நேருவின் கதையை திரைப்படமாக எடுத்தால் கமல் பொருத்தமாக இருப்பாரா?

வல்லிசிம்ஹன் : 

சைனா,தெற்கு கொரியா,ஜெர்மனி என்று மீண்டு வரும்
தொற்று யாருக்கும் கண்ணில் படவில்லையா.?
இல்லை தங்களுக்கு ஒன்றும் நேராது என்ற அசட்டுத் தைரியமா.?



# தொடர்ந்து வரும் தொற்று கண்ணில் படாமல் இல்லை. ஆனாலும் லாக் டவுன் என்பது ஓரளவுக்கு மேல் போனால் விபரீதமான பொருளாதாரச் சிக்கல்களை உண்டாக்குவதுடன் சட்ட ஒழுங்கு அத்து மீறல்களுக்கும் வழி வகுக்கும். ஆகவே தான் சில நடவடிக்கைகள் அவசியமாகின்றன.

& அரசாங்கம் உயிர் பிழைத்திருக்க என்ன வழி என்று சொல்லிவிட்டார்கள். சாம, தான, பேத , தண்ட வழிகளில் அறிவுறுத்திவிட்டார்கள். இதற்கு மேலும் புரியாதவர்களுக்கு என்ன செய்ய இயலும்? 

கமலா ஹரிஹரன் : 

ராசிகளைப்பற்றி நீங்கள் என்ன நினைக்கிறீர்கள்?
பொதுவாக முகராசி, கைராசி (எல்லாமே தலைவர் படங்கள் இல்லையா.. .ஆனால் எல்லாமே நன்றாகத்தான் ஓடின. தியேட்டரை விட்டு அல்ல.. ஹா ஹா) என்றெல்லாம் பார்க்கிறோமே அது சரிதானா? இல்லை அப்படி பார்க்கிறவர்களின் மனோபாவங்கள் முறைதானா?

# முகராசி, கைராசி எல்லாம் சரி தப்பு என்று வகைப் படுத்தக் கூடாது. அடுத்தவருக்குத் தீங்கு செய்யாத எதுவும் "தப்பு" ஆக முடியாது. பார்க்கிறவர் மனோபாவம் முறை "கெட்டதும்" அல்ல. இதெல்லாம் நம்பிக்கை பாற்பட்ட விஷயம்.  அவர்களுக்கு திருப்தி தருகிறதென்றால் இருந்து விட்டுப் போகட்டுமே. நம்பிக்கைகள் பலவும் மூட நம்பிக்கை யாகவும் இருக்கக் கூடும். 

ஜாதகம், நட்சத்திரம், ராசி, பெயர்ச்சி பலன்கள் விஷயத்தில் இருவேறு எதிரெதிர் மனோபாவம் காணப்படுகிறது. கணக்குப் போட்டு துல்லியமாக (நல்லது  & அல்லாதது) பலன் சொல்வது ஒரு பக்கம். காழியூர் ஹரிகேசநல்லூர் மாதிரி "நல்வாக்கு" மட்டும் சொல்வது மறு பக்கம். நல்வாக்கு பலராலும் விரும்பிப் பார்க்கப் படுகிறது. இதுவும் திருப்தி சம்பந்தப்பட்ட ஒன்றுதான். 

நான் ராசிபலன் பக்கம் திரும்பிப் பார்ப்பதில்லை. என் ஜாதகம் அதிர்ஷ்ட ஜாதகம். அதனால்தான் நான் பார்க்கத் தேவையின்றிப் போனது என்று வாதம் செய்வோருமுண்டு.

& கைராசி படம் தலைவர் படம் அல்ல. ஜெமினிகணேசன் - சரோஜாதேவி நடித்தது. ராசி என்ற பெயரோடு வந்த எந்தப் படத்தையும் நான் பார்த்ததில்லை. அந்தப் படங்களைப் பார்க்கும் ராசி எனக்கு இல்லை போலிருக்கு! (நிற்க. கன்னிராசி, மகராசி என்ற பெயர்களில் கூட படங்கள் வந்துள்ளன.)

நெல்லைத்தமிழன் : 

சிகரெட், கஞ்சா, பீடி, குடி, குட்கா, புகையிலை என்று இவை எல்லாமே உடல் நலத்துக்குக் கேடுதான். அப்படி இருக்கிறபோது, அரசாங்கம், அந்த ஃபேக்டரிகளை, தொழிலை இழுத்து மூடாமல், மக்களைப் பார்த்து 'நீ இதைச் செய்யாதே' என்று சொல்வதில் ஏதேனும் அர்த்தம் இருக்கா?

குட்கா தயாரித்தால் மரண தண்டனை மட்டுமல்ல, குடும்பச் சொத்துகள் அனைத்தும் பற்முதல் செய்யப்படும் என்று சொன்னால் போதாதோ? எதுக்கு விளம்பரம், சினிமாக்களில் சின்ன எழுத்துகள் எல்லாம்?

குடி, குட்கா போன்றவைகளை அனுமதிக்கும் அரசு, ஏன் போதை மருந்துகள், கஞ்சா போன்றவற்றையும் அனுமதிக்கக்கூடாது? அவைகளும் தொழில்கள் இல்லையா?

# "குடி குடியைக் கெடுக்கும்"  "புகை பிடித்தல் உடல் நலத்துக்குக் கேடு"  என்றெல்லாம் சின்ன எழுத்து கார்டுகள் கையாலாகாத்தனத்தின் பலவீனமான வெளிப்பாடுகள்.  அர்த்தமற்ற போலிச் சடங்குகள். பொறுப்பைத் தட்டிக் கழிக்கும் நொண்டிச் சமாதானங்கள். 

மதுவைப் பொறுத்தவரை மீளாநிலைக்கு வந்து விட்டோம். 

மிகக் கடுமையான சட்டங்கள் மிக அதிகமான ஊழலுக்கு வகை செய்யும். மக்களே உணர்ந்து ஒதுக்காதவரை இந்த அவலங்களிலிருந்து விமோசனம் இல்லை. மதுக்கடை மூடி இருந்தால் ஷேவிங் லோஷனைக் குடிக்கும் முட்டாள்களைக் கொண்டதல்லவா நம் பாரத மணித் திருநாடு !

& புகையிலை சில சுத்திகரிப்பு செயல்முறைகளிலும் பயன்படுத்துகிறார்கள் என்று கேள்வி. சில விவசாயிகள், செடிகளில் வருகின்ற பூச்சிகளை அழிக்க, புகையிலை கலந்த நீரைத் தெளிப்பார்கள் என்றும் கேள்விப்பட்டுள்ளேன். எல்லா பொருட்களிலும் பயன்படுத்தும் விதத்தைப் பொறுத்து, நன்மையையும் உண்டு, தீமையும் உண்டு. 


பிசிபெளாபாத்துக்கு உருளை வறுவல் நல்லா இருக்குமா அல்லது வாழைக்காய் சிப்சா?

# முதல்ல பிஸி பேளா பாத் நல்லா இருக்குமா ?

& வறுவல்களை தனியே நொறுக்குவதுதான் எனக்குப் பிடிக்கும். வாழைக்காய் வறுவலைவிட, உ வ crispy என்பதால் என்னுடைய ஓட்டு உ வ வுக்கே! 

பானுமதி வெங்கடேஸ்வரன்: 

1. நேருவின் கதையை திரைப்படமாக எடுத்தால் கமலஹாசன் பொருத்தமாக இருப்பாரா? இன்னும் ஏன் நேருவின் பயோ பிக் எடுக்க வேண்டும் என்று யாருக்கும் தோன்றவில்லை? 

# கமல்ஹாசன் தன் அதி மந்திர ஸ்தாயி குரலில் பேசாத பட்சத்தில் எந்த ரோலுக்கும் பொருத்தமானவர்தான். 

நேருவின் வாழ்க்கையில் மூன்று முக்கிய அம்சங்கள். 
ஒரு இங்கிலாந்து பெரிய இடத்துப் பெண்மணியுடனான "நட்பு". இதை ரஞ்சகமாகப் படமாக்கினால் சிக்கலான வழக்கு வாய்தாக்களுக்கு வகை செய்யும். 

இரண்டு அவரது நீண்...ட நாள் சிறைவாசம். இதை சுவாரஸ்யப் படுத்துமளவுக்கு நிகழ்ச்சிகள் வெளிப்படுத்தப் படவில்லை. 

அவர் 17 ஆண்டுக்கு மேலாக எதிர்ப்பே இன்றி ஓரளவு வெற்றி கரமாக வகித்த பிரதமர் பதவி.  இதிலும் சினிமாடிக் கன்டென்ட் கம்மி. 

காங்கிரஸ் மாதிரி கட்சி, பெரும் முதலீடு செய்து படம் எடுத்தால்தான் உண்டு. மற்றபடி வேறு யாரும் ரிஸ்க் எடுப்பது துர்லபம்.

& வேடப் பொருத்தம் கொஞ்சம் இருக்கலாம். 

ஆனால், இந்தக் காலத்தில் நேருவாக வந்து, அவர் 

" தொழில்துறை முன்னேற்றங்கள் நம் பின் நின்றாலும், ஏழை விவசாயியின் பிளந்து போன ஏர்க்காலின் முனையில், கடந்துபோன நாட்களின் காயங்கள் இழந்து போன பிம்பங்களாக பரிதவித்தால், செஞ்சோற்றுக் கடன் தீரும் நாள் வருமா? " 

என்று ஒரு ட்வீட் போட்டார் என்றால், காந்தியே ஃபிரேமை உடைத்துக்கொண்டு படத்திலிருந்து இறங்கி ஓடிவிடுவார்! 

2. சமீபத்தில் படித்த புத்தகம் எது?

# ஜே கிருஷ்ணமூர்த்தி "Awakening of Intelligence" . எல்லாரும் படிக்க வேண்டிய அருமையான புத்தகம்.

& (மேற்கூறப்பட்டுள்ள "Awakening of Intelligence"  புத்தகம் PDF என்னிடம் உள்ளது. வேண்டுவோர் வாட்ஸ் ஆப் / மின்னஞ்சல் முகவரி தெரிவித்தால், அவர்களுக்கு அதை அனுப்புகிறேன்) 

நான் படித்தது Ribardo Bansi எழுதிய Pulao in Persia என்ற புத்தகத்தின் மொழிபெயர்ப்பு. 

3. சொந்தப்படம் எடுக்கும் நடிகர்கள் ஒன்றுக்கு இரண்டாய் அழகான கதாநாயகிகளை தங்களுக்கு ஜோடியாக போட்டுக்கொள்கிறார்கள். ஆனால் கதாநாயகிகளோ ஒரு சொங்கி ஹீரோவை கதாநாயகனாக்குகிறார்களே?

# பதில் அளிக்கும் தகுதி எனக்கில்லை. 

& சொந்தப்படம் எடுக்கும் நடிகர்கள், தன்னுடைய ரசிக, ரசிகைகள் + நடிகையின் ரசிகர்களை கவர்ந்து படம் பார்க்க இழுப்பதற்காக அழகான கதாநாயகிகளைப் போட்டு படம் எடுக்கிறார்கள். நடிகர்களுக்கு ரசிகமன்றங்கள் உண்டு. பெரும்பாலான நடிகைகளுக்கு அப்படி எல்லாம் மன்றங்கள் கிடையாது. 
நடிகைகள் எடுக்கும் படங்களில், அந்த நடிகைக்குத்தான் முக்கியத்துவம் கொடுக்கப்பட்டிருக்கும் என்பதால், பல முன்னணி நடிகர்கள் நடிக்க ஒப்புக்கொள்ளமாட்டார்கள். அதனால் சொங்கி நடிகர்களே சரணம் என்ற நிலை. 

4. வீரமாமுனிவருக்கு முன்பு வரை தமிழில் ஒற்றைக் கொம்பு , இரட்டை கொம்பு கிடையாது, ஒற்றெழுத்துகளில் மேலே புள்ளி வைக்கும் பழக்கம் கிடையாது. ஓலைச்சுவடிகளில் எழுதி வந்த காலத்தில், சுவடியில் புள்ளி வைத்தால் சுவடி கிழிந்து விடும் என்பதே காரணம் என்கிறார்களே, அப்படியானால் வீரமாமுனிவர் காலத்திற்கு முன்னால் தமிழில் ஆய்த எழுத்தை எப்படி எழுதியிருப்பார்கள்?  

# புள்ளி வைத்தால் பரவாயில்லை ஆனால் சுழி தான் ஓலையை பாதிக்கும்.  பழந்தமிழ் எழுத்துக்களில் ஆய்த எழுத்து மூன்று சுழிகளாக இன்றி வேறு மாதிரி இருந்திருக்கும். வேறு எழுத்துக்களின் வடிவங்கள் அப்படி எண்ண வைக்கின்றன.

5. வேலைக்கு சேர்ந்த புதிதில் ஆர்வக் கோளாறில் ஏதாவது அசட்டுத்தனம் செய்திருக்கிறீர்களா? 

 # இல்லை. 

& ஹி ஹி ! நிறைய உண்டு. இப்போ நினைவுக்கு வருவதில் ஒன்று: நான் சேர்ந்தபோது, எங்கள் தொழிற்சாலையில், எங்களுக்கு மூன்று ஆண்டுகள் பயிற்சிக்காலம். முதல் ஆறு மாதங்கள் ஒவ்வொரு பகுதிக்கும் ஒருநாள் அல்லது இரண்டுநாள் சென்று, அந்தப் பகுதியைப் பற்றி அறிந்துகொள்வது. இயந்திர சாலைப் பகுதியில், சில வேலைகளை, கண் தெரியாதவர் சிலர் செய்வார்கள். அப்படி ஒரு வேலை, புதிதாக செய்யப்பட்ட பற்சக்கரங்களில் உள்ள பற்களில் அரம் கொண்டு சுத்தப்படுத்துதல். அந்த வேலையில் ஈடுபட்டிருந்த கண் தெரியாத தொழிலாளியிடம், அவரைப் பற்றிய விவரங்கள் கேட்டறிந்தேன். சுருக்கமான பதில்கள் கொடுத்துக்கொண்டிருந்தார். மேலும் மேலும் கேள்விகள் நான் கேட்டதும், அவர், " தம்பீ - நான் வேலை செய்யும்போது பேசமாட்டேன். ஏன் என்றால், இந்த பற்சக்கரம் ஒவ்வொன்றிலும் நாற்பத்திரண்டு பற்கள். ஒவ்வொரு பற்சக்கரத்தையும், அச்சில் பொருத்தி, ஏதாவது ஒரு பல்லில் ஆரம்பித்து, நாற்பத்திரண்டு பல் எண்ணிக்கை வரும்வரை, கைகளால் அடுத்தடுத்த பல்லை உணர்ந்து , நாற்பத்திரண்டு எண்ணிக்கை வரும்வரை சுத்தம் செய்வேன். நடுவில் என் கவனம் சிதறினால், எண்ணிக்கை தவறிப்போகும். அதனால், வேலை முடித்து நான் ஓய்வு எடுக்கும்போது வந்து கேள்வி கேளுங்க" என்றார். என் ஆர்வ, அசட்டுத்தனம் அப்போதான் புரிந்தது! 

6. அரசியல் தலைவர் charismatic ஆக இருக்க வேண்டியது அவசியமா?  நம் நாட்டில்தான் இப்படிப்பட்ட நிலையா? வெளிநாடுகளிலும் உண்டா?

# Charisma இல்லாமல் தலைமைக்கு வருவது கடினம்.  எல்லா நாடுகளுக்கும் இது பொருந்தும். Charisma வெறும் முக அழகு மட்டுமல்ல.

=========================================