவு இஷ்டம் இல்லை. எனக்கோ இந்த முறை அந்த இடத்தைப் பார்த்துவிட வேண்டும் என்ற எண்ணம். அதனால் போனால் போகிறது என்று அப்போ வந்தாள். ஆனால் பிறகெல்லாம் நான் செல்லும் கோவில்களுக்கு எல்லாம் அவளும் வருவாள். வரலாற்று முக்கியத்துவம் கொண்ட இடங்களை நான் எப்போதும் தவறவிடுவதில்லை.

வாழைத்தோப்பு, வயல்களின் ஓரத்தில் அமைந்துள்ள பஞ்சவன் மாதேவி பள்ளிப்படைக் கோயில்  (உள்ளூரில் ஓணான் பிடிக்க முடியாதவன் உளுந்தூர்பேட்டையில் ஒட்டகம் பிடிக்கப் போனான் என்ற கதையாக, கீழடியைத் தோண்டி தமிழர்கள் வரலாற்றைக் கண்டுபிடிக்கப்போகிறேன் என்று புறப்படுபவர்களுக்கு, இருக்கும் வரலாற்றுச் சின்னங்களை, இடங்களை இன்னும் செம்மைப்படுத்துவோமே என்ற எண்ணம் வருவதில்லை. ஏனென்றால் அப்படிச் செய்தால் தங்கள் அரசியலுக்கு உபயோகமில்லை என்று கருதுகிறார்கள் போலிருக்கிறது). 

பஞ்சவன் மாதேவி பள்ளிப்படையின் நுழைவாயிலைப் பார்த்தாகிவிட்டது. (சரித்திர முக்கியத்துவம் வாய்ந்த இந்த மாதிரி இடங்களை வெளியூர் மக்கள் மாத்திரம் பார்த்தால் போதாது. உள்ளூர் மக்களும் அடிக்கடி இந்த இடங்களுக்குச் செல்லவேண்டும். அப்போதுதான் கோயில்கள் காலம் காலமாக நிலைத்து நிற்கும். இது நமது கடமையாக நினைத்துச் செய்யவேண்டும்.

இந்த பஞ்சவன் மாதேவி பள்ளிப்படையில், பள்ளிப்படையைப் பற்றிய விவரம் ஒன்று வைத்திருக்கிறார்கள். அதில் குறிப்பிட்டிருப்பதைக் கீழே கொடுத்துள்ளேன்.

சோழப் பெருமன்னர்கள் வரிசையில் திலகமெனத் திகழ்ந்த முதலாம் ராஜராஜ சோழனின் மனைவியே இந்த பஞ்சவன் மாதேவி. இவர் சேரர் குறுநில மன்னர்களுள் ஒருவராகிய பழுவேட்டரையரின் மகள். திருச்சி மாவட்டம் உடையார்குடி தாலுக்காவில் உள்ள பழுவூரே இவரது ஊராகும். பழுவூர் கோவிலில் உள்ள முதலாம் ராஜராஜனின் 27ம் ஆண்டு கல்வெட்டில் இவரைப் பற்றி ‘அவனி சுந்தரி புரத்து பழுவூர் தேவனாரின் திருமகள்-பழுவேட்டரையரின் மகள்’ என்று கூறுகிறது திருப்புகலூர் கல்வெட்டால் இத் தேவியின் மற்றொரு பெயர் ‘நக்கன் தில்லையழகி’ என்று அறிய முடிகிறது.

பஞ்சவன் மாதேவி ஒரு தளிச்சேரி பெண் என்றும், ஆடல் கலை மற்றும் போர்த்திறனிலும் சிறந்து விளங்கியவள் என்றும் ராஜராஜன் உள்ளம் கவர்ந்த அன்பு மனைவி என்றும், ராஜராஜன் தஞ்சையில் பெரிய கோவில் எழுப்பிய பொழுது மன்னுக்கு எல்லாமுமாக இருந்து உதவி செய்தவர் என்றும், ராஜேந்திர சோஅனை தன்னுடைய சொந்த மகனாக பாவித்து வளர்த்தவர், அதனால் ராஜேந்திரனைத் தவிர வேறு யாரும் ஆட்சிக்குப் போட்டியாக வந்துவிடக்கூடாது என்று மூலிகை மருந்து உண்டு தன்னை மலடாக்கிக் கொண்டவர் என்று செவிவழிச் செய்திகள் உண்டு.

பஞ்சவன் மாதேவி அளித்த கொடைகளும் சாதனைகளும் பலவாகும். நினைவு கூறத்தக்க வகையில் புகழ் மிகுந்து திகழ்ந்த தால் சோழ நாட்டில் ஒரு ஊருக்கே இவர் பெயரால் பஞ்சவன் மாதேவி சதுர்வேதி மங்கலம் என்ற பெயர் மாற்றம் ஏற்பட்ட து.

பஞ்சவன் மாதேச்வரம் என்பது ராஜராஜனின் தேவி பஞ்சவன் மாதேவி மறைந்த பிறகு, ராஜராஜ சோழனின் மகனான ராஜேந்திர சோழனால் தன் சிற்றன்னைக்காக எடுக்கப்பட்ட நினைவாலயம்.

இத் திருக்கோவிலில் காணப்படும் ராஜேந்திர சோழனின் கல்வெட்டு இதனை ‘பழையாறையான முடிகொண்ட சோழபுரத்துப் பள்ளிப்படை பஞ்சவன் மாதேவிச்வரம்’ என்று குறிப்பிடுகிறது. இதே கல்வெட்டில் ராஜேந்திர சோழனின் தளபதி அருண்மொழியான உத்தம சோழ பிரம்மராயன் பற்றியும், சைவ மடங்களுள் ஒன்றான லகுலீசமடம் பற்றியும் அதன் தலைவர் லகுலீச பண்டிதர் பற்றியும் பல வரலாற்றுத் தகவலைச் சுமந்து நிற்கிறது.

இக்கோவில் திருச்சுற்றில் உள்ள விநாயகர், பிச்சை தேவர், ஆலமரச் செல்வர், லிங்கோத்பவர், பிரம்மன், துர்க்கை போன்ற சிற்பங்கள் ராஜேந்திர சோழனின் தனி முத்திரைகளாகும். இரண்டு சிவபெருமானின் கோல நிலைகளில் பல்லவர்களின் கலைமணம் கமழ்கிறது. இவை கிபி 710-715 வரை ஆண்ட இரண்டாம் நந்திவர்ம பல்லவனின் காலத்தில் அவனது கோநகரான பழையாறையில் இடம் பெற்று இருந்த சிலைகளாக இருக்கலாம்.

கருவறையின் அர்த்த மண்டபத்தில் உள்ள நந்தியும் கல்தூணும் பழுவேட்டரையர்களின் கலைப்படைப்பாகும். இதே போன்ற நந்தியும் தூணும் பழுவூரிலும் காணப்பட்கிறது. பழுவேட்டரையரின் மகள் என்பதால் இத் தேவி பிறந்த மண்ணின் கலைமணம் கருவறையில் வீசுகிறது என்பது ஆராய்ச்சியாளர்களின் கருத்து.

சோழப் பெருமன்னர்களின் தலைநகராகவும் சோழ அரச குடும்பத்தினர் இறுதிவரை வாழ்ந்த இடம் என்ற பெருமையை உடைய பழையாறை மாநகரின் ஒரு பகுதியாகத் திகழ்ந்த பட்ட்ச்வரம் எனும் சிற்றூரில் அமைந்துள்ளஹ்டு. இந்த பஞ்சவன் மாதேவிச்வரம். பட்டீச்வரம் தேனுபுரீச்வரர் திருக்கோவிலில் இருந்து அரை கி.மீ துரத்தில் உள்ளது இந்தப் பள்ளிப்படை கோயில். தற்போது இந்தக் கோவில் ராமநாதன் கோவில் என்று அழைக்கப்பட்கிறது. 

1978ல் டாக்டர் நாகசாமி அவர்களின் மாணவர் குழு ஒரு கோயிலைக் கண்டுபிடித்தனர். அப்போது அது மண் புதர்களால் மறைக்கப்பட்டு செடி கொடி மரங்கள் முளைத்து முழுவதுமாக மறைந்திருந்த து.  கருவறையும் மண் மூடிக் கிடந்திருக்கிறது. அந்த மாணவர் குழு (அவர்களில் முனைவர் பத்மாவதி அவர்களும் ஒருவர்) மண்ணை முழுவதுமாக அகற்றி, சிவலிங்கத்தை வழிபாட்டுக்குரியதாகச் செய்திருக்கிறார்கள். கோயிலைச் சுற்றியுள்ள காடுகள் போல மண்டியிருந்த மரம் செடி கொடிகளைச் சரி செய்து கோயிலை மீட்டெடுத்திருக்கிறார்கள். பிறகு கோயிலின் முன் கோபுரம் கட்டப்பட்டு, கோயில் வழிபாட்டுக்குரியதாக ஆக்கப்பட்டு உள்ளூர் மக்களிடம் ஒப்படைக்கப்பட்ட தாம்.

கோயிலில் உள்ள நந்தி, பழுவேட்டரையர் கட்டுமானத்தைப் பிரதிபலிப்பதாக, அழகிய கொம்புகள், மணிகள் அமைந்த மாலைகள் போன்றவற்றுடன் செய்யப்பட்டிருக்கிறது சிறப்பு.  மூலஸ்தானத்திற்கு முன்புறம், ந ந்திக்கு முன்புறம் இருக்கும் துவாரபாலகர்கள் மிகச் சிறப்பாகவும் வித்தியாசமாகவும் வடிவமைக்கப்பட்டிருக்கின்றனர்.

பஞ்சவன் மாதேவி என்பவர் இராஜராஜ சோழனின் மனைவியருள் ஒருவர். பழுவேட்டறையர் குலத்தைச் சேர்ந்தவர். அவர் ராஜேந்திர சோழனின் சிற்றன்னை. அவனுக்கு அனுசரணையாக குழந்தை பெற்றுக்கொள்ளாமலேயே இருந்துவிட்டார் என்கின்றார். இராஜராஜ சோழன் மறைவுக்குப் பிறகு (?) பஞ்சவன் மாதேவி சிவதீட்சை எடுத்துக்கொண்டுவிடுகிறார். சிவதீட்சை பெற்றுக்கொண்ட பிறகு, அவர்கள் இறக்கும்போது அவரது உடலைத் தீக்கு இரையாக்காமல் பள்ளிப்படுத்தி (பூத உடலை சதுரமான குழி வெட்டி அதில் உட்கார்ந்த நிலையில் வைத்து, நீராட்டுதன்ல் போன்ற சடங்குகளைச் செய்த பிறகு மேலே மூடி, தலைக்கு மேல் சிவலிங்கத்தை வைத்து சிறு கோயில் எழுப்புவது பள்ளிப்படை என்பதாகும். இது சைவ சமயத்தில் காளாமுக, பாசுபதப் பிரிவுகளின் வழக்கமாம்.   (சிவதீட்சை ஏற்றுக்கொண்டவர்களை தீக்கு இரையாக்கினால் அது சிவன் கோயிலையே தீக்கு இரையாக்குவது போல அர்த்தமாம். அப்படிச் செய்தால் நாட்டில் பசி பட்டினி பஞ்சம் வருமாம்) இப்படிப்பட்ட பள்ளிப்படைகளை ஒட்டிய மாதிரி ஒரு மட த்தை அமைத்து அதில் லகுலீச பாசுபதர் என்பவர் பொறுப்பில் விடுவார்களாம். அவர் இந்த பள்ளிப்படையைப் பார்த்துக்கொள்வாராம். (நினைவு நாள், பிறந்த நாளில் வழிபாடுகள் செய்யவும், வருகின்ற அதிகாரிகளுக்கு உணவு படைக்கவும் மடத்தின் வருமானத்தைச்-தானத்தின் மூலம் கிடைப்பது செலவிடுவார்களாம்). இந்த மாதிரி பள்ளிப்படைகளை அமைக்கும் முறையை திருமூலரின் திருமந்திரத்தில் சொல்லியிருக்கிறார்களாம்.

நான் வயல்வெளிகளுக்குள் கிடந்த இந்த பஞ்சவன் மாதேவி பள்ளிப்படையை மீட்டெடுத்திருக்கிறார்கள் என்று நினைத்தேன். ஆனால் இதனைச் சுத்தப்படுத்தி கல்வெட்டுகளைப் படியெடுத்துப் படித்து இதன் முக்கியத்துவத்தை உணர்ந்து என்று பெரிய வரலாறே இதன் பின்னால் இருக்கிறது. இதனை மனதில் வைத்து படங்களைக் காண வேண்டும்.

கோயில் முகப்பிலேயே பெரிய அளவில் துவாரபாலகர்கள். இது பொதுவாக சோழர்களின் கோயில் அமைப்பு.  

விநாயகர், பிக்ஷாடனர்

எங்குபார்த்தாலும் அதிஷ்டானத்தில் கல்வெட்டுகள். 

லிங்கோத்பவர். 

கொஞ்சம் அதிகாலைதான். அதனால்தான் புகைப்படம் பளிச் என்று வரவில்லை. இன்னொரு முறை இந்தக் கோயிலுக்குச் செல்லும் வாய்ப்பு இன்னும் வரவில்லை.

கல்வெட்டுகள் தெளிவாகத் தெரிகின்றனவா?

கருவறை விமானம். சுற்றிவர உள்ள மதில்கள் சோழர் கோயில் என்று சொல்லாமல் சொல்லும்.

சமீபத்தைய பயணத்தின்போது பஞ்சவன் மாதேவி பள்ளிப்படைக்கு மீண்டும் செல்லவேண்டும் என்று நினைத்தேன். ஆனால் நேரம் ஒத்துவரவில்லை. இந்தப் பள்ளிப்படையைப் பார்க்க நினைப்பவர்கள் பகல் 12 ½ க்குள் செல்வது நல்லது. அப்போதுதான் கோயில் திறந்திருக்கும் என்று படித்தேன். சோழர் வரலாற்றைப் படித்து, பல கோயில்களுக்கும் செல்லும்போது, திரும்பவும் ஒரு கோயிலைக் காணும்போது அதன் வேறு சிறப்புகளும் நமக்குப் பிடிபடும். இதற்காகத்தான் ஒரு தடவைக்கு மேல் இந்த மாதிரி வரலாற்றுச் சிறப்பு மிக்க இடங்களுக்குச் செல்ல நினைப்பது.

இதன் கடைசிப் பகுதியை அடுத்த வாரம் காணலாம்.

(தொடரும்)