ஓமிக்ரானா ? டெங்குவா? அவனா நீயி?

 இளையவனுக்கு சென்ற வாரம் திடீரென ஒரு இரவில் குளிர் தூக்கிப் போட, அதன் பின் இரண்டு மணிநேரம் கழித்து ஜுரம் தொடங்கியது. 

102, 103 என்று அனலடித்தது.  ஆஸ்தான மருத்துவரிடம் அலைபேசி அளவளாவியத்தில் 'வைரல் ஃபீவராத்தான் இருக்கும்.  ஆன்டிபயாட்டிக் இப்போ தேவையில்லை, டோலோ650  மட்டும் கொடுங்கள் பார்க்கலாம்' என்றார்.  

சரி என்று கொடுத்தால் மாத்திரை கொடுத்தால் ஜுரம் 100 க்கு கீழே இறங்குவேனா என்றது.  மறுபடியும் அலைபேசியதில் 'சாதாரண வைரல் ஜுரமா, 'ஸ்பெஷல் வைரஸ்' ஜுரமா, இல்லை டெங்குவா என்பது சற்று இடைவெளி விட்டுதான் பார்க்கவேண்டும்"

டெங்குவா...   ஆ...   ஆஸ்பத்திரி, முன்னெச்சரிக்கை கொரோனா டெஸ்ட், அட்மிஷன், பிளாடெலேட்ஸ், ரத்தம் ஏற்றுதல் என்றெல்லாம் மனம் அதனுடைய 35 எம் எம் திரையில் வேகமாகக் காட்சிகளை உருவாக்கி பீதியைக் கிளப்ப, 

'ரேஷஸ் இல்லை, உடம்பு வலியும் இல்லை என்கிறான்.." என்றேன்.

"எல்லா சிம்ப்டம்ஸும் இருக்கவேண்டும் என்று அவசியம் இல்லை ஸ்ரீராம்.." என்று கூறி, ஒரு குழம்பு வைக்கத் தேவையான அளவு புளியை என் வயிற்றில் கரைத்தவர்,  தொடர்ந்து "எதற்கும் கடையில் க்ளேவிரா மாத்திரை வாங்கி இரு வேளை ஒரு வாரம் கொடுத்து வாருங்கள் பார்க்கலாம்" என்றார்.

அவ்வப்போது 100 ற்கு கீழ் 99.8, 99.3 என்றெல்லாம் இறங்கிய வேகத்தில் மறுபடி 102, 101 என்று அனலடித்துக் கொண்டிருந்தது.  இடையில் பப்பாளி இலை வாங்கி அதையும் தண்ணீரில் கொதிக்க வைத்து வடிகட்டி இருவேளை கொடுத்தோம்.

ஒருவழியாய் இரண்டு நாட்களுக்குப் பின் ஜுரம் 98 க்கு இறங்கியது.  அப்புறம் மெல்ல நார்மல் நிலைக்கு வந்தது.

அப்போது வாட்ஸாப்பில் வந்த ஒரு செய்தியையும் வைத்து இப்படி பேஸ்புக்கில் ஒன்றைப் பகிர்ந்தேன்.

மீம்ஸ் மாதிரி ஒரு நிலைத்தகவல் பார்த்தேன்.  

'இந்தியாவில் DOLO 650 பெப்பெர்மிண்ட் மிட்டாய் போல ஆகிவிட்டது.  எல்லோரும் வாங்கி சாப்பிட்டுக் கொண்டிருக்கிறார்கள்' என்று.   

 ஆபத்தான பழக்கமும் கூட.

உண்மைதான்.  அப்படிதான் நடக்கிறது.  500 மி கி என்பதே வழக்கொழிந்து போய்விடும் போல இருக்கிறது. 

ஆனால் ஒரு சந்தேகம்..

அதென்ன யாரைக்கேட்டாலும் டோலோ 650?  

Calpol 650 அல்லது Fepanil 650, அல்லது Metacin 650 எல்லாம் வேலை செய்யாதா?  இல்லை, அது இது எல்லாம் ஒன்றுதான் என்று யாருக்கும் தெரியவில்லையா?  எல்லாம் பாராசிட்டமால்தானே?

மைக்ரோ லேப்ஸ் என்ன உசத்தி? ரேன்பாக்சியோ, க்ளாக்ஸோவோ, சிட்டாடலோ, தெமிஸ் நிறுவனமோ என்ன தாழ்த்தி?  இந்த brand பெயர் மட்டும் மக்கள் மனதில் பதிந்து போனதன் மர்மம் என்ன?!!

இப்படி ஒரு நிலைத்தகவலை பேஸ்புக்கில் பகிர்ந்திருந்தேன்.  திவாண்ணா உள்ளிட்ட இரண்டு மருத்துவர்கள், மற்றும் கேஜிஜி  உட்பட சிலர் தங்கள் கருத்துகளை பகிர்ந்திருந்தார்கள்.  எங்கள் மருத்துவரிடமும் கேட்டபோது 'எப்படியோ அது பெயர் பெற்று விட்டது.  அதனாலேயே நீங்கள் கடையில் போய்க்கேட்டால் இது எல்லாக் கடையிலும் வாங்கி வைத்திருப்பார்கள்.  மற்றவை கிடைப்பதில் சிரமம் இருக்கும்.  நானும் அதையே கேட்கிறேன்..  எல்லாம் பாராசிட்டமால்தானே, இதையே வாங்கி கொடுங்களேன்' என்றார்!

நியாயம்தான்.

இந்நிலையில் கடந்த சனி இரவு முதல் பாஸுக்கும் பெரியவனுக்கும் இதே போல பிரச்னை தொடங்கியது.  அவர்கள் இருவருக்கும் குளிர் தூக்கிப் போடாமல் ஜுரம் நேரடியாய் வந்து இறங்கியது. மருத்துவரிடம் ஆலோசித்தபோது "பின்னே?  ஒருத்தனுக்கு வீட்டுக்குள் வந்திருக்கு..  மற்றவர்களுக்கு வராமல் இருக்குமா?  மாஸ்க் போட்டுக் கொண்டு தனியாய்த்தானே இருந்தார் உங்கள் மகன்?'  என்று கேட்டார்.  

'ஆமாம்' என்றேன்.  

'அதே போலதான்.  டோலோ தோழா..'  என்றார்.  அதே போல நீங்களும் தனித்தனியாவே இயங்குங்கள்' என்றும் சொன்னார்.

'எடு டோலோ கொடு ஜோரா' என்று கொடுக்கத் தொடங்கினேன்.  இளையவன் இப்போது இருமலுடன் சுற்றிக் கொண்டிருந்தான்.

பாஸ், பெரியவன் இவர்களுக்கும் சளி, இருமல் இருந்தது.

அலுவலகத்திலா, வருடாந்திர அறிக்கை, வருமானவரி தாக்கல் என்று கடும் பணி நெருக்கடி.  இடையில் உடன் பணிபுரியும் பெண்ணின் பெண்ணுக்கு பிரசவம் என்று அவர் வேறு லீவ் லீவாகப் போட்டுக் கொண்டிருந்தார்.  பாஸுக்கு உடம்பு சரியில்லாத போய், இப்போது வீட்டுப் பொறுப்பும் சேர்ந்து கொண்ட நிலையில்......

செவ்வாய் மதியம் முதல் என் தொண்டை கீச்கீச் என்றது.  ஜுரம் கிட்ட வா என்றது.   இரவு குளிர்ஜுரம் என்னை தூக்கிப் போட்டு விளையாடியது.  தொடர்ந்து ஜுரம் தொடங்கியது!  காலை படுக்கையை விட்டு எழவே முடியவில்லை.  கடுமையான உடல்வலி.  டோலோவே கதி என்று யாரையும் கேட்காமலேயே சரணடைந்தேன்.

பாஸிடமிருந்து குட்மார்னிங் மெஸேஜோ, குட்நைட் மெஸேஜோ வரவில்லை என்றால் நான்கைந்து உறவினர்கள் என் மகன்களை உடனே தொடர்பு கொண்டு விடுவார்கள்.  ''அம்மாவுக்கு என்ன?  சரியாய்த்தானே இருக்கா?  ஏன் மெஸேஜ் இல்லை" என்று கேட்பார்கள்.  எனக்கு வியப்பாய் இருக்கும்.  பாஸின் உறவுத்தொடர்பு பற்றி நான் அறியும் நேரங்கள் அவை.

 இபப்டி எல்லாம் பேசும்போதுதான் தெரிந்தது.  கடந்த சில நாட்களாகவே சென்னையில் (மற்ற ஊர்களிலும் இருக்கலாம்)  கிட்டத்தட்ட எல்லோரும் இந்நிலையை அனுபவித்து வருகிறார்கள் என்று தெரிந்தது.  நிறைய உறவினர் வீடுகளிலும், நண்பர்கள் வீடுகளிலும் இந்நிலைதான்.  வீட்டுக்குளேயே இருப்பவர்களைக் கூட தாக்குகிறது என்பதும் ஆச்சர்யம்.  யாரையும் விட்டு வைக்காது போல..

ஓமிக்ரானா, டெங்குவா என்று உறுதிப்படுத்திக் கொள்ளவேண்டும்.  அவ்வளவுதான்.

எதற்கும் இருக்கட்டும் என்று க்ளாவிரா மற்றும் பப்பாளி இலை ட்ரீட்மென்ட்டையும் எடுத்துக் கொண்டேன்.  செவ்வாய் முழுக்க எழ முடியவில்லை.  அதே போல ஜுரம் 102, 103 என்று அலைந்து கொண்டிருந்தது.  பாஸும், பெரியவனும் எனக்கு சீனியர்கள் என்பதால் செவ்வாய்க்கிழமை அன்று அவர்கள் ஜுரத்தை 96, 97 என்று இறக்கி விட்டிருந்தார்கள்.

பொதுவாக மூன்று நாட்களுக்கும் மேல் 100 க்கு மேல் டெம்பெரேச்சர் குறையாமல் இருந்தால் மருத்துவமனையை நாடலாம், நாடவேண்டும். 

 படுத்தே இருப்பதால்தான் தலை பாரமாக இருக்கிறதோ என்று மாலை ஹாலில் சற்று அமர்ந்தேன்.  வல்லிம்மா வாட்ஸாப்பில் பேசி 'என்ன ஆச்சு, ஆளைக் காணோம்' என்று விசாரித்தார்.  

எனக்கு செவ்வாய் இரவே ஜுரம் 98 ஐக் காட்டியது.  எனினும் ஒழுகும் மூக்கும் இருமலும் படுத்துகிறது.

இன்று நேற்று  (புதன்) வந்த செய்தி இது..  (லிங்க்)

சென்னை :  தமிழகத்தில் பரவும் கொரோனா தொற்று, ஒமைக்ரான் வகையை சார்ந்ததா என்பதைகண்டறிவதற்கான, மரபணு பரிசோதனை நிறுத்தப்பட்டுள்ளது.  தினமும் பாதிக்கப்படுவோரில் 85 சதவீதம் பேருக்கு, ஒமைக்ரான் அறிகுறிகளே இருப்பதாலும், இதற்கான பரிசோதனை

முடிவுகள் வந்து சேருவதற்குள், அவர்கள் குணமடைந்து வீடு திரும்பி விடுவதாலும்,ஒமைக்ரானுக்கான மரபணு சோதனை தேவையில்லை என்ற முடிவுக்கு அரசு வந்துள்ளது.

தமிழகத்தில் 2020 டிசம்பர் 25ம் தேதி வரை, 'டெல்டா' வகை கொரோனா வைரஸ் தாக்கம் தான் இருந்தது. இதனால், தினசரி பாதிப்பும் 600 என்ற எண்ணிக்கையிலேயே நீடித்தது.

பின், நைஜீரியாவில் இருந்து வந்த நபர் மற்றும் அவருடன் பயணித்த நபர்கள், சென்னையில் பல்வேறு இடங்களில் சுற்றித் திரிந்தனர்.

தற்போது ஏற்படும் கொரோனா தொற்றில், 85 சதவீதம் பேருக்கு ஒமைக்ரான் வகை தொற்றும், 15 சதவீதம் பேருக்கு டெல்டா வகை தொற்றும் ஏற்படுகிறது.

ஒமைக்ரான் தொற்றை உறுதி செய்ய, மத்திய ஆய்வகத்திற்கு மாதிரிகள்அனுப்பப்பட்டு, மரபணு சோதனை முடிந்து, முடிவுகள் வருவதற்குள், நோயாளிகள் சிகிச்சை முடிந்து வீடு திரும்பி விடுகின்றனர். எனவே, ஒமைக்ரானை உறுதி செய்யும் மரபணு பரிசோதனையை நிறுத்தி விட்டோம்.அதேவேளையில், 'கிளஸ்டர்' எனப்படும், ஒரே பகுதியில் அதிகம் பாதிப்பு காணப்படும் இடங்களில் மட்டுமே மாதிரிகள் சேகரிக்கப்பட்டு, மரபணு பரிசோதனைக்கு அனுப்பப்படும். அப்போது தான், வேறு ஏதேனும் மாறுபட்ட தொற்று ஏற்பட்டுள்ளதா என்பதை கண்டறிய முடியும்.

முழுச் செய்தியையும் படிக்க லிங்க்கை க்ளிக் செய்யவும்.  இங்கு முக்கிய பகுதிகளை மட்டும் எடுத்துக் போட்டிருக்கிறேன்.

எனவே, இப்போது சளித்தொந்தரவு, லேசான இருமல் தவிர வேறு குறையில்லை மறைமூர்த்தி கண்ணா..

இந்தவகை ஜுரம் வருவது இயற்கையே நம்மை இம்யூன் செய்து விடுகிறது என்று ஒரு மருத்துவர் சொன்னதை எங்கோ கேட்டேன்.  ஒருவகையில் பார்க்கும்போது  அது சரிதானோ என்று தோன்றுகிறது.

==================================================================================================

காய்ச்சலால், 'பிளேட்லெட்' குறைவதை தவிர்க்க வழி கூறும், சித்த மருத்துவர் செல்வ சண்முகம், இயற்கை நல மருத்துவர் ஒய்.தீபா:

"பொதுவாகவே, நம் மண்ணில் அனைத்து வகை இலைகளுக்குமே, 'பிளேட்லெட்' அதிகப்படுத்தக் கூடிய தன்மை இருக்கிறது.

குறிப்பாக, பப்பாளி, ஆடாதோடை இலை, உடனே பிளேட்லெட்சை அதிகப்படுத்தும் சிறப்பு வாய்ந்தவை.ஒரேயொரு பப்பாளி இலையின் நரம்பை நீக்கி, அதை மிக்சியில் அடித்து சாறெடுத்து, அதனுடன் தேன் கலந்து தரலாம்.

பிளேட்லெட் குறைந்து கொண்டு வரும் சமயம் என்றால், ஒரு நாளைக்கு மூன்று முறை கூட தரலாம்.

ஆடாதோடையில் செய்த மணப்பாகு, சித்த மருத்துவக் கடைகளில் கிடைக்கிறது. 'இம்ப்காப்ஸ்' தயாரிப்பு எனில், தரமாக இருக்கும்.

அதை, 10 மில்லி அளவுக்கு மூன்று வேளை சாப்பிடலாம். கொய்யா இலையையும் ஜூசாக்கி, தேன் கலந்து குடிக்கலாம். அதுவும் பிளேட்லெட்சை அதிகரிக்கும்.

அதேபோல், செங்காய் பதத்தில் இருக்கும் கொய்யா பழம், பப்பாளி, கிவி பழத்துக்கு இந்த குணம் உண்டு. மில்க் ஷேக் போட்டு, சர்க்கரைக்கு பதிலாக வெல்லம் சேர்த்து குடிக்கலாம்.

இந்த சமயத்தில் உடலில் எனர்ஜி மிக குறைவாக இருக்கும். எனவே, காய்ந்த திராட்சை, அத்திக்காய் சாப்பிடலாம்.

தவிர, உணவில் கூட சிறுதானியங்கள் அதிகம் சேர்த்துக் கொள்ளலாம்.

செரிமானத்துக்கும், உடல் கழிவுகள் நீங்க வும், மிளகு, இஞ்சி, திப்பிலியை நன்றாக கொதித்து வைத்து, அதில் பனங்கல்கண்டு கலந்து குடிக்கலாம்.

வாந்தி வந்தாலும், இது சாப்பிட்டால் சரியாகும்.

கிருமிகளின் தாக்கத்தை கட்டுப்படுத்தி, பிளேட்லெட்சை அதிகப்படுத்த, வேப்பிலையை கொதிக்க வைத்துக் குடிப்பதும் சிறப்பு.

பொதுவாக, வாரம் ஒருமுறை வேப்பங்கொழுந்து, சிறு துண்டு விரளி மஞ்சள், மிளகு மூன்றையும் அரைத்து, நெல்லிக்காய் அளவு, வெறும் வயிற்றில் சாப்பிட்டாலே எந்த காய்ச்சலும் வராது.

தவிர, பிளேட்லெட்சை அதிகரிக்கவும், காய்ச்சலை குறைக்கவும் அனைவருக்கும் தெரிந்த விஷயம், நிலவேம்பு. இதற்கு, இரண்டு தேக்கரண்டி நிலவேம்பு பவுடரை, இரண்டு டம்ளர் தண்ணீரில் போட்டு, அது, அரை டம்ளர் அளவுக்கு சுண்டும் வரை, நன்றாக காய்ச்ச வேண்டும். இப்படி நாள் ஒன்றுக்கு, இரண்டு முறை செய்து குடிக்க வேண்டும்.

இந்த சமயத்தில், மிக மிக முக்கியமானது, தண்ணீர் நன்றாக குடிக்க வேண்டும் என்பது தான்.

தண்ணீர் போதுமான அளவில் குடித்தால் தான், மேலே சொன்ன விஷயங்கள் அனைத்தும் வேலை செய்யும். எனவே, சுத்தமான தண்ணீர் நிறைய குடியுங்கள்; இதன் மூலம் பிளேட்லெட், விரைவிலேயே அதிகரிக்கும்.

தினமலரிலிருந்து...

===================================================================================

பேஸ்புக் பகிர்வு ஒன்று.  

எளிமை என்று நாம் நினைப்பதெல்லாம் எளிமை அல்ல..   காந்திஜியின் ஆட்டுப்பால் எளிமை ரொம்ப ஃபேமஸ்!  

கேஜரிவால் பதவிக்கு வந்தப்ப புதிதில் அவருக்கு டெல்லியில் சின்ன வீடு ஒன்று தேடுகிறார்கள் என்று செய்தியைப் படித்து கிண்டலாக ஒரு பகிர்வு போட்டிருந்தேன்.  அதைப் படித்து KGJ போட்ட சுவாரஸ்யமான பேஸ்புக் பகிர்வு!

============================================================================================================

ஜீவி ஸார் சென்ற வருடம் எழுத்தாளர் வையவன் தன்னிடம் பேசியதாக சொல்லி இருந்தார்.

============================================================================================================

இந்தப் புத்தகத்தை இணையத்தில் தேடிப் பார்த்தேன்.  கிடைக்கவில்லை.

வ.ரா.,வின் அறுபதாவது வயது நிறைவை முன்னிட்டு, ஒரு விழா நடத்த வேண்டுமென்று தீர்மானித்து, அதற்கான ஆலோசனைக் கூட்டம் நடந்தது. அன்று பேசிய நண்பர்கள் எல்லாரும், வ.ரா.,வை பாராட்டி, அவரது குணாதிசயங்களைப் சிலாகித்தனர். மணிவிழாவை சிறப்பாக நடத்தி, அவருக்கு பணமுடிப்பு ஒன்று அளிக்க வேண்டும் என்று கூறினர்.

ஒரு பிரபல எழுத்தாளர், 'இந்த வயதான காலத்தில், வ.ரா.வைத் தரித்திரம் பிடிக்கும்படி விடலாமா, அன்ன, வஸ்திரத்துக்கு அவரைக் கஷ்டப்பட விடலாமா...' என்று உணர்ச்சியுடன் பேசினார்.

கூட்டம் முடிந்த அரை மணி நேரத்துக்கு பின், வ.ரா.,வின் வீட்டுக்குப் போனேன். வ.ரா., உற்சாகமாக இருப்பார் என்று எண்ணினேன். அதற்கு மாறாக, சத்தம் போட்டுக் கொண்டிருந்தார். எனக்கு முன்னாலேயே, ஒருவர் சென்று, ஆலோசனைக் கூட்டத்தில் நடந்ததை சொல்லி விட்டார்.

வ.ரா.,வின் வறுமையைப் பற்றி குறிப்பிட்டது, அவருக்குப் பிடிக்கவில்லை. ஆகையால், சத்தம் போட்டுக் கொண்டிருந்தார்.

என்னைக் கண்டதும், 'ஏங்காணும், நான் தரித்திரன் என்பதற்காகவே, எனக்கு பணமுடிப்பு அளிக்கப் போகிறீர்களா... நான் ஒன்றும் தரித்திரன் இல்லை. இந்த உலகத்து செல்வம் எல்லாம், என்னுடையதாயிற்றே! என்னுடைய ஏழ்மைக்காக, பணம் கொடுப்பதாக இருந்தால், என்னை விட, எத்தனையோ ஏழைகள் இருக்கின்றனர். அவர்களுக்கு கொடுங்கள். நான் எழுத்தாளன். என் தமிழ் தொண்டுக்காக, பணமுடிப்பு கொடுப்பதாயிருந்தால், கொடுங்கள். இல்லாவிடின் வேண்டாம்...' என்று சீறினார் வ.ரா.,

—கல்கி எழுதிய, 'யார் இந்த மனிதர்கள்...'என்ற நூலிலிருந்து...

தினமலர் வாரமலர் -திண்ணை-

==========================================================================================

கவிதை என்கிற மடக்கிப்போடும் வரிகள் இல்லாமலேயே பதிவுகள் போவதில் கமலா அக்கா, பானு அக்கா, கீதா ரெங்கன் எல்லாம் கவலைப் பட்டிருந்தார்கள்!

இந்த உடல்நிலை சரியில்லாத சிரமமான நேரத்திலும் அவர்கள் கவலையைப் போக்குவது என் கடமையானது!

பேஸ்புக்கில் 'ரெற்றோ கவிதைகள்' என்கிற வினோத பக்கம் ஒன்று இருக்கிறது. கேஜிஜி என்னை அதில் சேர்த்து விட்டிருந்தார். அவரும் அங்கே அவ்வப்போது எழுதி வருகிறார். நான் அந்த தளத்தில் போட்ட கவிதை (மாதிரி) ஒன்று! கேஜிஜி(மட்டும்) யின் 'லைக்'கோடு 'அமோக வரவேற்பை'ப் பெற்றது "கவிதை"!!!

பற்றேதுமில்லாமல் வந்தேன் - வந்த 

சற்றைக்கெல்லாம் குழுமத்தில் இணைக்கப் 

பெற்றேன்.. கவனித்துப்பார்க்கையில்

மற்றோரெல்லாம் எழுதும்போது நாம் மட்டும் 

ஒற்றையாய் நிற்கிறோமே - இப்படி மனதில்

சுற்றிய எண்ணங்களை விடு !

ரெற்றோ கவிதைகள் என்றால் 

கற்றோருக்கெல்லாம் புரிகிறது

 சற்றும் உனக்குப் புரியவில்லை என்றால் 

விட்டுர்றா என்கிறது மனம்! 

================================================================================================

பட், உங்க அந்த நேர்மையும் முன்யோசனையும் எனக்குப் பிடிச்சிருக்கு!

அது சரி, இப்படி இன்னும் என்னென்ன பொங்கல் எல்லாம் கொண்டாடலாம்?!

இதை என்னன்னு சொல்வீங்க...!

மதன்னு சொன்னா ஜோக் மட்டும்தானா? அவர் கார்ட்டூன் போடலாமே.. இதுவும் ஜோ(ஷோ)க்காதான் கீது!