ராகங்கள் பாடுகின்ற போது

ராகங்கள் பாடுகின்ற போது ரசிகர்கள் உட்கார்ந்து கேட்டுக் கொண்டிருப்பதைப் பார்த்தோம்.
**..தோம்?. ஆம், நண்பருடன் T.Nagar German Hall -லில் நடந்த சிவரஞ்சனி - நளின காந்தி கச்சேரி பற்றி தான் சொல்கிறேன்.

ஜி என் செட்டி சாலையில் பால மந்திர் அருகேதான் நண்பர் வீடு. புதிதாக வாங்கியிருந்த டெல் இன்ச்பிறான் கணினியைப் பார்ப்பதற்கும், கேட்பதற்கும் கூப்பிட்டிருந்தார். சரியாகத்தான் படித்தீர்கள் - கேட்பதற்கு என்பது சரியே. பாட்டுக்கள் கேட்கும்போது சுனாதமாய் ஒலிக்கிறது. மூர்த்தி சிறிதாயினும் கீர்த்தி பெரிது என்பார்களே அது இது தானோ?

பார்த்தீர்களா எழுத எடுத்துக்கொண்ட பொருளை விட்டு விட்டு வேறெங்கோ அலைகின்றேனே!
நாங்கள் பாய் இருக்கைகளில் அமர்ந்த போது நாட்ட குறிஞ்சி மாதிரியோ அல்லது நாட்டக்குறிஞ்சியிலேயோ வெகு விஸ்தாரமாக ஸ்வரம் பாடிக் கொண்டிருந்தார்கள். இரண்டு பேருமே சற்றுக் "கீச்" ஆக இருந்தாலும் கேட்க நன்றாகத்தான் இருந்தது. அடுத்து பைரவியில் ஒரு டான்ஸ் பாட்டு - உங்கள் எல்லோருக்கும் பரிச்சயமாக இருக்கலாம். நான் சமஸ்கிருதத்தில் ரொம்ப வீக்.

இவர்கள் ஏன் பக்க வாத்தியத்தில் கடம் இல்லாமல், கஞ்சிரா வைத்துக் கொண்டு பாடுகின்றனர் என்று யோசித்துக் கொண்டே

இன்னும் கொஞ்ச நேரம் உட்கார்ந்து கேட்ட போது அவர்கள் அடிக்கடி மேல் ஸ்தாயியைப் பிடிக்க முயல்வதும் வெற்றியடைந்தாலும் மீண்டும் மீண்டும் மீண்டும் முயற்சிப்பதுமாக விளையாடிக் கொண்டிருந்த வேளையில் நண்பர் இன்னொரு நண்பரை "காட்டியா" கேட்டிருந்தது நினைவுக்கு வர ....

ஏ சீ பஸ்ஸில் படம் பார்த்த (அ)திருப்தியுடன் வெளி வந்தோம்.
இதென்ன தலையும் இல்லாமல் வாலும் இல்லாமல் .... என்கிறீர்களா?
கேட்டவரை தானே எழுத முடியும்?