"நான் என்ன பெரிசா பண்ணிட்டேன்?" + புத்தக அறிமுகம் – நெல்லைத்தமிழன் - “இமயத்து ஆசான்கள் – சுவாமி ராமா”

1)  ’தேவை’யே கண்டுபிடிப்புகளின் தாய்’ (Necessity is the mother of all inventions) என ஒரு பழமொழி உண்டு. அந்த வழியில், விவசாயிகளின் வியூகங்கள் !

பழைய 20லி. தண்ணீர்ப்பாட்டில்கள், குளுகோஸ் பாட்டில்களை உபயோகித்து சொட்டுநீர்ப் பாசனம், அரிதாகவே கிடைக்கும் தண்ணீர் வீணாகிவிடாமல்..   (நன்றி ஏகாந்தன் ஸார்)

2)  அவரது ஆட்டோவில் பயணம் செய்த மாலத்தீவு உட்பட பல்வேறு வெளிநாடுகளைச் சேர்ந்த சுற்றுலா பயணிகள் அலைபேசியில் தொடர்பு கொண்டு பாராட்டி வருகின்றனர். பணம் கொடுப்பதற்கு வங்கி கணக்கு எண்ணை கேட்ட சிலரிடம் மறுத்து விட்டார்..... 

கேரளா, மூணாறு அருகே ஜீப்பில் இருந்து தவறி விழுந்த குழந்தையை மீட்ட ஆட்டோ டிரைவர் கனகராஜ்.

=========================================================================================================================

புத்தக அறிமுகம்  – நெல்லைத்தமிழன் - 

 “இமயத்து ஆசான்கள் – சுவாமி ராமா”

இளைய துறவியாக சுவாமி ராமா.  முதிர்ந்தபிறகு ஆசானாக அமெரிக்காவில்

நான் புத்தகப் பிரியன். சிறிய வயதிலிருந்தே நிறைய வாசிப்பவன். 6வது படிக்கும்போது முதல் முதலாக எங்கள் பள்ளிக்கு லைப்ரரி வந்தது. பள்ளித் தலைமை ஆசிரியரான என் அப்பா, எல்லோருக்கும் படிக்கும் பழக்கத்தை அறிமுகப்படுத்த வேண்டும் என்று, மாணவர்கள் சிலருக்கு ‘லைப்ரரி மெம்பர், புத்தகத்தை இரவலாக எடுத்துச் செல்லுதல், படித்த பிறகு பள்ளி லைப்ரரியில் புத்தகத்தைத் திருப்பித் தருதல்’ என்பதை அறிமுகப்படுத்தினார்கள். நான் புத்தகங்கள் படிப்பதில் மிகுந்த விருப்பம் உடையவன் என்பதை அறிந்திருந்த என் அப்பா, எனக்கு ‘ஷேக்ஸ்பியரின் ஒரு நாடகத்தை தமிழில் ‘கழுதையின் காதல்’ (சரியாக நினைவில் இல்லை) என்பதாக வெளியிடப்பட்டிருந்த புத்தகத்தைக் கொடுத்தார்.  நான் அப்போதெல்லாம் கல்கியில் அப்போதுதான் வெளிவந்துகொண்டிருந்த சிவகாமியின் சபதம் தொடரை விரும்பிப் படிக்க ஆரம்பித்திருந்தேன் (எங்க அப்பா கல்கி வாங்கலை. அந்தத் தெருவில் இருந்த என் டீச்சர் வாங்கிக்கிட்டிருந்தாங்க. அங்கேயே உட்கார்ந்து படித்துவிட்டு வருவேன். அப்போதுதான் அந்த ஓவியங்களை தனியாக தொடரின் இடையில் முழு வண்ணத்தில் வெளியிடுவார்கள்).  என்னவோ அந்த ஷேக்ஸ்பியரின் நாடகம் அப்போ என்னைக் கவரவில்லை. அதுக்குக் காரணம் அந்த கலாச்சாரம் நம்முடையது இல்லை என்பதால் இருக்கலாம்.  இந்த ‘புத்தகப் பைத்தியம்’ எப்படி என் பள்ளி/கல்லூரிப் படிப்பைக் கெடுத்தது என்பதையெல்லாம் இங்கு எழுதப்போவதில்லை. வேலைக்குப் போக ஆரம்பித்ததும் சொந்தமாக புத்தகங்கள் வாங்க ஆரம்பித்தேன். அவ்வப்போது அவை தொலைந்துபோகும். பஹ்ரைனில் இருந்தபோது என்னிடம் நூற்றுக்கணக்கில் புத்தகங்கள் சேர்ந்திருந்தன. அனேகமாக அனைத்தையும் அங்குள்ள தமிழ் மன்றத்திற்குக் கொடுத்துவிட்டேன்.  அந்தக் கதையை இங்கு எழுதினால் ‘புத்தக அறிமுகம்’ செய்ய இடம் இருக்காது.

எனக்கு “இமய குருவின் இதய சீடன்” என்ற ஸ்ரீ. எம். என்பவரின் புத்தகம், ஒரு புது வசீகரமான வாசலைக் காட்டியது. அதற்கு முன்பாக நான் படித்திருந்த “ஒரு யோகியின் சுய சரிதை” என்ற புத்தகம் எனக்கு யோகம், தியானம் போன்றவற்றில் சிறிது ஈர்ப்பை உண்டாக்கியிருந்தது.  அதன் ஆசிரியர், தான் கடவுளைக் கண்டதாக அந்தப் புத்தகத்தில் எழுதியிருந்தார்.  ‘இமய குருவின் இதய சீடன்’ புத்தகத்திற்குப் பிறகு, சென்னை விமான நிலையத்தில் ‘இமயத்து ஆசான்கள்’ என்ற இந்தப் புத்தகத்தை வாங்கியிருந்தேன்.

இமயமலைப் பள்ளத்தாக்கில் பிறந்த ஒருவரை, அவரது முன் வினைப் பயனாக, குரு சின்ன வயதிலேயே தன்னுடன் எடுத்துச் செல்கிறார். குருவின் அரவணைப்பிலேயே வளரும் சீடன், இமயமலைப் பள்ளத்தாக்கில் பல்வேறு சாதுக்களிடம் பயிற்சியும், அனுபவங்களையும் பெற்று சுவாமி இராமா என்ற நிலைக்கு உயர்கிறார். சுவாமி இராமா தன் அனுபவங்களையும் சந்தித்த யோகிகள், அவர்கள் மூலம் தான் கற்றுக்கொண்டவை போன்றவற்றை சின்னச் சின்ன அத்தியாயங்களாக எழுதியுள்ளார். இது முதலில் “Living with the Himalayan Masters” என்ற புத்தகமாக ஆங்கிலத்தில் எழுதப்பட்டு, பிறகு அவருடைய சீடரின் மூலமாக ஹிந்தியில் மொழிபெயர்க்கப்பட்டது.  நான் வாங்கிய தமிழ்ப்பதிப்பு, ஆங்கில மூலத்திலிருந்து புவனாபாலு என்பவரால் தமிழாக்கம் செய்யப்பட்டு கண்ணதாசன் பதிப்பகத்தால் 2011ல் வெளியிடப்பட்டது.

பொதுவாக ஆன்மீகப் புத்தகங்கள், அதிலும் ஒருவரது சுய சரிதம், அவருடைய அனுபவங்கள் மற்றும் சாதனைகள் நமக்கு அப்பாற்பட்டவை என்று நம்மைச் சிந்திக்க வைக்கும். ஆனால் சுவாமி இராமா இந்தப் புத்தகத்தில் தானும் நம்மைப் போன்ற குறும்புக்காரனாகவும், விடலைப் பருவத்தின் துணிவும் கொண்டிருந்த, பல நேரங்களில் தன் குருமார்களிடம் இளமை வேகத்தில் மரியாதை இல்லாமல் நடந்துகொண்டதை, பலவீனங்களை எல்லாம் எழுதுவதன் மூலம், அவர் நம்மில் ஒருவராக இருந்து தன் நிலையில் மேம்பட்டவர் என்பதை உணர வைக்கிறார்.  இதுதான் நம்மை இந்தப் புத்தகத்தில் ஒன்றிட வைக்கிறது.

அவரது சீடரான, இந்தப் புத்தகத்தின் ஹிந்தி மொழியாக்கம் எழுதிய பண்டிட் ராஜ்மணி திகுநாயத் என்பவர், தான் சுவாமிஜியிடமிருந்து நேரடியாகப் பெற்ற அனுபவங்களும், அவருடன் பயணம் செய்து கற்றறிந்த விஷயங்களும் தனக்கு அளித்த தன்னம்பிக்கையின் பலத்தில் இந்த மாபெரும் பனிமலையின் ஒரு சிறு நுனியைத்தான் இந்தப் புத்தகத்தில் உள்ள கதைகள் பிரதிபலிக்கின்றன என்று கூறுகிறார்.

சமீபத்தில் என்னிடம் பிரபல மூத்த பதிவரான ஜி.எம்.பாலசுப்ரமணியம் சார், அவர் எழுதிய முதல் நாவலான “நினைவில் நீ” என்ற மின்னூலை பகிர்ந்துகொண்டிருந்தார். அந்த நாவலின் விமர்சனத்தை எங்கள்  பிளாக், சனிக்கிழமைக்கு புத்தக விமர்சனமாக  எழுதலாமே என்று நினைத்தேன். அதற்கு அவரின் அனுமதி கிடைக்கலை. அதனால் டிராஃப்டில் வைத்திருந்த ‘இமயத்து ஆசான்கள்’ என்ற புத்தக அறிமுகத்தை இந்த வாரத்துக்காக எங்கள் பிளாக்குக்கு எழுதி அனுப்பினேன். 

சரி..இப்போ புத்தக அறிமுகத்துக்கு வருகிறேன்.

சுவாமி இராமா, தன்னுடைய இந்தப் புத்தகம் வாழ்க்கைச் சரிதமல்ல, ஆனால் இமயத்து யோகிகளிடமிருந்தும் அன்புக்குரிய ஆசான்களிடமிருந்தும் தான் பெற்ற அனுபவங்களின் பரிசு என்கிறார். 

சுவாமி இராமாவின் தந்தை உயர்ந்த ஆன்மீக வாதியாகவும் பண்டிதராகவும் உத்திரப்பிரதேசத்தில் உள்ள கிராமத்தில் நிலச்சுவாந்தாராக வாழ்ந்தார். அவர் ஆன்மீகப் பயிற்சி மேற்கொள்ள தனிமையை நாடி ஆறுமாதம் ஹரித்துவார் அருகிலுள்ள மானஸா தேவிக் கோவில் காடுகளில் தியானத்தில் ஆழ்ந்திருந்தார். அப்போது ஒரு யோகி அவர் தங்கியிருந்த இடத்துக்கு வந்து சேர்ந்தார். அவரைக் கண்டதும் சுவாமி இராமாவின் தந்தைக்கு அவர்தான் தனக்குரிய குருநாதர் என்பதை உணர்ந்துகொண்டார்.  அந்த யோகி, அங்கே ஒரு வாரம் தங்கியிருந்து சுவாமி இராமாவின் தந்தைக்கு வழிகாட்டி, அவரை உத்திரப்பிரதேசத்தில் இருக்கும் அவரது வீட்டிற்குத் திரும்பிப் போகச் சொன்னார். அப்போதே சுவாமி இராமாவின் தந்தைக்கு வயது அதிகமாக ஆகியிருந்தது.  வீடு திரும்பியவர், தன் மனைவியிடம் தனக்கு ஏற்பட்ட அனுபவங்களையும் தான் ஒரு குருநாதரைச் சந்தித்ததையும் அவர் தங்களுக்கு ஒரு மகன் பிறப்பான் என்றும் அவன், தன்னையே பின்பற்றுவான் என்று அருளியதையும் பகிர்ந்துகொண்டார்.

இதனை சுவாமி இராமாவின் மொழியிலேயே படித்தால்தால்தான், எப்படி சுவாமி இராமாவின் வாழ்க்கை தொடங்கியது என்று தெரியும்.

இரு வருடங்களுக்குப் பிறகு எனது குருநாதர் இமய மலையிலிருந்து எனது பெற்றோரின் கிராமத்துக்கு வந்து அவர்களைச் சந்தித்தார். அப்போது என் தந்தை இரவு உணவு அருந்திக்கொண்டிருக்க, என் தாயார், கதவைத் திறந்து, வந்தவர் யாரென்று அறியாமல் அவரைக் காத்திருக்கும்படிக் கேட்டுக் கொண்டார். விருந்தினர் வருகை அறிந்து என் தந்தை உணவைப் பாதியில் விட்டு வாசலுக்கு விரைந்தார். “உங்கள் வீட்டில் உணவருந்தவோ, உபசரிப்பை ஏற்கவோ நான் வரவில்லை. நீங்கள் எனக்கு ஏதாவது தரவேண்டும்” என்றார் குருநாதர். 

“என்னிடம் உள்ளது எதுவும் தங்களுடையதே என்று பதிலளித்தார் என் தந்தை.

“எனக்கு உன் மகன் வேண்டும்” என்று குருநாதர் கேட்க,

“இத்தனை வயதான பிறகு ஒரு பிள்ளைப்பேறு என்பது எங்களுக்கு அதிசயமானதே. ஆனால் அவ்வாறு நேர்ந்தால் என் மகன் உங்களுக்கே சொந்தமாவான்” என்று என் பெற்றோர் உறுதியளித்தனர். இந்தச் சந்திப்பிற்குச் சரியாக 18 மாதங்களுக்குப் பிறகு நான் பிறந்தேன்.

நான் பிறந்த அன்றே என் குருநாதர் குழந்தையைத் தன்னிடம் கொடுக்கும்படிக் கேட்டாராம். தாய்மைக்கே உரிய மனோபாவத்தில் என் தாய் முதலில் மறுத்தாலும், என் தந்தையின் கட்டளையின்படி என்னை அவரிடம் கொடுத்தார். அவர் சிறிது நேரம் என்னைத் தன் கரங்களில் வைத்திருந்துவிட்டு, “அவனைப் பார்த்துக்கொள்ளுங்கள். நான் பின்னர் மறுபடியும் வந்து அவனைக் கூட்டிச் செல்கிறேன்” என்று கூறிவிட்டுச் சென்றுவிட்டார்.

3 வருடங்களுக்குப் பிறகு எனது குருநாதர் எனது வலது காதில் ஏதோ ஒரு மந்திரத்தை ஓதினார். “எனக்கு அந்த மந்திரம் நினைவில் உள்ளது” என்று நான் சொன்னதற்கு, “எனக்குத் தெரியும்.. ஆனாலும் உறுதிப்படுத்திக் கொண்டேன்” என்றார்.

தன் பெற்றோரின் மரணத்திற்குப் பிறகு, தன் குருநாதரை வந்தடைந்தவர், அவருடனே தன் வாழ்க்கையைச் செலவழித்தார். குருநாதர், இவரை பல்வேறு சாதுக்களிடம் அனுப்பி ஒவ்வொருவரிடமும் கற்றுக்கொள்ளவைத்து சுவாமி இராமாவை உருவாக்கினார்.

இமயமலையின் இயல்பு, அங்குள்ள மக்களின் இயல்பு, அவர்களுடைய வாழ்க்கை, அங்கிருக்கும் சாதுக்கள், இந்த வழியில் அவர் சந்தித்த தாந்திரீக குருக்கள்,  மாந்திரீகர்கள், அவர்களின் மாயவித்தை என்று பல்வேறு கூறுகளை சுவாமி இராமா நம்முடன் பகிர்ந்துகொள்கிறார்.

அதில் ஒரு இஸ்லாமிய மெளல்வி, தாந்திரீக முறையில், கோழிக்குஞ்சின் உயிரை வாழை மரத்துக்கு மாற்றி கோழியை இறக்கச் செய்து பிறகு சிறிது நேரம் கழித்து அந்த வாழை மரத்திலிருந்து உயிரை மீண்டும் கோழிக்குக் கொண்டு செல்லும் மாயவித்தை காண்பித்ததையும், இது போன்ற பல வித்தைகளைத் தான் பார்த்ததையும், அதற்கும் ஆன்மீக முன்னேற்றத்துக்கும் சம்பந்தம் இல்லை என்றும், இத்தகைய வசீகர மாயவித்தையில் நம் மனம் சென்றால், ஆன்மீக முன்னேற்றம் நிகழாது எனவும், அது மேலும் நம் கர்ம வினைகளை அதிகரிக்கும் என்றும் குறிப்பிடுகிறார்.

ஆன்மீகத்துக்கும் குறிப்பிட்ட மதத்திறும் சம்பந்தம் இல்லை. கடவுளை அறிய அது ஒரு வழி என்று குறிப்பிடும் சுவாமி இராமா, இமயத்தில் தான் சந்தித்த கிறித்துவ யோகி பற்றியும் குறிப்பிடுகிறார். கருணையும் அன்பும் கொண்டிருந்த சாது சுந்தர்சிங் அவர்கள் மிகச் சிறந்த ஆன்மா எனவும் அவர் பைபிளையும் பகவத்கீதையையும் ஒப்பிட்டுச் சொன்னதையும் நம்முடன் பகிர்ந்துகொள்கிறார்.

“காலையில் அளிக்கப்பட்ட ஞானம் பகவான் கிருஷ்ணருடையது; நண்பகலில் புத்தருடையதும் மாலையில் இயேசு கிறிஸ்துவுடையதும் என்பதே அன்றி இந்தப் போதனைகளில் எந்த விதமான வேறுபடும் இல்லை. கருணையின் வடிவான இயேசு, ஞானப் பழமான புத்தர் மற்றும் பூரணமான பகவான் கிருஷ்ணரும் அவரவர் வாழ்ந்த காலத்திற்கேற்ப, அதைப் பின்பற்றும் அக்களுக்குத் தேவையான போதனைகளை வழங்கினர். பல்வேறு வடிவங்களைக் கொண்டு அவசியமானபோது மானுடத்தை வழிநடத்துவதற்காகத் தோன்றும் அந்த ஒரே மெய்ப்பொருளின் பிரதிநிதியாகத் திகழ்பவர்கள்தான் இந்த மகான்கள். உலகிலுள்ள அனைத்து மதங்களின் மீதும் யோகிகள் பரம்பரை பரம்பரையாக மதிப்பும், மரியாதையும் கொண்டிருக்கிறார்கள்” என்று சுவாமி ராமா எழுதுகிறார்.

  

இந்தப் புத்தகத்தில் அவரது அனுபவங்கள், அதன் மூலம் நமக்கு அவர் சொல்லவரும் செய்தி என்னை மிகவும் வசீகரித்தது. முடிவாக சுவாமி இராமாவுக்கு அவர் சந்தித்த சக்கரவர்த்தி யோகி என்பவர் சொன்ன செய்தியுடன் இதனை முடிக்கிறேன்.

உலகிலுள்ள அனைத்துப் பொருட்களும் விஷயங்களும் பூஜ்ஜியத்தைப் போலவே. ‘ஒன்றாகிய’ மெய்ஞானத்தை உணராது போனால் மதிப்பில்லாது போய்விடும். அந்த ஒரு பரம்பொருளை நாம் கவனத்தில் வைத்துக்கொண்டால் அதன் பிறகு நம் வாழ்க்கை மேம்பட்டிருக்கும். இல்லையெனில் அது பெருஞ்சுமையாகிவிடும்”

என்னை மிகவும் வசீகரித்த இந்தப் புத்தகத்தை உங்களுக்கு நான் சிபாரிசு செய்கிறேன். வாங்கிப் படித்துப் பயனடைவீர்.

இமயத்து ஆசான்கள் – Living with The Himalayan Masters

ஆசிரியர் - சுவாமி ராமா

தமிழாக்கம் புவனா பாலு

கண்ணதாசன் பதிப்பகம்

விலை – 280 ரூ  (2015ல் நான் வாங்கியபோது.)

பின்குறிப்பு:  புத்தக மேலட்டை மற்றும் சுவாமி ராமா படங்கள் தவிர மற்றவை எனது பயணங்களில் எடுக்கப்பட்ட படங்கள்.