வெள்ளி வீடியோ : இமையை விழிதான் மறப்பதுண்டோ காட்சி வந்த பின்னே எனது நிலையை எடுத்துச் சொல்ல தூது போ என் கண்ணே

1971 டிசம்பர் 24 ஆம் தேதி வெளியான படம் ரங்கராட்டினம்.  

படம் பற்றி பெரிய தகவல் எதுவும் தெரியவில்லை.  சௌகார் ஜானகி தயாரித்து இரட்டை வேடங்களில் நடித்திருக்கும் இந்தப் படத்தை இயக்கி இருப்பவர்கள் கிருஷ்ணன் -பஞ்சு.  

ஜெமினி கணேசன், ரவிச்சந்திரன் ஆகியோரும் நடித்திருக்கிறார்கள் என்று தெரிகிறது.

அப்போது வெளிவந்த வெகுளிப்பெண் திரைப்படமும் இந்தப் படமும் ஒரே கதை என்றும், அந்தப் படம் முன்னரே வெளிவந்து வெற்றியும் விருதும் பெற்றது என்றும், இது தோல்விப்படம் என்றும் படித்தேன்.  அது என்ன ஆனால் என்ன, எனக்கு / நமக்குத் தேவை பாடல்கள்!

இசை வி. குமார்.  பாடல்கள் வாலி.

இந்தப் படத்தில் மூன்று பாடல்கள் எனக்குப் பிடிக்கும்.  முதல் இரண்டு இடங்களில் வரும் பாடல்கள் எஸ் பி பாலசுப்ரமணியம் பாடியது.  முதல் பாடல் இந்த வாரம்.

வழக்கம்போல SPB யின் குரல்...   ரசிக்கத்தக்க பாடல்.  பாடல் வரிகளிலிருந்து ஓரளவு காட்சியை யூகிக்க முடிகிறது.  தஞ்சை ராஜேந்திரா தியேட்டர் காலங்களில் கேட்ட பாடல்கள்.  

வெகுளிப்பெண்ணும் பார்த்ததில்லை, இந்தப் படமும் பார்த்ததில்லை.   

தங்கத் தொட்டில் பட்டுமெத்தை தாய் வீட்டிலே 

பாசம் மட்டும் உண்டு எந்தன் தாலாட்டிலே 

தன்னைத்தானே மறந்திருந்தாள் உன்னை ஈன்ற அன்னை 

திரும்பி வந்த நினைவிருந்தும் மறந்ததென்ன என்னை 

இமையை விழிதான் மறப்பதுண்டோ காட்சி வந்த பின்னே 

எனது நிலையை எடுத்துச் சொல்ல தூது போ என் கண்ணே 

கண்ணன் வந்தான் நண்பனுக்குத் தேரோட்ட அன்று 

தந்தை வந்தான் பிள்ளைக்காகக் காரோட்ட இன்று 

வானில் உள்ள தேவன் இந்த விந்தை கண்டு சிரிப்பான் 

வாழ்ந்து பார்க்க வேளை வந்தால் நம்மை ஒன்று சேர்ப்பான்