வெள்ளி வீடியோ : மெய் சிலிர்த்து முகம் சிவக்கும் மெல்லிடையாள் கூந்தலிலே

​​1​968 இல் தாதா மிராசி இயக்கத்தில் வெளியான படம் பூவும் பொட்டும்.  ஏ வி எம் ராஜன், நாகேஷ், முத்துராமன் பாரதி ஆகியோர் நடித்த இந்தப் படத்துக்கான பாடல்களை மருதகாசி, கண்ணதாசன், வாலி ஆகியோர் இயற்ற ஆர் கோவர்தன்  இசை அமைத்திருக்கிறார்.

தாதா மிராசி பற்றிய ஒரு சுவாரஸ்யமான தகவல் உண்டு.  இவர் கதை சொல்லும் பாணியைதான் காதலிக்க நேரமில்லை படத்தில் நாகேஷ் பாலையாவிடம் கதை சொல்ல பயன் படுத்தினாராம்.   ஸ்ரீதர் - கோபுவிடம் சிவாஜி கணேசன் அனுப்பி அவர் கதை சொன்ன பாணியைப் பார்த்து ஸ்ரீதர் சங்கடத்தில் நெளிந்தாராம்.  ஆனால் கோபு அவர்களோ அதிலிருக்கும் நகைச்சுவை பார்ட்டை எடுத்துக் கொண்டு நாகேஷுக்குச் சொல்லிக் கொடுத்து விட்டாராம்.

திரு கோபுவின் மகன் திரு காலச்சக்கரம் நரசிம்மா ஃபேஸ்புக்கில் எழுதிய தொடரில்  இதுபற்றிச் சொல்லி இருக்கிறார்.​

கண்ணதாசன் எழுதிய பாடல்.   டி எம் எஸ்- சுசீலா இனிய குரலில் அழகிய வரிகளுடனான பாடல்.

நாதஸ்வர ஓசையிலே, தேவன் வந்து பாடுகின்றான்

சேர்ந்து வரும் மேளத்திலே தேவி நடம் ஆடுகின்றாள்

கோலமிட்ட மணவறையில் குங்குமத்தின் சங்கமத்தில் 

மாலையிட்ட பூங்கழுத்தில் 

தாலிகட்டும் வேளையிலும் 

ஊரார்கள் வாழ்த்துரைக்க  

ஊர்வலத்தில் வரும்பொழுதும்

தேவன் வந்து பாடுகின்றான் 

தேவி நடமாடுகின்றாள்

மை வடித்தக் கண்ணிரண்டும் 

மண் பார்க்கும் பாவனையில் 

கை பிடித்த நாயகனின் 

கட்டழகு கண்டு வர 

மெய் சிலிர்த்து முகம் சிவக்கும் 

மெல்லிடையாள் கூந்தலிலே 

தேவி நடமாடுகின்றாள் 

தேவன் வந்து பாடுகின்றான்

கற்பில் ஒரு கண்ணகியாய், காதலுக்கு ஜானகியாய்

சிற்ப மகள் வாழ்கவென்று தேவன் வந்து பாடுகின்றான் 

பத்தினியைக் காவல் கொண்டு பார் புகழ வாழ்கவென்று 

சத்தியத்தின் மேடையிலே  தேவி நடம் ஆடுகிறாள்